Génesis 32
32
Jakobi ka Esau exép'erantasïnti
1Jakobi imeri xanharini chunkumaspti, ka xanhari jimpoksï Diósïri anjelichaksï kúmani niraspti. 2Ka Jakobi enka exeapka uantaspti: Íksï Diósïri p'urhek'utisti ka jima Maanaimi jakankurhitaspti.
3Jakobi uantakua párichani urhepani axaaspti eskaksï Esauni arhipirinka: Chéti erachi Jakobi junkuaxati marhuacheni, Labani jinkuni jarhaspti irekani, 4uákasïchani, ch'anchakichani ka karichichani uánekua káasïnka, jántspiri tataka ka nanakechani, mintsikaxati eskari sési erontaaka. 5Uantakua párichaksï k'uanhatsentaspti ka uantasptiksï: Esau chéti eracheni niraskachi exeni ka imakini jurhaxati kúmani. Ka ma irepeta tatachichani jinkuni jurhaxati.
6Enka Jakobi kurhaapka kánekua chéspti.
Ka k'uiripuni arhukuaaspti, ka karichichani, uákasïchani, kameiuechani, tsimoru arhukuaspti.
7Ka uantaspti: Enka Esau jurhani jakarini kúmani atani, ma arhutakata uát'i sïpakorheni. 8Ka ménteru uantaspti: ACHA, jucheti táte Abraamiri Diósï, jucheti táte Isaakiri Diósï, t'úrini arhiska: K'uanhatsentsï chénio, chéti márkuechani jinkuni, jikini kuách'akuaka. 9Ka Jakobi uantamukorhespti: Oh, jucheti táte Abrahamiri Diósï ka jucheti táte Iskakiri Diósï, ACHA enkarini arhika: Chéti echerirhu níntsï, jikini kuách'akuaka 10¡Kómu arhixakakini eskarini kuách'akuaka eskari Esau jucheti erachi no ataaka! Kánekua chéxaka eska juaka ka jucheti tempechani ka uáp'echani ataani uantikuani. 11T'úrini arhiska: Jíkini kuách'akuaka ka chéti sïrukua xáni káneraaka eska k'éri japuntarhu anapu uanamukutini ch'eri, enka no jamperi únhaaka miiunhani. 12Ima chúrekua jima k'uispti, ka ampe enka jimak'u ísï jatsipka imani Esau erachi jempani arhutakuspti.
13Témpeni ekuatse karichi kutsïtichani, ma ekuatse karichi tatakechani, témpeni ekuatse karichi enka kánekua xurhata jukaka, ka ma ekuatse karichi enka sïuankua uantsïrhuka. 14Ma ekuatse ka témpeni kameiuechani uáp'echani jinkuni, tsimani ekuatse uákasïchani, témpeni uákasï sapirhatichani, ma ekuatse ch'ánchanki kutsïtichani, ka témpeni ch'ánchakichani. 15Jántspirichani táchani íntsaasti ma ekuatse ka témpeni (30) kameiuechani, p'itarhekatechani jinkuni, tsimani ekuatse uákasïchani, témpeni uákasï tsíueratichani, ma ekuatse ch'anchaki kutsïchani, ka tempeni ch'anchakichani. 16Imani uantari párini enka urhetku axapka arhispti: Enkakini jucheti erachi kúmaaka ka kurhamarhenkini ¿Né chéti ánchetpiriski? Ka ¿Naniri niraxampki?
¿Nénti íntskuaka íni manakorherichani enkari arhich'ukuani jaka?
17Arhiakari: Intsïmpera maesti enkakini chéti jántspiri Jakobi axacheka, tata Esau exe ima tátsepuxati.
18Uantakua párini enka tsimantarhu, tanintarhu, ka enka xáni axapka mák'ueni arhiaspti enkaksï manakorherichani arhich'ukuani jápka: Iámentu mák'uentsï arhiaka Esauni enkats'ï kúmaaka.
19Arhiakats'ï: Jakobi chéti jántspiri tátsepuxati. Ima eratsespti ka uantani:
20Nantika tsírapenhentaaka íntsïmperata exerini enkani axakuni jaka, tátsekua erateaka nantikarini púachentaaka.
21Ima chúrekua jauaraspti, ka tsimani uarhitichani ka tsimani jántspirichani ka tempeni ma sapichani jauataaspti ka vado iurhekua parhimetaaspti.
Jakobi, ánjeli ma jinkuni kámperaspti
22Jauataspti ka iurhekuarhu parhimetaaspti jatsikorhekua ampe jinkuni enka xáni kánkorhempka. 23Enka Jakobi jantiok'u pakarapka, ka erantskutaspti tatachi ma jinkuni uarhipeni. 24Jakobi jantiok'u pakaraspti, ka erantskutaspti uarhiperani nema jinkuni. 25Tatachi arhispti: Jurak'urini níntani jimpoka jurhiata antaraxakaia. Ka Jakobi arhispti: Nókini jurak'uaka enkarini no úch'akuraska. 26Tatachi arhispti:
¿Nári jakankurhisïnki?
Ka ima arhispti: Jakobi.
27Tatachi arhispti:
Iásï uératini nóteruri Jakobi jakankurhiaka, iásï uératini Israeli jakankurhiaka, jimpokari Diósïni ka tatachichani úska uérakuni ka antani.
28Jakobi kurhamarhespti: ¿Nári jakankurhisïnki? Ka ima mókukuspti:
¿Antirisï uék'i míteni ji na arhinhasïnki? Ka jima úch'akuraspti.
29Jakobi jima Penieli Jakankurhitaspti ka uantaspti:
Diósï jinkuni erateparini uantaxeska ka no uarhiska.
30Jurhiata antaraxapti enka ima Penueli parhiakuni jápka, rénketskapaxapti.
31Iásï jamperi Israeli anapuechaksï no arhasïnti k'uanhapekua tsikat'akuarhu anapu enka k'urhupka, jimpokaksï Jakobini jima ataspka. 32
Currently Selected:
Génesis 32: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
