Génesis 13
13
Abrami ka Lóti jarharhperasptiksï
1Abrami, Ejiptu uératini Neguebi niraspti imeri tempa jinkuni, ka iámu ampe pát'aspti, ka Lóti imat'u imechani jinkuni niraspti. 2Abrami kánekua ampe jatsikorhespti, uánekua manakorherichani ka kánekua tiámu tiripiti ka mereari. 3Néguebi uératini sánhani arhispti niántani Beteli jima enka ma xanhari jápkia irekani. 4Jima, Abrami tiósta ma úspti ka jima kómu arhisïrempti ACHAni.
5Lóti enka Abrami jinkuni nípka imat'u karichichani ka uákasïchani kánkorheasïremti. 6Uitsakua no antakusïrempti enkaksï manakorhericha akuatempka tsimarheniri, jimpokaksï uánhachani kankorheasïrempka, 7Uákasï erankuticha Abramiri ka Lótiri uarhiperasïremptiksï. Jima echerirhuksï irekaxapti Kananicha ka Fereseucha. 8Abrami arhispti Lótini: Juchachi no jatsiska anti uarhiperani jarhani, juchari uákasï erankutichat'uksï no jatsisti anti urhiperani jarhani, jimpokachi eracheska. 9Xáni káni echeri jaki anti, enkari uitsakua jukaka, jarharherini. Enkari t'irek'antani niraska, ji uikixukantani niuaka, enkari uikixukantani niraska, ji t'irek'antani niuaka.
10Lóti pákua Jordani erap'aspti, jimesï iurhekua nirasïrempti, eska ACHAeri p'ukumentu. Ejiptu anapueni jáxespti echeri enka Soari ísï jápka, enka nótki k'amantskempka Sodomani ka Gomorra. 11Lóti, Jordani pákua erakuspti ka jurhiata antarakuarhu ísï niraspti. Ka isïksï jarharhperaspti. 12Abrami, Kanaa pakaraspti irekani, ka Loti, Sodoma niraspti irekani. 13Sodoma anapu k'uiripuechaksï kánekua no amparhaspti ka kánekuaksï k'amanharintasïrempti ACHAni.
14Enka na Lóti jarharhepkia Abramini, ACHA arhispti Abramini: Jimini uératini, eraa karhamani ísï, kétsemani ísï, jurhiata antarakuarhu ísï ka jurhiata inchakuarhu ísï. 15Enkari xáni antak'orhek'a exeni, chétiuati ka chéti sïrukueriuati echeri. 16Uák'a eskaksï kánekua uáneaka chéti sïrukuecha eskaksï xáni uáneaka eska t'upuri. Enka nema úska miiuni t'upurini ístu uát'i miiuni chéti sïrukuani. 17Jauara ka uanakurhani echerirhu jimpoka chétiuaka.
18Abrami xerentaspti kuakuani, ka Mamré enka urhikuecha jukaka niraspti irekani jima enka Jebronika ka ACHAni jima úkuspti tiósta ma.
Currently Selected:
Génesis 13: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
