Génesis 12
12
Diósï uantap'asïnti Abramini
1ACHA arhispti Abramini: Uéaku chéti iretarhu, kéntikukua chéti márkuechani, kéntiku chéti táteo ka ni jima echerirhu enkakini exeraaka. 2Chéti sïrukuani jinkuni, k'éri ma ireta uaxastaaka ka úch'akurakakini; kánekuakini mítetarkorheaka ka t'út'uri mák'ueni intsïmpentaaka inteni kóntperata. 3Úch'akuraaka imani enkakini sési kámaaka, ka imani enkakini nósesi kámaaka ikimchaaka.
4Abrami niraspti jima enka ACHA arhipka ka Lóti ima jinkuni niraspti. Abrami tanimu ekuatse ka témpeni iúmu (75) uéxurhini jatirispti enka Jarani isï uéakupka. 5Abrami pát'aspti Saraini enka témpepka ka Lóti enka erachi jémperi uáp'epka, ka iámentu jatsikorhekua ampe ka jántspirichani enka xani Jaráni piáapka, Kanaa nirasptiksï ka jimaksï niáraspti. 6Abrami parhiakuspti ima echerichani ka Sikemi niáraspti, urhikuarhu jamperi enka More ireta jaka. Imani jurhiatekua isï, Kanani anapuechaksï jima irekaspti. 7ACHA jima xarhakuspti Abramini ka arhispti: Chéti sïrukuani íntskuaka íni echerini. Ka Abrami, ACHAni kéts'ïtakua ma úkuspti jima enka xarhakupka.
8Jima uératini Beteli ireta juátarhu mótsespti, jurhiata inchats'ïkuarhu isï, ka teruk'ani pakaraspti irekani enka Beteli ka Ai ireta jaka, jima úntaspti imeri kuákua. Beteli, jurhiata antarakuarhu pakarasti. Ka jima úkuspti kéts'ïtakua ACHAni ka jima k'éri ampe arhispti. 9Jima uératini Abrami, sánhani arhispti Néguebi mótsepani.
Enka Abrami Ejiptu jápka
10Jimesï k'arhintekua jarhaspti ka Abrami Ejiptu kétsemaspti ka jima irekaspti, jimpoka jima enka jápka no jarhaspka ampe t'ireni. 11Enkaksï inchaakuni jamani jápkia Ejiptu, arhispti Sarai imeri témpani: Míteska eskari kánekua sési jáxeska, 12enkats'ïni Ejiptu anapuecha exeaka, uantaatiksï interi témpa kánekua sési jáxesti ka jíntenits'ïni ataati uántikuni ka t'únkeniksïni no ataati. 13Ísï jimpori arhiauaka eskani ji chéti eracheska, ka t'úrini uarhikuarhu p'ímutantaaka.
14Ka ísï úkorhespti enkaksï inchaakuni jámempkia Ejiptu, jima anapuechaksï exespti eska témpa kánekua sési jáxespka. 15Juramutiri jántspiricha, imát'uksï exespti eska kánekua sési jaxespka ka irechekuarhuksï páaspti.
16Témpani jimpo, Abrami sési kánhaspti, karichi, ch'anchaki, uákasï, jántspirichani, ch'anchaki kutsïchani ka kameiuechani intsïnhaaspti. 17K'óru ACHA nósesi úkuspti irechani ka ikimespti ka k'umanchekuarhu kánekua nósesi jántskaraspti, Sarai jimpo enka Abramiri témpepka. 18Tátsekua irecha uantap'aspti Abramini ka arhispti: ¿Amperini úcheski? ¿Antirisï nósesi uantantapi eska inte chéti témpeska? 19T'úri uantaska: Jucheti pirenchisti, ji úpirinka jucheti témpa úni, ixu jarhasti chéti uarhiti, pántsï ka ni níntani. 20Irecha juramuspti eskaksï tsînkuntapirinka Abramini témpa jinkuni, ka jatsikorhekua ampe jinkuni.
Currently Selected:
Génesis 12: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
