Éxodo 8

1Tátsekua ACHA, Moisesini arhispti: Ni irechani exeni ka arhi: Eskani ji ACHA uantaska: Jurak'u nirani jucheti iretani, eskarini kómu arhiaka.

2Ekari no jurak'uaska nirani, jíkini uánekua kókicha axacheaka ka imaksïni chéti iretarhu iámentu ampe ampetarhecheati, 3Iurhekua Nilurhu jimaksï kókichaksï uánekua uémeati, ka chéti jántspirichani ka chénio iámuksï inchaati, chéti ják'orhekuarhu jamperi, jima jamperi enkari jarina tsïkataak'a. 4¡Kókichaksïni karhaparhakuati ka chéti iretantu karhaparhakuauati ka ístu chéti jántspirichani!

5ACHA arhispti Moisesini: Arhi Aaronini eska tantsiraaka pirimi jimpo jimesï enka iurhekuecha jaka ka jimesï enka itsï jataka ka eska uák'a eskaksï kókicha karhamaaka Ejiptu ísï.

6Ka ísï úspi, Aaroni ióxurhantaspti ka tantsiraspti jimesï enka Ejiptu itsï jatapka, ka karhamasptiksï kókicha ka uiniakurhasptiksï Ejiptu. 7K'óru tantochpirichatuksï mák'ueni úspti, imat'uksï úspti eskaksï kókicha Ejiptu niarapirinka. 8Tátsekua faraoni uantap'aspti Moisesini ka Aaronini ka arhiaspti: Kómu arhije ACHAni eskats'ïni kéntitacheaka kókichani jucheti iretarhu. Enka ísï úska, ji jurak'uaka nirani chéti iretani eskaksï kéts'ïtakuaka ACHAni.

9Ka Moisesi arhispti faraonini: Arhirini na jatiniri uékasïnki enkani kómu arhiaka ACHANI t'únheni jimpo, ka chéti jántspirichani jimpo ka chéti iretani jimpo, eskaksï kókicha kéntikucheaka, ka eskaksï iurhekuarhuk'u pakaraaka.

10Faraoni arhispti: Pauani. Ka Moisesi arhispti: Ísï uák'a eskari na uantarini jaka, ka míteaka eska no jarhaska máteru diósï eska ACHA juchari Diósï.

11Kókichaksïni kéntikucheati chéti k'umanchekuarhu ka chéti jántspiricheri k'umanchekuarhu ka chéti iretarhu, iurhekuarhukuksïsï pakaraati.

12Enkaksï na uéntapkia Moisesi ka Aaroni faraoni jinkuni, Moisesi kómu arhispti ACHAni eska kéntitapirinka kókichani enka faraonini axakupka. 13ACHA kurhach'aspti Moisesini, ka kókichaksï uarhispti enkaksï k'umanchekuarhu ísï jamani jápka ka jimesï enka jarina tsïkatanhak'a ka juátarhu ísï. 14Tánantasptiksï ka márkuksï úaspti ka iámu k'éri ireta ikichakueni jákuntixapti. 15Ka ísï eska ACHA na uantapka, irecha jiretantaspti sáni ka ménteru sóntku no jiaretaaspti nirani.

Sïpimuechaksï uiniakurhaati

16Tátsekua ACHA, Moisesini arhispti: Aaronini arhi eska t'upurini k'uikintskaraaka eska t'upuri Ejiptu anapu ampusï úkorhentaaka.

17Imaksï ísï úspti, Aaroni k'uikintskaraspti echerini ka echeri ampusï úkorhentaspti iámu Ejiptu, ka ístu k'uiripu ka manakorhericha ampusï jukasptiksï. 18Tántochpirichat'uksï mák'ueni úspti, imat'uksï t'upurini ampusï úntaspti. 19Tátsekua tántochpirichaksï arhispti faraonini: I Diósïri ják'i jimpo ísï úkatesti. Faraoni sánteru chúperaspti mintsitani ísï eska na uantarini japka ACHA, ka no kurhach'aspti tantochpirichani.

Tintini jarhatichaksï uiniakurhaspti

20ACHA arhispti Moisesini: Pauani xarhentkuri jauaraaka ka niuakari faraoi exeni ima jántu enka ima kétsemuaka iurhekuarhu niárani, ka jimari arhik'a eskani ji ACHA arhixaka: Jurak'u eska niuaka jucheti ireta marhuachentini.

21Enkari no jurak'uska nirani, jíkini t'únkeni ka chéti jántspirichani axachea iámentu járhati t'intichani. Iámentu k'umanchakuachaksï Ejiptu iuniati t'inticha ka ístu jima jamperi enkaksï Ejiptu anapuecha jauaka. 22Imani jurhiatekua kuachakuaka Goseni enka jucheti ireta irekaka ka jima no ma t'inti jámaati ka ísï mítenhaati eskani ji jima jarhaska. 23Jima xarharaati nakisï chéti iretee ka nákisï jucheti iretee. Pauani úkorheati ísï.

24Ka ísï úspti ACHA, ka mámaru járhaticha t'intichaksï niáraspti faraonio ka imeri jántspiri jémpo ka iámu Ejiptuksï uiniakuraspti. Ejiptu iámu nósesi úkorhesti t'inticha jimpo.

25Tátsekua faraoni ióarhispti Moisesini ka Aaronini, ka arhiaspti: Nije ka aiáku je Diósïni kéts'ïtakua ma ixu Íni k'éri iretarhu.

26Moisesi arhispti: No sési jarhasti eskachi ísï uák'a, jimpokani na enkani jucha kéts'ïtakuaka ACHA juchari Diósïni, Ejiptu anapuechaksï no sési exeati. Ka enkaksï ima no sési exeska na enkani jucha kéts'ïtapirinka, imats'ïni tsakapu jimpo atapirinti.

27K'uanisïnti enkani jucha niuaka jima enka no nema irekaka ka enka kánekua k'arhinteka enka tanimu jurhiatekua xanharakueka ka eskachi jima kéts'ïtakuaka ACHAni juchari Diósïni, ísï eskats'ïni ima na arhika.

28Faraoni arhispti: Jíksïni jurak'uaka eskats'ï niuaka jima enka kánekua k'arhinteka ka eskats'ï jima kéts'ïtakuaka ACHAni chári Diósïni, ka ísïts'ï no sánteru iauani niuaka.

29Ka Moisesi arhispti: Ji ixu uéntatini, kómu arhiaka ACHAni eskaksïni pauani iámentu t'inticha kéntikukuaka faraonini, ka imeri jántspirichani ka iretarhu. K'óruri t'u jatsiska nóteruts'ïni ísku ísï arhini jarhania ka eskats'ïni jurak'uaka iretani nirani ACHANI kéts'ïtakuni.

30Moisesi uéntaspti jima enka faraoni japka, ka kómu arhispti ACHAni. 31Ka ACHA ísï úspti eska Moisesi na kurhakupka, k'entitakuaspti iámentu járhati t'intichani, ístu k'entitakuaspti t'intichani faraoniri jántspiri jempechani ka iretarhu. 32Ka ménteru faraoni chúperaspti mintsitani ka no jurak'uaspti iretani nirani.

Currently Selected:

Éxodo 8: BI-PURHE

Highlight

Copy