Éxodo 7
7
1CHA Moisesini arhispti: Xe, t'úri irecha jinkuni ísïuaka eska ji, ka Aaroni chéti erachi chéti uantariuati.
2T'úri irechani aiakuaka iámentu ampe enkakini ji juramucheaka aiankuni, ka chéti erachi Aaroni arhiati eska jurak'uaka nirani Israeli uáp'echani, eska jiaretauaka uékuni iretarhu. 3Ji mintsita chuperakuaka irechani, ka Ejiptu uánekua míntechani xarhataaka. 4Irecha ísku kurhauati, ka ji jucheti uinhapekua Ejiptuni xarhataaka ka no sési ampe úkuauaka, ka jucheti ireta Israeli anapuechani petauaka jima uératini. 5Ka enkani ji jucheti uinhapekua Ejiptu xarhataaka, ka Israeli uáp'echani Ejiptu p'ímutantaani, imaksï jiáni míteati eskani jísïni ACHAeka.
6Moisesi ka Aaroni ísïksï úspti eska ACHA na arhiapka. 7Enka irechani uantaxekupka, Moisesi t'amu ekuatse (80) uéxurhini jatirixapkti ka Aaroni t'amu ekuatse ka tanimu (83) uéxurhini jatirispti.
Aroniri pirimu.
8ACHA, Moisesi ka Aaronini arhiaspti:
9Enkaksïni arhiska irecha, eskats'ï xarhataaka o úaka ampe ma enka ima jakak'uaka eska ísïska, t'úri Aaronini arhiaka eska irechani pirimu k'uanintutaaka, ka ima pirimu akuitse úkorhentaati.
10Tátsekua Moisesi ka Aaroni irechani niraspti uantaxekuni ka ísïksï úspti eska ACHA na juramukuapka: Aaroni irechani ka imeri jántspiricha pirimuni k'uanintutaspti ka ima pirimu akuitse úkorhentaspti. 11Irecha uantap'aspti máru k'uiripuechani Ejiptu anapuechani enkaksï úemka ampe ma úni, xerkorheparini ka imaksï mák'ueni úspti: 12Mántani arhiniksï pirimu k'uanitskaspti ka imaksï akuitse úkorhentaspti, Aaroniri pirimu iámentu imecheri pirimuechani auantaaspti. 13Ka ísï úspti eska ACHA na arhiapka, irecha mintsita chúperaspti ka no jurak'uaspti, ísï kurhach'aaspti.
Itsï iurhiri úkorhentaaspti
14ACHA Moisesini arhispti: Irecheri mintsita chuperixati ka jiáretaati nirani Israeli anapuechani.
15Ísï jimpo ni irecha jinkuni uantaxeni, ima jántu xarhentku enka ima iurhekuarhu ísï nirak'a xanharani. Pát'a pirimu enka akuitse úkorhentapka, 16antarheraakari ka arhiakari: ACHA, Israeli anapuecheri Diósïrini axasti eskakini arhiaka: Jurak'u jucheti iretani nirani jima enka k'arhinteka, eskarini marhuacheaka, iásï jamperiri ísï kurhaaska. 17Ísï jimpo ACHA uantasti: Íasïri míteaka eskani ji ACHAeska. Íni pirimuni jimpo iurhekuarhu k'uikimaaka ka iurhekua iurhiri úmeaati. 18Kuruchecha iámu uarhimeati ka sïpeameati ka Ejiptu anapuechaksï ikichaati itsïmani.
19ACHA, Moisesini arhispti:
Aaroni arhiaka eska pirimu jimpo iámu Ejiptu anapuni itsïni t'antsiraaka, iurhekuechani, ka iámpuru ísï enka xáni itsï jataaka, ima iápuru ísï iurhiri úkorhentaati, ka iápuru ísï Ejiptu iurhiri úkorhentaati chékakuarhu ka tsapaku ítsï jatakuarhu ísï.
20Moisesi ka Aaroni ísïksï úspti eska ACHA na juramukuapka. Aaroni pirimuni jimpo t'antsiraspti iápuru ísï enka itsï jatapka, irecha jima jarhaspti ka imeri jántspiricha, k'uikimaspti iurhekuarhu, ¡Ka iámentu iurhekuechaksï iurhiri úkorhentaspti! 21Kuruchechaksï iámu uarhimespti ka iurhiri úkorhespti, Ejiptu anapuechaksï no úsïrempti itsïmani, iápuru ísï Ejiptu iurhiri jarhaspti.
22Ejiptu anapu xerkorheticha, mák'ueni úspti, ka irecheri mintsita sánteru chupespti, ísï eska ACHA na uantapka, ménteru irecha ísku kurhaaspti. 23Irecha nintaspti, ka imani ampe ísï exespti. 24Ejiptu anapuechaksï jirinhakuntaspti, ka iurhekuarhu uanamukutiniksï jarhakuspti ka jima jatasïrempti ampanhari itsï, jimpokaksï no úsïrempka iurhekuarhu anapu itsïmani.
K'uanasïchaksï iámu ampe ampentarhespti
25Iúmu tsimani jurhiatekua tátsekua enka na xáni ampe úkorhepkia, enka ACHA iurhekuani iurhi úmapka.
Currently Selected:
Éxodo 7: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
