Éxodo 6
6
1ACHA, Moisesini arhispti:
Iásïri exeaka ampe enkani irechani úkuaka, sési jasï jimpo no uékasti iásï jucheti uinhapekua jimpo uékaati, ima jámperiksïn axaati.
Diósï, Moisesini uántap'atasti
2Diósï, Moisesini ménteru uataxekuspti ka arhispti: Ji ACHAeska.
3Ka Abraamini, Isaakini ka Jakobini xarhakuaspka eska Diósï enka iámu uinhapiti, ka nóksï mítesti jucheti jakankurhikua ACHA. 4Imechani jinkuni pakatperakua ma úska, ka uantakorheska eskani Kanaa echeri íntsaapirinka, ima enkaksï ísï irekani jaka eska ják'orhericha. 5Iásï enkani míteka enkaksï Israeli anapuecha kómu irekaxaka, eskaksï Ejiptu anapuecha no sési káasïnka ánchetaani, imani pakatperata miántaska. 6Isï jimpo arhia Israeli uáp'echani: Ji ACHAeska. Ka jíksïni Ejiptu p'imutantaka jima enkats'ï xáni no sési kanhak'a ánchetanhani. Jíksïni p'ímutantaaka jima enkats'ï jupikata jaka. Jucheti uinhapekua jimpoksïni p'ímutantaaka ka imechani enkaksïni ísï kámka ikimeuaka. 7Jíksïni p'ikukorhentaaka ka cháts'ï jucheti ireteuaka, ka ji chári Diósïuaka; ka cháts'ï míteaka eskani ji ACHAeska chári Diósï, enkaksïni Ejiptu p'imutantaka jima enkats'ï xáni no sési kanhempka ánchetanhani. 8Ka jimaksïni páaka enkani Abraamini, Isaakini ka Jakobini aiakupka. Ima cháriuati. Ji ACHAeska.
9Moisesi, Israeli uáp'echani aiankuantaspti ampe enka ACHA arhipka, imaksï ísku kurhaaspti, jimpokaksï mintsita uantikutini kamaxapka, imani jimpo enkaksï xáni no sési kánhempka ánchetanhani. 10ACHA, Moisesini jinkuni uantaxesti ka arhispti:
11Ni irecha Ejiptu anapu jinkuni uantaxeni. Ka arhi eska Israeli uáp'echani jurakuauka uekuani imeri k'éri iretarhu.
12Moisesi, ACHAni arhispti:
Eskari na mítekia, Israeli uáp'echa nóts'ini kurhach'asti, nénari irecha kurhach'aa ka ístuni no úsïnka sési uantani.
13ACHA, Moisesi ka Aaronini uantaxekuaspti ka uantakua axakuaaspti Israeli uáp'echani ka Ejiptu anapu irechani: Eska juramukuaxapka eskaksï jiáretapirinka Israeli uáp'echani Ejiptu uéakuni.
Aaroni ka Moisesiri sïrukua
14Íksï jintespti iónti anapu urhets'ïkuricha k'umanchekuarhu anapuecha: Rubenu, Israeli uáp'a enka urhetipka, interi márkuechaksï:
Janoki, Falu, Jesroni ka Karmispti.
15Simeoni uáp'echaksï ka márkuechaksï: Jemueli, Jamini, Óadi, Jakini, Sójari ka Saulispti enka nánte jempa Kanani anapuepka.
16Lebi kuímu ekuatse ka tempeni iúmu tsimani uéxurhini irekaspti, ka íksï jintespti Lebi uáp'echa: Guersoni, Koati ka Merari. 17Íksï jintespti Guersoni uáp'ehca, Libni ka Simei ka imeri márkuecha. 18Íksï jintesti Koati uáp'echa Amirani, Isari, Jebroni, ka Usieli. Koati k'uimu tsimani ekuatse ka témpeni tanimu uéxurhini irekaspti. 19Íksï jintespti Merari uáp'echa, Mali ka Musi, ísksï jintesti Lebiri márkuecha ka sïrukuecha.
20Amirani, Jokabedini tempa úspti, ka Aaroni ka Moisesini kámaspti, Amirani kuimu ekuatse ka tempeni iúmu tanimu uéxurhini irekaspti.
21Íksï jintespti Isari uáp'echa: Kore ka Nefegi ka Sicri.
22Íksï jintespti Usiel uáp'echa: Misaeli ka Elsafani ka Sitri.
23Aaroni, Elisabetini tempa úspti Aminadabi uáp'a nanakani, ka Nasoni pirenchi jempani, ka ima Nadabi ka Abiu ka Eleasari ka Itamarini kánkorheaspti.
24Íksï jintesti Kore uáp'echa: Asiri, Elkana ka Abiasafa. Íksï jintesti Koreri sïrukuespti.
25Eleasari, Aaroni uáp'a, Futieli uáp'a nanakani tempa úspti ka ima Finesini kámaspti. Íksï jintesti Lebitecheri urhets'ïkuricha ka imeri sïrukua.
26I Aaroni ka Moisesispti enka ACHA arhiapka: Ejiptu ueratin kentitaa Israeli anapuecha, sïruk'antaa eska p'urhekuticha ísï uep'antaa. 27I Moisesi ka Aaronispti enka irechani Ejiptu anapuni uataxekuspka eska jiaretapirinka Israeli uáp'echani Ejiptu uératini.
Diósï, Moisesi ka Aaronini uantap'asïnti
28Ima jurhiatekua enka ACHA, Moisesini Ejiptu uantaxekupka, 29arhispti:
Ji ACHAeska. Ni ka irechani Ejiptu anapuni aiánku ampe enkani ji arhini jaka.
30K'óru Moisesi, ACHAni arhispti:
Sési mítetixaka eskani ji no úsïnka sési uantani jámasïnka matochani, ¿Nénari irecha jakak'uchea?
Currently Selected:
Éxodo 6: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
