Éxodo 3
3
Diósï, Moisesini uantap'asti
1Moisesi, Jetroeri karichichani erankuaxapti, enka imeri tarhampiri jémpepka, Jetro, Madiani tátespti, ma jurhiani karichichani jimesï paaspti enka nónema irekaka, ka Jorebi jamperi niáraspti enka Diósïri juáteka. 2Jima ACHAeri ánjeli uantakua pári ma xarhakuspti enka tsïtuni sïnhaki teruk'ani jápka, ima tsïtuni kurhixapti, Moisesi exespti eska tsïtuni kurhixapka ka eska no k'amap'esïrempka. 3Ima uantaspti: Nipa antarherani exeni antisï sïnhaki no k'amap'eki.
4ACHA exespti Moisesi tsïtunini antarheraxapka, ACHA jima uératini uantap'aspti ka arhispti: ¡Moisesi, Moisesi! Ka ima kurhakorhespti: Ixu jarhaska.
5ACHA arhispti:
Ásï antarhera. P'iua kuarhachichani, jimpokari pínpinhanturhusï jaka.
6Ístu arhispti: Ji chéti sïrukuecheri Diósïska, ka Abraani, Isaaki ka Jakobiri Diósïska.
Tátsekua Moisesi ónharhispti jimpoka chéspka Diósïni erateni.
7ACHA auantaspti: Sési exeska na enkaksï no sési irekorheni jaka Ejiptu, kurhauaska na enkaksï kómu arhak'a enkaksï ánchetpiricha xáni nósesi káaka. Mítetixaka na enkaksï xáni uerak'a.
8Jimposïni ketseka Ejiptu anapu uinhapetarhuksïni p'ímutantani ka jimaksïni echerirhu páni, enka kánekua kónteka ka ampakiti, jima enka etsukua ka tékua iurheni jauaka enka uánekua ampe júk'a, jima enkaksï Kana, Jitita, Amoreo, Fereseo, Jivita ka Jebuseo anapu k'uiripuecha irekaka. 9Israeli uáp'echeri kómu akua kurhaskia ka ístuni exeska na enkaksï Ejiptu anapuecha xáni nósesi káaka. 10Ísï jimpori jíkini irecha jinkuni axaaka eskari Ejiptu iretara Israeli uép'echani kéntitauaka.
11Moisesi, Diósïni arhispti:
Ji nonemaeska, ji ísku ampe máeska irecha jinkuni, ji no uák'a Israeli uáp'echani Ejiptu petaatani 12Diósï arhispti:
Ni, jikini urhechepaaka. I mínteuati eskakini ji axaxaka, ka enkari na Ejiptu uératini petatauakia Israeli uáp'echani, cháts'ï Diósïni íni juátarhu marhuakuaka.
13Moisesi, Diósïni arhispti: Enkani Israeli uáp'echani jinkuni niuakia ka arhiani chári tátecheri Diósïrini axasti arhiani ka enkats'ïni ima kurhamarheska.
¿Na jakankurhisïnki?
14Diósï, Moisesini arhispti: JI JINTESKA ENKANI JI JINTEKA. Ka útasï arhispti:
Israeli uáp'echanti arhiauaka: JI JINTESKA enkari cha jinkuni axani jaka.
15Diósï, Moisesini arhisptiteru: Israeli uáp'echanti arhiauaka: ACHArini cha jinkuni axasti. Ima chári tua anapu Diósïsti, Abraaniri Diósï, Isaakiri Diósï ka Jakobiri Diósï. I jintesti jucheti jakankurhikua enka méntku ísïuaka. Íni jakankurhikuani ménku ísï míaje.
16Ísï jimpo ni ka iámentu tátechani Israeli anapuechani tánantaa ka arhia: ACHA, ima chári tátecheri Diósïsti, Abraaniri, Isaakiri, ka Jakobiri. Imarini xarhachesti ka arhistirini: Sési jimpoksïni jurhaska exeni, ka exeska na enkaksïni Ejiptu anapuecha xáni no sési káaka, 17ka uantaskia eskani kéntitauaka ixu Ejiptu uératini ka jima echerirhu páuaka enkaksï Kananeo, Jitita ka Jebuseo irekani jaka, jima enka echeri kánekua ampakitika enka etsukua ka tékua iurheni jaka 18Imaksïni kurhach'aati, t'u ka tátecha Israeli anapuecha niuakats'ï Ejiptu anapu irechani uantaxekuni ka arhik'ats'ï: ACHA, Ebreo anapuecheri Diósï exéntastits'ïni, tanimu jurhiatekueri xanharani niuaka jimesï enka no nema irekaka ACHAni manakorherichani kéts'ïtakuani imani enka juchari Diósïka. 19Mítetixaka eskaksïni Ejiptu anapu irecha no jiaretaaka nirani sési jasï jimpo, no sési jasï jimposï jiánkuati. 20Ji ióxurhantaaka ka Ejiptu anapu k'uiripuni maiampetaraaka ka tátsekua imaksïni jiánkuati nirani. 21Ji úaka eskaksïni Ejiptu anapuecha janhanharhiaka, ka jimak'ani enkats'ï uékuni jamaaka eskats'ï no xásku uekuaka. 22Ka Israeli anapu nanakecha, Ejiptu anapu nanakechani kurhakuati uékach'akua ka tirhintikua, xukuparhakua, imani ampets'ï jatsikuntaka chári sapichani, ka ísïts'ï Ejiptu anapuechani ampe euakorheauaka.
Currently Selected:
Éxodo 3: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
