Éxodo 2

Moisesiri antap'enukua

1Tataka ma enka Lebiri sïrukuepka, nanakani ma tempu úspti enka mák'ueni sïrukuepka, 2ka charhaku máksï kámaspti, ima charhaku kánekua sési jáxespti jimposï ima tanimu kutsï jískapti, 3nóteru úsptia xáni ióni jískani, jimposï tsïkiata chúspateri ma jirinhapti ka xunhanta ataparhakuspti eska no inchakupirinka itsï, ka jima jatsiraspti charhakuni ka iurhekuarhu uanamukutini jurak'uspti. 4Charhakueri jinkunekua jempa ma, no kánekua jarharhetini pakaraspti ka ima exexapti jimpoka uékasïrempka exeni ima na japirini.

5Irecha uáp'a nanaka iurhekuarhu kémespti jupats'ïni ka nanakecha enkaksï imeri jántspiripka iurhekuarhu uanamukutini ísï jámaxapti, ima exespti tsïkiatani, ka arhispti jántspiri jempa nanakani ma eska p'ímantapirinka ka pákuni. 6Jima exespti eska tsïkiatarhu charhaku ma jataspka, irecha uáp'a nanaka kánekua p'amok'uspti charhakuni ka uantaspti:

I charhaku Ebreo anapu ma uáp'esti.

7Charhakueri pirenchi jémpa jimak'u uétaspti ka kurhamarhespti:

¿Uékasïnti eskani niuaka Ebreo anapu ma nanachini jirinhani eska charhakuni etsukua íntskuaka ka eskakini jarhoataaka t'arhexerani?

8Ka irecha uáp'a nanaka arhispti: Jo, ni. Ima niraspti ka charhakueri nánte jempani páspti.

9Irecha uáp'a nanaka arhispti:

Pa íni charhakuni ka t'arhexera jinteni jimpo, jíkini maiamuaka. Nanachi páspti charhakuni ka t'arhexeraspti.

10Enka ima tataka sapichu tumpipkia, ima pákuntaspti irecha uáp'a nanakani, irecha uá'pa nanaka uáp'a úspti tumpini ka Moisesi jakankurhitaspti, ísï uantaparini:

Ji iurhekuarhu p'ítamakorhentaska.

Moisesi, Ejiptu sïpakorhespti

11Ióni jimpo enka Moisesi sánteru k'eripkia, ima niraspti imeri erachi jempechani echeani, ka exeaspti eskaksï kánekua ánchetanhasïrempka. Ima exekorhespti eska Ejiptu anapu ma Ebreo anapu ma ataxapka. 12Moisesi iápuru ísï eraeranharhispti, ka exespti eska no nema jamasïrempka, ataspti uántikuni Ejiptu anapuni ka ch'érirhu tuskuspti jískani. 13Pauantekuarhu ménteru jimesï niraspti ka exespti eskaksï tsimani Ebreo anapuecha uarhiperaxapka, ka imani enka atani jápka kurhamarhespti: ¿Antirisï ataák'i inteni enka chéti erachika?

14Ka ima arhispti: T'úri no jarhamekua jatsika juchantsïni inchakucheni jarhani, ¿Órini mák'ueni uántikua eskari na uántikuka Ejiptu anapuni?. Moisesi chéspti ka uantaspti: Mítekorhestia.

15Enka irecha mítepka ampe enka úkorhepka, Moisesini jirinhatarkorhentaspti uántikukuekani, Moisesi, Madiani niraspti sïpakorherheni ka jima pakaraspti irekani.

16Enka ima jima jápka enka itsï p'itanhak'a uaxamukutini, iumu tsimani nanakecha Madiani anapu táta uáp'epkaksï jima niaraspti itsï p'itani, imaksï karichichani itsïmatapirinti enka táte jempa káuamka. 17Máteru karichi erankuticha jima niraspti ka imani nanakechani kéntitaaspti, Moisesi jauaraspti nanakechani kuáp'eani ka jarhuataspti karichi itsïmataani. 18Enkaksï iurhitskiricha níntapka táte jémpani Reueliksï ima kurhamarheaspti: ¿Antits'ïsï iásï xáni kókuani junkua?

19Ka imaksï aiankuspti: Ejiptu anapu ma achatits'ïni kuáp'esti, jimpo máteru karichi erankutichats'ïni kéntitaspti jima, ka ima chatits'ïni jarhoataspti karichi itsïmataani.

20Reueli uáp'a nanakechani kurhamarheaspti: ¿Nani jarhaski ima achati? ¿Antits'ïsï jurarku? ¡Uantap'a je eska juaka t'ireni!

21Ka ísï jamani Moisesi jima pakaraspti irekani, ka ima achati uáp'a Séforani intskupsti. 22Ka ima charhakuni ma kámaspti ka Moisesi, Jersoni jakankurhitaspti, jimpoka uantaspka: Jimpokani ji no ixu anapueska.

23Ióni jimpo Ejiptu anapu irecha uarhispti. Ka Israeli anapuechaskï uérasïrempti enkaksï xáni no sési kánhempka ánchetanhani jupikatarhu. Imeri uekua Diósï kurhaaspti. 24Enka Diósï kurhaapka na enkaksï uerampka, miántaspti imeri pakatperakua enka Abraani ka Isaaki ka Jakobuni jinkuni úpka. 25Diósï exeaspti Israeli anapu k'uiripuechani ka míteantaspti.

Currently Selected:

Éxodo 2: BI-PURHE

Highlight

Copy