Úkuecha 4

Pédru Juánu jinkunksï k'éri tánkorhekuarhu pánhasti

1Enkaksï Pédru Juánu jinkuni uantaxetspeni jápkateru, tátechaksï saduseuecha jinkuni ka k'éri tiósïo anapu purhek'uti jinkunksï antarheraaspti, 2ka ikiaxaptiksï enkaksï Pédru Juánu jinkuni jurhentpeni jápka ka aiankpenksï járhani eska Jesusi tsíntaspka. 3Ka jupiasptiksï ka pauantekuarhu jamperiksï ónhaaspti, jimpoka ióntakuarhuespkia. 4Ka uánekuaksï jakak'uspti enkaksï aiankperakuani kurhapka: Iúmu míli acheticha ísïsptiksï. 5Pauantekua enkaksï Jerusaleni tánkorhent'apka iretarhu anapu urhets'ïkuricha ka achamasïcha ka juramukua jurhentpiricha, 6ka ístu k'éri táta Anasi, ka Kaifasi ka Juanu ka Alejandru ka iámentu enkaksï tátecha jinkunika. 7Teruk'anksï péraspti ka kurhamarheasptiksï:

–¿Néksïni uinhapekua íntskuski o néri jakankurhikua jimpots'ï ísï úski?

8Jiák'ani Pédru, Espiritu Sántuni uinirhekorhetini arhiaspti:

–Iretarhu anapu urhets'ïkuricha, ka Israeli anapu tatecha: 9Iásï enkachi kurhamarhenhani jaka néna enka p'amenchati ampakentaka, 10mítetini ja je cha ka iámentu Israeli anapuecha, eska Jesusi Nasareti anapueri jakankurhikua jimpoeska, ima enkats'ï cháparhata ka enka Diósï tsítant'a'ka, imani jimpo i acheti ampakentasti ka cha jinkuni ixu jarhasti. 11Jesusi ima tsakapuesti enkats'ï cha tsïntsïricha no jaiapanhentaka, enka iásï pítsekuekia. 12Ka nóteru nema jinkuni p'ímutantskorhenhasïnti, jimpoka Diósï nóteru nemani íntspeska enkachi jimpo úaka p'ímutantskorheni.

13Enkaksï juramuticha Pédruni ka Juánuni kurhach'aapka eskaksï jarhamekua jinkuni uantaspka, ka eskaksï no sïranta arhirispka níksï jánhaskatini, ískuksï pakareraspti eratsentani ka míteantaasptiksï eskaksï Jesusi jinkuni jámsïrempka. 14Ka achetinksï exerini enka ampakeranhantapka ka enka anhaxurhitini jápka imecha jinkuni, nóteruksï ampe ma úspti arhiparhataani. 15Jiák'anksï tánkorhekuarhu petarkorheantaaspti ka mámaru ampeksï 16arhip'eraxapti:

–¿Nénachi káua íni achetichani? Jerusaleni anapuechaksï xésti eskaksï k'éri mínta xarhatakuaska, ka nóchi úaka no jiókorheni. 17Eska nóteru i ampe iretarhu uantanhani jáuakateru, ju je chéraani ka ásteruksï nemani ampe arhi óksï Jesusiri jakankurhikua jimpo jurhentpeni.

18Ka uantap'antaasptiksï ka juramukuasptiksï eskaksï nóteru jámapirinka Jesusiri jakankurhikua jimpo uantani ka jurhentpeni. 19Ka Pédru Juánu jinkunksï mókukuantaaspti:

Kurhamarhekorhe je, ¿Diósïni jáparini, sési jaki chánksïni kurhach'ani o Diósïni? 20Jimpokani jucha no úaka no uantant'a'ni inteni ampe enkachi jucha xékorheka ka kurhaakorhenchi.

21Ka ménteruksï chéraani uékaspti, jurak'uasptiksï, ka nónanimaru jimpoksï úspti úmarheani, iretani jimpo, jimpokaksï iámentuecha k'éri ampe arhisïrempka Diósïni imani ampe jimpo enka úkorhepka. 22Jimpoka ima acheti enka mínta jimpo ampakeranhantapka, jukari tsimani ekuatse uéxurhini jatirispkia.

Jakak'uticheri kómakua

23Enkaksï Pédru Juánuni jinkuni jurak'unhapka, pámpiri jémpechanksï jinkunksï niántaspti ka iámentu ampeksï aiankuant'aspti ampe enkaksï k'éri tátecha ka achamasïchaksï arhiapka. 24Ka imaksï kurhach'aatini, mák'u k'éri uinhachaspti Diósïni arhini:

“Acha xáni k'éri, t'úeskari Diósï enkari auantani ka parhakpenini kueraaka, k'éri japuntani ka enkateru xáni ampe jima jaka; 25enkari chéti jántspiri Dabidi jimpo uantaka:

¿Antisï xáni méntku ísï jánhki,

iretechaksï antisï xáni ísku ampe eratsek'i?

26Kúnkorhekuntastiksï Diósïni

parhakpeni anapu

irechecha ka juramuticha,

imeri Erakukatani no kurhach'ani.”

27“Ka sési jimpoksï íni iretarhu, Erodesi ka Pónsio Pilatu no judiuecha ka Israeli anapuecha jinkuni chéti erakukatani kunkorhekuntaspti; jántspiri Jesusini enkari t'u úch'akuraka, 28ka ísï jámanksï ústi, enkari t'u eratsetini jápka chéti mímixekua jimpo eska úkorhepirinka. 29Iásï Acha, exe ampe enkaksïni xáni ampe arhik'a, ka sésikua íntsaa chéti jántspirichani eskaksï chéti uantakuani jarhamekua jinkuni uantant'a'aka. 30Xárhata chéti uinhapekuani p'amenchatichani ampakerantaatini ka míntechani ka milagruechani ampe úaparini, chéti erakukata jántspiri Jesusiri jakankurhikua jimpo.”

31Enkaksï Diósïni kómarhipkia, jenchespti jima enkaksï tánkorhent'atini jápka, ka iámentu jakak'utichaksï Espiritu Sántuni uinirhekorhespti ka jarhamekua jinkunksï Diósïri uantakuani uantant'a'sïrempti.

Jakak'utichaksï márku marhuatasïrenti ampe

32Xánksï uánespti enkaksï jakak'upka, mák'u mintsita jinkuniksï jarhaspti, ka mák'u p'ikuarhenhekua jinkuni. Nónema no uinhaasïrempti jatsikorhekua ampe, iámentu ampe iámentuecherispti. 33Ka Jesusiri uantakua párichaksï kánekua uinhapekua jinkuni, Acha Jesusiri tsíntskuani uantant'a'sïrempti, ka Diósï kánekua úch'akuraasïrempti. 34Imechani jinkuni nónema kómu nitamanchakorhesïrempti, jimpokaksï ima enka ampe kánkorhempka óksï k'umanchekua ampe jatsikorheni, atarantasïremptiksï ka antakuanksï, 35Jesusiri uantakua párichanksï íntsasïrempti. Ka eskamentu na uétarhechanhani japirinka ísï arhukunhasïrempti. 36Jiák'ani Jose, enka Lebiri sïruku jémpepka ka Chípre ómekuarhu anapueni, enkaksï Jesusiri uantakua páricha Bernabe arhimpka (enka arhikuekak'a “Karhuakpiri”), 37echeri ma kánkorhesïrempti ka atarant'aspti ka tuminani Jesusiri uantakua párichani íntsaspti.

Currently Selected:

Úkuecha 4: BI-PURHE

Highlight

Copy