Úkuecha 3

Néna enka renket'a ampakeranhantaka

1Ma xanhariksï tanimu atakuarhu ísï, Pédru Juánu jinkuniksï k'éri tiósïo karhamaxapti uantamukukorheni. 2Ka jima járhaspti acheti ma enka renket'empka jimpoka ísï antap'enuspka, ka mántani pauanksï k'éri tiósïo jamukutini pásïrempti, jima enka kasïpiti arhinhak'a, ka eska ima jima tumina kurhakuaapirinka imechani enkaksï tiósïo inchempka. 3Enka acheti xépka Pédruni ka Juánuni enkaksï tiósïo inchani jápka, kómu arhiaspti eskaksï tumina sáni íntskupirinka. 4Ka Pédru arhispti Juánu jinkunksï éskuarhu eratespti ka arhispti:

–Eratets'ïni.

5Ka ima ísku jarhasti erateani ka ísï eratsexapti eskaksï ampe intsïmpepirinka. 6K'óru Pédru arhispti:

–No sáni kámasïnka tumina, ampe enkani ji kámani jaka, imankini íntskuaka: Jesukristu Nasareti anapueri jakankurhikua jimpo jauara ka xanhara.

7Ka t'irek'antani jupik'uspti ka jauataspti ka ima jimak'u uinhaptarhantaspti ka uinhapenturhantaspti; 8ka jauap'atsespti ka imechani jinkuni k'éri tiósïo inchaspti xanharaparini ka tsánkuaraparini ka Diósïni k'éri ampe arhiparini. 9Iámentu iretarhu anapuechaksï exespti enka xanharani jápka ka enka Diósïni k'éri ampe arhini jápka. 10Ka mítent'asptiksï eska imasï tiósïo uaxamukuempka enka kasïpiti arhinhak'a, ka ísku pakareranhaspti ka chérakorhenhaspti imani ampe jimpo enka úkorhepka.

Pédru tiósïo uantasti

11Ka ima acheti enka ampakentapka, Pédruni ka Juánuni no jurak'uaspti, ka k'uiripu ísku pakareraspti ka uiriasptiksï jima enka Salomoniri jách'ukurini arhinhak'a. 12Ka Pédru ísï exearini arhiaspti:

“Tatecha ka nanecha Israeli anapuecha, ¿Antits'ïsï ísku pakarerak'i? ¿Antits'ïnisï ísku pakarak'i exeni? Enak'ini ampe jucha juchari uinhapekua o juchari p'amop'erakua jimpo íni achetini ampakerantsï. 13Abraniri Diósï ka Isakiri ka Jakobueri, ima enkat'u juchari tua anapuecheri Diósïka, jántspiri jémpa Jesusini k'éri ampe ústi; imani enkats'ï cha intsïnharhitpeka ka Pilatuni jáparinits'ï no jiókorheni enka ima jurak'ukuekani jápka. 14Cháts'ï no jiók'orheska imani enka Kaxumpitipka ka sési jásï k'uiripueni, ka uantikpitintsï ma jurak'utarkorheska. 15Ka uántikuskats'ï imani k'érini enka tsípekua íntspek'a, k'óru Diósï tsítant'a'sti, jucha xékorheska. 16I acheti enkats'ï cha xéni jaka ka enkats'ï mínharhikuka, ampakentasti Jesusiri jakankurhikuani jakak'utini; cháts'ï íni achetini míteska ka xékorhexakats'ï. Ampakentastia ima jakak'ukua jimpo enkats'ïni Jesusi íntskuka.”

17“Tatecha ka nanecha, ji mítetixaka eskats'ï cha ka ima enkaksïni chánksïni k'érichek'a no mítetini nósesi úska. 18K'óru Diósï úxati ampe enka imeri uantarichani jimpo aiatspetini jápka: Eska imeri Krístu uarhipirinka. 19Ísï jimpo, Diósïni antarhentsï je ka k'amanharhintskuechantsï nóteru míamenhani jauakia [enka Acheri jurhiatekua niáraaka enka ima mintsitechani karhuantspeantauaka.] 20Ka Diósïksïni Jesukristuni axacheati eskats'ï na aiankukata jaka. 21K'uanisïnti eska Jesukristu auantarhu jauaka ima jurhiatekua jamperi enka iámentu ampe sési pénhantaaka, ísï eska Diósï na uantaka ióntki imeri uantarichani jimpo enka erakuatini jápka. 22Moisesi uantaspti: ‘Juchari Acha Diósïksïni chári erachini ma erakucheati, mák'ueni Diósïri uantarini ma eskani ji na Diósïri uantarika; ka imantsï kurhach'aaka ampe enkaksïni xáni ima arhiaka. 23Ka ne enka imani Diósïri uantarini no kurhach'aska, iretarhu petaatanhaati.’

24Ka iámentuksï Diósïri uantaricha, Samueli uénani ka eskaksï imani chúxapak'a, imat'uksï íni jurhiatecheri ampe uantant'a'spti. 25Cháts'ï Diósïri aiatsperakua p'ikuaka enka Diósï chári tátechani aiakuaka, enka Abranini arhipka: ‘Chéti sïrukua jimpoksï úch'akuranhaati iámentu ireta parhakpeni anapuecha.’ 26Enka Diósï Uáp'ani tsítant'a'ka, chánksïni uénaspti axacheni eskats'ïni úch'aranhapirinka, uékani eskats'ï cha mántani arhini móantapirinka ampe enkats'ï xáni nósesi ampe úka.”

Currently Selected:

Úkuecha 3: BI-PURHE

Highlight

Copy