ल़ेह-पेन 16
16
पावल दाङ सिलास ङ्याम्बु तिमोथी थ़ूक्यो
1ओ़ह पावल डर्बी दाङ लुस्त्रा क्याहसाॱलाङ लेप्सीन। ओहले ओ़ह क्याहसाला तिमोथी मिहन थो़क्यो स्याहप्च्यी च्यी़ तेहको येहकें। खो किन्ज्योला यिह-छ्य़े पेहक्यो यहूदी पी़हमी च्यी़गी पुह यिहन्गे, यिहॱनाङ खोगी आबादी ग्रीक यिहन्गे। 2लुस्त्रा दाङ आइकोनियन क्याहसाकी आदा-नो़ह थाम्ज्यीगीराङ तिमोथीला मिह या़हबु यिहन म़ेदी चा़ पेहको येहकें। 3ओहले पावलगी खोला राहङ ङ्याम्बुराङ ख्येर्ती डोज्ये सेम पेहसीन। ओहले ओ़ह ग्या़या़ला तेहकेन्गी यहूदी मिहया़गी तिमोथीला च्यिॱआङ मा मा़हखुज्यु म़ेदी पावलगी खोला ख्येर्ते स्या-ताक पेह तेर्सीन। च्यिबेमाना तिमोथीकी आबा ग्रीक यिहन म़ेदी थाम्ज्यीलाराङ क्यी़ह येहकें।
4ओहले खुङ फे़बे सुम क्याहसा क्याहसाले पेहती डोएँमु खुङया़गी यरूशलेमगी ल़ेह-पेनया़ दाङ एल्डरया़गी लोप्ताम क्याहप्क्योगी तामया़ खुङया़ला ची़दोङ म़ेदी का तेर्सीन। 5दि ल़ेहमु पेहती छेन्छोककी मिह थाम्ज्यी राहङगी यिह-छ्य़ेला स्युक छ्यिम्बु पेहती ङ्यिहमा-टाहङमाराङ चो़वो येशूला यिह-छ्य़े पेहकेन्गी स्याहप्च्यीया़ माहङरो माहङरो पेहती काहल्सीन।
माकेडोनिया क्याहल-खापला डोज्येला ज्याल्गा नाङग्यो
6किन्ज्योगी थुगी पावल, सिलास दाङ तिमोथीला एशिया क्याहल-खाप छ्यिम्बुला सुङ ख्येप्टा तेर्च्येला डो च्यु माहनाङ। ओ़ह सोङबे खुङ फ़ेबेॱया फ्रिगिया दाङ गलातीया साने़लेगी पेहती काहल्सीन। 7ओहले माइसिया साने़की सा-छेन्जामला लेप्केमु खुङया़गी बिथिनिया लुहङबाला डोज्ये म़ेदी साम्लु ताङसीन, ओहजेला येशूकी थुगी खुङया़ला डो च्यु माहनाङ। 8ओ़ह सोङगोराङ खुङ माइसिया साने़की लाहमले पेहती थेका सिरे छो-क्याहम्जोकी सुहरला फाप्सीन, ओहले त्रोआस माएँ क्याहसाला लेप्सीन। 9ओ़ह कुहङमु पावलला किन्ज्योगी दि ल़ेहमु ज्याल्गा नाङसीन। माकेडोनिया साने़की मेहन्दा च्यी़ लाहङदी तेहक्यो थोङसीन। ओहले ओ़ह लाहङदी तेहक्यो मिहगी, “माकेडोनिया साने़ला फेप्ते ङ्यिहला रो़हराम जे नाङदोङ!” म़ेदी पावलला उर्चु पेहक्यो थोङसीन। 10पावलला किन्ज्योगी दि रोहवा ज्याल्गा नाङ फान्ज्यो माकेडोनियाकी मिहया़ला चो़वो छ्येवा येशूगी लेहङगु या़हबुया़ स्येच्येला किन्ज्योगी ङ्यिहलाराङ क़े क्याहप नाङग्यो दुबा म़ेदी ङ्यिहगी ह्अ कोहसीन। ओहले ङ्यिह छारा पेहती माकेडोनियाला डोज्येला ठाबे पेहसीन।
लिडियागी येशूला यिह छ्य़ेक्यो
11ओहले ङ्यिह त्रोआस क्याहसाले छ्यु-टुहला जा़दे थेका सिरेराङ सामोथ्राके छोलिङला काहल्सीन, ओहले नाहङबार च्युङ नियापोलिस क्याहसाला लेप्सीन। 12ओहले नियापोलिस क्याहसाले फिलिप्पी क्याहसाला काहल्सीन, ओ़ह क्याहसादी माकेडोनिया दे-खामगी क्याहसा छ्यिम्बु यिहन्गे ओहजेला रोमीया़गी ओङ छ्ये़उ येहकें। ओहले ओ़हला ङ्यिह तोबा ङ्यिहमा थु तेहसीन। 13ओहले छ्यु-चाङबु सुहरया़ला यहूदीया़की सोल्वाङ ताप्केन ग्या़ येहबा नि माएँ सेम क्ये़दी यहूदीगी थाङ सोएँ ङ्यिहमाला ङ्यिह ओ़हला काहल्सीन, ओहले ओ़हला छो़क्योगी पी़हमी-पेहजाया़ ङ्याम्बु तेहती ताम मासीन।
14ङ्यिहगी माक्योगी ताम ङ्यिहन्गेनया़ नाहङला लिडिया माएँ पी़हमी च्यी़ येहकें। मोह थिआटीरा क्याहसादी यिहन्गे ओहले मोह क्ये़हज्येन काप्च्यागी छोङ क्याहप्को येहकें। ओहले मोहगी किन्ज्योला छ्येपा फुल्गो येहकें। ओहले पावलगी माक्योगी तामला या़हबु पेहती ङ्यिहन्दी पेहच्यु म़ेदी चो़वोगी मोहगी सेम खा फे़ नाङसीन।
15यिह-छ्य़े पेहती तिङले मोह दाङ मोहगी खाङबागी म़ेहमे थाम्ज्यीगीराङ छ्युगी बप्तिस्मा लेहन्सीन। ओहले मोहगी ङ्यिहला थाल्मु च्याहर्ते मासीन, “राहङ फे़बेया़गी ङाहला, तेहम्बाराङ चो़वोला यिह-छ्य़े पेहक्यो नुहमु यिहन म़ेदी राहङ फे़बेया़गी थुला ठुङसीमाना ङाहगी खाङबाला फेप्ते ङ्यिह ङ्याम्बुराङ ज़्य़ू नाङदोङ” म़ेदी मोहगी ङ्यिहला उर्चु पेहसीन।
पावल दाङ सिलास चोन-खाङला
16ओहले ङ्यिहमा च्यी़ ङ्यिह सोल्वाङ ताप्के ग्या़ला डोएँॱराङ येहकें ओहजेला ङ्यिहगी यो़मु पोहमो पेहजा च्यी़ला थ़ूसीन। ओ़ह पोहमो पेहजाला ङ्येहम्बा नाम्स्यी स्युहक्यो येहकें, ओहले ङ्येहम्बा नाम्स्यीगी ओङगी मोह त़ेदी राहङ ताहक्पुला माहङबुराङ टाङगा जे़दे तेर्को तेहके। 17ओहले मोह पावल दाङ ङ्यिहगी तिङदा तिङ ओहङदी, “दि मिहया़ चा़ छ्यिम्बु किन्ज्योला स्याहप्तो स्युहएँगी मिहया़ यिहम्बा। दि मिहया़गी ख्याया़ला थार्पा ज्योर्केन्गी तेहन्दाला स्येके” म़ेदी क़े तेन्दी मासीन। 18ओहले मोहगी ङ्यिहमा माहङबु थु ओ़ह ल़ेहमुराङ म़ेदी क़े तेन्दीराङ तेहसीन। ओहले पावल छेर्स्यी लाहङदी ल्होक लो़हदी ओ़ह ङ्येहम्बा नाम्स्यीला, “येशू मास्यीकागी छेनला ख्ये दि पोहमोले थेन्दी सोङ” म़ेदी ठो़ तेन्दी मासीन ओ़हजेलाराङ ओ़ह ङ्येहम्बा नाम्स्यी ओ़ह पोहमोगी ज़ुबुले थेन्दी काहल्सीन।
19ता़ह ओ़ह पोहमो-पेहजाकी ताहक्पुया़गी राहङदी टाङगा ओहङगेन्गी लाहम छ्य़ेक्यो थोङदी खुङगी पावल दाङ सिलासला ज़ुङदे क्याहसाकी पोम्बोया़ छो़गेन्गी ग्या़ला टिहते ख्येर्सीन। 20ओहले खुङ ङ्यी़ला क्याहसाकी रोमी स्युहङ-पेनया़गी दिनला ख्योङदी मासीन, “दि मिहया़नी यहूदीया़ यिहन, दिया़गी ओहराङगी क्याहसाला ठू़ च्य़ूदी तुहक्पु तेर्केॱराङ येह। 21दि मिहया़गीनी ओहराङ रोमीया़गी ठिमला म़ेहबागी लेहमेन लेहमेन ठिमया़ गा लोप्कु दु दि ठिमया़ ओहराङ रोमीया़गी ची़ज्येला ज्यार्पु मेहयोहङगे।” 22ओहजेला मिह मिह-माहङया़ पावल दाङ सिलास थो़ला च्योम ओहङसीन। ओहले स्युहङ-पेनया़गी मिहया़ला कुल्दी खुङ ङ्यी़ला काप्च्या पिते तुहङ च्य़ूसीन। 23ओहले खुङगी पावल दाङ सिलासला तुहङदा या़हबु तेर्ते चोन-खाङला क्याल्दी चोन-खाङगी स्युहङ-पेनला, “ता़ह खुङ ङ्यी़ थेन्दी डो मी़हखुएँ पेहती ल़ू ज़्या़दोङ” म़ेदी म़े ज़्या़सीन। 24ओहले ओ़ह रोहवा म़े ज़्या़ फान्ज्यो स्युहङ-पेनगी खुङ ङ्यी़ला चोन-खाङ नाहङ नाहङगी ङ्याहल-खाङला ख्येर्ती खुङ ङ्यी़गी काङबाला स्यिङ-खोर्लो काहर्ती ज़्या़सीन।
25नुहप फेचेला फार पावल दाङ सिलास किन्ज्योला सोल्वाङ ताप्ती छ्ये़-लु लेहन्गेॱराङ त़ेरा फुल तेहती येहकें, ओहले चोन-खाङला येहकेन लेहमेन मिहया़दी ङ्यिहन तेहते येहकें। 26ओ़ह याहङमे-याहङलाराङ साङगुल स्युक छ्यिम्बुच्यी ओहङदी, चोन-खाङगी ब्रामया़ युहङसीन ओहले चोन-खाङगी थाम्ज्यीराङ कोहया़ खा फ़ेसीन, ओहले चोन-खाङला ताहम्दी ज़्या़क्योगी मिहया़ थाम्ज्यीगी च्याल्दाॱआङ स्यी़हसीन। 27ओहजेला चोन-खाङगी स्युहङ-पेन ङ्यि स़ेसीन, ओहले खोगी चोन-खाङगी थाम्ज्यीराङ कोहया़ खा फे़क्यो थोङदी ता़ह चोन-खाङगी मिहया़ प्रे़हबा यिहन्डो ने़दी राहङगी पादाङ स्योहक टिहते राहङगी राहङलाराङ सेच्ये पेहसीन#१६:२७ ओ़ह ती़हजीलादी चोन-खाङला येहकेन्गी मिहया़ प्रे़ह काहल्सीमाना ओ़ह मिहया़गी ज्योर्केन्गी ङ्य़ेहबा चोन-खाङकी स्युहङ-पेनया़ला काल्गो येहकें। 28दि थोङदी पावलगी, “ए ला़ह, दिठी जे माहनाङ, ङ्यिहया़ प्रे़हदी म़ेह, ङ्यिह थाम्ज्यी देलाराङ येहबा” म़ेदी क़े तेन्दी मासीन।
29दि थे़दी चोन-खाङगी स्युहङ-पेन लो लाङ म़ेदी पार्ते नाहङला छ्योङदे ओहङसीन, ओहले खो ज्यी़सुगी ल्होक-ल्होक दार्ते पावल दाङ सिलासगी दिनला खेप्चु क्याहप्सीन। 30ओहले स्युहङ-पेनगी खुङया़ला फिला ख्योङदी, “ए फ़ेबेॱया, ता़ह ङाहगी थार्पा ज्योर्च्येला च्यि पेह कोहएँ?” म़ेदी टी़हसीन। 31“चो़वो येशूला यिह-छ्य़े पेहतोङ, ओहले ख्ये दाङ ख्येगी म़ेहमे थाम्ज्यीगीराङ थार्पा ज्योर्च्ये येह” म़ेदी पावल दाङ सिलासगी मासीन। 32ओहले खुङ ङ्यी़गी चो़वोगी या़हबु लेहङगु खो दाङ खोगी खाङबा म़ेहमे थाम्ज्यीलाराङ स्येसीन। 33ओहले चोन-खाङगी स्युहङ-पेनगी पावल दाङ सिलासला ओ़ह कुहङमुराङ ख्येर्ती नाहन्दीया़ ठी़ तेर्सीन। ओहले खो दाङ खोगी खाङबा मे़हमेगी बप्तिस्मा लेहन्सीन। 34ओहले चोन-खाङगी स्युहङ-पेनगी पावल दाङ सिलासला खाङबाला ख्येर्ती सोल स्युहसीन। ओहले खुङ मे़हमेया़ थाम्ज्यीगीराङ, “ङ्यिहगीॱआङ किन्ज्योला यिह-छ्य़े पेह ङ्युहङसीन” म़ेदी क़ेहनाङ पेहसीन।
35नाहम लाहङ फान्ज्यो क्याहसाकी स्युहङ-पेनया़गी, “खुङ ङ्यी़ला ताङदोङ” म़ेदी माक्मीया़ला म़े ताङसीन। 36ओहले चोन-खाङगी स्युहङ-पेनगी पावलला दि ताम स्येसीन, “ता़ह क्याहसाकी स्युहङ-पेनया़गी ख्या फे़बे ङ्यी़ला ताङदोङ म़ेदी का नाङदी येह। ओ़ह सोङगोराङ ख्या फ़ेबेॱया सेम लो तेहमु पेहती फेप नाङदोङ ला़ह!” म़ेदी मासीन। 37ओहले पावलगी लेहङगु ख्योङगेन माक्मीया़ला मासीन, “ङ्यिहनी रोम क्याहल-खापगी नागरिकता ज़्योरक्यो मिह यिहम्बा, खुङगी ङ्यिहला ठिमॱराङ मा़हतेबा पेहती मिहया़गी दिनला तुहङदी चोन-खाङॱलाङ लू़सीन। ता़ह ङ्यिहला खाजुम्बा पेहती तेन ताङज्ये छोल्गे? दि रोहवा पेहती नि ङ्यिह मेहन्डो। क्याहसाकी स्युहङ-पेनया़ खुङ राहङराङ ओहङदी ङ्यिहला तेन कोहएँ” म़ेदी पावलगी मासीन।
38ओहले दि लेहङगु ख्येर्ती माक्मीया़ क्याहसाकी स्युहङ-पेनया़साला काहल्दी, “पावल दाङ सिलास नि रोम क्याहल-खापकी नागरिकताॱआङ ज़्योरक्योगी मिहया़ गा दुबा” म़ेदी स्येसीन। दि ताम थे़दे खुङया़ ज्यी़सीन। 39ओहले खुङया़गी पावल दाङ सिलास ङ्याम्बु कोहङदा स्युहसीन, ओहले खुङया़गी खुङ ङ्यी़ला फिला ख्येर्तोङ, “ओहर-छ्य़े!, ता़ह दि क्याहसाले थेन्दी फेप्तोङ” म़ेदी स्युहसीन। 40ओहले पावल दाङ सिलास चोन-खाङले थेन्दी लिडियागी खाङबाला काहल्सीन। ओहले चो़वोला यिह-छ्य़े पेहक्यो आदा-नो़हया़ ङ्याम्बु थू़दी खुङया़ला आ़र क्ये च्य़ूदी खुङ ङ्यी़ काहल्सीन।
Currently Selected:
ल़ेह-पेन 16: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
