ल़ेह-पेन 15
15
यरूशलेमगी छो़बा छ्यिम्बु
1ओहले लाहला मिहया़ यहूदीया साने़लेगी एन्टिओखिया क्याहसाकी आदा-नो़हया़साला ओहङदी दि ल़ेहमु लोप्च्युङ लोप्च्ये छ़ूसीन, “ख्या फ़ेबेॱया मोशागी नाङग्यो ठिमला ल़ेहमु स्या-ताक माहकाहल्बा येहनानी ख्या फे़बेया़गी थार्पा ज्योर मी़हखुएँ।”#लेवी १२:३ 2ओहजेला पावल दाङ बारनाबास खुङया़ ङ्याम्बु माहङबुराङ स्येपा तुहर्सीन, ओहले ओ़ह ग्या़गी छेन्छोकगी पावल दाङ बारनाबास ओहले लेहमेन मिहया़ला दि टी़हदापकी तेहन्दाला था-च्येच्येला ल़ेह-पेन दाङ एल्डरया़ साला यरूशलेमला सोङ म़ेदी मासीन। 3ओहले छेन्छोककी आदा-नो़हया़गी खुङया़ला ओ़ह ग्या़ले ताङ चाहङसीन। ओहले खुङया़ फोनिके दाङ सामरिया युहलले पेहती काहल्सीन, ओहजेला खुङया़गी ग्या़ ग्या़ला किन्ज्योला यिह-छ्य़े पेहक्यो आदा-नो़हया़ला लेहमेन क्यिहपागी मिहया़गीॱआङ किन्ज्योला सेमले खाल्दे येह माएँ ताम स्येसीन दि थे़दी खुङया़ ज्यिबुराङ क़ेहनाङ पेहसीन।
4खुङ यरूशलेम क्याहसाला लेप्केमु ओ़ह ग्या़गी छेन्छोक, ल़ेह-पेन दाङ एल्डरया़गी खुङया़ला फेप स्युहसीन। ओहले किन्ज्योगी पावल दाङ बारनाबास लाहमले जे नाङग्योकी थाम्ज्यीराङ तामया़ खुङ फे़बेया़ला स्येसीन। 5ओहजेला किन्ज्योला यिह-छ्य़े पेहक्यो फरिसी छो़बागी रेहरे मिहया़गी लाहङदी दि ल़ेहमु मासीन, “लेहमेन क्यिहपागी मिहया़गीॱआङ यहूदी ठिमला ल़ेहमु पेहती स्या-ताक पेहॱराङ कोहकें ओहले खुङया़गी मोशागी नाङग्यो छ्य़े-ठिम थाम्ज्यीराङ ची़ॱराङ कोहएँ।”
6ओहले दि तामगी तेहन्दाला ल़ेह-पेन दाङ एल्डरया़ ग्या़ च्यी़ला जोम्दी टे़ह क्याहप्सीन। 7माहङबुराङ टे़ह क्याहप फान्ज्यो पत्रुस लाहङदी मासीन, “आदा-नो़हया़, सेन नाङदोङ, लेहमेन क्यिहपागी मिहया़गी चो़वो छ्येवा येशूगी या़हबु लेहङगु ङ्यिहन्दी यिह-छ्य़े पेहच्यु म़ेदी ङ्यिहमा तोबाज्यी तोहङले किन्ज्योगी ओहराङ नाहङले ङाहला दाम नाङग्यो यिहम्बा। दि स्याहल ख्या फे़बेया़ला थुयी़राङ येह।#ल़ेह १०:१-४३ 8सेमगी स्याहल ङोह ख्येन्गे किन्ज्योगी ओहराङला नाम्पार-ताहक्पा थ़ू नाङग्यो ल़ेहमुराङ लेहमेन क्यिहपागी मिहया़ॱलाङ नाङसीन। दि ल़ेहमु पेहती किन्ज्योगी लेहमेन क्यिहपागी मिहया़लाॱआङ राहङदी ज़ो नाङसीन।#ल़ेह १०:४४; २:४
9किन्ज्योगी लेहमेन क्यिहपा दाङ ओहराङगी पाहरक्यीला ङ्येम्बा-ङ्य़ेहरी जे माहनाङ, ओहले खुङया़गी किन्ज्योला सेमले खाल्सीन ओहले मिहरोगी खुङया़गी यिहला चाङमा ज़ो नाङसीन। 10ओ़ह सोङबे स्याहप्च्यीया़गी ताक्चाला दि ङ्यास्यीङ ज़्या़ नाङदी च्यिबे किन्ज्योगी छेता पेहकें? मोशागी नाङग्यो छ्य़े-ठिम ओहराङगी चावाया़गीॱआङ ची़ मा़हखुबा येहकें ओहले ओहराङगीॱआङ ची़ मी़हखुएँ। 11ओ़ह सोङबे दि ल़ेहमु पेहच्ये मेहयोहङगे च्यिबेमाना ओहराङॱआङ चो़वो येशूकी काटीनगी जेती थारक्यो ल़ेहमुराङ खुङया़ॱआङ चो़वो येशूकी काटीनगीॱराङ थार्ते येह।”
12ओहजेला छो़बागी मिह थाम्ज्यी खाजुम पेहती तेहसीन। ओहले लेहमेन क्यिहपागी मिहया़गी पाहरक्यीला किन्ज्योगी खुङ ङ्यी़ लाहमले काहन्डुमु याहम्जेन छ्येवागी छ्या़लेया़ दाङ ताक्छेनया़ तेन नाङबा माएँ ताम पावल दाङ बारनाबासगी स्येकेमु खुङया़गी या़हबु पेहती ङ्यिहन्सीन।
13ओहले खुङ ङ्यी़गी ताम मा सिहन फान्ज्यो याकूबगी लाहङदी मासीन, “आदा-नो़हया़, सेन नाङदोङ! 14किन्ज्योगी राहङगी छेनकी तेहन्दाला लेहमेन क्यिहपाया़ नाहङले क्यिहपा च्यी़ दाम नाङसीन माएँ ताम सिमोनगी स्ये सिहन्दी येह। 15लुहङतेम्बाया़गीॱआङ छ्य़ेला दि ल़ेहमु म़ेदी प्री़हदी येहबा–
16‘दि ताम तिङले ङाह लो़ह ओहङज्ये येह ओहले
दाऊदती रोहम्ग्यो क्याहल्सीया़ येहपाराङ ज़ोज्ये येह,
ओहले ओ़ह क्याहल्सीकी खाटोया़ ङाहगी येहपाराङ जे़दी लाङज्ये येह। #आमो ९:११,१२
17ओहले ङाहगी राहङदीराङ ज़ोज्येला क़े क्याहप्क्योगी लेहमेन क्यिहपागी मिहया़ ङाहसाला ओहङज्ये येह।
18सुङदे चो़वो किन्ज्योगी सुङ नाङगे, मिहरोगी दि स्याहल तोहङलेराङ तेन नाङग्यो येहकें।’
19ओ़ह सोङबे ओहराङगी किन्ज्यो ङो़ले ओहङगेन्गी लेहमेन क्यिहपागी मिहया़ला तुहक्पु तेर्च्ये मेहयोहङगे म़ेदी याकूबकी ताम था-च्येसीन। 20यिहॱनाङ ओहराङगी खुङया़ला दि तामया़गी तेहन्दाला ङोह स्येॱराङ च्य़ू कोहएँ, कुला तेरक्यो ची़बु काहल्ग्योगी साहज्ये से़हया़ माहसाह, छ्येउ-छ्येंमु माहबे ओहले ज्यिङबा च्यिर्ते सेक्यो सेम्ज्येनया़गी स्या दाङ ठा़ माहसाह।#प्रस ३४:१५-१७; लेवी १८:६-२३; लेवी १७:१०-१६ 21च्यिबेमाना मोशागी नाङग्यो छ्य़े-ठिमला तोहङ यिहन्ज्युराङ थाङ सोएँ ङ्यिहमा-टाहङमाराङ छो़खाङला लोप्क्यो सोङबे मोशागी लोप्च्युङ क्याहसा टाहङमाराङ मिहया़गी ङोह स्य़े सिहन्दी येह।”
लेहमेन क्यिहपागी यिह-छ्य़ेबाया़की तेहन्दाला प्रुहक्योगी यिहगी
22ओहले ल़ेह-पेनया़, एल्डरया़ दाङ यरूशलेमगी छेन्छोककी मिहया़गी टे़ह क्याहप्ती मिह ङ्यी़ दाम्दी पावल दाङ बारनाबास ङ्याम्बु एन्टिओखिया क्याहसाला ताङज्ये ठाबे ऩेसीन। ओहले आदा-नो़हया़गी पाहरक्यीले यहूदा माएँगी बारसाबास दाङ सिलासला दाम्सीन। खुङ ङ्यी़दी किन्ज्योला यिह-छ्य़े पेहकें मिहया़गी एल्डर यिहन्गे। 23ओहले छेन्छोककी थाम्ज्यीराङ मिहया़गी खुङया़ला दि ल़ेहमु यिहगी च्यी़ प्री़हदी ताङ चाहङसीन–
“एन्टिओखिया, सिरिया दाङ किलिकिया साने़या़ला तेहकेन्गी लेहमेन क्यिहपागी किन्ज्योला यिह-छ्य़े पेहक्यो आदा-नो़हया़ दाङ आज्यी-नुहमुया़, ल़ेह-पेनया़ दाङ एल्डरया़ थाम्ज्यीलाराङ टास्यी-देले। 24ङ्यिहगी पाहरक्यीले रेहरे मिहया़ ओहङदी राहङ फे़बेया़ला फिर्च्या लोप्च्युङया़ तेर्ते ज्यिबुराङ तुहक्पु तेर्सीन लो माएँ ताम ङ्यिहगी थ़ेसीन। यिहॱनाङ ओ़ह मिहया़ला ङ्यिहगी ताङग्यो मिहन। 25ओ़ह सोङगोराङ ङ्यिहगी टे़ह क्याहप्ती ख्यासाला ओहराङगी च्याहम्बु बारनाबास ताङ पावल ङ्याम्बु मेहन्दा ङ्यी़ दाम्दी ताङज्ये ठाबे ऩेसीन। 26पावल दाङ बारनाबास चो़वो येशू मास्यीकाकी छ्या़लेगी तेहन्दाला स्यि कोहॱनाङ स्यि ख़ूएँगी मिहया़ यिहन्गे। 27दि नो़हया़ ङ्याम्बु ङ्यिहगी यहूदा दाङ सिलासॱआङ ताङ चाहङदी येह। ङ्यिहगी प्रुहक्योगी यिहगी, खुङगीॱआङ राहङ फे़बेया़ला स्येच्ये येह। 28ता़ह ची़ कोहएँगी तामया़ म़ेदी लेहमेन, राहङ फे़बेया़ला मोशागी नाङग्योकी ठिमगी खुर्पु खुर मी़हच्य़ूज्येला किन्ज्योगी नाम्पार-ताहक्पा थुगी ङ्यिहला तेन नाङसीन। 29राहङ फे़बेया़गी कुला तेरक्यो से़हया़ माहसाह,
ज्यिङबा च्यिर्ते सेक्यो मार्च्येगी स्या दाङ
ठा़या़ माहसाह ओहले छ्येउ-छ्येंमु माहबे।
दि तामया़ ङो़ले राहङ फ़ेबेॱया
जेम्दे तेहसीन मानानी या़हबु ओहङज्ये येह।
ख्या फे़बेया़ला मा कोहएँगी तामया़ देजेराङ यिहन। टास्यी-देले” म़ेदी यिहगी प्रुहसीन।
30ओहले खुङ फे़बे ज़्यिगी दि यिहगी थो़दी एन्टिओखिया क्याहसाला काहल्सीन। ओ़हला लेप्तीले खुङ फे़बेया़गी छेन्छोककी मिह थाम्ज्यीला क़े क्याहप्ती ओ़ह यिहगी तेर्सीन। 31ओहले यिहगीला लोप्ताम क्याहप्क्यो ताम टा़हदी खुङ फ़ेबेॱया ज्यिबुराङ क़ेहनाङ पेहसीन। 32यहूदा दाङ सिलास खुङ फे़बे ङ्यिकाराङ लुहङतेम्बा यिहन्गे सोङबे किन्ज्योला यिह-छ्य़े पेहक्यो नो़हया़ला सुङ लाहमले लोप्ताम क्याहप्ती खुङ फे़बेया़ला आ़र क्ये च्य़ूसीन। 33ओहले ङ्यिहमा तोबा थु खुङ फ़ेबेॱया ओ़हला तेहसीन, ओहले यहूदा दाङ सिलासदी आदा-नो़हया़ ङ्याम्बु “ता़ह डो कोहसीन” म़ेदी कोहङबा स्यी़हदी राहङगी यरूशलेमगी छेन्छोकलाॱराङ सेम लो तेहमु पेहती लोह काहल्सीन। 34[यिहॱनाङ सिलासलादी ओ़हलाराङ तेहच्ये सेम क्ये़दी येहकें।#१५:३४ माहङबुराङ ग्रीक तामगी बाइबलला दि आङ-टा़हङ प्रुहक्यो म़ेह। ]
35पावल दाङ बारनाबासती लोप्च्युङ तेर्केॱराङ चो़वोगी सुङ स्येती लेहमेन मिहया़ ङ्याम्बु एन्टिओखियाला तेहसीन।
पावल दाङ बारनाबास खा फे़क्यो
36ङ्यिहमा तोबा तिङले पावलगी बारनाबासला, “डो, ओहराङगी लेहङगु स्ये ज़्या़क्योगी क्याहसाया़ला काहल्दी येहपाराङ लेहमा च्यी़ थु डोएँ। ओहले ओ़हला तेहकेन्गी चो़वो छ्येवा येशूला यिह-छ्य़े पेहकेन्गी आदा-नो़हया़ काहन्डुमु दुबा म़ेदी ङ्याहम च्येच्ये” म़ेदी मासीन। 37ओहले बारनाबासकी मर्कूस माएँ यूहन्नालाॱआङ ङ्याम्बुराङ ख्येर्ती डोज्ये सेम पेहसीन। 38यिहॱनाङ पावलगी “मर्कूसला ङ्याम्बु ख्येर्ती डोज्येला या़हबु मेहयोहङगे” म़ेदी मासीन। च्यिबे मासीमाना मर्कूस ल़ेह सिहन्दा माहच्येह पेहती पाम्फिलिया साने़लेगी खुङया़ला क्युर ज़्या़दी खो लो़ह ओहङग्यो येहकें।#ल़ेह १३:१३ 39दि तामगी पेहती पावल दाङ बारनाबासकी पाहरक्यीला ठाक-ठुक काहल्सीन। ओहले पावल दाङ बारनाबास खा फ़ेदी बारनाबासकी मर्कूसला ख्येर्ती छो-क्याहम्जोकी लाहमले पेहती साइप्रस क्याहल-खापला काहल्सीन।
40ओहले पावलगी सिलासला दाम्सीन, ओहले आदा-नो़हया़गी खुङ फे़बे ङ्यी़ला किन्ज्योगी काटीनला च्योल्दी ताङ चाहङसीन। 41ओहले खुङया़गी छेन्छोकया़ला आ़र क्ये च्य़ूएँराङ खुङ ङ्यी़ सिरिया दाङ किलिकिया साने़लेगी पेहती काहल्सीन।
Currently Selected:
ल़ेह-पेन 15: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
