ल़ेह-पेन 12
12
हेरोद क्याहल्बुगी तुहक्पु तेरक्यो
1ओ़ह ती़हजीला हेरोद क्याहल्बुगी छेन्छोककी आदा-नो़हया़ला ज़ुङदे ज्यिबुराङ तुहक्पु तेर्च्ये छ़ूसीन 2ओहले खोगी यूहन्नागी आदा याकूबला पादाङगी से च्य़ूसीन। 3दि ल़ेहला यहूदीया़ क़ेहनाङ पेहक्यो थोङदी हेरोद क्याहल्बुगी पत्रुसॱलाङ ज़ुङज्ये छोल्सीन। ओ़ह ती़हजीला यहूदीया़की थार्पा छ्येपा येहकें। 4ओहले हेरोद क्याहल्बुगी पत्रुसला ज़ुङदे चोन-खाङला लू़सीन, ओहले थार्पा छ्येपा तिङले खोला मिहया़गी दिनला ख्योङज्ये साम्लु ताङदे खोला सुङज्येला माक्मी मेहन्दा च्यी़रुला मिह ज़्यि ज़्यिगी छो़बा जे़दे चि क्याहप्सीन।#प्रस १२:१-२७ 5दि ल़ेहमु पेहती पत्रुसला चोन-खाङ नाहङला ज़्या़सीन, यिहॱनाङ पत्रुसगी तेहन्दाला छेन्छोकगी किन्ज्यो ङ्याम्बु स्युक छ्यिम्बु पेहती सोल्वाङ ताप्ते तेहती येहकें।
चोन-खाङले पत्रुस थेन्ग्यो
6हेरोद क्याहल्बुगी पत्रुसला मिहया़गी दिनला ख्योङगे ङ्यिहमागी तोहङमा कुहङमु पत्रुस माक्मी ङ्यी़गी पाहरक्यीला ङ्याहल तेहते येहकें। ओहजेला पत्रुसला च्याल्दा ङ्यी़गी ताहम्दी येहकें ओहले लेहमेन माक्मी ङ्यी़दी कोह ग्या़ला सुङ तेहती येहकें। 7याहङमे-याहङराङ चो़वो छ्येवागी स्यिहङगामकी स्याहप्च्यी च्यी़ फेप नाङसीन, ओहजेला चोन-खाङ नाहङला क्या-साङे काहल्सीन। ओहले स्यिहङगामकी स्याहप्च्यीगी, “ग्यो़बा लोहङ!” सुङदी पत्रुसगी चिमाला फुल्दी ङ्यि स़े च्य़ू नाङसीन। ओ़हजेलाराङ पत्रुसकी लाहक्पाला ताहम्ग्योगी च्याल्दा ङ्यी़ स्यी़हदी साला ताहप्सीन। 8ओहले स्यिहङगामकी स्याहप्च्यीगी, “कारा च्यिङदोङ! लेकाम केहन्दोङ!” म़ेदी सुङ नाङसीन ओहले पत्रुसगी ओ़हठीॱराङ पेहसीन, ओहले स्यिहङगामकी स्याहप्च्यीगी, “ख्ये योल्सेन योल्दी ङाहगी तिङदा तिङ स्यो!” म़ेदी सुङ नाङसीन। 9ओहले पत्रुस स्यिहङगामकी स्याहप्च्यीगी तिङदा तिङ काहल्सीन। यिहॱनाङ स्यिहङगामकी स्याहप्च्यी लाहमले दि ताम तेहम्बाराङ यिहम्बानी म़ेदी खोला क्यी़हॱआङ म़ेहबा येहकें, खोगीनी मिलामला ज्याल्गा नाङग्यो दु म़ेदी ऩे तेहक्यो येहकें। 10ओहले स्यिहङगामकी स्याहप्च्यी दाङ पत्रुस तोहङगी कोह दाङ तिङमा कोह च्येती फिला थेन्गेन्गी क्याहसाकी च्या़गी कोह छ्यिम्बुला लेप्केमु ओ़ह कोह खोराङॱराङ खा फ़ेसीन, ओहले खुङ ङ्यी़ फिला थेन्दी लाहम स्युहएँ ती़हजीला स्यिहङगामकी स्याहप्च्यी ओ़हलाराङ फेत तोर्सीन।
11ओहजेला गा पत्रुसगी टेहम्बा सिहन्सीन, ओहले खोगी मासीन, “ता़ह ङाहला तेहम्बाराङ क्यी़ह ज्योर्सीन, चो़वो छ्येवागी राहङगी स्यिहङगामकी स्याहप्च्यी ताङ नाङदी हेरोद क्याहल्बुगी लाहक्पा दाङ यहूदीया़की पेहच्ये छोल्ग्योगी ल़ेहया़ ङो़ले ङाहला थार च्य़ू नाङग्यो दुबा।”
12दि ताम ह्अ कोह फान्ज्यो खो मर्कूस माएँ यूहन्नागी आमा, मरियमगी खाङबाला काहल्सीन। ओ़हला मिह माहङबुराङ जोम्दी किन्ज्योला सोल्वाङ ताप तेहती येहकें। 13ओहले पत्रुसगी क़े क्याहप्ती कोह तुहङगेमु रोदा मिहन थो़क्यो यो़मु च्यी़गी कोह खा फे़ ओहङसीन। 14पत्रुसकी क़े ङोह स्य़ेदी मोह क़ेहनाङ लाहङदी कोहॱराङ खा मा़हफे़बा नाहङला छ्योङदी काहल्दी, “पत्रुस कोह ग्या़ला लाहङदी तेहक्यो दुबा!” म़ेदी मासीन। 15“ख्ये ङ्योमा काहल्बा नि” म़ेदी खुङ बा़लगी मासीन। ओहले मोहगी मासीन, “तेहम्बाराङ पत्रुसराङ यिहम्बा” म़ेदी क्याहल्सीन। ओहले खुङया़गी, “ओ़ह खोगी स्यिहङगामकी स्याहप्च्यी यिहन्डो” म़ेदी मासीन।
16पत्रुसगी कोह तुहङदेॱराङ तेहसीन। ओहले खुङगी कोह खा फ़ेगेमु पत्रुसला थोङसीन ओहजेला खुङया़ ज्यिबुराङ ह्अ ल़ेहसीन। 17ओहले पत्रुसगी, “ख्या मे़हमेया़ खाजुम तेह” म़ेदी ला़हदाप पेहसीन। ओहले चो़वो छ्येवागी खोला चोन-खाङले तेन नाङग्योकी ताम थाम्ज्यीराङ स्येसीन। ओहले, “याकूब दाङ लेहमेन आदा नो़हया़ॱलाङ दि ताम स्ये तेर” म़े ज़्या़दी खो ओ़ह ग्या़ले तेन्दी काहल्सीन।
18नाहम लाहङ फान्ज्यो पत्रुसला ता़ह च्यि काहल्बा यिहन्डो म़ेदी ओ़ह सुङज्येला तेहक्यो माक्मीया़ राहङ नाहङदुङ कलाम पेहसीन। 19क्याहल्बु हेरोदगी पत्रुसला काहजे छोल्देॱआङ च्य़ेह माहसीहन फान्ज्यो, माक्मीया़ला टी़हदाप पेहसीन ओहजेला खुङया़गी च्यिॱआङ ल़ेहन क्याहप मा़हखु ओहले हेरोदगी खुङया़ला सेच्येला का नाङसीन। ओहले हेरोद यहूदीयाले कैसरिया माएँ लुहङबाला काहल्दी ओ़ह ग्या़लाराङ तेहसीन।
क्याहल्बु हेरोद स्यिक्यो
20ओहजे काहङला हेरोद टुरोस दाङ सीदोन क्याहसाकी मिहया़ला ज्यिबुराङ स्यिहताङ लाहङ तेहती येहकें। ओ़ह क्याहसा ङ्यी़ला तेहकेन्गी मिहया़गी राहङगी क्या़हबेया़ माहङ-छ्येवा हेरोदकी लुहङबालेगीराङ ख्येर कोहउ येहकें। ओ़ह सोङबे खुङ क्याहसा ङ्यी़ डी़सीम्बाराङ हेरोदला थू़ज्ये सेम पेहसीन। ओहले खुङगी क्याहल्बु हेरोदसाला ल़ेह पेहकेन्गी मिह बलस्तस माएँदीला लाहक्पाला लेहन्दी क्याहल्बु ङ्याम्बु ज्याल्ज्ये म़ेदी मासीन।
21ताहम्ज्या ज़्या़क्योगी ङ्यिहमाला क्याहल्बु हेरोदगी क्याहल्बुगी नाहम्सा केहन्दी हेरोद राहङगी क्याहल ठिला तेहसीन। ओहले मिह थाम्ज्यीगी दिनला खाम छ्यिम्बु पेहती ताम मासीन। 22ओहले मिहया़गी, “दिनी किन्ज्योगी सुङ-क़े दुबा, मिहतीनी मिहम्बा दुबा!” म़ेदी क़े तेन्सीन। 23हेरोदगी किन्ज्योला चा़ माहबेबा सोङबे ओ़हजेलाराङ चो़वो छ्येवागी स्यिहङगामकी स्याहप्च्यी च्यी़गी खोला क्याहप्सीन ओहले खो च्योङलोङ क्याहप्ती स्यिसीन।
24किन्ज्योगी सुङ फेल्दी टाहम्दी काहल्सीन।
25बारनाबास दाङ शाऊल राहङगी ल़ेह सिहन्दा च्ये फान्ज्यो यरूशलेमले लो़ह काहल्सीन। खुङया़ मर्कूस माएँ यूहन्नाला राहङ ङ्याम्बुराङ ख्येर्ती यरूशलेमले एन्टिओखिया क्याहसाला लो़ह ओहङसीन।
Currently Selected:
ल़ेह-पेन 12: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
