ल़ेह-पेन 13
13
बारनाबास दाङ शाऊलला दाम्ग्यो
1एन्टिओखिया क्याहसागी छेन्छोकला लुहङतेम्बाया़ दाङ लोप्च्युङ तेर्केन मिहया़ माहङबुराङ येहकें। खुङया़ बारनाबास, आफ्रिकागी शिमियोन, कुरेनीगी लुकियस, क्याहल्बु हेरोद ङ्याम्बुराङ छारक्योगी मनेन दाङ शाऊल यिहन्गे। 2ओहले खुङ फ़ेबेॱया ङ्युङने तेहती सोल्वाङ ताप्ती चो़वो छ्येवाला त़ेरा फुल तेहके ती़हजीला किन्ज्योगी थुगी खुङया़ला सुङ नाङसीन, “शाऊल दाङ बारनाबासला ङाहगी का़हन्दी ल़ेहगी तेहन्दाला दाम्ग्यो, ओ़ह ल़ेहला खुङया़ला खा फ़ेदोङ!” 3ओहले खुङ फे़बेया़गी येहपाराङॱआङ ङ्युङने तेहती खुङ ङ्यी़गी थो़ला लाहक्पा ज़्या़दी सोल्वाङ ताप्ती ताङ चाहङसीन।
साइप्रसगी छोलिङला
4किन्ज्योगी थुगी ताङ नाङग्यो सोङबे शाऊल दाङ बारनाबास सेलुकिया क्याहसाला काहल्सीन। ओहले ओहलेगी खुङ ङ्यी़ छ्यु-टुहला जा़दे साइप्रस साने़ला काहल्सीन। 5ओहले सलामीस माएँ क्याहसाला लेप्ती यहूदीया़की छेन्छोकला काहल्दी किन्ज्योगी या़हबु लेहङगु स्येसीन। खुङ ङ्यी़ला रो़ह पेहच्येला मर्कूस माएँगी यूहन्नाॱआङ खुङ ङ्याम्बुराङ येहकें।
6ओहले खुङया़ साइप्रस छोलिङगी सा काहङगी लाहमले पेहती पाफोस साने़ थु लेप्सीन, ओ़ह ग्या़ला खुङगी यहूदी मी़रिप तेन्गे मिह च्यी़ला थ़ूसीन। खो राहङगी राहङलाराङ, “ङाह लुहङतेम्बा यिहन” म़ेदी माउ येहकें। खोगी मिहनती बार-येशू यिहन्गे। 7ओहले खो साइप्रस छोलिङगी रोमी स्युहङ-पेन सर्गियस पौलुसकी खाङबाला डे़देराङ तेहको येहकें। सर्गियस पौलुस रिहक्पा छ्यिम्बु येहकेन्गी मिह येहकें। ओहले खोगी किन्ज्योगी सुङ ङ्यिहन्ज्ये सेम पेहती बारनाबास दाङ शाऊलला क़े क्याहप्च्येला ताङ चाहङसीन। 8यिहॱनाङ मी़रिप तेन्गे एलुमासगी (ग्रीक क़ेलुला एलुमास माक्योदी मी़रिप तेन्गेन्गी मिह यिहम्बा) बारनाबास दाङ शाऊलला तुहक्पु तेर्ती स्युहङ-पेन छ्यिम्बुगी येशूला यिह-छ्य़े माहबेच्यु म़ेदी लो़ज्ये छोल्सीन। 9शाऊल (खोला पावल म़ेदीॱआङ माउ येहकें) किन्ज्योगी थुगी काहङदे एलुमासला छ्यारे पेहती त़ेदी मासीन, 10“ख्ये थाम्ज्यी टाहङदेनकी टाह यिहम्बा। ख्ये चिहन क्याहप्केन दाङ ल़ेह ङ्येहम्बा पेहकें ती़ह गो-छ्येवागी पेहजा यिहम्बा। ख्ये चो़वोगी थेक्का लाहमया़ला ख्योक्तोङ ज़ोज्ये छोल्गे? 11ता़ह, त़ेदोङ। चो़वो छ्येवागी ङ्य़ेहबा ख्ये थो़ला बाप्ती येह, ता़ह ख्येगी मी़ माहथोङ पेहती ङ्यिहमा तोबा थु ङ्यिहमागी क्या-साङे थोङ ङ्युहङज्ये म़ेह।” ओ़हजेलाराङ खोगी मी़ला मुक्पा नाहक्पु ल़ेहमु च्यी़ ओहङसीन ओहले खोगी मी़ थोङ मा़हखु, ओहले का़हलेॱआङ मिह च्यी़गी खोगी लाहक्पाला ज़ुङदी ॱठिते ख्येर तेर्केननी म़ेदी खो फार छुर यू़हज्ये छ़ूसीन।
12चो़वो छ्येवागी सुङदेनला दि ल़ेहमु ओङ छ्यिम्बु थोङदी सर्गियस पौलुस ह्अ ल़ेहसीन, ओहले खोगी चो़वो छ्येवाला सेमले खाल्सीन।
पिसिदिया साने़की एन्टिओखिया क्याहसाला
13पाफोस क्याहसालेगी पावल दाङ खोगी रो़हया़ छ्यु-टुहला जा़दे पाम्फिलिया साने़की पर्गा माएँ क्याहसाला लेप्सीन। ओ़हला लेप्ती यूहन्नागी पावल दाङ बारनाबासला क्युर ज़्या़दी खो यरूशलेमला लो़ह काहल्सीन। 14ओहलेगी पावल दाङ बारनाबासती पर्गालेगी पिसिदिया साने़की एन्टिओखिया क्याहसाला काहल्सीन। ओहले थाङ सोएँ ङ्यिहमाला यहूदीया़की छो़खाङला काहल्दी तेहसीन। 15मोशागी नाङग्यो छ्य़े-ठिम दाङ लुहङतेम्बाया़गी प्रुहक्योगी छ्य़े टा़ह फान्ज्यो छो़खाङगी गोबाया़गी पावल दाङ बारनाबासला क़े क्याहप्ती मासीन, “ए नो़हया़! राहङ फे़बेया़गी मिहया़ला निङरु क्ये च्य़ूएँगी ताम सुङ नाङज्ये येहनानी सुङ नाङदोङ।”
16ओहले पावल लाहङदी मिहया़ला ला़हदाप पेहती मासीन, “ए इस्राएल क्याहल-खापगी मिहया़ दाङ किन्ज्योला ज्यिक्पा पेहकेन लेहमेन क्यिहपागी मिहया़, सेन नाङदोङ, 17इस्राएली क्यिहपागी किन्ज्योगी ओहराङगी चावाया़ला दाम नाङसीन ओहले खुङ फ़ेबेॱया मिश्र क्याहल-खापला ज़्य़ू नाङगेमु खुङ फे़बेया़ला क्यिहपा छ्यिम्बु ज़ो नाङसीन। राहङगी ओङ तेन नाङदी किन्ज्योगी खुङ फे़बेया़ला मिश्र क्याहल-खापले तेन नाङसीन।#प्रस १:७; प्रस १२:५१ 18ओहले लोह ज़्यिप-च्यु थु सा काम्बुला तेहकेमु किन्ज्योगी खुङ फे़बेया़ला थुज्यी ज़ी़ नाङसीन।#गन्ती १४:३४; व्य १:३१ 19ओहले किन्ज्योगी कनान क्याहल-खापगी क्यिहपा तिहनला तोङ च्य़ू नाङदी ओ़ह क्याहल-खाप ओहराङगी चावाया़ला नाङसीन।#व्य ७:१; यहो १४:१ 20ओहजेला लोह ज्य़िप्क्या दाङ ङाप्च्यु काहल सिहन्दी येहकें। ओ़ह तिङले किन्ज्योगी खुङया़गी पाहरक्यीला ठिम ताङज्येला ठिम-पेनया़ दाम नाङसीन। ओ़ह ठिम-पेनया़ च्यी़गी तिङले च्यी़ पेहती शमूएल लुहङतेम्बा थु ठिम ताङसीन।#न्याय २:१६; १ शमू ३:२० 21ओ़ह तिङले ओहराङगी आख्ये मे़हमेया़गी क्याहल्बु कोहकें म़ेदी लाङसीन ओहले किन्ज्योगी खुङ फे़बेया़ला बेन्यामीन माएँ क्यिहपागी कीशकी पुह शाऊलला क्याहल्बु ज़ो नाङसीन। ओहले क्याहल्बु शाऊलगी लोह ज़्यिप्च्यु थु क्याहल्बु पेहसीन।#१ शमू ८:५; १ शमू १०:२१ 22किन्ज्योगी खोला तेन नाङ फान्ज्यो दाऊदला क्याहल्बु ज़ो नाङसीन। दाऊदगी तेहन्दाला किन्ज्योगी दि ल़ेहमु सुङ नाङदी येह, ‘ङाहगी यिशैगी पुह दाऊदला ङाहगी सेमगी ने़जेबा मिह ज्योर्सीन, ता़ह खोगी ङाहगी सेमला ने़जेबा ल़ेहमु ल़ेहया़ थाम्ज्यीराङ पेहच्ये येह।’#१ शमू १३:१४; १ शमू १६:१२; भज ८९:२० 23राहङगी ज़्या़ नाङग्योकी ताहम्ज्या तेहन्दा डुप च्यु नाङदी किन्ज्योगी इस्राएली क्याहल-खापकी मिहया़गी तेहन्दाला क्याहल्बु दाऊदगी क्यिहलेगीराङ थार्पा थोप च्य़ू नाङगेन मेहन्दा च्यी़ ताङ नाङसीन, ओ़हदीॱराङ येशू यिहम्बा। 24चो़वो छ्येवा फेप नाङगे म़ेदी तोहङले यूहन्नागी इस्राएलगी थाम्ज्यीराङ मिहया़ला ‘तिहक्पागी ल़ेहया़ क्युर्ती सेमगी स्या़बा पेहती बप्तिस्मा लेहन्दोङ’ म़ेदी प्रा साल्ग्यो येहकें।#मर्क १:४; लूक ३:३ 25राहङगी ल़ेह सिहन्दा च्येच्ये पेहकें ती़हजीला यूहन्नागी मासीन, ‘ख्यागी ङाहला सु यिहम्बा ने़उ दुबा? ङाहनी ख्याया़गी कू़हदी तेहक्योगी मिह मिहन। ङाह तिङले मेहन्दा च्यी़ फेप नाङज्ये येह, ङाहनी मिहरोगी स्याहपगी लेकाम स्युज्येॱलाङ सी़हज्ये म़ेह।’#यूह १:२०; मत्ती ३:११; मर्क १:७; लूक ३:१६; यूह १:२७
26अब्राहामगी क्यिहकी छार्क्यीन, इस्राएली आदा-नो़हया़ दाङ किन्ज्योला ज्यिक्पा पेहकेन लेहमेन क्यिहपागी ङ्येन्जेन-ङ्येहवाया़ दि थार्पागी लेहङगु ओहराङ थाम्ज्यीगी तेहन्दाला किन्ज्योगी ताङ नाङग्यो यिहम्बा। 27ओहले यरूशलेमगी मिह दाङ पोम्बोया़गी येशूॱराङ थार्पा नाङगेन्गी किन्ज्यो यिहन म़ेदी ङोह स्य़े मा़हखु। थाङ सोएँ साता टाहङमाराङ लुहङतेम्बाया़गी छ्य़ेला प्री़हदी ज़्या़क्योगी लुहङदेनया़ टा़हॱनाङ खुङया़गी ङोह मा़हस्ये। ओहले खुङगी येशूला सेत्ती छ्य़ेला किन्ज्योगी तेहन्दाला प्रुहक्योगी लुहङदेन तेहन्दा डुप च्य़ूसीन। 28येशूला सेॱराङ कोहएँगी च्यिॱआङ ङ्य़ेहबा मे़हॱनाङ खुङया़गी येशूला सेॱराङ कोहकें म़ेदी पिलातसला मासीन।#मत्ती २७:२२,२३; मर्क १५:१३,१४; लूक २३:२१-२३; यूह १९:१५ 29दि रोहवा पेहती येशूगी तेहन्दाला छ्य़ेला प्रुहक्योगी थाम्ज्यीराङ ताम खुङया़गी तेहन्दा डुप च्य़ू-फान्ज्यो खुङगी येशूला क्याहङस्यीङले पाप्ते फुक्पा नाहङला ज़्या़सीन।#मत्ती २७:५७-६१; मर्क १५:४२-४७; लूक २३:५०-५६; यूह १९:३८-४२ 30यिहॱनाङ किन्ज्योगी येशूला टोहङग्यो ग्या़लेगी सोम्बो ज़्याङ च्य़ू नाङसीन। 31ओहले गालील साने़ले येशू ङ्याम्बुराङ यरूशलेमला ओहङग्यो मिहया़गी ङ्यिहमा माहङबु थु येशूला ज्याल्सीन। ओहले ओ़ह मिहया़राङ दाङ-तिहरीङगी इस्राएली मिहया़गी तेहन्दाला येशूला ज्याल्ग्योगी पाङबु यिहन।#ल़ेह १:३ 32किन्ज्योगी ओहराङगी आख्ये मे़हमेया़ ङ्याम्बु ज़्या़ नाङग्योकी ताहम्ज्या दाङ या़हबु लेहङगुगी तामया़ ता़ह ङ्यिहगी राहङ फे़बेया़ला स्येको येह।#भज २:७ 33किन्ज्योगी खुङकी छार्क्यीनकी तेहन्दालाराङ तेहन्दा डुप च्य़ू नाङदी येह। येशूला टोहङग्यो ग्या़लेगी सोम्बो ज़्याङ च्य़ू नाङगेमु किन्ज्योगी ओ़ह ताहम्ज्या ओहराङगी तेहन्दालाराङ तेहन्दा डुप च्य़ू नाङग्यो यिहम्बा। ता़ह किन्ज्योगी मिहरोला टोहङग्यो ग्या़लेगी सोम्बो ज़्याङ च्य़ू नाङज्ये येह माएँ तामकी तेहन्दाला छ्ये़-लु ङ्यिपाला दि ल़ेहमु म़ेदी प्री़हदी येहबा–
‘ख्ये ङाहगी स़ेबु यिहन, तिहरीङ ङाह ख्येगी याहप काहल्दी येह।’
34येहपाराङ किन्ज्योगी मिहरोला टोहङग्यो ग्या़ले नाहमॱआङ मिहरुहल्गे जेती सोम्बो ज़्याङ च्य़ू नाङदी येह। दिगी तेहन्दाला किन्ज्योगी दि ल़ेहमु सुङ नाङदी येह–
‘दाऊद ङ्याम्बु ज़्या़ नाङग्योकी ताहम्ज्या नाम्पार-ताहक्पा दाङ मेलाम तेहम्बाराङ ङाह ख्याया़गी पाहरक्यीला ताङज्ये येह।’#यशै ५५:३
35ओहले येहपाराङ छ्य़े-लुगी लेहमेन ग्या़ला दि ल़ेहमु म़ेदी प्री़हदी येहबा,
‘किन्ज्योगी राहङगी नाम्पार-ताहक्पा मिहला रुहल च्य़ू नाङज्ये म़ेह।’#भज १६:१०
36दि ताम दाऊदगी राहङगी तेहन्दाला माक्यो मिहम्बा च्यिबेमाना किन्ज्योगी थुला ठुङग्योगी ल़ेह पेह सिहन्दी खोनी स्यिसीन ओहले खो राहङगी आख्ये मे़हमेया़ तो़हक्योगी फुक्पालाॱराङ तो़हसीन ओहले रुहल्दी काहल्सीन। 37यिहॱनाङ किन्ज्योगी येशूला टोहङग्यो ग्या़ले सोम्बो ज़्याङ च्य़ू नाङसीन ओहले येशूगी कुसोला रुहल च्यु माहनाङ। 38ओ़ह सोङबे आदा-नो़हया़ सेन नाङदोङ, ओ़ह येशू लाहमलेॱराङ तिहक्पा ता़हगे माएँ ताम राहङ फे़बेया़ला मोशागी छ्य़े-ठिमगी म़ेदी येहबा। 39येशूला यिह छ्य़ेगेया़ थाम्ज्यी तिहक्पा ङो़ले थार्पा ज्योर्ती किन्ज्योगी ज़ी़नाङला ठाबे सी़हगे। मोशागी नाङग्यो छ्य़े-ठिमगी मिहया़ला थार्पा तेर मी़हखुएँ। 40ओ़ह सोङबे ख्याया़ जेम्बु पेहतोङ, मिहन्सीमानानी लुहङतेम्बाया़गी सुङ नाङग्योकी स्याहल राहङ फ़ेबेॱया थो़ला बाप ओहङ–
41‘ए स्ये़हन्डील पेहकेन मिहया़, याहम्जेनज्यी ने़दोङ,
ओहले तोङदी सोङ!
च्यि मासीमाना, ख्याया़गी
ती़हजीला ङाह दि ल़ेहमु ल़ेह च्यी़ पेहच्ये येह।
ओहले दि रोहवा काहल्सीन म़ेदी का़हलेॱआङ मिह च्यी़गी ख्याया़ला स्येॱनाङ ख्याया़गी यिह छ्य़ेज्ये म़ेह’।”#हब १:५
42पावल दाङ बारनाबास छो़खाङलेगी थेन्दी डोज्ये पेहकेमु मिहया़गी, “तिङमा थाङ सोएँ ङ्यिहमाला येहपाराङ फेप्ते दि तामगी तेहन्दाला तोहरोङ ङ्यिहला स्ये नाङदोङ” म़ेदी स्युहसीन। 43छो़बा सिहन फान्ज्यो यहूदीया़ दाङ यहूदी छ्य़े पेहकें लेहमेन क्यिहपागी माहङबुराङ मिहया़ पावल दाङ बारनाबासकी तिङदा तिङ काहल्सीन। पावल दाङ बारनाबासकी खुङया़ ङ्याम्बु ताम म़ेदी “राहङ फ़ेबेॱया नाहम माॱनाङ किन्ज्योगी काटीनला ज्यू़दोङ म़ेदी स्युहसीन।”
44तिङमा थाङ सोएँ ङ्यिहमाला किन्ज्योगी या़हबु लेहङगु ङ्यिहन्ज्ये म़ेदी क्याहसाकी थाम्ज्यीराङ मिहया़ बुङजी क्याहप्ती ओहङसीन। 45मिह थाम्ज्यी बुङजी क्याहप्ती ओहङग्यो थोङदी यहूदीया़गी पावल दाङ बारनाबासला ठादो पेहसीन। ओहले पावलगी माक्यो तामला खुङया़गी टाह पेहती स्ये़हन्डील पेहसीन। 46यिहॱनाङ पावल दाङ बारनाबासकी आप छ्य़ेदी मासीन, “थाम्ज्यी म़ेदी तोहङले किन्ज्योगी या़हबु लेहङगु राहङ फे़बेया़ला स्येॱराङ कोहच्ये येहकें, यिहॱनाङ राहङ फे़बेया़गी सेन्ज्ये थुराङ जे मेहनाङ दु। नाहमॱआङ स्यिज्ये म़ेहबागी मिहली ज़ाङबु ज्योर्च्येला राहङ फे़बेया़गीराङ का़ नाङसीन। ओ़ह सोङबे ता़ह ङ्यिह लेहमेन क्यिहपागी मिहया़साला डोएँ। 47चो़वो छ्येवागीराङ ङ्यिहला दि ल़ेहमु पेहतोङ सुङदी का नाङदी येह–
‘जाम्बुलीङगी फार्केन सुहर थु मिहया़गी थार्पा ज्योर्च्यु म़ेदी
ङाहगी ख्याया़ला लेहमेन क्यिहपागी मिहया़गी पाहरक्यीला क्या-साङे डो च्य़ूज्येला ताङग्यो यिहन’।”#यशै ४२:६; ४९:६
48दि ताम थे़दी लेहमेन क्यिहपागी मिहया़ क़ेहनाङ पेहती किन्ज्योगी नाङग्योकी या़हबु लेहङगुला ची़नाङ पेहसीन। ओहले नाहमॱआङ स्यिज्ये म़ेहबागी मिहली ज़ाङबु थोप्च्येला दाम्ग्योया़गी चो़वो छ्येवा येशूला यिह-छ्य़े पेहसीन।
49चो़वोगी सुङ ओ़ह लुहङबागी थाम्ज्यीराङ ग्या़या़ला टाहम्सीन। 50यिहॱनाङ यहूदीया़गी छ्य़ेसेम पेहकें दाङ मिहन थोप्क्यो पी़हमी-पेहजाया़ ओहले क्याहसाकी गोबाया़ला ताम ख्येर क्याहप्ती पावल दाङ बारनाबासला ओ़ह दे-खामले ङेसीन। 51ओहले पावल दाङ बारनाबासकी खुङया़ला ज्यी़-ङोर तेर्ती राहङगी काङबाकी थाल्बी प्रू़ ज़्या़दी खुङ आइकोनियन साने़ला ओहङसीन।#मत्ती १०:१४; मर्क ६:११; लूक ९:५; १०:११ 52ओहले स्याहप्च्यीया़दी नाम्पार-ताहक्पा थुगी काहङदे सेम काहसो पेहती तेहसीन।
Currently Selected:
ल़ेह-पेन 13: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
