ମାତ୍ତିଉ 27

ପିଲାତୁସ୍ ରାଃ ନାଡ଼େଏ ୟୀଶୁ

(ମାର୍କୁ. 15:1; ଲୁକା. 23:1-2; ଯୋହା. 18:28-32)

1ସେତାଃ-ଇଦାନ୍ ଲୋଃ ଗି ସବେନ୍ ପ୍ରାଧାନ୍ ୟାଜାକ୍‍କୋ ହାର୍ ହୋଡ଼ୋକୋୱାଃ ମାରିହୋଡ଼ୋକୋ ୟୀଶୁ କେ ଗୋଏଃ ଲାଗିନ୍ ବିଚାର୍ କେଦାକୋ। 2ଇନ୍‍କୁ ଇନିଃକେ ଥୋଲ୍‍କିଜାକୋ ହାର୍ ଇଦିକେତେ ପିଲାତୁସ୍ ହାକିମ୍ ରାଃ ତିଈ ରେ ଜିମା କିଜାକୋ।

ୟାହୁଦା ଆଏଃଗି ଫାଶୀ ଜାନାଏ

(କୁଲା. 1:18-19)

3ଏନ୍ତେ ଚିମ୍ତା ୟାହୁଦା ଅକନିଃ ୟୀଶୁ କେ ସାବ୍ ରିକା ନିଈ ନେଲ୍‍କେଦାଏ ଚି ଇନିଃ ଦୋଷୀ ହୋବାଜାନାଏ ଦୋ ଇନିଃ ପାସ୍ତାଅ କେଦାଏ ହାର୍ ଏନ୍ ତିସ୍ ଠୁ ରୂପା ରାଃ ଶିକା କୋକେ ପ୍ରାଧାନ୍ ୟାଜାକ୍‍କୋ ହାର୍ ମାରିହୋଡ଼ୋକୋ ତାଃ ଆଉ ରୁଆଡ଼୍ କେଦାଏ। 4ହାର୍ କାଜିକେଦାଏ, “ଇଙ୍ଗ୍ ନିର୍ଦୋଷ୍ ହୋଡ଼ କେ ସାବ୍ ରିକା କେତେ ପାପ୍ କେଦାଇଙ୍ଗ୍? ଇନ୍‍କୁ କାଜିକେଦାକୋ, ଆଲେକେ ଚିନାଃ? ଆମ୍ ଗି ସାରିମ୍।” 5ଏନ୍ତେ ଇନିଃ ଏନ୍ ରୂପା ରାଃ ଶିକା କୋକେ ମାନ୍ଦିର୍ ରାଃ ରାଚା ରେ ଦୁଡ଼ିଙ୍ଗ୍ କେତେ ସେନୋଃ ଜାନାଏ, ହାର୍ ମାନ୍ଦିର୍ ରାଃ ବାହାରି ସେନ୍ କେତେ ଆଏଃଗି ଡୁଙ୍ଗା ଗୋଏଃ ଜାନାଏ। 6ପ୍ରାଧାନ୍ ୟାଜାକ୍‍କୋ ଏନ୍ ରୂପା ରାଃ ଶିକା କୋକେ ଇଦିକେତେ କାଜିକେଦାକୋ, “ନେୟାକେ, ଭାଣ୍ଡାର୍ ରେ ମାଣ୍ଡାଅ ତେୟାଃ ଆଲେୟାଃ ଆଇନ୍ ହିସାବ୍ ରେ ଠାଉକା ନାହାଲା, ଚିୟାଃଚି ନେୟା ମାୟୋମ୍ ରାଃ ଗୋନୋଙ୍ଗ୍ ତାନାଃ।” 7ଏନାତେ ଇନ୍‍କୁ ବିଚାର୍ କେତେ ଏନ୍ ଟାକାରେ ଏଟାଃ ଦିଶୁମ୍ ରେନ୍ କୋ ତୋପାଅଃ ଲାଗିନ୍ତେ କୁମ୍ଭାର୍ ରାଃ ଅତେ କେ କିରିଙ୍ଗ୍ କେଦାକୋ। 8ନେୟାଲାଗିନ୍ ଏନ୍ ଅତେ ଇସିଙ୍ଗ୍ ସାନ୍ତେ ମାୟୋମ୍ ରାଃ ଅତେ କାଜିୟୋଗା। 9ଏନ୍ତେ ଅକନ୍ ବାଚାନ୍ ୟିର୍ମିୟାହ୍ ନାବୀ ରାଃ ହୋରାତେ କାଜିଲେନା ଏନା ପୁରା ଜାନା, “ଇନ୍‍କୁ ଏନ୍ ତିସ୍ ଟାକା ମାନେ ଏନ୍ ଠାହ୍‍ରାଓ କାନ୍ ଗୋନୋଙ୍ଗ୍ କେ (ଅକନାଃ ଇସ୍ରାଏଲ୍ ଦିଶୁମ୍ ରେନ୍ ଘାରାନା କୋୱାଃ ହୋନ୍ କୋଏତେ ଚିମିନାଙ୍ଗ୍ କୋ ଠାହ୍‍ରାଓ ଲେଦାକୋ) ଇଦିକେଦାକୋ, 10ହାର୍ ଚିଲ୍‍କା ପ୍ରାଭୁ ଇଙ୍ଗ୍‍କେ ଆନାଚୁ ଏମ୍ ଲେଦିଙ୍ଗାଏ ଏନ୍‍ଲେକାଗି ଏନାକେ କୁମ୍ଭାର୍ ରାଃ ଅତେ ରାଃ ଗୋନୋଙ୍ଗ୍ ଲେକାଗି ଏମ୍ ତାଦାଇଙ୍ଗ୍।”

ପିଲାତୁସ୍ ୟୀଶୁ କେ କୁଲି

(ମାର୍କୁ. 15:2-5; ଲୁକା. 23:3-5; ଯୋହା. 18:33-38)

11ଚିମ୍ତା ୟୀଶୁ ପିଲାତୁସ୍ ହାକିମ୍ ରାଃ ନାଡ଼େଏ ରେ ତିଙ୍ଗୁ ଲେନ୍ ତାଇନାଏ ଦୋ ପିଲାତୁସ୍ ହାକିମ୍ ଇନିଃକେ କୁଲିକିଜାଏ, “ଚିନାଃ ଆମ୍ ୟାହୁଦୀ କୋୱାଃ ରାଜା ତାନ୍‍ମେ?” ୟୀଶୁ ଇନିଃକେ କାଜିକେଦାଏ, “ଆମ୍ ଗି କାଜି ତାନାମ୍।” 12ଚିମ୍ତାଙ୍ଗ୍ ପ୍ରାଧାନ୍ ୟାଜାକ୍‍କୋ ହାର୍ ମାରିହୋଡ଼ୋକୋ ଇନିଜାଃ ରେ ଦୋଷ୍ ଲାଗାଅ ତାଇନାକୋ, ଦୋ ଇନିଃ ଜେତ୍ନାଃ କାଏ କାଜିରୁଆଡ଼୍ କେଦାଏ। 13ଏନ୍ତେ ପିଲାତୁସ୍ ଇନିଃକେ କାଜିକେଦାଏ, “ଚିନାଃ ଆମ୍ କାମ୍ ଆୟୁମ୍ ତାନା ଚି ନିକୁ ଆମାଃ ବିରୋଧ୍ ରେ ଚିମିନାଙ୍ଗ୍ ଗୋୱାକୋ ଏମ୍ ତାନା?” 14ମେନ୍ଦୋ ଇନିଃ ହିନିଃକେ ମିୟାଃ କାଜି ରାଃ ହ କାଏ କାଜିରୁଆଡ଼୍ କିଜାଏ, ଏନାତେ ପିଲାତୁସ୍ ହାକିମ୍ ଥିମ୍ବାଗି ଆକ୍‍ଦାନ୍ଦା ଜାନାଏ।

ୟୀଶୁ କେ ଗୋଜି ରାଃ ଆନାଚୁ

(ମାର୍କୁ. 15:6-15; ଲୁକା. 23:13-25; ଯୋହା. 18:39; 19:16)

15ମେନ୍ଦୋ ରୋମାନ୍ ରାଇଜ୍ ରେନ୍ ହାକିମ୍ ରାଃ ନିୟାମ୍ ତାଇକେନା ଚି ଏନ୍ ପାରାବ୍ ରେ ହୋଡ଼ୋକୋୱାଃ ଲାଗିନ୍ ଜେତାଏ ମିହୋଡ଼୍ କେ ଜେଲ୍ଅଡ଼୍ଆଃ ଏତେ ଅକନିଃକେ ଇନ୍‍କୁ ସାନାଙ୍ଗ୍ ତାଇନାକୋ ବାଗେ ତାଇନାଏ। 16ଏନ୍ ସାମାୟ୍ ଇନ୍‍କୁୱାଃ ଏନ୍ତାଃ ବାରାବ୍ବା ନୁତୁମ୍ ମିୟାଃ ବାଦ୍‍ନାମ୍ କୈଦୀ ତାଇକେନାଏ। 17ଏନାମେନ୍ତେ ଚିମ୍ତାଙ୍ଗ୍ ଇନ୍‍କୁ ହୁଣ୍ଡି ଲେନ୍ ତାଇନାକୋ, ଦୋ ପିଲାତୁସ୍ ଇନ୍‍କୁକେ କାଜିୟାଃକୋୱାଏ, “ଆପେ ଅକଏ କେ ସାନାଙ୍ଗ୍ ତାନାପେ ଚି ଇଙ୍ଗ୍ ଆପେୟାଃ ଲାଗିନ୍ ବାଗେତାଇୟାଇଙ୍ଗ୍? ବାରାବ୍ବା କେ ଚି ୟୀଶୁ କେ ଅକନିଃ କେ ମାସୀହ୍ କାଜିୟାକୋ?” 18ଚିୟାଃଚି ପିଲାତୁସ୍ ସାରିତାଇନାଏ ଚି ଇନ୍‍କୁ ଇନିଃକେ ହିସିଙ୍ଗା ତେ ସାବ୍ ରିକା ଲିଜାକୋ। 19ଚିମ୍ତା ପିଲାତୁସ୍ ବିଚାର୍ ଜାଗା ରେ ଦୁବ୍ ଲେନ୍ ତାଇକେନାଏ ଦୋ ଇନିଜାଃ କୁଡ଼ି ଇନିଃକେ କାଜିକୁଲ୍ କେଦାଏ, “ଆମ୍ ଏନ୍ ଧାର୍ମୀ ହୋଡ଼ ରାଃ ବିଷାୟ୍ ରେ ଆଲୋମ୍ ବିଚାର୍ ରିକାୟା, ଚିୟାଃଚି ଇଙ୍ଗ୍ ଇସିଙ୍ଗ୍ କୁମୁ ରେ ଇନିଜାଃ ଚାଲ୍ତେ ଥିମ୍ବାଗି ଦୁକୁ ସାହାତିଙ୍ଗ୍ କେଦାଇଙ୍ଗ୍।”

20ପ୍ରାଧାନ୍ ୟାଜାକ୍‍କୋ ହାର୍ ମାରିହୋଡ଼ୋକୋ ହୋଡ଼ୋକୋକେ ଉସ୍କୁର୍ କେଃକୋୱାକୋ ଚି ଇନ୍‍କୁ ବାରାବ୍ବା କେ ଆସିକାକୋ, ହାର୍ ୟୀଶୁ କେ ଗୋଏଃ ରିକା ୟାକୋ। 21ହାକିମ୍ ଇନ୍‍କୁକେ କୁଲିକେଃକୋୱାଏ, “ନେ ବାରାନ୍‍କିନ୍ ଏତେ ଅକଏ କେ ସାନାଙ୍ଗ୍ ତାନାପେ ଚି ଇଙ୍ଗ୍ ଆପେୟାଃ ଲାଗିନ୍ତେ ବାଗେ ତାଇୟାଇଙ୍ଗ୍?” ଇନ୍‍କୁ କାଜିକେଦାକୋ “ବାରାବ୍ବା କେ।” 22ପିଲାତୁସ୍ ଇନ୍‍କୁକେ କୁଲିକେଃକୋୱାଏ, “ଏଣ୍ଡେ ୟୀଶୁ କେ ଅକନିଃ କେ ମାସୀହ୍ କାଜିୟାକୋ, ଇନିଃକେ ଚିନାଃ ରିକାୟାଇଙ୍ଗ୍?” ସବେନ୍ କୋ ଇନିଃକେ କାଜିକିଜାକୋ, “ଇନିଃକେ କ୍ରୁଶ୍ ରେ ରାକାବିପେ!” 23ଏନ୍ତେ ପିଲାତୁସ୍ ହାକିମ୍ କାଜିକେଦାଏ, “ଚିନାଃ ଲାଗିନ୍, ଇନିଃ ଚିନାଃ ଗାଲ୍ତି ରିକା କାଦାଏ?” ମେନ୍ଦୋ ଇନ୍‍କୁ ଆଡୋଃଗି କାଉରି-କାଉରି କେତେ କାଜିକେଦାକୋ, “ଇନିଃକେ କ୍ରୁଶ୍ ରେ ରାକାବିପେ।”

କ୍ରୁଶ୍ ରେ ରାକାବୋଃ ଲାଗିନ୍ ଜିମା

(ଆଇ. 21:6-9)

24ଚିମ୍ତାଙ୍ଗ୍ ପିଲାତୁସ୍ ନେଲ୍‍କେଦାଏ ଚି ଜେତ୍ନାଃ ହଗି କା ବାଇୟୋଃତାନା ମେନ୍ଦୋ ନେୟା ରାଃ ଉଲ୍‍ଟା ହୋହାଲା ହୋବା ଇଦିଅଃ ତାନାଃ, ଦୋ ଇନିଃ ଦାଆ ଇଦିକେତେ ହୋଡ଼ୋକୋୱାଃ ସାମ୍‍ନାଙ୍ଗ୍ ରେ ଆଜାଃ ତିଈ ଆବୁଙ୍ଗ୍ ଜାନାଏ ହାର୍ କାଜିକେଦାଏ, ନେ ଧାର୍ମୀ ହୋଡ଼ ରାଃ ମାୟୋମ୍ ଲିଙ୍ଗୀ କେତେ ଇନିଃ ଗୋଜୋଃ ରେ ଇଙ୍ଗ୍ ନିର୍ଦୋଷ୍ ତାଇନାଇଙ୍ଗ୍, ଆପେ ଦୋଷୀ ବାଇୟୋଃ ୱାପେ। 25ସବେନ୍ ହୋଡ଼ୋକୋ କାଜିରୁଆଡ଼୍ କେଦାକୋ, “ଇନିଜାଃ ମାୟୋମ୍ ଲିଙ୍ଗୀ କେତେ ଗୋନୋଏଃ ରାଃ ଦୋଷ୍ ଆଲେୟାଃ ରେ ହାର୍ ଆଲେୟାଃ ହୋନ୍-ଗାଣା କୋୱାଃ ରେ ଉୟୁଗୋଃକା।” 26ଏନ୍ତେ ଇନିଃ ବାରାବ୍ବା କେ ଇନ୍‍କୁୱାଃ ଲାଗିନ୍ ବାଗେ ତାଜାଏ ହାର୍ ୟୀଶୁ କେ କୋଡ୍ରା ମାଉର୍ ଏମ୍ ରିକା କେତେ ଜିମା ତାଃକୋୱାଏ, ଚି କ୍ରୁଶ୍ ରେ ରାକାବୋଃ କାଏ।

ସିପାହୀ କୋ ୟୀଶୁ କେ ଆପ୍‍ମାନ୍ କିଜାକୋ

(ମାର୍କୁ. 15:16-20; ଯୋହା. 19:2-3)

27ଏନ୍ତେ ହାକିମ୍ ରାଃ ସିପାହୀକୋ ୟୀଶୁ କେ ହାକିମ୍ ରାଃ ବିଚାର୍ ଅଡ଼୍ଆଃ ରେ ଇଦିକିଜାକୋ ହାର୍ ସବେନ୍ ପାଲ୍‍ଟାନ୍ କୋକେ ଇନିଜାଃ ସବେନ୍ ପାଡ଼୍ ହୁଣ୍ଡି କେଦାକୋ। 28ଇନିଜାଃ ଲିଜାଃ ଆଡ଼୍‍ଗୁ କେତେ ଇନିଃକେ ଆରାଃ ଲିଜାଃ ତୁସିଙ୍ଗ୍ କିଜାକୋ। 29ହାର୍ ଜାନୁମ୍ ରାଃ ମୁକୁଟ୍ ଗାଲାଙ୍ଗ୍ କେତେ ଇନିଜାଃ ବୋଅ ରେ ତୁସିଙ୍ଗ୍ କିଜାକୋ, ହାର୍ ଇନିଜାଃ ଜୋମ୍ ତିଈ ରେ ମାଆସୋଟା ରାଜା ସାବେୟାଏ ଏନ୍ ଲେକା ସାବାଇଜାକୋ ହାର୍ ଇନିଜାଃ ଆୟୁର୍ ରେ ଇକ୍ଡ଼ୁମ୍ କେତେ ଇନିଃକେ ଲାନ୍ଦା ଆପ୍‍ମାନ୍ କିଜାକୋ ହାର୍ କାଜିକିଜାକୋ, “ହେ ୟାହୁଦୀ କୋୱାଃ ରାଜା, ଜୋହାର୍!” 30ଆଡୋଃ ଇନିଜାଃ ରେ ବେଏଃ କିଜାକୋ ହାର୍ ଏନ୍ ମାଆସୋଟା ଇଦିକେତେ ଇନିଜାଃ ବୋଅ ରେ ବିଡ଼ା ଲାଗାଅ ଜାନାକୋ। 31ଚିମ୍ତାଙ୍ଗ୍ ଇନ୍‍କୁ ଇନିଃକେ ଲାନ୍ଦା ଆପ୍‍ମାନ୍ ଛାବା କିଜାକୋ, ଦୋ ଏନ୍ ଲିଜାଃ କେ ଇନିଜେତେ ରାଡ଼ା ଆଡ଼୍‍ଗୁ କେତେ ଆଜାଃଗି ଲିଜାଃ ଇନିଃକେ ତୁସିଙ୍ଗ୍ କିଜାକୋ, ହାର୍ କ୍ରୁଶ୍ ରେ ରାକାବ୍ ଲାଗିନ୍ ଇଦିକିଜାକୋ।

ୟୀଶୁ କେ କ୍ରୁଶ୍ ରେ ରାକାବ୍

(ମାର୍କୁ. 15:21-32; ଲୁକା. 23:26-43; ଯୋହା. 19:17-27)

32ବାହାରି ତେ ସେନ୍ ତାନ୍ ଇମ୍ତା ଇନ୍‍କୁକେ ଶିମୋନ୍ ନୁତୁମ୍ କୁରେନୀ ସାହାର୍ ରେନ୍ ମିୟାଃ ହୋଡ଼ ନାମ୍ ଜାନାଏ। ଇନ୍‍କୁ ଇନିଃକେ ଜାବ୍ରାଇ କିଜାକୋ ଚି ଇନିଜାଃ କ୍ରୁଶ୍ ଉଠାଓକେତେ ଇଦିକାଏ। 33ଏନ୍ ଜାଗା ରେ ଅକନାଃ ଗୋଲ୍‍ଗୋଥା ମାନେ ଖୋପ୍‍ଡ଼ି ରାଃ ଜାଗା କାଜିୟୋଃ ୱା, ସେଟେର୍ କେତେ, 34ଇନ୍‍କୁ ପିତ୍ତ୍ ମେଶାକାନ୍ ଆଙ୍ଗୁର୍ ରାଶି ଇନିଃକେ ନୁ ଲାଗିନ୍ତେ ଏମାଇଜାକୋ, ମେନ୍ଦୋ ଇନିଃ ଚାଖା କେତେ କାଏ ନୁ ସାନାଙ୍ଗ୍ କେଦା। 35ଏନ୍ତେ ଇନ୍‍କୁ ଇନିଃକେ କ୍ରୁଶ୍ ରେ ରାକାବ୍ କିଜାକୋ ହାର୍ ଖୁଡ଼୍‍ଖୁଡ଼ି ଉୟୁଃକେତେ ଇନିଜାଃ ଲିଜାଃ ହାଟିଙ୍ଗ୍ ଜାନାକୋ। 36ହାର୍ ଏନ୍ତାଃରେ ଦୁବ୍ କେତେ ଇନିଃକେ ହୋରୋ କିଜାକୋ। 37ଆଡୋଃ ଇନିଜାଃ ଦୋଷ୍-ଚିଠି ଇନିଜାଃ ବୋଅ ଚେତାନ୍ ରେ ଲାଗାଅ ତାଦାକୋ, ଚି “ନିଈ ୟାହୁଦୀ କୋୱାଃ ରାଜା ୟୀଶୁ ତାନିଃ।”

38ଏନ୍ତେ ଇନିଜାଃ ଲୋଃ ବାରିୟା ଡାକୁ ମିୟାଃ ଜୋମ୍ ପାଡ଼୍ ଆଡୋଃ ମିୟାଃ ଲେଙ୍ଗା ପାଡ଼୍ କ୍ରୁଶ୍ ରେ ରାକାବ୍ କେଃକିନାକୋ। 39ହିଜୁଃ ସେନୋଃ ତାନ୍‍କୋ ବୋଅ ହିଲାଅ-ହିଲାଅ କେତେ ଇନିଃକେ ନିନ୍ଦା ତାଇନାକୋ। 40ହାର୍ ନେୟା କାଜି ତାଇନାକୋ, “ହେ ମାନ୍ଦିର୍ କେ ଧାଶୁଡ଼୍ ନିଈ ହାର୍ ତିନ୍ ଦିନ୍ ରେ ବାଇ ନିଈ, ଆମ୍ ଆମ୍‍ଗି ଦୋ ବାଞ୍ଚାଅନ୍ ମେ!, ଆଗାର୍ ଆମ୍ ପାର୍ମେଶ୍ଵାର୍ ରାଃ ହୋନ୍ ତାନ୍‍ମେ, ଦୋ କ୍ରୁଶ୍ ଏତେ ଆଡ଼୍‍ଗୁନ୍ ମେ।” 41ନେଲେକାଗି ପ୍ରାଧାନ୍ ୟାଜାକ୍‍କୋ, ଆଇନ୍ ଗୁରୁକୋ, ହାର୍ ମାରିହୋଡ଼ୋକୋ ହ ଲାନ୍ଦା କେତେ କାଜି ତାଇକେନାକୋ, 42“ନିଈ ଦୋ ଏଟାଃ କୋକେ ବାଚାଓ କେଃକୋୱାଏ, ହାର୍ ଆଏଃ ଆପାନ୍ କେ କାଏ ବାଞ୍ଚାଅ ଧାଡ଼ିତାନାଏ। ନିଈ ଦୋ ‘ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋ କୋୱାଃ ରାଜା’ ତାନିଃ। ନାଆ କ୍ରୁଶ୍ ଏତେ ଆଡ଼୍‍ଗୁନ୍ କାଏ, ଏଣ୍ଡେ ଆଲେ ବିଶ୍ଵାସ୍ ୟାଲେ। 43ଇନିଃ ପାର୍ମେଶ୍ଵାର୍ ରେ ଆଶ୍ରା ମାଣ୍ଡାଅ କାଦାଏ, ଆଗାର୍ ଇନିଃ ନିଈ କେ ସାନାଙ୍ଗ୍ ତାନାଏ, ଦୋ ନାଆ ନିଈ କେ ଛୋଡ଼ାୱିକାଏ, ଚିୟାଃଚି ନିଈ କାଜିଲେଦାଏ, ଇଙ୍ଗ୍ ପାର୍ମେଶ୍ଵାର୍ ରାଃ ହୋନ୍ ତାନିଙ୍ଗ୍।” 44ନେଲେକାଗି ଡାକୁକୋ ଅଗି ଅକନ୍‍କୋ ଇନିଜାଃ ଲୋଃ କ୍ରୁଶ୍ ରେ ରାକାବ୍ ଲେନ୍ ତାଇକେନାକିନ୍, ଇନିଃକେ ନିନ୍ଦା ତାଇକେନାକିନ୍।

ୟୀଶୁ ରାଃ ଗୋନୋଏଃ

(ମାର୍କୁ. 15:33-41; ଲୁକା. 23:44-49; ଯୋହା. 19:28-30)

45ତିକିନ୍ ଏତେ ଇଦିକେତେ ତିନ୍ ବାଜେ ସାନ୍ ଏନ୍ ସବେନ୍ ଦିଶୁମ୍ ରେ ନୁବାଃ ଲେନ୍ ତାଇନା। 46ତିନ୍ ବାଜେ ଲାଗ୍‍ଭାଗ୍ ୟୀଶୁ ମାରାଙ୍ଗ୍ ଆୱାଜ୍ ତେ କାଉରି କେତେ କାଜିକେଦାଏ, “ଏଲି, ଏଲି, ଲାମା ସାବାକ୍ତାନୀ?” ଏନାରାଃ ମାନେ “ହେ ଇଙ୍ଗ୍ଆଃ ପାର୍ମେଶ୍ଵାର୍, ହେ ଇଙ୍ଗ୍ଆଃ ପାର୍ମେଶ୍ଵାର୍, ଆମ୍ ଇଙ୍ଗ୍‍କେ ଚିନାଃ ଲାଗିନ୍ତେ ବାଗେ କେଦିଙ୍ଗାମ୍?” 47ଅକନ୍‍କୋ ହେନ୍ତାଃ ରେ ତିଙ୍ଗୁ ଲେନ୍ ତାଇନାକୋ, ଇନ୍‍କୁ ଏତେ ଚିମିନାଙ୍ଗ୍ କୋ ନେୟା ଆୟୁମ୍‍କେତେ କାଜିକେଦାକୋ, “ନିଈ ଦୋ ଏଲିୟା ନାବୀ କେ କେଡ଼ାଇ ତାନାଏ।” 48ଇନ୍‍କୁ ଏତେ ମିହୋଡ଼୍ ଇମ୍ତାଗି ନିର୍ କେଦାଏ, ହାର୍ ସ୍ପଞ୍ଜ ଇଦିକେତେ ଜୋଜୋ ଆଙ୍ଗୁର୍ ରାଶି ରେ ତୁପୁ କେଦାଏ, ହାର୍ ଏନାକେ ମାଆସୋଟା ରାଃ ଆଗା ରେ ମାଣ୍ଡାଅ କେତେ ଚୋପୋଃ ରିକାକିଜାଏ। 49ମେନ୍ଦୋ ଏଟାଃକୋ କାଜିକେଦାକୋ, “ଆଉରି ତାଇନୋଃ ପେ, ନେଲିୟାବୁ ଏଲିୟା ଇନିଃକେ ବାଞ୍ଚାଅ ଲାଗିନ୍ ହିଜୁଃ ତାନାଏ ଚି କାହା।” 50ଏନ୍ତେ ୟୀଶୁ ଜୋର୍ତେ କାଉରି କେତେ ଗୋଏଃ ଜାନାଏ। 51ହାର୍ ନେଲେପେ, ମାନ୍ଦିର୍ ରାଃ ପାର୍ଦା ଚେତାନ୍ ଏତେ ଲାଥାର୍ ସାନ୍ ଚାଗାଡ଼୍ କେତେ ବାର୍ ଖାଣ୍ଡା ହୋବାଜାନା। ହାର୍ ଅତେ ହିଲାଅ ଜାନା ହାର୍ ସେରେଙ୍ଗ୍ କୋ ଚାଟାଃ ଜାନା। 52ହାର୍ କାବାର୍ କୋ ଖଲାଅ ଜାନା, ହାର୍ ଗୋଜାକାନ୍ ପାବିତାର୍ ହୋଡ଼ୋକୋ ଏତେ ବାହୁତ୍ କୋୱାଃ ମାଣା ଜୀବିରିଃ ଜାନା। 53ହାର୍ ୟୀଶୁ ରାଃ ଜୀବିନିରିଦ୍ ତାୟୋମ୍ତେ ଇନ୍‍କୁ କାବାର୍ ଏତେ ଅଡୋଙ୍ଗ୍ କେତେ ପାବିତାର୍ ନାଗାର୍ ୟୀରୁଶାଲେମ୍ ତେ ସେନୋଃ ଜାନାକୋ, ହାର୍ ଥିମ୍ବାଗି ହୋଡ଼ୋକୋକେ ନେଲ୍ ଜାନାକୋ। 54ଏନ୍ତେ ସିପାହୀ କୋୱାଃ ଗୋମ୍‍କେ ହାର୍ ଅକନ୍‍କୋ ୟୀଶୁ କେ ହୋରୋ ତାଇକେନାକୋ, ଅତେହିଲାଅ ଆଡୋଃ ଅକନାଃ ହୋବାଲେନ୍ ତାଇନା ଏନା ନେଲ୍‍କେତେ ଥିମ୍ବାଗି ବୋରୋ ଜାନାକୋ ହାର୍ କାଜିକେଦାକୋ, “ସାର୍ତିଗୀ ନିଈ ପାର୍ମେଶ୍ଵାର୍ ରାଃ ହୋନ୍ ତାଇକେନାଏ!”

55ଏନ୍ତାଃ ରେ ଥିମ୍ବାଗି କୁଡ଼ିକୋ ଅକନ୍ କୋ ଗାଲିଲୀ ଜିଲ୍ଲା ଏତେ ୟୀଶୁ କେ ସେୱା ତାନ୍‍ଲୋଃ ଇନିଃ ଲୋଃ ହିଜୁଃ ଲେନାକୋ, ସାଙ୍ଗିନ୍ ଏତେ ନେୟା ନେଲ୍ ତାଇନାକୋ। 56ଇନ୍‍କୁ ଏତେ ମାରିୟାମ୍ ମାଗ୍‍ଦାଲା ସାହାର୍ ରେନ୍, ହାର୍ ୟାକୁବ୍ ହାର୍ ଯୋଶେଷ୍ ରାଃ ଏଙ୍ଗା ମାରିୟାମ୍, ହାର୍ ଯାବ୍ଦୀ ରାଃ ହୋନ୍ କୋୱାଃ ଏଙ୍ଗା ତାଇକେନାକିନ୍।

ୟୀଶୁ କେ କାବାର୍ ଏମ୍

(ମାର୍କୁ. 15:42-47; ଲୁକା. 23:50-56; ଯୋହା. 19:38-42)

57ଚିମ୍ତାଙ୍ଗ୍ ଶିଙ୍ଗି ଡୁବିଃ ଜାନା ଦୋ ଯୋଶେଫ୍ ନୁତୁମ୍ ଆରିମାତିୟା ରେନ୍ ମିୟାଃ କିଶାଣ୍ ହୋଡ଼ ଅକନିଃ ଆଏଜୋଗି ୟୀଶୁ ରାଃ ଚେଲା ତାଇକେନାଏ। 58ଇନିଃ ପିଲାତୁସ୍ ତାଃ ସେନ୍ କେତେ ୟୀଶୁ ରାଃ ମାଣା କେ ଆସି କେଦାଏ। ଏନ୍ତେ ପିଲାତୁସ୍ ଏମ୍ ଲାଗିନ୍ ଆନାଚୁ କେଦାଏ। 59ଯୋଶେଫ୍ ହାର୍ ଏଟାଃକୋ ଏନ୍ ମାଣା କେ ଇଦିକେଦାକୋ, ହାର୍ ଏନାକେ ପୁଂଣ୍ଡି ଲିଜାଃ ରେ ଲାଟୁମ୍ କେଦାକୋ, 60ଏନ୍ତେ ଇନ୍‍କୁ ଏନାକେ ଯୋଶେଫ୍ ରାଃ ନାୱା କାବାର୍ ରେ ମାଣ୍ଡାଅ କେଦାକୋ, ଅକନାଃକେ ଯୋଶେଫ୍ ସେରେଙ୍ଗ୍ ରେ ଉର୍ ରିକା ଲେଃତାଇକେନାଏ ହାର୍ ଏନ୍ କାବାର୍ ରାଃ ଦୁହାର୍ ରେ ମାରାଙ୍ଗ୍ ଦିରି ଗୁଡ୍ରାଓ କେତେ ହାରୁବ୍ କେଦାକୋ ହାର୍ ସେନୋଃ ଜାନାକୋ। 61ମାରିୟାମ୍ ମାଗ୍‍ଦାଲା ସାହାର୍ ରେନ୍ ହାର୍ ଏଟାଃ ମାରିୟାମ୍ ଏନ୍ତାଃ କାବାର୍ ନାଡ଼େଏ ରେ ଦୁବ୍ ଲେନ୍ତାଇ କେନାକିନ୍।

କାବାର୍ ଜାଗା ରେ ହୋରୋ

62ଏଟାଃ ହୁଲାଙ୍ଗ୍ ଅକନାଃ ସେକାଡ଼େନ୍ ହୁଲାଙ୍ଗ୍ ରାଃ ତାୟୋମ୍ ହୁଲାଙ୍ଗ୍ ତାଇକେନା, ପ୍ରାଧାନ୍ ୟାଜାକ୍‍କୋ ଏତେ ମୁଖିୟା କୋ ହାର୍ ଫାରିସୀ ହୋଡ଼ୋକୋ ଏତେ ଚିମିନାଙ୍ଗ୍ କୋ ପିଲାତୁସ୍ ଲୋଃ ନାପାମ୍ ଲାଗିନ୍ତେ ସେନ୍ ଜାନାକୋ ହାର୍ କାଜିକେଦାକୋ, 63“ହେ ଗୋମ୍‍କେ, ଆଲେ କେ ମୋନେ ମେନାଃ ଚି ଏନ୍ ଲୋଗୋ ହୋଡ଼ ଚିମ୍ତାଙ୍ଗ୍ ଇନିଃ ଜୀହିଃ ତାଇକେନାଏ, ଇମ୍ତା କାଜିଲେଦାଏ, ‘ଇଙ୍ଗ୍ଆଃ ଗୋଜୋଃ ରାଃ ଆପି ହୁଲାଙ୍ଗ୍ ତାୟୋମ୍ତେ ଇଙ୍ଗ୍ ଆଡୋଃଗି ଜୀହିଃ କେନୋଗାଇଙ୍ଗ୍।’ 64ଏନା ଲାଗିନ୍ତେ ଆନାଚୁ ଏମାଲେମ୍ ଚି ଆପି ହୁଲାଙ୍ଗ୍ ସାନ୍ତେ କାବାର୍ କେ ହୋରୋ ୟୋଃକା, ଆଗାର୍ ଆମ୍ ନେକା କାମ୍ ରିକାଏ ରେଦୋ ଇନିଜାଃ ଚେଲାକୋ ହିଜୁଃକେତେ ଇନିଜାଃ ମାଣା କେ ଚୋର୍ହା ଇଦିକିୟାକୋ ହାର୍ ହୋଡ଼ୋକୋକେ କାଜିୟାକୋୱାକୋ, ‘ଇନିଃ ଗୋଜାକାନ୍ କୋଏତେ ଜୀବିରିଃ କାନାଏ।’ ଏନ୍ତେ ନେ ତାୟୋମ୍ ରାଃ ବେଦା ମାନେ ‘ୟୀଶୁ ରାଃ ଜୀବିନିରିଦ୍’ ସିଦା ରାଃ ବେଦା ମାନେ ‘ୟୀଶୁ ମାସୀହ୍ ତାଇକେନାଏ’ ଏନା ଏନାତେ ଅଗି ଥିମ୍ବା ଖାରାପ୍ କାଜି ହୋବାଃ ୱା।” 65ପିଲାତୁସ୍ ଇନ୍‍କୁକେ କାଜିକେଦାଏ, ଆପେ ସିପାହୀ କୋକେ ହୋରୋ ଲାଗିନ୍ ଇଦିକୋପେ। ସେନୋଃ ପେ, ଆପେ ଚିଲ୍‍କା ଧାଡ଼ି ଏନ୍‍ଲେକା କାବାର୍ କେ ହୋରୋ ଏପେ। 66ଏନ୍ତେ ଇନ୍‍କୁ ସିପାହୀ କୋକେ ହୋରୋ ଲାଗିନ୍ ଇଦି କେଃକୋୱାକୋ ହାର୍ ଦିରି ରେ ମୋହାର୍ ଲାଗାଅ କେତେ କାବାର୍ କେ ହୋରୋ କେଦାକୋ।

Currently Selected:

ମାତ୍ତିଉ 27: UNXNT

Highlight

Copy