ମାତ୍ତିଉ 26
26
ୟୀଶୁ କେ ହିଡ଼୍ କେତେ ସାବି ରାଃ ବିଚାର୍
(ମାର୍କୁ. 14:1,2; ଲୁକା. 22:1,2; ଯୋହା. 11:45-53)
1ଚିମ୍ତାଙ୍ଗ୍ ୟୀଶୁ ନେ ସବେନ୍ କାଜିକୋ କାଜି ଛାବା କେଦାଏ ଦୋ ଆଜାଃ ଚେଲାକୋକେ କାଜିକେଦାଏ, 2“ଆପେ ସାରିତାନାପେ ଚି ବାର୍ସିଙ୍ଗ୍ ତାୟୋମ୍ତେ ଫାସାହ୍ ପାରାବ୍ ମେନାଃ ହାର୍ ଇଙ୍ଗ୍ ମାନ୍ୱା ରାଃ ହୋନ୍ କ୍ରୁଶ୍ ରେ ରାକାବ୍ ଲାଗିନ୍ ସାବୋଗାଇଙ୍ଗ୍।” 3ଏନ୍ ସାମାୟ୍ ରେଗି ପ୍ରାଧାନ୍ ୟାଜାକ୍କୋ ହାର୍ ୟାହୁଦୀ ହୋଡ଼ୋକୋୱାଃ ମାରିହୋଡ଼ୋକୋ କୈଫା ନୁତୁମ୍ ମାରାଙ୍ଗ୍ ୟାଜାକ୍ ରାଃ ରାଚା ରେ ହୁଣ୍ଡି ଜାନାକୋ, 4ହାର୍ ଆକୋ-ଆକୋରେ ବିଚାର୍ କେଦାକୋ ଚି, ୟୀଶୁ କେ ହିଡ଼୍ କେତେ ସାବିୟାବୁ ହାର୍ ଗୋଜିୟାବୁ। 5ମେନ୍ଦୋ ଇନ୍କୁ କାଜି ତାଇନାକୋ, “ପାରାବ୍ ରାଃ ସାମାୟ୍ ରେ କାହା; କାରେ ଦୋ ହୋଡ଼ୋକୋ ରେ ହାଲାଗୁଲା ହୋବାକୋୱା।”
ବେଥାନି ସାହାର୍ ରେ ୟୀଶୁ କେ ସୁନୁମ୍ ଗୋସୋଃ
(ମାର୍କୁ. 14:3-9; ଯୋହା. 12:1-8)
6ଚିମ୍ତା ୟୀଶୁ ଶିମୋନ୍ କୋଢ଼ି ରାଃ ଅଡ଼୍ଆଃ ବେଥାନି ହାତୁ ରେ ତାଇକେନାଏ। 7ଦୋ ମିୟାଃ କୁଡ଼ି ସାଙ୍ଗ୍ମାର୍ମାର୍ ଦିରି ରାଃ ଶିଶି ରେ ଥିମ୍ବାଗି ଗୋନୋଙ୍ଗାନ୍ ସୋୱାନ୍ ସୁନୁମ୍ ଆଉକେତେ ଇନିଃତାଃ ହିଜୁଃଲେନାଏ, ହାର୍ ଚିମ୍ତାଙ୍ଗ୍ ଇନିଃ ଜୋମ୍ ଲାଗିନ୍ ଦୁବ୍ ଲେନାଏ ଦୋ ୟୀଶୁ ରାଃ ବୋଅ ରେ ଦୁଲ୍ ତାଜାଏ। 8ନେୟା ନେଲ୍କେତେ ଆଜାଃ ଚେଲାକୋ ଖିସ୍ ଜାନାକୋ ହାର୍ କାଜିକେଦାକୋ, ନେୟାକେ ଚିନାଃ ଲାଗିନ୍ ନାଷ୍ଟ୍ ରିକା ଜାନା? 9ନେୟା କେ ଦୋ ଥିମ୍ବା ଗୋନୋଙ୍ଗ୍ ରେ ଆଖ୍ରିଙ୍ଗ୍ କେତେ ଗାରିବ୍ କୋକେ ଟାକା ହାଟିଙ୍ଗ୍ ଧାଡ଼ି ଜାନ୍ତେୟାଃ। 10ନେୟା ସାରିକେତେ ୟୀଶୁ ଇନ୍କୁକେ କାଜିକେଦାଏ, କୁଡ଼ି କେ ଚିନାଃ ମେନ୍ତେ ସାତାୱି ତାନାପେ? ଇନିଃ ଇଙ୍ଗ୍ଆଃ ଲୋଃ ବୁଗିନ୍ ରିକା କେଦାଏ। 11ଗାରିବ୍ ହୋଡ଼ୋକୋ ଦୋ ଆପେୟାଃ ଲୋଃ ସବେନ୍ ଇମ୍ତାଙ୍ଗ୍ ତାଇନ୍ ତାନାକୋ, ମେନ୍ଦୋ ଇଙ୍ଗ୍ ଆପେୟାଃ ଲୋଃ ସବେନ୍ ହୁଲାଙ୍ଗ୍ କାଇଙ୍ଗ୍ ତାଇନା। 12ଇନିଃ ଇଙ୍ଗ୍ଆଃ ହୋଡ଼ମୋ ରେ ଅକନ୍ ସୋୱାନ୍ ସୁନୁମ୍ ଦୁଲ୍ କେଦାଏ, ଏନା ଇଙ୍ଗ୍କେ କାବାର୍ ଏମ୍ ଲାଗିନ୍ ରିକା କେଦାଏ। 13ଇଙ୍ଗ୍ ଆପେକେ ସାର୍ତି କାଜି ତାନିଙ୍ଗ୍, ଚି ସବେନ୍ ଦିଶୁମ୍ ରେ ଅକ୍ତାଃ-ଅକ୍ତାଃ ରେ ନେ ସୁସାମାଚାର୍ ପାର୍ଚାର୍ ଅଗା, ଏନ୍ତାଃ ରେ ଇନିଜାଃ ନେ କାମି ରାଃ ବିଷାୟ୍ ରେ ହଗି ଇନିଜାଃ ପାହୋମ୍ ଲାଗିନ୍ ଉଦୁବୋଗା।
ୟାହୁଦା ଇସ୍କାରିୟୋତୀ ୟୀଶୁ କେ ସାବାଇ ଲାଗିନ୍ ରାଜି ଜାନାଏ
(ମାର୍କୁ. 14:10,11; ଲୁକା. 22:3-6)
14ଏନ୍ତେ ୟାହୁଦା ଇସ୍କାରିୟୋତୀ ଅକନିଃ ବାରା ଚେଲାକୋ ଏତେ ମିହୋଡ଼୍ ତାଇକେନାଏ, ପ୍ରାଧାନ୍ ୟାଜାକ୍ କୋତାଃ ସେନ୍ କେତେ କାଜିକେଦାଏ, 15“ଆଗାର୍ ଇଙ୍ଗ୍ ଇନିଃକେ ଆପେୟାଃ ତିଈ ରେ ସାବ୍ ପେୟାଇଙ୍ଗ୍ ଦୋ ଆପେ ଇଙ୍ଗ୍କେ ଚିନାଃ ଏମାଇଙ୍ଗ୍ୟାପେ?” ଇନ୍କୁ ଇନିଃକେ ତିସ୍ ଠୁ ରୂପା ରାଃ ଟାକା ଲେକାକେତେ ଏମାଇଜାକୋ। 16ହାର୍ ଇନିଃ ଏନ୍ ସାମାୟ୍ ତେଗି ଇନିଃକେ ସାବ୍ ରିକା ଲାଗିନ୍ ମାଉକା ଦାଣାବାଡ଼ା କେଦାଏ।
ଚେଲାକୋ ଲୋଃ ଫାସାହ୍ ପାରାବ୍ ରାଃ ଆଖ୍ରୀ ଭୋଜ୍
(ମାର୍କୁ. 14:12-21; ଲୁକା. 22:7-13,21-23; ଯୋହା. 13:21-30)
17ଖାମୀର୍ କାମେଶାକାନ୍ ହୋଲୋଙ୍ଗ୍ ରାଃ ପାରାବ୍ ରାଃ ପାହିଲା ହୁଲାଙ୍ଗ୍, ଚେଲାକୋ ୟୀଶୁ ତାଃ ହିଜୁଃକେତେ କୁଲିକିଜାକୋ, “ଆମ୍ କୋତାଃମ୍ ସାନାଙ୍ଗ୍ ତାନା ଚି ଆଲେ ଆମାଃ ଲାଗିନ୍ ଫାସାହ୍ ପାରାବ୍ ରାଃ ଜୋମେୟାଃ ବାଇୟାଲେ?” 18ୟୀଶୁ କାଜିୟାଃକୋୱାଏ, “ସାହାର୍ ରେନ୍ ଫାଲ୍ନା ହୋଡ଼ ତାଃ ସେନ୍ କେତେ ଇନିଃକେ କାଜିୟାଇପେ, ‘ଗୁରୁ କାଜି ତାନାଏ ଚି ଇଙ୍ଗ୍ଆଃ ସାମାୟ୍ ନାଡ଼େଏ କାନା। ଇଙ୍ଗ୍ ଇଙ୍ଗ୍ଆଃ ଚେଲାକୋ ଲୋଃ ଆପେୟାଃ ଅଡ଼୍ଆଃ ରେ ଫାସାହ୍ ପାରାବ୍ ମାନାତିଙ୍ଗ୍ୟାଇଙ୍ଗ୍।’ ” 19ଏନ୍ତେ ଚେଲାକୋ ୟୀଶୁ ରାଃ ଆନାଚୁ କେ ମାନାତିଙ୍ଗ୍ ଜାନାକୋ ଆଡୋଃ ଫାସାହ୍ ପାରାବ୍ ରାଃ ଜୋମେୟାଃ ବାଇକେଦାକୋ।
20ଚିମ୍ତା ଶିଙ୍ଗି-ଡୁବିଃ ଜାନା ଦୋ ଇନିଃ ବାରାଝାନ୍ ଚେଲାକୋ ଲୋଃ ଜୋମେ ଲାଗିନ୍ ଦୁବ୍ ଜାନାଏ। 21ଚିମ୍ତା ଇନ୍କୁ ଜୋମ୍ ତାଇନାକୋ ଦୋ ଇନିଃ କାଜିକେଃକୋୱାଏ, ଇଙ୍ଗ୍ ଆପେକେ ସାର୍ତି କାଜିୟାପେ ତାନିଙ୍ଗ୍ ଚି ଆପେ ଥାଲା ଏତେ ମିହୋଡ଼୍ ଇଙ୍ଗ୍କେ ବାଇରୀ କୋୱାଃ ତିଈ ରେ ସାବ୍ ରିକାଇଙ୍ଗ୍ ୟାଏ। 22ନେୟାତେ ଇନ୍କୁ ଥିମ୍ବାଗି ଦୁକୁ ଜାନାକୋ, ହାର୍ ସବେନ୍ କୋ ଇନିଃକେ କୁଲିକିଜାକୋ, “ହେ ଗୁରୁ, ଚିନାଃ ଇନିଃ ଇଙ୍ଗ୍ ତାନିଙ୍ଗ୍?” 23ଇନିଃ କାଜିରୁଆଡ଼୍ କେଃକୋୱାଏ, ଅକନିଃ ଇଙ୍ଗ୍ଆଃ ଲୋଃ ମିୟାଃ ଥାଡ଼ିୟା ରେ ଜୋମ୍ କେଦାଏ, ଇନିଃ ଗି ଇଙ୍ଗ୍କେ ସାବ୍ ରିକାଇଙ୍ଗ୍ ୟାଏ। 24ଇଙ୍ଗ୍ ମାନ୍ୱା ରାଃ ହୋନ୍ ଦୋ ଜେଲେକା ଇଙ୍ଗ୍ଆଃ ବିଷାୟ୍ ରେ ଅଲାକାନା ଗୋଜୋଗାଇଙ୍ଗ୍, ମେନ୍ଦୋ ଏନ୍ ହୋଡ଼ ଲାଗିନ୍ ହାୟ୍! ବୋରୋୱାନ୍ ଦାଣ୍ଡ୍ ଇନିଜାଃ ଲାଗିନ୍ ମେନାଃ ଅକନିଜାଃ ଚାଲ୍ତେ ଇଙ୍ଗ୍ ମାନ୍ୱା ରାଃ ହୋନ୍ ସାବୋଃ ତାନାଏ, ଆଗାର୍ ଏନ୍ ହୋଡ଼ ରାଃ ଜାନାମ୍ ଗି କା ହୋବାଜାନ୍ତେୟାଃ ରେଦୋ, ଇନିଜାଃ ଲାଗିନ୍ ବୁଗିନ୍ ହୋବାଜାନ୍ତେ। 25ଏନ୍ତେ ଇନିଃକେ ସାବ୍ ରିକାନିଃ ୟାହୁଦା କାଜିକେଦାଏ, “ହେ ଗୁରୁ, ଚିନାଃ ଇନିଃ ଇଙ୍ଗ୍ ତାନିଙ୍ଗ୍?” ଇନିଃ ଆଏଃକେ କାଜିକିଜାଏ, “ଆମ୍ କାଜି ଛାବା ତାଦାମ୍।”
ପ୍ରାଭୁ ଭୋଜ୍ ରାଃ ନିୟାମ୍ ବାଇନା
(ମାର୍କୁ. 14:22-26; ଲୁକା. 22:14-20; 1 କୁରି. 11:23-25)
26ଚିମ୍ତାଙ୍ଗ୍ ଇନ୍କୁ ଜୋମ୍ ତାଇକେନାକୋ ଦୋ ୟୀଶୁ ହୋଲୋଙ୍ଗ୍ ଇଦିକେଦାଏ, ହାର୍ ପାର୍ମେଶ୍ଵାର୍ କେ ଧାନ୍ୟାବାଦ୍ କେତେ କେଚାଃ କେଦାଏ, ହାର୍ ଚେଲାକୋକେ ଏମ୍ କେତେ କାଜିକେଦାଏ, “ନେ, ଜୋମେ ପେ, ନେୟା ଇଙ୍ଗ୍ଆଃ ହୋଡ଼ମୋ ତାନାଃ।” 27ଏନ୍ତେ ଇନିଃ ଗିଲାସ୍ କେ ଅକଣ୍ଡେ ଆଙ୍ଗୁର୍-ରାଶି ତାଇକେନା ଇଦିକେତେ ପାର୍ମେଶ୍ଵାର୍ କେ ଧାନ୍ୟାବାଦ୍ କେଦାଏ, ହାର୍ ଇନ୍କୁକେ ଏମ୍ କେତେ କାଜିୟାଃକୋୱାଏ, “ଆପେ ସବେନ୍ ନେୟା ଏତେ ନୁୱେପେ। 28ଚିୟାଃଚି ନେୟା ନିୟାମ୍ଥଲ୍ ରାଃ ଇଙ୍ଗ୍ଆଃ ଏନ୍ ମାୟୋମ୍ ତାନାଃ ଅକନାଃ ଥିମ୍ବାଗି ହୋଡ଼ୋକୋ ଲାଗିନ୍ ପାପ୍ କୋରାଃ ଛାମା ଲାଗିନ୍ ଲିଙ୍ଗୀଅଃ ତାନା। 29ଇଙ୍ଗ୍ ଆପେକେ କାଜିୟାପେ ତାନିଙ୍ଗ୍ ଚି ଆଙ୍ଗୁର୍ ରାଃ ନେ ରାଶି ଏନ୍ ହୁଲାଙ୍ଗ୍ ସାନ୍ତେ ଚିଉଲାଅ କାଇଙ୍ଗ୍ ନୁୱେୟା, ଚିମ୍ତାଙ୍ଗ୍ ସାନ୍ତେ ଆପେ ଲୋଃ ଇଙ୍ଗ୍ଆଃ ଆପୁ ରାଃ ରାଇଜ୍ ରେ ନାୱା ଆଙ୍ଗୁର୍-ରାଶି କାଇଙ୍ଗ୍ ନୁୱେୟା।” 30ଆଡୋଃ ଇନ୍କୁ ଭାଜାନ୍ ଦୁରାଙ୍ଗ୍ କେତେ ଜାଏତୁନ୍ ଦାରୁ ବୁରୁ ତେ ସେନୋଃ ଜାନାକୋ।
ପାତ୍ରାସ୍ ୟୀଶୁ କେ କାଇଙ୍ଗ୍ ସାରିୟା କାଜିୟାଏ
(ମାର୍କୁ. 14:27-31; ଲୁକା. 22:31-34; ଯୋହା. 13:36-38)
31ଏନ୍ତେ ୟୀଶୁ ଇନ୍କୁକେ କାଜିକେଃକୋୱାଏ, “ଆପେ ସବେନ୍ କୋ ଇସିଙ୍ଗ୍ ନିଦା ଗି ଇଙ୍ଗ୍କେ ବାଗେ କେତେ ସେନୋଃ କୋୱାପେ, ଚିୟାଃଚି ଅଲାକାନା, ଇଙ୍ଗ୍ ଗୁପୀନିଃକେ ଗୋଜିୟାଇଙ୍ଗ୍ ହାର୍ ଗୋଟ୍ ରେନ୍ ମିଣ୍ଡୀକୋ ଛିତି ବିତି ଅଗାକୋ। 32ମେନ୍ଦୋ ଇଙ୍ଗ୍ଆଃ ଜୀବିରିଃ ତାୟୋମ୍ତେ ଆପେ ତେ ସିଦା ଗାଲିଲୀ ଜିଲ୍ଲା ତେ ସେନାଇଙ୍ଗ୍।” 33ନେୟା ରେ ପାତ୍ରାସ୍ ଇନିଃକେ କାଜିକେଦାଏ, “ଆଗାର୍ ସବେନ୍ କୋ ଆମ୍କେ ବାଗେ ତାମେୟାକୋ ରେଦୋ ବାଗେ ଚାକୋ, ମେନ୍ଦୋ ଇଙ୍ଗ୍ ଚିଉଲା ହଗି କାଇଙ୍ଗ୍ ବାଗେ ମେୟା।” 34ୟୀଶୁ ଇନିଃକେ କାଜିକେଦାଏ, “ଇଙ୍ଗ୍ ଆମ୍କେ ସାର୍ତି କାଜି ତାନିଙ୍ଗ୍ ଚି ଇସିଙ୍ଗ୍ ନିଦାଗି ସିମ୍କୋ ରାଆ ସିଦାରେ, ଆମ୍ ଆପିସା ଇଙ୍ଗ୍କେ କାଇଙ୍ଗ୍ ସାରିୟା ମେନ୍ତେ କାଜିୟାମ୍।” 35ପାତ୍ରାସ୍ ଇନିଃକେ କାଜିକେଦାଏ, “ଆଗାର୍ ଇଙ୍ଗ୍କେ ଆମ୍ ଲୋଃ ଗୋଜେନ୍ ହୋବାୱା ରେ ହଗି, ଇଙ୍ଗ୍ ଆମ୍କେ ଚିଉଲାଅ କାଇଙ୍ଗ୍ ସାରିୟା ମେନ୍ତେ କାଇଙ୍ଗ୍ କାଜିୟା।” ହାର୍ ଏନ୍ଲେକାଗି ସବେନ୍ ଚେଲାକୋ ହଗି କାଜିକେଦାକୋ।
ଗେଥ୍ସେମାନୀ ଜାଗା ରେ ୟୀଶୁ ରାଃ ବିନ୍ତି
(ମାର୍କୁ. 14:32-42; ଲୁକା. 22:39-46)
36ଏନ୍ତେ ୟୀଶୁ ଆଜାଃ ଚେଲାକୋ ଲୋଃ ଗେଥ୍ସେମାନୀ ନୁତୁମ୍ ମିୟାଃ ଜାଗା ତେ ହିଜୁଃଲେନାଏ ହାର୍ ଆଜାଃ ଚେଲାକୋକେ କାଜିକେଃକୋୱାଏ, “ନେତାଃ ରେ ଦୁବ୍ କାନ୍ପେ, ଚିମ୍ତାଙ୍ଗ୍ ସାନ୍ତେ ଇଙ୍ଗ୍ ଏନ୍ତାଃ ସେନ୍ କେତେ ବିନ୍ତି ୟାଇଙ୍ଗ୍।” 37ଇନିଃ ପାତ୍ରାସ୍ କେ ହାର୍ ଯାବ୍ଦୀ ରାଃ ବାରାନ୍ ହୋନ୍ କିନ୍କେ ମିଶା ତେ ଇଦି କେଃକୋୱାଏ ହାର୍ ଥିମ୍ବାଗି ଦୁକୁ ହାର୍ ଆକ୍ବାକାଅ ଏଟେଃ ଜାନାଏ। 38ଏନ୍ତେ ଇନିଃ ଇନ୍କୁକେ କାଜିକେଃକୋୱାଏ, “ଇଙ୍ଗ୍ଆଃ ମୋନ୍ ଥିମ୍ବାଗି ଦୁକୁ ମେନାଃ ନେତାଃ ସାନ୍ତେ ଚି ଇଙ୍ଗ୍ଆଃ ଜୀଉ ଅଡୋଙ୍ଗ୍ କୋୱା ଲେକା ଆଟ୍କାରିଙ୍ଗ୍ ତାନା। ଆପେ ନେତାଃ ରେ ଗି ତାଇନ୍ପେ ହାର୍ ଇଙ୍ଗ୍ଆଃ ଲୋଃ ଏୟୋନ୍ କାନୋଃପେ।”
39ଏନ୍ତେ ଇନିଃ ହୁଡିଙ୍ଗ୍ ଆଡୋଃ ଆୟୁର୍ ତେ ସେନ୍ କେତେ ଇକ୍ଡ଼ୁମ୍ କେଦାଏ, ହାର୍ ନେୟା ବିନ୍ତି କେଦାଏ, “ହେ ଇଙ୍ଗ୍ଆଃ ଆପୁ, ଆଗାର୍ ହୋବା ଧାଡ଼ିୟୋଃ ରେଦୋ ନେ ଦୁକୁ ଇଙ୍ଗ୍ଆଃ ତାଃ ଏତେ ଆତୋମ୍ ତାମ୍, ଏନ୍ ରେହ ଚିଲ୍କା ଇଙ୍ଗ୍ ସାନାଙ୍ଗ୍ ତାନାଇଙ୍ଗ୍ ଏନ୍ଲେକା କାହା ମେନ୍ଦୋ ଚିଲ୍କା ଆମ୍ ସାନାଙ୍ଗ୍ ତାନାମ୍ ଏନ୍ଲେକାଗି ହୋବାଅଃକା।” 40ଏନ୍ତେ ଇନିଃ ଚେଲା କୋତାଃ ହିଜୁଃକେତେ ଇନ୍କୁକେ ଦୁଣୁମ୍ ତାନ୍ ନାମ୍ କେଃକୋୱାଏ ହାର୍ ପାତ୍ରାସ୍ କେ କାଜିକେଦାଏ, “ଚିନାଃ ଆପେ ଇଙ୍ଗ୍ଆଃ ଲୋଃ ମିୟାଃ ଘାଣ୍ଟା ହଗି କାପେ ଏୟୋନ୍ ଧାଡ଼ିଜାନା? 41ଏୟୋନ୍ କାନ୍ପେ, ହାର୍ ବିନ୍ତି କାତେପେ, ଚି ଆପେ ପାରୀକ୍ଷା ରେ କାପେ ଉୟୁଗୋଗା, ଆତ୍ମା ଦୋ ସାପ୍ଡ଼ାଅ କାନ୍ ମେନାଃ, ମେନ୍ଦୋ ହୋଡ଼ମୋ ନାରାଦୁରା ମେନାଃ।”
42ହାର୍ ଇନିଃ ଆଡୋଃ ମିଶା ସେନ୍ କେତେ ନେୟା ବିନ୍ତି କେଦାଏ, “ହେ ଇଙ୍ଗ୍ଆଃ ଆପୁ, ଆଗାର୍ ନେୟା ଇଙ୍ଗ୍ଆଃ ବେଗାର୍ ସାହାତିଙ୍ଗ୍ କା ଆତୋମ୍ ଧାଡ଼ିୟୋଃୱା ଏଣ୍ଡେ ଆମାଃ ସାନାଙ୍ଗ୍ ପୁରାଅଃ କା।” 43ଏନ୍ତେ ଇନିଃ ହିଜୁଃକେତେ ଇନ୍କୁକେ ଆଡୋଃଗି ଦୁଣୁମ୍ ତାନ୍ ନାମ୍ କେଃକୋୱାଏ, ଚିୟାଃଚି ଇନ୍କୁୱାଃ ମେଏଃ ଦୁଣୁମ୍ ତେ ଫେରେଜାକାନ୍ ତାଇନ୍ କେନା। 44ଇନ୍କୁକେ ବାଗେ କେତେ ଇନିଃ ଆଡୋଃଗି ସେନୋଃ ଜାନାଏ, ହାର୍ ଏନ୍ କାଜିକୋ କାଜିକେତେ ଗି ଆଡୋଃଗି ଆପିସା ବିନ୍ତି କେଦାଏ। 45ଏନ୍ତେ ଇନିଃ ଚେଲା କୋତାଃ ହିଜୁଃକେତେ ଇନ୍କୁକେ କାଜିକେଃକୋୱାଏ, “ନାଆ ଦୁଣୁମ୍ କାତୋଃପେ, ହାର୍ ଆରାମ୍ ରିକାଏପେ, ନେଲେପେ, ସାମାୟ୍ ହିଜୁଃ ସେଟେର୍ ଜାନା, ହାର୍ ଇଙ୍ଗ୍ ମାନ୍ୱା ରାଃ ହୋନ୍ ପାପୀକୋୱାଃ ତିଈ ରେ ସାବୋଃ ତାନିଙ୍ଗ୍। 46ବିରିଃପେ! ଦୋଲା! ନେଲିପେ, ଇଙ୍ଗ୍କେ ବାଇରୀ କୋୱାଃ ତିଈ ରେ ସାସାବ୍ ଲାଗିନ୍ ଦେଙ୍ଗା ଏମେ ନିଈ ନାଡ଼େଏ ହିଜୁଃ ସେଟେର୍ କାନାଏ।”
ୟୀଶୁ ଗେଥ୍ସେମାନୀ ଜାଗା ରେ ବାଇରୀ କୋୱାଃ ତିଈ ରେ ସାବୋଃ ତାନାଏ
(ମାର୍କୁ. 14:43-50; ଲୁକା. 22:47-53; ଯୋହା. 18:3-12)
47ଚିମ୍ତା ୟୀଶୁ ନେୟା କାଜି ତାଇନାଏ ଚି ୟାହୁଦା ଅକନିଃ ବାରାଝାନ୍ କୋଏତେ ମିହୋଡ଼୍ ତାଇକେନାଏ ହିଜୁଃ ଲେନାଏ, ହାର୍ ଇନିଃ ଲୋଃ ପ୍ରାଧାନ୍ ୟାଜାକ୍କୋ ହାର୍ ହୋଡ଼ୋକୋୱାଃ ମାରିହୋଡ଼ୋକୋ ପାଡ଼େତେ ମିଃଥିମ୍ବା ହୋଡ଼ୋକୋ, ତାଲ୍ୱାର୍ କୋକେ ହାର୍ ଲାଠି କୋକେ ସାବ୍ ଆଉକେତେ ହିଜୁଃ ଲେନାକୋ। 48ଇନିଃକେ ବାଇରୀ କୋୱାଃ ତିଈ ରେ ସାବ୍ ରିକାନିଃ ଇନ୍କୁକେ ନେୟା ଚିହ୍ନା ଏମ୍ ଲେଦାଏ, “ଅକନିଃକେ ଇଙ୍ଗ୍ ଚୁମାୟାଇଙ୍ଗ୍ ଇନିଃଗି ତାନିଃ, ଇନିଃ କେ ସାବ୍ କିୟାପେ।” 49ହାର୍ ଇମ୍ତାଗି ୟୀଶୁ ରାଃ ନାଡ଼େଏ ହିଜୁଃକେତେ କାଜିକେଦାଏ, “ହେ ଗୁରୁ, ଜୋହାର୍!” ଏନ୍ତେ ଇନିଃକେ ଥିମ୍ବାଗି ଚୁମା କିଜାଏ। 50ୟୀଶୁ ଇନିଃକେ କାଜିକେଦାଏ, “ହେ ଗାତି, ଅକନ୍ କାମି ଲାଗିନ୍ ଆମ୍ ହିଜୁଃ କାନାମ୍, ଏନାକେ ରିକା ଏମ୍।” ଏନ୍ତେ ଇନ୍କୁ ନାଡ଼େଏ ହିଜୁଃକେତେ ୟୀଶୁ କେ ଚୁଣ୍ଡୁଲ୍ କିଜାକୋ ହାର୍ ଇନିଃକେ ସାବ୍ କିଜାକୋ।
51ୟୀଶୁ ରାଃ ଗାତି କୋଏତେ ମିହୋଡ଼୍ ତିଈ ଆୟୁର୍ କେତେ ଆଜାଃ ତାଲ୍ୱାର୍ ଥାଇଃ କେଦାଏ ହାର୍ ମାରାଙ୍ଗ୍ ୟାଜାକ୍ ରାଃ ଦାସୀ ଚେତାନ୍ ରେ ଚାଲାଓ କେତେ ଇନିଜାଃ ଲୁତୁର୍ ଖାଣ୍ଡାଅ ତାଦାଏ। 52ଏନ୍ତେ ୟୀଶୁ ଇନିଃକେ କାଜିକେଦାଏ, “ଆମାଃ ତାଲ୍ୱାର୍ ଆମାଃ ଖାପ୍ ରେ ଦୋହୋଏମେ ଚିୟାଃଚି ଅକଏ ତାଲ୍ୱାର୍ ଚାଲାଓ ୟାକୋ ଇନ୍କୁ ସବେନ୍ ତାଲ୍ୱାର୍ ତେକୋ ଗୋଜୋଗା। 53ଚିନାଃ ଆମ୍ କାମ୍ ସାରିତାନା ଚି ଇଙ୍ଗ୍ ଇଙ୍ଗ୍ଆଃ ଆପୁ ଏତେ ବିନ୍ତି ଧାଡ଼ିୟାଇଙ୍ଗ୍, ହାର୍ ଇନିଃ ସିର୍ମାଦାସୀ କୋୱାଃ ବାରା ପାଲ୍ଟାନ୍ ଏତେ ଥିମ୍ବା ଇଙ୍ଗ୍ଆଃ ତାଃ ନାଆ ସେଟେର୍ ତାକୋୱାଏ? 54ମେନ୍ଦୋ ପାବିତାର୍ ପୁଥି ରାଃ ଏନ୍ କାଜିକୋ ଅକନାଃ ଏନ୍କା ଗି ହୋବା ନାଙ୍ଗ୍ ଜାଲେକାତେ ମେନାଃ, ଏନା ଚିଲ୍କା ପୁରାଅଗା?”
55ଏନ୍ ସାମାୟ୍ ୟୀଶୁ ମିଃଥିମ୍ବା ହୋଡ଼ୋକୋକେ କାଜିୟାଃକୋୱାଏ, “ଚିନାଃ ଆପେ ତାଲ୍ୱାର୍ କୋକେ ହାର୍ ଲାଠି କୋକେ ଆଉକେତେ ଇଙ୍ଗ୍କେ ଡାକୁ କୋୱାଃ ଲେକା ସାବ୍ ଲାଗିନ୍ ଅଡୋଙ୍ଗ୍ କାନାପେ? ଇଙ୍ଗ୍ ସବେନ୍ ହୁଲାଙ୍ଗ୍ ମାନ୍ଦିର୍ ରାଃ ରାଚା ରେ ଦୁବ୍ କେତେ ଶିଖାଅ କୋ ତାଇନାଇଙ୍ଗ୍, ହାର୍ ଆପେ ଇଙ୍ଗ୍କେ କାପେ ସାବ୍ କେଦିଙ୍ଗା। 56ମେନ୍ଦୋ ନେୟା ସବେନାଃ ନେୟା ଲାଗିନ୍ତେ ହୋବାଜାନା ଚି ନାବୀକୋୱାଃ ବାଚାନ୍ ପୁରାଅଃଚା।” ଏନ୍ତେ ସବେନ୍ ଚେଲାକୋ ଇନିଃକେ ବାଗିକେତେ ନିର୍ ଜାନାକୋ।
ୟାହୁଦୀ ମାରାଙ୍ଗ୍ସାଭା ସାମ୍ନାଙ୍ଗ୍ ରେ ୟୀଶୁ
(ମାର୍କୁ. 14:53-65; ଲୁକା. 22:54,55,63-71; ଯୋହା. 18:13,14,19-24)
57ଏନ୍ତେ ଏନ୍ ହୋଡ଼ୋକୋ ଅକନ୍କୋ ୟୀଶୁ କେ ସାବ୍ ଲିଜାକୋ କୈଫା ନୁତୁମ୍ ମାରାଙ୍ଗ୍ ୟାଜାକ୍ ତାଃ ଇଦିକିଜାକୋ, ଅକତାଃରେ ଆଇନ୍ ଗୁରୁକୋ ହାର୍ ମାରିହୋଡ଼ୋକୋ ହୁଣ୍ଡି ଲେନ୍ ତାଇନାକୋ। 58ମେନ୍ଦୋ ପାତ୍ରାସ୍ ସାଙ୍ଗିନ୍-ସାଙ୍ଗିନ୍ ଇନିଜାଃ ତାୟୋମ୍-ତାୟୋମ୍ ମାରାଙ୍ଗ୍ ୟାଜାକ୍ ରାଃ ରାଚା ସାନ୍ତେ ସେନ୍ ଜାନାଏ, ହାର୍ ଭିତାର୍ ସେନ୍ କେତେ ନେ କାଜି ରାଃ ଟୁଣ୍ଡୁ ନେନେଲ୍ ଲାଗିନ୍ ମାନ୍ଦିର୍ କେ ହୋରୋତାନ୍ କୋଲୋଃ ଦୁବ୍ ଜାନାଏ। 59ପ୍ରାଧାନ୍ ୟାଜାକ୍କୋ ହାର୍ ସବେନ୍ ବିଚାର୍ ସାଭା ରେନ୍ କୋ ୟୀଶୁ କେ ଗୋଏଃ ଲାଗିନ୍ ଇନିଜାଃ ବିରୋଧ୍ ରେ ଲୋଗୋ ଗୋୱା ରାଃ ଦାଣା ରେ ତାଇକେନାକୋ, 60ମେନ୍ଦୋ ଥିମ୍ବାଗି ଲୋଗୋ ଗୋୱାକୋ ହିଜୁଃ ଜାନ୍ ରେ ହଗି ମିହୋଡ଼୍ ହ କାକୋ ନାମ୍ କେଦା। ଆଖ୍ରୀ ରେ ବାର୍ହୋଡ଼୍ ହିଜୁଃଲେନାକିନ୍। 61ହାର୍ କାଜିକେଦାକିନ୍, “ନେ ହୋଡ଼ କାଜିକାଦାଏ ଚି ଇଙ୍ଗ୍ ପାର୍ମେଶ୍ଵାର୍ ରାଃ ମାନ୍ଦିର୍ କେ ଧାଶୁଡ଼୍ ଧାଡ଼ିୟାଇଙ୍ଗ୍ ହାର୍ ତିନ୍ ଦିନ୍ ରେ ବାଇ ଧାଡ଼ିୟାଇଙ୍ଗ୍।”
62ଏନ୍ତେ ମାରାଙ୍ଗ୍ ୟାଜାକ୍ ତିଙ୍ଗୁ କେତେ ୟୀଶୁ କେ କାଜିକେଦାଏ, “ଚିନାଃ ଆମ୍ ଜାହାନାଃ କାମ୍ କାଜିରୁଆଡ଼୍ ତାନାମ୍? ନେ ହୋଡ଼ୋକୋ ଆମାଃ ବିରୋଧ୍ ରେ ଚିକାନ୍ ଗୋୱା ଏମ୍ ତାନାକୋ?” 63ମେନ୍ଦୋ ୟୀଶୁ ହାପାଗି ତାଇନ୍ ଜାନାଏ। ଏନ୍ତେ ମାରାଙ୍ଗ୍ ୟାଜାକ୍ ଇନିଃକେ କାଜିକେଦାଏ, “ଇଙ୍ଗ୍ ଆମ୍କେ ଜୀନିଦ୍ ପାର୍ମେଶ୍ଵାର୍ ରାଃ କିରିୟା ଏମ୍ ମେତାନିଙ୍ଗ୍ ଚି ଆଗାର୍ ଆମ୍ ପାର୍ମେଶ୍ଵାର୍ ରାଃ ହୋନ୍ ମାସୀହ୍ ତାନ୍ମେ ଦୋ ଆଲେକେ କାଜିୟା ଲେମ୍।” 64ୟୀଶୁ ଇନିଃକେ କାଜିକେଦାଏ, “ଆମ୍ ଆମ୍ଗି କାଜିକେଦାମ୍, ମେନ୍ଦୋ ଇଙ୍ଗ୍ ଆମ୍କେ ନେୟା ହଗି କାଜିତାନିଙ୍ଗ୍ ଚି ନାଆ ଏତେ ଆମ୍ ଇଙ୍ଗ୍ ମାନ୍ୱା ରାଃ ହୋନ୍ କେ ସବେନ୍ ଏତେ ପେଡ଼େଜାନ୍ ରାଃ ଜୋମ୍ ପାଡ଼୍ ରେ ଦୁବାକାନ୍, ହାର୍ ରିମିଲ୍ଦିଶୁମ୍ ରାଃ ରିମିଲ୍ ରେ ହିଜୁଃ ତାନ୍ ନେଲିଙ୍ଗ୍ୟାପେ।”
65ଏନ୍ତେ ମାରାଙ୍ଗ୍ ୟାଜାକ୍ ଆଜାଃ ଲିଜାଃ ଚାଗାଡ଼୍ କେଦାଏ ହାର୍ କାଜିକେଦାଏ, “ନିଈ ପାର୍ମେଶ୍ଵାର୍ କେ ନିନ୍ଦା କିଜାଏ, ନାଆ ଆବୁକେ ଗୋୱା ରାଃ ଚିକାନ୍ ଦାର୍କାର୍? ନେଲେପେ, ଆପେ ନାଆଗି ନେ ନିନ୍ଦା ଆୟୁମ୍ କେଦାପେ! 66ଆପେ ଚିନାଃ ପାହୋମ୍ ତାନାପେ?” ଇନ୍କୁ କାଜିରୁଆଡ଼୍ କେଦାକୋ, “ନିଈ ଗୋନୋଏଃ ଦାଣ୍ଡ୍ ନାମେ ଲେକାନିଃ ତାନିଃ।”
67ଏନ୍ତେ ଇନ୍କୁ ଇନିଜାଃ ମେଏଃମୁହାଡ଼୍ ରେ ବେଏଃ କିଜାକୋ ହାର୍ ଇନିଃକେ ଗୁଡ଼୍ଦା କିଜାକୋ, ଏଟାଃକୋ ଥାପ୍ଡ଼ାଅ କିଜାକୋ ହାର୍ କାଜିକିଜାକୋ, 68“ହେ ମାସୀହ୍ ଆଲେକେ ଆୟାର୍କାଜି କାଜିକେତେ କାଜିମ୍ ଚି ଅକଏ ଆମ୍କେ ବିଡ଼ା କେଃମେୟାଏ?”
ପାତ୍ରାସ୍ ୟୀଶୁ କେ କାଇଙ୍ଗ୍ ସାରିୟା ମେନ୍ତେ କାଜିକେଦାଏ
(ମାର୍କୁ. 14:66-72; ଲୁକା. 22:56-62; ଯୋହା. 18:15-18,25-27)
69ପାତ୍ରାସ୍ ବାହାରି ରାଚା ରେ ଦୁବ୍ ଲେନାଏ ଚି ମିୟାଃ ଦାସୀ କୁଡ଼ି ଆଜାଃ ତାଃ ହିଜୁଃ ଲେନାଏ ହାର୍ କାଜିକେଦାଏ, “ଆମ୍ ଅଗି ଗାଲିଲୀ ଜିଲ୍ଲା ରେନ୍ ୟୀଶୁ ଲୋଃ ତାଇକେନାମ୍।” 70ମେନ୍ଦୋ ଇନିଃ ସବେନ୍ କୋୱାଃ ଥାଲା ରେ ମାନା କେଦାଏ ହାର୍ କାଜିକେଦାଏ, “ଇଙ୍ଗ୍ କାଇଙ୍ଗ୍ ସାରିତାନା ଆମ୍ ଚିନାଃ କାଜିତାନାମ୍।” 71ଚିମ୍ତାଙ୍ଗ୍ ଇନିଃ ବାହାରି ଦୁହାର୍ ତାଃ ସେନ୍ ଜାନାଏ, ଦୋ ଏଟାଃ ଦାସୀ କୁଡ଼ି ଇନିଃକେ ନେଲ୍କେତେ ଇନ୍କୁକେ ଅକନ୍କୋ ଏନ୍ତାଃରେ ତାଇକେନାକୋ କାଜିକେଃକୋୱାଏ, ନିଜୋ ଗିଦୋ ୟୀଶୁ ନାଜ୍ରେଥିୟା ଲୋଃ ତାଇକେନାଏ। 72ଇନିଃ କିରିୟା ଜୋମ୍ କେତେ ଆଡୋଃ ମିଶା ମାନା କେଦାଏ, “ଇଙ୍ଗ୍ ଏନ୍ ହୋଡ଼ କେ କାଇଙ୍ଗ୍ ସାରିୟା।” 73ହୁଡିଙ୍ଗ୍ ସାମାୟ୍ ରାଃ ତାୟୋମ୍ତେ ହୋଡ଼ୋକୋ ଅକନ୍କୋ ହେନ୍ତାଃ ରେ ତିଙ୍ଗୁ ଲେନ୍ ତାଇକେନାକୋ, ପାତ୍ରାସ୍ ତାଃ ନାଡ଼େଏ ହିଜୁଃ କେତେ ଇନିଃକେ କାଜିକିଜାକୋ, “ସାର୍ତିଗୀ ଆମ୍ ହଗି ଇନ୍କୁଏତେ ମିହୋଡ଼୍ ତାନ୍ମେ, ଚିୟାଃଚି ଆମାଃ କାଜିତେ ଆମ୍ ଆଟ୍କାର୍ ଉରୁମଃ ତାନାମ୍।” 74ଇନିଃ ସାର୍ପାଅ ଆଡୋଃ କିରିୟା ଜୋମ୍ କେଦାଏ, “ଇଙ୍ଗ୍ ଏନ୍ ହୋଡ଼ କେ କାଇଙ୍ଗ୍ ସାରିୟା।” ହାର୍ ଇମ୍ତାଗି ସିମ୍ ରାଆ କେଦାଏ। 75ଇମ୍ତା ପାତ୍ରାସ୍ କେ ଏନ୍ କାଜିକୋ ପାହୋମ୍ ହିଜୁଃଲେନା ଅକନାଃ ୟୀଶୁ କାଜି ଲିଜାଏ, “ସିମ୍କୋ ରାଆ ରାଃ ସିଦାରେ ଆମ୍ ଇଙ୍ଗ୍କେ ଆପିସା କାଇଙ୍ଗ୍ ସାରିୟା ମେନ୍ତେ କାଜିୟାମ୍।” ହାର୍ ଇନିଃ ବାହାରି ସେନ୍ କେତେ ଥିମ୍ବାଗି ଦୁକୁ ଜାନାଏ ହାର୍ ରାଆ କେଦାଏ।
Currently Selected:
ମାତ୍ତିଉ 26: UNXNT
Highlight
Share
Copy
Want to have your highlights saved across all your devices? Sign up or sign in
Munda (ମୁଣ୍ଡା) Bible by The Love Fellowship is licensed under Creative Commons Attribution-ShareAlike 4.0 License.
