ଯୋହାନ୍ 19

1ଏନ୍ତେ ପିଲାତୁସ୍ ଆନାଚୁ ଏମ୍ କେଦାଏ ଚି ୟୀଶୁ କେ ଇଦି କେତେ କୋଡ୍ରା ମାଉରି କାକୋ। 2ପାଲ୍‍ଟାନ୍ କୋ ଜାନୁମ୍ ରାଃ ମୁକୁଟ୍ ଗାଲାଙ୍ଗ୍ କେତେ ଇନିଜାଃ ବୋଅ ରେ ମାଣ୍ଡାଅ କେଦାକୋ, ହାର୍ ଇନିଃକେ ଟୋକୋ ରାଙ୍ଗ୍ ରାଃ ଲିଜାଃ ତୁସିଙ୍ଗ୍ କିଜାକୋ। 3ହାର୍ ଇନିଜାଃ ନାଡ଼େଏ ହିଜୁଃ-ହିଜୁଃକେତେ କାଜିକେଦାକୋ, “ହେ ୟାହୁଦୀ କୋୱାଃ ରାଜା, ଜୋହାର୍!” ହାର୍ ଇନିଃକେ ଚାଟ୍‍କାନ୍ କିଜାକୋ। 4ଏନ୍ତେ ପିଲାତୁସ୍ ଆଡୋଃଗି ବାହାରି ଅଡୋଙ୍ଗ୍ କେତେ ହୋଡ଼ୋକୋକେ କାଜିକେଃକୋୱାଏ, “ନେଲେପେ, ଇଙ୍ଗ୍ ଇନିଃକେ ଆପେୟାଃ ନାଡ଼େଏ ରେ ବାହାରି ଆୱିତାନିଙ୍ଗ୍, ଏନାତେ ଆପେ ସାରିପେ ଚି ଇଙ୍ଗ୍ ଇନିଜାଃ ଜେତ୍ନାଃ ଦୋଷ୍ କାଇଙ୍ଗ୍ ନାମ୍ ତାନା।” 5ଚିମ୍ତାଙ୍ଗ୍ ୟୀଶୁ ଜାନୁମ୍ ରାଃ ମୁକୁଟ୍ ହାର୍ ଟୋକୋ ରାଙ୍ଗ୍ ରାଃ ଲିଜାଃ ତୁସିଙ୍ଗ୍‍କାନ୍ ବାହାରି ଅଡୋଙ୍ଗ୍‍ନାଏ, ପିଲାତୁସ୍ ଇନ୍‍କୁକେ କାଜିକେଦାଏ, “ନେଲିପେ, ନେ ହୋଡ଼କେ!” 6ଚିମ୍ତାଙ୍ଗ୍ ପ୍ରାଧାନ୍ ୟାଜାକ୍‍କୋ ହାର୍ ମାନ୍ଦିର୍ ହୋରୋତାନ୍ ସିପାହୀକୋ ଇନିଃକେ ନେଲ୍ କିଜାକୋ, ଦୋ କାଉରିକେତେ କାଜିକେଦାକୋ, “ଇନିଃକେ କ୍ରୁଶ୍ ରେ ରାକାବିପେ, କ୍ରୁଶ୍ ରେ!” ପିଲାତୁସ୍ ଇନ୍‍କୁକେ କାଜିକେଃକୋୱାଏ, “ଆପେଗୀ ଇନିଃକେ ଇଦିକେତେ କ୍ରୁଶ୍ ରେ ରାକାବିପେ, ଚିୟାଃଚି ଇଙ୍ଗ୍ ଇନିଜାଃ ରେ ଜେତାନ୍ ଦୋଷ୍ କାଇଙ୍ଗ୍ ନାମ୍ ତାନା।” 7ୟାହୁଦୀ ଗୁରୁକୋ ଇନିଃକେ କାଜିରୁଆଡ଼୍ କିଜାକୋ, “ଆଲେୟାଃ ପୁର୍ଖା ମୁଶା ନାବୀ ରାଃ ଆଇନ୍ ହ ମେନାଃ ହାର୍ ଏନ୍ ଆଇନ୍ ଲେକାତେ ଇନିଃ ଗୋଜୋଃ ଦାଣ୍ଡ୍ ନାମେ ଲେକାନିଃ ତାନିଃ, ଚିୟାଃଚି ଇନିଃ ଆପାନ୍ କେ ପାର୍ମେଶ୍ଵାର୍ ରାଃ ହୋନ୍ ବାଇକେଦାଏ।”

8ଚିମ୍ତାଙ୍ଗ୍ ପିଲାତୁସ୍ ନେ କାଜି ଆୟୁମ୍‍କେଦାଏ ଦୋ ଆଡୋଃଗି ବୋରୋ ଜାନାଏ, 9ହାର୍ ଇନିଃ ଆଡୋଃଗି ହାକିମ୍ ରାଃ ବିଚାର୍ ଅଡ଼୍ଆଃ ତେ ବୋଲୋ ଜାନାଏ ହାର୍ ୟୀଶୁ କେ କାଜିକିଜାଏ, “ଆମ୍ କୋତାଃ ରେନ୍ ତାନ୍‍ମେ?” ମେନ୍ଦୋ ୟୀଶୁ ଇନିଃକେ ଚିନାଃ ହ କାଏ କାଜିରୁଆଡ଼୍ କିଜାଏ। 10ଏନ୍ତେ ପିଲାତୁସ୍ ଇନିଃକେ କାଜିକିଜାଏ, “ଇଙ୍ଗ୍‍କେ ଚିନାଃ ଲାଗିନ୍ କାମ୍ କାଜିତାନା? ଚିନାଃ ଆମ୍ କାମ୍ ସାରିୟା ଚି ଆମ୍‍କେ ବାଗେ ରାଃ ଆଧିକାର୍ ଇଙ୍ଗ୍ଆଃ ତାଃ ମେନାଃ ହାର୍ କ୍ରୁଶ୍ ରେ ରାକାବ୍ ରାଃ ହ ଆଧିକାର୍ ଇଙ୍ଗ୍ଆଃ ତାଃ ମେନାଃ?” 11ୟୀଶୁ କାଜିରୁଆଡ଼୍ କିଜାଏ, “ଆଗାର୍ ଆମ୍‍କେ ପାର୍ମେଶ୍ଵାର୍ ଏତେ କା ଏମୋଃ ତେୟାଃ, ଦୋ ଆମାଃ ଇଙ୍ଗ୍ଆଃ ଚେତାନ୍ ରେ ଜେତାନ୍ ଆଧିକାର୍ କା ହୋବାଅଃ ତେୟାଃ, ଏନାମେନ୍ତେ ଅକଏ ଇଙ୍ଗ୍‍କେ ଆମାଃ ତିଈ ରେ ସାବାଦିଙ୍ଗାଏ ଇନିଜାଃ ପାପ୍ ଥିମ୍ବା ମେନାଃ।”

12ଏନାମେନ୍ତେ ପିଲାତୁସ୍ ଇନିଃକେ ବାଗେ ଲାଗିନ୍ ସାନାଙ୍ଗ୍ କିଜାଏ, ମେନ୍ଦୋ ୟାହୁଦୀ ହୋଡ଼ୋକୋ କାଉରି-କାଉରି କେତେ କାଜିକେଦାକୋ, “ଆଗାର୍ ଆମ୍ ଇନିଃକେ ବାଗେତାୟାମ୍, ଏଣ୍ଡେ ଆମ୍ ରୋମ୍‍ରେନ୍ ରାଜା#19:12 କୈସାର୍ ରୋମ୍‍ରେନ୍ ରାଜା ରାଃ ଗାତି ନାହାଲାମ୍, ଜେତାଏ ଆଏଃ ଆପାନ୍ କେ ରାଜା ବାଇତାନାଏ ଇନିଃ କୈସାର୍ ରାଃ ବିରୋଧ୍ ତାନାଏ।”

13“ନେ ବାକାଣ୍ ଆୟୁମ୍‍କେତେ ପିଲାତୁସ୍ ୟୀଶୁ କେ ବାହାରି ଆଉକିଜାଏ ହାର୍ ଏନ୍ ଜାଗା ରେ ମିୟାଃ ଦିରି ରାଃ ପିଣ୍ଡା ତାଇକେନା ଏନା ଇବ୍ରାନୀ ବାକାଣ୍ ରେ ‘ଗାବ୍ବାଥା’ କାଜିୟଗା, ହାର୍ ଏନ୍ତାଃ ବିଚାର୍ କୁର୍ସି ରେ ଦୁବ୍ ଜାନାଏ। 14ନେୟା ଫାସାହ୍ ପାରାବ୍ ହାପ୍ତା ରାଃ ସେକାଡ଼େନ୍ ହୁଲାଙ୍ଗ୍ ତାଇକେନା, ହାର୍ ତିକିନ୍ ସାମାୟ୍ ତାଇକେନା।” ଇମ୍ତା ଇନିଃ ୟାହୁଦୀ ହୋଡ଼ୋକୋକେ କାଜିକେଃକୋୱାଏ, “ନେଲିପେ ଆପେୟାଃ ରାଜା!” 15ମେନ୍ଦୋ ଇନ୍‍କୁ କାଉରି କେଦାକୋ, “ଗୋଜିମ୍! ଗୋଜିମ୍! ଇନିଃକେ କ୍ରୁଶ୍ ରେ ରାକାବିମ୍!” ପିଲାତୁସ୍ ଇନ୍‍କୁକେ କାଜିକେଃକୋୱାଏ, “ଚିନାଃ ଇଙ୍ଗ୍ ଆପେୟାଃ ରାଜା କେ କ୍ରୁଶ୍ ରେ ରାକାବିୟାଇଙ୍ଗ୍?” ପ୍ରାଧାନ୍ ୟାଜାକ୍‍କୋ କାଜିରୁଆଡ଼୍ କେଦାକୋ, “ରୋମ୍‍ରେନ୍ ରାଜା କେ ବାଗେ କେତେ ଜେତାଏ ଆଲେୟାଃ ରାଜା ନାହାଲାଏ।”

16ଏନ୍ତେ ପିଲାତୁସ୍ ଇନିଃକେ ଇନ୍‍କୁୱାଃ ତିଈ ରେ ଜିମା ତାଃ କୋୱାଏ ଏନାତେ ଇନିଃ କ୍ରୁଶ୍ ରେ ରାକାବୋଃ କାଏ।

ୟୀଶୁ କେ କ୍ରୁଶ୍ ରେ ରାକାବ୍ କିଜାକୋ

(ମାତ୍ତି. 27:32-44; ମାର୍କୁ. 15:21-32; ଲୁକା. 23:26-43)

17“ଏନ୍ତେ ପାଲ୍‍ଟାନ୍ କୋ ୟୀଶୁ କେ ଇଦିକିଜାକୋ, ହାର୍ ଇନିଃ ଆୟାଃ କ୍ରୁଶ୍ ଉଠାଓ କେତେ ଏନ୍ ଜାଗା ସାନ୍ ବାହାରି ତେ ସେନ୍ ଜାନାଏ, ଅକନାଃ ‘ଖୋପ୍‍ଡ଼ି ରାଃ ଜାଗା’ କାଜିଅଃୱା ହାର୍ ଇବ୍ରାନୀ ବାକାଣ୍ ରେ ‘ଗୋଲ୍‍ଗୋଥା’। 18ହେନ୍ତାଃ ରେ ଇନ୍‍କୁ ଇନିଃକେ ହାର୍ ଇନିଃ ଲୋଃ ଆଡୋଃ ବାରିୟା ହୋଡ଼ୋ କିନ୍‍କେ ଏଟାଃ କ୍ରୁଶ୍ ରେ ରାକାବ୍ କେଃକୋୱାକୋ ମିହୋଡ଼୍ କେ ନେତେରେ ହାର୍ ଏଟାଃ ମିହୋଡ଼୍ କେ ହାନ୍ତେରେ, ହାର୍ ଥାଲା ରେ ୟୀଶୁ କେ।” 19ପିଲାତୁସ୍ ମିୟାଃ ଦୋଷ୍ ଅନୋଲ୍ ଅଲ୍‍କେତେ କ୍ରୁଶ୍ ଚେତାନ୍ ରେ ଲାଗାଅ ତାଦାଏ, ହାର୍ ଏନାରେ ନେୟା ଅଲ୍‍ଲେନା, “ୟୀଶୁ ନାଜ୍ରେଥ୍ ସାହାର୍ ରେନ୍ ୟାହୁଦୀ କୋୱାଃ ରାଜା।” 20ନେ ଦୋଷ୍ ଚିଠି କେ ଥିମ୍ବାଗି ୟାହୁଦୀକୋ ପାଢ଼ାଅ କେଦାକୋ, ଚିୟାଃଚି ଏନ୍ ଜାଗା ଅକତାଃ ୟୀଶୁ କେ କ୍ରୁଶ୍ ରେ ରାକାବ୍ ଲିଜାକୋ ୟୀରୁଶାଲେମ୍ ସାହାର୍ ରାଃ ନାଡ଼େଏ ରେ ତାଇକେନା, ହାର୍ ଚିଠି ଇବ୍ରାନୀ ବାକାଣ୍ ହାର୍ ଲାଟିନ୍ ବାକାଣ୍ ହାର୍ ୟୁନାନୀ ବାକାଣ୍ ରେ ଅଲାକାନ୍ ତାଇକେନା। 21ଏନ୍ତେ ୟାହୁଦୀ ହୋଡ଼ୋ କୋୱା ପ୍ରାଧାନ୍ ୟାଜାକ୍‍କୋ ପିଲାତୁସ୍ କେ କାଜିକେଦାକୋ, “ ‘ୟାହୁଦୀ କୋୱା ରାଜା’ ଆଲୋମ୍ ଅଲେ ମେନ୍ଦୋ ନେୟା ଅଲେମ୍ ଚି ‘ଇନିଃ କାଜିକେଦାଏ, ଇଙ୍ଗ୍ ୟାହୁଦୀ କୋୱା ରାଜା ତାନିଙ୍ଗ୍।’ ” 22ପିଲାତୁସ୍ କାଜିରୁଆଡ଼୍ କେଃକୋୱାଏ, “ଇଙ୍ଗ୍ ଅକନାଃ ଅଲ୍ ତାଦାଇଙ୍ଗ୍ ଏନା ଅଲ୍ ତାଦାଇଙ୍ଗ୍।”

23ଚିମ୍ତା ପାଲ୍‍ଟାନ୍ କୋ ୟୀଶୁ କେ କ୍ରୁଶ୍ ରେ ରାକାବ୍ ତାଇଜାକୋ, ଏନ୍ତେ ଇନିଜାଃ ଲିଜାଃ କେ ଇଦିକେତେ ଚାଇର୍ ଭାଗ୍ କେଦାକୋ, ଚାଇର୍ ପାଲ୍‍ଟାନ୍ କୋ ନାଙ୍ଗ୍ ମିପୀୟାଃ ଭାଗ୍, ହାର୍ ଝୁଲା କେ ହ ଇଦିକେଦାକୋ, ମେନ୍ଦୋ ଝୁଲା ସିଲାଇକାନ୍ ତେୟାଃ କା ତାଇକେନା ଚେତାନ୍ ହେତେ ଲାଥାର୍ ଗାଲାଙ୍ଗ୍ କାନ୍ ତେୟାଃ ତାଇକେନା। 24ଏନାଲାଗିନ୍ ଇନ୍‍କୁ ଆକୋ-ଆକୋ ରେ କାଜିଜାନାକୋ, “ଆବୁ ନେୟାକେ କାବୁ ଚାଗାଡ଼େୟା, ମେନ୍ଦୋ ନେୟା ରେ ଖୁଡ଼୍‍ଖୁଡ଼ି ୟାବୁ ଚି ନେୟା ଅକେୟାଃ ହୋବାୱା।” ନେୟା ଏନାଲାଗିନ୍ ହୋବାଜାନା, ଚି ପାବିତାର୍ ପୁଥି ରେ ଅକନାଃ କାଜିଲେନ୍ ତାଇନା ଏନା ପୁରାଅଃକା,

“ଇନ୍‍କୁ ଇଙ୍ଗ୍ଆଃ ଲିଜାଃ ଆକୋ କେରେ ହାପାଟିଙ୍ଗ୍ ଜାନାକୋ ହାର୍ ଇଙ୍ଗ୍ଆଃ ଝୁଲା ରେ ଖୁଡ଼୍‍ଖୁଡ଼ି ଉୟୁଃ କେଦାକୋ।”

25ଏନାମେନ୍ତେ ପାଲ୍‍ଟାନ୍ କୋ ନେକାଗି ରିକା କେଦାକୋ। ୟୀଶୁ ରାଃ କ୍ରୁଶ୍ ନାଡ଼େଏ ରେ ଇନିଜାଃ ଏଙ୍ଗାକିନ୍ ହାର୍ ଏଙ୍ଗାକିନା ମିଶି, କ୍ଲୋପାସ୍ ଗାଃ କୁଡ଼ି ମାରିୟାମ୍, ହାର୍ ମାରିୟାମ୍ ମାଗ୍‍ଦାଲା ସାହାର୍ ରେନ୍ ତିଙ୍ଗୁକାନ୍ ତାଇକେନାକୋ। 26ଚିମ୍ତାଙ୍ଗ୍ ୟୀଶୁ ଆୟାଃ ଏଙ୍ଗାକିନ୍ କେ ହାର୍ ଏନ୍ ଚେଲା କେ ଅକନିଃକେ ଇନିଃ ଦୁଲାଡ଼୍ ତାଇକେନାଏ ନାଡ଼େଏ ଦିଙ୍ଗୁଆକାନ୍ ନେଲ୍‍କେଦାଏ, ଦୋ ଆୟାଃ ଏଙ୍ଗାକିନ୍ କେ କାଜିକେଦାଏ, “ହେ ମା, ନେଲେମ୍, ନିଈ ଆମାଃ ହୋନ୍ ତାନିଃ।” 27ଏନ୍ତେ ଇନିଃ ଏନ୍ ଚେଲା କେ କାଜିକିଜାଏ, “ନିଈ ଆମାଃ ଏଙ୍ଗାକିନ୍ ତାନ୍‍କିନ୍।” ହାର୍ ଇମ୍ତା ଏତେଗି ଏନ୍ ଚେଲା, ଆକିନ୍ କେ ଆୟାଃ ଅଡ଼୍ଆଃ ଇଦିକିଜାଏ।

ୟୀଶୁ ରାଃ ଗୋନୋଏଃ

(ମାତ୍ତି. 27:45-56; ମାର୍କୁ. 15:33-41; ଲୁକା. 23:44-49)

28ନେୟା ରାଃ ତାୟୋମ୍ତେ ୟୀଶୁ ନେୟା ସାରିକେତେ ଚି ନାଆ ସବେନାଃ ପୁରା ହୋବାଜାନା, ଏନାମେନ୍ତେ ଚି ପାବିତାର୍ ପୁଥି ରେ ଅକନାଃ କାଜି ଜାନା ଏନା ପୁରାଅଃକା, କାଜିକେଦାଏ, “ଇଙ୍ଗ୍ ତେତାଙ୍ଗ୍ ମେନାଇଙ୍ଗ୍‍ୟା।” 29ଏନ୍ତାଃ ଜୋଜୋ ଆଙ୍ଗୁର୍ ରାଶି ତେ ଫେରେଃକାନ୍ ମିୟାଃ ଚାଟୁ ତାଇକେନା, ଏନ୍ତେ ଇନ୍‍କୁ ଜୋଜୋ ଆଙ୍ଗୁର୍ ରାଶି ରେ ତୁପୁକାନ୍ ସ୍ପଞ୍ଜ କେ ହିସୋପ୍ ସୋଟା ରାଃ ଆଗା ରେ ମାଣ୍ଡାଅ କେତେ ମୋଚା ତାଃ ଏମ୍ କିଜାକୋ। 30ଚିମ୍ତା ୟୀଶୁ ଏନ୍ ଜୋଜୋ ଆଙ୍ଗୁର୍ ରାଶି ଚାଖାକେଦାଏ, ଦୋ କାଜିକେଦାଏ, “ପୁରା ହୋବାଜାନା” ହାର୍ ବୋଅ ତିରୁବ୍ କେତେ ଗୋଏଃ ଜାନାଏ।

ବାର୍ଛା ତେ ହୋଟୋର୍

31ନାଆ ଦୋ ଏନା ସେକାଡ଼େନ୍ ହୁଲାଙ୍ଗ୍ ତାଇକେନା, ହାର୍ ଏଟାଃ ହୁଲାଙ୍ଗ୍ ଆରାମେ ହୁଲାଙ୍ଗ୍ ହାର୍ ଫାସାହ୍ ପାରାବ୍ ବାରାନାଃ ତାଇକେନା, ଏନାମେନ୍ତେ ୟାହୁଦୀ ଗୁରୁ କୋ ପିଲାତୁସ୍ କେ ଆର୍ଜି କିଜାକୋ ଚି ଇନ୍‍କୁୱାଃ କାଟା କୋକେ ଠୋଏଃ ରିକାଅଃକା ଏନାତେ ଇନ୍‍କୁ ଜାଲ୍‍ଦି ଗୋଜୋଃ କାକୋ ହାର୍ ଇନ୍‍କୁକେ ଆଡ଼୍‍ଗୁ ରିକାଅଃକାକୋ, ହାର୍ ଆରାମେ ହୁଲାଙ୍ଗ୍ ରେ କ୍ରୁଶ୍ ରେ ଇନ୍‍କୁୱାଃ ଗୋଏଃ ହୋଡ଼ମୋକୋ କାତାଇନ୍‍କା, ଚିୟାଃଚି ଏନ୍ ଆରାମେ ହୁଲାଙ୍ଗ୍ ଖାସ୍ ମାରାଙ୍ଗ୍ ହୁଲାଙ୍ଗ୍ ତାଇକେନା। 32ଏନ୍ତେ ପାଲ୍‍ଟାନ୍ କୋ ହିଜୁଃକେତେ ସିଦା ନିଜାଃ କାଟା ଠୋଏଃ କେଦାକୋ ଏନ୍ତେ ଏଟାଃ ନିଜାଃ ହ, ଅକନ୍‍କୋ ଇନିଜାଃ ଲୋଃ କ୍ରୁଶ୍ ରେ ରାକାବ୍ ଲେନାକୋ। 33ମେନ୍ଦୋ ଚିମ୍ତା ୟୀଶୁ ରାଃ ନାଡ଼େଏ ହିଜୁଃକେତେ ନେଲ୍ କିଜାକୋ ଚି ଇନିଃ ଗୋଏଃ ଛାବା କାନାଏ, ଏଣ୍ଡେ ଇନିଜାଃ କାଟା କାକୋ ଠୋଏଃ କେଦା। 34ମେନ୍ଦୋ ପାଲ୍‍ଟାନ୍ କୋଏତେ ମିହୋଡ଼୍ ବାର୍ଛା ତେ ଇନିଜାଃ ପାଞ୍ଜ୍ରା କେ ହୋଟୋର୍ କିଜାଏ, ହାର୍ ଏନା ଏତେ ଇମ୍ତାଗି ମାୟୋମ୍ ଆଡୋଃ ଦାଆ ଅଡୋଙ୍ଗ୍ ଜାନା। 35ଅକଏ ନେୟା ନେଲ୍‍କେଦାଏ, ଇନିଃଗି ଗୋୱା ଏମ୍‍କେଦାଏ, ହାର୍ ଇନିଜାଃ ଗୋୱା ସାର୍ତି ତାନାଃ, ହାର୍ ଇନିଃ ସାରିୟାଏ ଚି ଇନିଃ ସାର୍ତି କାଜି ତାନାଏ ଏନାତେ ଆପେ ହ ୟୀଶୁ ରେ ବିଶ୍ଵାସ୍ ୟାପେ। 36ନେ କାଜିକୋ ନେୟାମେନ୍ତେ ହୋବାଜାନା ଚି ପାବିତାର୍ ପୁଥି ରେ ଅକନାଃ ଅଲାକାନ୍ ତାଇକେନା ଏନା ପୁରାଅଃକା, “ଇନିଜାଃ ଜାହାନ୍ ଜାଙ୍ଗ୍ କା ଠୋଏଜୋଗା।” 37ଆଡୋଃଗି ପାବିତାର୍ ପୁଥି ରାଃ ଏଟାଃ ଜାଗା ରେ ନେକା ଅଲାକାନା, “ଅକଏକେ ହିନ୍‍କୁ ହୋଟୋର୍ ଲିଜାକୋ, ଇନିଃକେ ହିନ୍‍କୁ ନେଲିୟାକୋ।”

ୟୀଶୁ କେ କାବାର୍ ଏମ୍

(ମାତ୍ତି. 27:57-61; ମାର୍କୁ. 15:42-47; ଲୁକା. 23:50-56)

38ନେ ବାକାଣ୍ କୋରାଃ ତାୟୋମ୍ତେ ଆରିମାତିୟା ହାତୁ ରେନ୍ ଯୋଶେଫ୍ ଅକନିଃ ୟୀଶୁ ରାଃ ଚେଲା ତାଇକେନାଏ, ମେନ୍ଦୋ ୟାହୁଦୀ ଗୁରୁ କୋୱା ବୋରୋ ତେ ନେ କାଜିକୋକେ ଉକୁ ମାଣ୍ଡାଅ ତାଇକେନାଏ, ପିଲାତୁସ୍ କେ ଆର୍ଜି କିଜାଏ ଚି, ଚିନାଃ ଇନିଃ ୟୀଶୁ ରାଃ ମାଣା କେ ଇଦି ଧାଡ଼ିୟାଏ। ପିଲାତୁସ୍ ଇନିଜାଃ ଆର୍ଜି କେ ଆୟୁମ୍ କେଦାଏ, ହାର୍ ଇନିଃ ହିଜୁଃକେତେ ଇନିଜାଃ ମାଣା କେ ଇଦିକେଦାଏ। 39ନିକୁଦିମୁସ୍ ହଗି, ଅକଏ ସିଦା ୟୀଶୁ ତାଃ ନିଦା ରେ ସେନ୍ ଲେନାଏ, ପାଚାଶ୍ ସେର୍#19:39 ପାଚାଶ୍ ସେର୍ 35 କି.ଗ୍ରା. ଲାଗ୍‍ଭାଗ୍ ମେଶାକାନ୍ ଗାନ୍ଧରାସ୍ ହାର୍ ଏଲାବା ଆଉକେଦାଏ। 40ଏନ୍ତେ ଇନ୍‍କୁ ୟୀଶୁ ରାଃ ମାଣା କେ ଇଦିକେଦାକୋ, ହାର୍ ୟାହୁଦୀ କୋୱାଃ କାବାର୍ ଏମ୍ ନିୟାମ୍ ଲେକାତେ ଇନିଃକେ ସୋୱାନ୍ ଜିନିଷ୍ କୋତେ ମାଣା ଲିଜାଃ ରେ ପୋଟୋମ୍ କିଜାକୋ। 41ଅକ୍ତାଃ ୟୀଶୁ କେ କ୍ରୁଶ୍ ରେ ରାକାବ୍ ରିକାଲେନା ଏନ୍ ଜାଗା ରେ ମିୟାଃ ବାଖ୍‍ଡ଼ି ତାଇକେନା, ହାର୍ ଏନ୍ ବାଖ୍‍ଡ଼ି ରେ ମିୟାଃ ନାୱା କାବାର୍ ତାଇକେନା ଅକଣ୍ଡେ ଚିଉଲା ହ ଜେତାଏ କେ କାମାଣ୍ଡାଅ ଲେନା। 42ଏନାମେନ୍ତେ ୟାହୁଦୀ କୋୱା ସେକାଡ଼େନ୍ ହୁଲାଙ୍ଗ୍ ରାଃ ଚାଲ୍ତେ ଇନ୍‍କୁ ୟୀଶୁ କେ ଏଣ୍ଡେ ରେଗି ଦହ କିଜାକୋ, ଚିୟାଃଚି ଏନ୍ କାବାର୍ ନାଡ଼େଏ ରେ ତାଇକେନା।

Currently Selected:

ଯୋହାନ୍ 19: UNXNT

Highlight

Copy