मर्कूस 16

येशूक फेनदोस्रे जिउठ्ना

(मत्ती २८:१-८; लूक. २४:१-१२; यूह. २०:१-१०)

1दोसुर संझा यहूदिनके बिँसैना दिन ओराके सेकके मग्दल गाउँक मरियम, सलोमी और दोसुर मरियम जे याकूब और योसेफके दाई हो। ओइने यहूदी चलन अनुसार एकदम महँकना तेल नन्लाँ, और येशूक लाहाशमे घाँसक लग किनके नन्लाँ। 2तब् अँतवारके दिन सक्करहीँ, यी जन्नी मनै चिहानके लग्गे गैलाँ, और जब दिन निकरतेहे, तब्बेहेँ ओइने चिहानमे पुग्लाँ। 3और डगरमे ओइने एकदोसर जहनसे यी बात बत्वाइतिहिँत, “हमार लग चिहानके मोह्करमेसे पठरा के उस्टा दि?” 4पर जब ओइने उप्पर हेरलाँ, ते ओइने देख्लाँ कि उ बरवार पठरा ते भित्तर जैना मोह्करमेसे पैलेहेँ उस्टागिल बा। 5जब उ जन्नीन चिहानके लग्गे अइलाँ, और भित्तर गैलाँ, ते ओइने एकथो जवान मनैयाहे चहकार उज्जर लुग्गा घालके अपन दाहिन ओहोँर बैठल देख्लाँ, और ओइने घब्रागिलाँ। 6जवान मनैया उ जन्नीनहे कहल, “ना डराऊ, का तुहुरे नासरत गाउँक येशूहे खोजतो? जे क्रूसमे मुवागिल रहिँत। ऊ ते मुके फेनदोस्रे जित्ती होके उठ्गिल बताँ, ऊ यहाँ नै हुइताँ। उ ठाउँहे हेरो, जहाँ ऊ धारगिल रहिँत। 7पर आब जाऊ और पत्रुस और येशूक दोसुर चेलनहे यी खबर दैदेऊ। ओइन्हे कहहो, येशू तुहुरिन्से आघे गालील प्रदेशमे जैहीँ, और तुहुरे हुँकिन्हे वहाँ देख्बो, जसिके ऊ तुहुरिन्हे आग्गिहीँ बतादेले रहिँत।” 8असिन सुनके सेक्लाँ ते ओइने चिहानमेसे चलगिलाँ, और दौरगिलाँ। काकरेकी ओइने घब्राइल रहिँत, और लग्लगाइतिहिँत। जवान मनैया ज्या कहल रहे, उ बात डगरमे ओइने किहुहे फेन नै बतैलाँ। काकरेकी ओइने डराइल रहिँत।

प्रभु येशू चेलनके थेन देखा परलाँ

(मत्ती २८:९-२०; लूक. २४:१३-५३; यूह. २०:११-२३; निउत. का. १:४-११)

9अँतवारके दिन बेहानके, जब येशू मुअलमेसे जित्ती हुइलाँ, ते सुरुमे मग्दल गाउँक मरियम रहे, जिहिहे येशू देखा परलाँ। यी वहे मरियम हो, जिहिहे येशू एकचो सातथो भूत्वनके कब्जामेसे छुटाइल रहिँत। 10मरियम गैल और येशूक चेलनहे यी खबर देहल। ओइने येशूक मृत्युमे दुखि रहिँत, और रुइतिहिँत। 11पर जब ओइने ओकर मुहसे यी बात सुन्लाँ कि येशू फेनदोस्रे जित्ती होगिलताँ और ऊ हुँकिन्हे देख्लस, ते ओइने ओकर बात नै पत्यैलाँ। 12ओकरपाछे वहे दिन येशू अपन चेलनमेसे दुई जहनहे देखा परलाँ, जब ओइने यरुशलेम शहरमेसे कहुँ आँजरपाँजर अपन घरे जाइतिहिँत। पर ओइने येशूहे झत्ते चिन्हे नै सेक्लाँ। काकरेकी ऊ दोसुर मेरके देखाइतिहिँत। 13जब ओइने हुँकिन्हे चिहिन्लेलाँ, तब उ दुईथो चेलनके यरुशलेम शहरमे फिर्ता होगिलाँ। ओइने येशूक दोसुर चेलनहे फेन बतैलाँ कि का हुइलस, पर ओइने नै पत्यैलाँ।

महान आदेश

14ओकरपाछे येशू उ एघारथो चेलनके थेन फेनदोस्रे देखा परलाँ, जब ओइने एक्के थेन खाना खाइतिहिँत। ऊ ओइन्हे गर्यैलाँ, काकरेकी ओइने जिद्दीह्या रहिँत। चेलनके ओइन्केमे विश्वास नै करलाँ, जेने येशूहे मुअलमेसे जित्ती होसेकलमे देखल रहिँत। 15येशू ओइन्हे कलाँ, “संसारमे हरेक ठाउँ जाऊ और सक्कु मनैनहे खुशीक खबर सुनाऊ। 16जे केऊ फेन मोरिकमे विश्वास करी, चिन्हक रुपमे उहिहे डुब्कि देऊ कि ऊ आब मोरिकमे विश्वास करत। और परमेश्वर उहिहे ओकर पापके सजाय मिल्नासे बँचैहीँ। पर जे मोरिकमे विश्वास नै करी, ओकर पापके सजाय परमेश्वर उहिहे दिहीँ। 17-18जेने मोरिकमे विश्वास करहीँ, ओइने यी चमत्कार करे सेक्हीँ। मोरिक नाउँमे ओइने भूत्वनहे भगैहीँ, और मै ओइन्हे असिन बनैम कि ओइने अन्य भाषा बोले सेक्हीँ। यदि ओइने बिखार सँप्वा उठालिहीँ कलेसे फेन मै ओइन्के सुरक्षा करम। यदि ओइने कौनो विष पिलिहीँ कलेसे फेन मै उहिसे ओइन्हे कौनो नोकसान हुई नै देहम। ओइने बेमार मनैनके उप्पर अपन हाँथ धरहीँ, ते मोरिक नाउँक कारण बेमार मनै चोखाजैहीँ।”

येशूक स्वर्गमे जैना

19जब प्रभु येशू चेलनहे यी सक्कु बात कहिके सेक दरलाँ, ते हुँकिन्हे परमेश्वर स्वर्गमे उठालेलिन। और ऊ परमेश्वरके दाहिन ओहोँर आदरके पदमे बैठ्लाँ। 20तब् चेलनके हरेक ठाउँमे गैलाँ, और खुशीक खबर सक्कु ठाउँमे प्रचार करलाँ। प्रभु ओइन्के सहायता करलाँ और देखैलाँ कि ओइन्के देहल खबर परमेश्वरके ओहोँरसे रहे। आमेन! (यकर मतलब हुइत, अस्तेहेँ होए।)

Currently Selected:

मर्कूस 16: DVGNT

Highlight

Copy