लूका 1
1
भूमिका
1माननीय थियोफिलस, बहुत मनै हमार बिच्चेम पूरा हुइलक घटनक बारेमे एकथो दस्तावेज लिख्ना कोशिस कर्ले बताँ। 2ओइने ठिक वहे लिख्लाँ, ज्या हम्रिहिन्हे उ मनै बताइल रहिँत, जेने प्रत्यक्ष रुपमे येशूक सेवकाइहे सुरुसे देखल रहिँत। और ओइने पाछेजाके परमेश्वरके वचनके सेबक बनगिलाँ। 3माननीय थियोफिलस, मै सुरुएसे साबधानीसे सक्कु चिजके खोजी करल बतुँ, और अप्निक लग एकथो क्रम अनुसारके विवरण लिख्ना महिन्हे मजा लागल। 4मै यी यकर लग लिखतुँ ताकि अप्निहे मनैनके जनाइल बातके पूरा सच्चाई पता होजाए।
डुब्कि देहुइया यूहन्नक जलमके भविष्यवाणी
5जब हेरोद रज्वा यहूदिया प्रदेशमे राज करतेहे, तब अबिया दलके#1:5 अबिया दलके दाऊद रज्वक समयसे पुजारीनके चौबीसथो दल रहे। जेने मन्दिरमे हुइना सक्कु कामके जिम्मेवार रहिँत। जोन काममे दान, बलिदान, प्राथना, आराधनामे अगुवाई करना और सामान्य रेखदेख करना काम परत। हरेक दल हर छे-छे महिनामे एकचो एक अँठवारके लग मन्दिरमे सेवा करे। जकरिया नाउँ रहल एकथो पुजारी रहे। ऊ और ओकर जन्नी दुनु जाने हारुनके वंशक रहिँत, जेने इजरायलके सुरुक पुजारी रहिँत। जकरियक जन्नीक नाउँ एलिशिबा रहिस। 6उ दुनु जाने परमेश्वरके आघे धर्मी रहिँत, और ओइने परमप्रभुक सक्कु आज्ञा और विधि-विधानमे निर्दोष होके नेँगित। 7पर ओइन्के लरका एक्को नै रहिन। काकरेकी एलिशिबा बाँझी रहिन, और उ दुनु जाने बुह्रागिल रहिँत। 8एक दिन जब जकरिया यरुशलेमके मन्दिरमे परमेश्वरके लग्गे अपन दलके पालम यहूदी पुजारीक काम करतेहे। 9तब् यहूदी पुजारीक कामके चलन अनुसार चिट्टा दारेबेर बहुत्ते काममेसे परमप्रभुक मन्दिरके भित्तर पैँठ्के धूप बर्ना काम जकरियाहे पर्लिस। 10धूप बारेबेर बहुत्ते मनै मन्दिरके अंगनामे प्राथना करतिहिँत। 11तब ऊ परमप्रभुक एकथो स्वर्गदूतहे धूप-वेदीक दाहिन पाँजर ठरह्याइल देखल। 12तब जकरिया उहिहे देख्के घब्रागिल, और गजब जोरसे डरागिल। 13पर स्वर्गदूत उहिहे कहल, “ना डराऊ जकरिया, काकरेकी तोहाँर प्राथना परमेश्वर सुनलेहल बताँ। आब तोहाँर जन्नी एलिशिबा तोहाँर लग एकथो छावा लरका पाई। और तुँ हुँकार नाउँ यूहन्ना धरहो। 14तुहिन्हे खुशी और आनन्द हुई और बहुत्ते मनै रमैहीँ, काकरेकी हुँकार जलम हुइल बतिन। 15काकरेकी ऊ परमप्रभुक आघे महान हुइहीँ। उहिन्हे मतवार लगैना जाँर-दारु कबु नै पिए देहो, और ऊ जल्मनासे आग्गिहीँ पवित्र आत्मासे भरपूर रहिहीँ। 16ऊ इजरायलके बहुत्ते मनैनहे ओइन्के परमप्रभु परमेश्वरके ओहोँर फिर्ता नन्हीँ। 17यूहन्ना एकथो असिन मनैया बन्हीँ, जे एलिया अगमवक्तक आत्मा और शक्तिसे रहिहीँ। ताकि उ बाबनके मन ओइन्के छाई छावनके ओहोँर फेनदोस्रे घुमजाइन। और आज्ञा नै मनुइयनहे धर्मी मनैन नन्हेँ मजा तरिकासे जिअक लग नेगैहीँ। और उ मनैनहे परमप्रभुक आज्ञा मानक लग तयार करहीँ।” 18तब् जकरिया स्वर्गदूतहे कहल, “यी मै कसिके जानु कि पक्कै फेन हमार संग असिके हुई? मै बुह्रागिल बतुँ, और मोरिक जन्नीक उमेर फेन गैसेकल बा।” 19स्वर्गदूत उहिहे जवाफ देहल, “मै गब्रिएल हुइतुँ, जे परमेश्वरके आघे ठरह्याइल रहत। तुहिन्से बात करे और यी खुशीक खबर सुनाई मै पठागिल बतुँ। 20हेरो, जोन दिनसम बच्चा नै जल्मी, वहे दिनसम तुँ बोले नै सेक्बो, और चिमचाम रबो। काकरेकी तुँ मोरिक वचनमे विश्वास नै कर्लो, जोन वचन अपन समयमे पूरा हुई।” 21जकरियासे आशीर्वाद लेहक लग मनै मन्दिरके अंगनामे अँस्याइतिहिँत। और मन्दिरमे उहिहे बेर करत देख्के ओइने हैरान होगिलाँ। 22ओकरपाछे जकरिया बाहेर आइल। पर ऊ ओइन्से बोले नै सेकल। और ऊ मन्दिरके भित्तर दर्शन देखल कना ओइने बुझगिलाँ। ऊ ओइन्हे इशारा करे लागल और ऊ लाट पलिरहल। 23जब मन्दिरमे एकथो पुजारीक रुपमे ओकर सेवा करना काम एक अँठवार ओरागिलिस। तब ऊ यरुशलेम शहरमे अपन घरे चलगिल। 24थोरिक दिन पाछे ओकर जन्नी एलिशिबा पैनाहाँ होगिलिस। और पाँच महिना सम् मनैनहे देखक डरे घरेमेसे बाहेर नै गैलिस, और कलिस, 25“प्रभु महिन्हे लरका पाइक लग सहायता कर्ले बताँ। और मनैनके बिच्चेम मोरिक बाँझीपनसे दूर करदेले बताँ।”
येशूक जलमके भविष्यवाणी
26जब एलिशिबक पेटमे छे महिनक लरका रहिस। तब परमेश्वर गब्रिएल स्वर्गदूतहे गालील प्रदेशके नासरत गाउँमे पठैलाँ। 27स्वर्गदूत एकथो कन्या बथिन्या मरियमके थेन गैल, जेकर ठकौनी दाऊद रज्वक सन्तान योसेफ कना एकथो मनैयक संग हुइल रहिस। 28स्वर्गदूत ओकर थेन जाके कहल, “तुहिन्हे अभिवादन! परमेश्वर तोहाँरमे बरवार कृपा कर्ले बताँ। प्रभु तोहाँर संग बताँ।” 29पर मरियम स्वर्गदूतके कलक बातसे गजब घब्रागिल। और यी कोन मेरिक अभिवादन हो कहिके मनमने सोँचे लागल। 30स्वर्गदूत उहिहे कलिस्, “जिन डराऊ मरियम! काकरेकी परमेश्वरके दया तोहाँरमे बा। 31आब हेरो तुँ पैनाहाँ हुइबो, और एकथो छावा लरका पैबो, और तुँ हुँकार नाउँ ‘येशू’ धरहो। 32ऊ महान हुइहीँ और परमप्रधानके छावा कहलाजिहीँ, और परमप्रभु परमेश्वर हुँकिन्हे हुँकार पुर्खा दाऊद रज्वक हस रज्वा बनैहीँ। 33ऊ याकूबके सन्तानके उप्पर सदादिन रज्वा बनके राज करहीँ, और हुँकार राजके कबु अन्त्य नै हुई।” 34मरियम स्वर्गदूतहे कहल, “यी कसिके हुई सेकी? काकरेकी मै एकथो कन्या हुइतुँ, और मोरिक ते भोजे नै हुइल हो।” 35स्वर्गदूत उहिहे जवाफ देके कहल, “पवित्र आत्मा तोहाँरमे आई, और परमप्रधानके शक्तिक छाहीँ तोहाँर उप्पर परी। तबेकमारे जोन लरका जल्मीहीँ, ऊ पवित्र रहिहीँ अथवा परमेश्वरके छावा कहलाजिहीँ। 36और सुनो, तोहाँर नातेदार एलिशिबा फेन ओकर बुह्राइल बेलामे पैनाहाँ हुइल बतिन। और जे बाँझी कहिगिल रहिन, अब्बे हुँकार पेटमे छे महिनक लरका बतिन। 37काकरेकी परमेश्वरके लग सक्कु चिज सम्भव बा।” 38और मरियम कली, “हेरो, मै परमप्रभुक दासी हुइतुँ, महिन्हे जसिके तुँ कलो, ओस्तेके होए।” तब स्वर्गदूत मरियमके थेनसे विदा होगिल।
मरियम और एलिशिबक भेँटा
39थोरिक दिन पाछे मरियम यहूदिया प्रदेशके एकथो पहाड़ी गाउँमे एकदम झत्ते जाइक लग तयार होगिल। 40और जकरियक घरेम जाके एलिशिबाहे अभिवादन करल। 41जब एलिशिबा मरियमके अभिवादन सुनल तब ओकर पेटमे रहल बच्चा कुत्गल,, और एलिशिबा पवित्र आत्मासे भरपूर होगिल। 42और एलिशिबा महा जोरसे कहल, “जन्नीनमेसे तैँ धन्य हुइते। और उ लरका धन्यके रही, जिहिहे तैँ पैबे। 43तुहिहे यहाँ देख्के मै अपनहे सम्मानित महसुस करतुँ, मोरिक प्रभुक दाई महिन्हे भेँटा करे आइल बा!” 44“काकरेकी हेर, तोरिक अभिवादन सुन्तिकिल बच्चा मोरिक पेटमे आनन्दसे कुत्गल। 45तैँ धन्यके हुइते, काकरेकी तैँ विश्वास कर्ले कि प्रभु ज्या कलाँ, उ बात पूरा करहीँ।”
मरियमके स्तुतिगान
46और मरियम कहल,
“मै परमेश्वरके स्तुति करथुँ।
47और मोरिक आत्मा मुक्तिदाता परमेश्वरके जयजयकार करत।
48काकरेकी अपन दासीक दीनतामे ऊ दया देखैले बताँ, हेरो आबसे सक्कु पुस्ता महिन्हे धन्यके कहिहीँ।
49काकरेकी परमेश्वर जे शक्तिशाली बताँ, ऊ मोरिक लग महान काम कर्ले बताँ। हुँकार नाउँ पवित्र बा।
50परमेश्वरके डर मनुइयनके उप्पर हुँकार दया पुस्तासे पुस्तासम पलिरहिहीन।
51परमेश्वर अपन महान शक्तिहे महान काम करक लग प्रयोग करथाँ। ऊ कठोर घमण्डी मनैनहे पराजित करदेले बताँ।
52ऊ शासकहुँक्रिहिनके शासन करना अधिकार लैलेथाँ, और नम्रहुँक्रिहिनहे सम्मानित करथाँ।
53भुँखाइलहुँक्रिहिनहे ऊ मजा चिजसे तृप्त पारल बताँ। और धनीनहे ऊ खाली हाँथ पठाइल बताँ।
54ऊ हमार पुर्खनहे देहल वाचाहे सम्झले बताँ। और अपन सेबक इजरायलके मनैनहे सहायता करे अइलाँ।
55ऊ अब्राहामहे और ओकर सारा सन्तानहुँक्रिहिनहे सदादिनके लग दया देखाइक लग सम्झले बताँ, जसिके ऊ हमार पुर्खनहे कले रहिँत।”
56मरियम एलिशिबकसंग लगभग तीन महिना बैठके अपन घर फिर्ता आगिल।
डुब्कि देहुइया यूहन्नक जलम
57आब एलिशिबक लरका पैना बेला अइलिस और ऊ एकथो छावा लरका पाइल। 58परमप्रभु ओकर उप्पर हुँकार बरवार अनुग्रह देखाइल बताँ कना सुनके ओकर परोसीन और नातपाँत ओकर संग रमैलाँ। 59अठौँ दिनमे ओइने लरकक खतना करे अइलाँ। ओइने ओकर नाउँ जकरिया धारे चाहतिहिँत, काकरेकी यी ओकर बाबक नाउँ रहे। 60पर ओकर दाई एलिशिबा कहल, “नाई, ओकर नाउँ यूहन्ना धारे परी।” 61ओइने उहिहे कलाँ, “तोरिक नातपाँतमे यी नाउँ केक्रो नै हो।” 62तब ओइने ओकर बाबाहे इशारा करके पुँछ्लाँ, “अप्नि यकर नाउँ का धारे चहथी?” 63ऊ एकथो लिख्ना पाटी मगाके लिखल, “ओकर नाउँ यूहन्ना हो।” और उ सक्कु जहनहे अचम्म लग्लिन। 64जुरतेहेँ ऊ फेनदोस्रे बोले सेक्नाहाँ होगिल, और ऊ परमेश्वरके प्रशंसा करे लागल। 65ओइन्के सक्कु परोसीन डरागिलाँ। यहूदिया प्रदेशके सक्कु पहाड़ी गाउँ भर यी घटनक चर्चा फैलगिल। 66और यी बात सुनुइया सक्कु जाने अपन मनमने सोँचके कलाँ, “यी लरका कसिन हुई।” काकरेकी परमप्रभुक शक्ति ओकर संग रहिस।
जकरियक गीत
67ओकर बाबा जकरिया पवित्र आत्मासे भरके अगमवाणी बोले लागल,
68“इजरायलके परमप्रभु परमेश्वरके प्रशंसा करो,
काकरेकी ऊ अपन मनैनके थेन भेँटा करे आइल बताँ, और अपन मनैनहे मुक्ति देहल बताँ।
69और ऊ हमार लग अपन दास दाऊद रज्वक वंशमेसे एकथो शक्तिशाली मुक्तिदाता पठाइल बताँ।
70बहुत आघे परमेश्वर अपन अगमवक्तनसे कले रहिँत,
71कि ऊ हम्रिहिन्हे हमार दुश्मनसे और उ सक्कुहुनके शक्तिसे बँचैहीँ, जेने हम्रिहिन्हे घृणा करथाँ।
72आब हमार पुर्खनसे जोन वाचा कर्ले रहिँत, वहे समझके हमारमे दया करल बताँ।
73जोन कसम ऊ हमार पुर्खा अब्राहामसे खाइल रहिँत, और अपन वाचाहे पक्का कर्ले रहिँत।
74कि ओइने हम्रिहिन्हे दया करके हमार दुश्मनसे मुक्ति दिहीँ, ताकि हम्रे बिना डरैले परमेश्वरके सेवा करे सेकी।
75जबसम हम्रे जित्ती बती, तबसम हुँकार आघे बिना डरैले पवित्रता और धार्मिकतासे हुँकार सेवा जिअतसम कर्ती रहब।
76उ लौँदा परमप्रभु परमेश्वरके अगमवक्ता कहलाजिहीँ।
काकरेकी ऊ परमप्रभुक डगर तयार करक लग हुँकार आघे-आघे नेंग्हीँ।
77ऊ अपन मनैनहे यी ज्ञान दिहीँ कि पाप माफ होके कसिके मुक्ति पाई सेकजाइत।
78यी हमार परमेश्वरके कोमल दयासे हुई;
जसिके दिन हम्रिहिन्हे ओजरार देहक लग चम्कत, ओस्तेके ख्रीष्ट फेन हमार थेन स्वर्गमेसे अइहीँ।
79और पापमे जिउइयन और सदाकालके मृत्युक जोखिममे रहुइयनहे ओजरार दिहीँ।
और यी ओजरार हम्रिहिन्हे उ डगरमे नेगैहीँ, जोन डगर हम्रिहिन्हे परमेश्वरके संग शान्ति देहत।”
80और लौँदा यूहन्ना बहरती और आत्मामे बल्गर हुइती गैल। और इजरायली मनैनके बिच्चेम उपदेश देहल दिनसम ऊ उजाड़-ठाउँमे बैठल।
Currently Selected:
लूका 1: DVGNT
Highlight
Share
Copy
Want to have your highlights saved across all your devices? Sign up or sign in
Deukhuri (देउखरिया थारु) Bible by The Love Fellowship is licensed under Creative Commons Attribution-ShareAlike 4.0 License.
