मर्कूस 10

भोज और छुट्पत्तरके बारेमे

(मत्ती १९:१-९)

1येशू अपन चेलनके संग कफर्नहुम नगरमेसे निकरगिलाँ, तब् ओइने यहूदिया प्रदेश हुइती यर्दन लदियक दोसुर पाँजर गैलाँ। एकचो फेनदोस्रे मनैनके भीड़ हुँकार चारु ओहोँर जमा होगिलिन, और येशू अपन तरिकासे ओइन्हे शिक्षा देहे लग्लाँ। 2कौनो फरिसीनके हुँकार थेन अइलाँ, और असिक पुँछ्के हुँकिन्हे जाँचे लग्लाँ, “का कानुन यी अनुमति देहत कि कौनो थारु मनैया अपन जन्नीहे छुट्पत्तर देहे सेकी?” 3येशू यी पुँछ्के ओइन्हे जवाफ देलाँ, “परमेश्वरके अगमवक्ता मोशा छुट्पत्तरके बारेम तुहुरिन्हे कसिन कानुन देले बा?” 4ओइने कलाँ, “मोशा हम्रिहिन्हे यी अनुमति देले बा कि छुट्पत्तर कागत लिख्के अपन जन्नीहे छोरदेना।” 5येशू ओइन्हे कलाँ, “काकरेकी तुहुरिन्हे सिखैना महा कर्रा बा, तबेकमारे मोशा यी कानुन लिखल। 6पर पवित्र शास्त्रमे असिके लिखल बा, ‘जब परमेश्वर संसारहे बनैलाँ, ऊ थारु और जन्नी मनै बनैलाँ।’ 7तबेकमारे परमेश्वर कहतताँ, ‘थारु मनैया अपन दाई-बाबाहे छोरके अपन जन्नीक संग एक्के होजाई। तबेकमारे ओसिक ते भोज करुइयन भोज करनासे आघे दुईथो अलग-अलग मनै रथाँ, पर आब परमेश्वर ओइन्हे एकथो मन्थाँ, और ऊ चहथाँ कि ओइने सदादिनके लग विवाहित पलिरहिँत। 8तबेकमारे ओइने दुनु जाने एक्के होजिहीँ।’ भोज करके ओइने दुई जाने नै रहिहीँ, पर एक्के शरीर होजिहीँ। 9यकर मतलब यी हो कि केऊ फेन थारु और ओकर जन्नीहे अलग ना करिँत्, जिहिहे परमेश्वर जोरले बताँ।” 10ओकरपाछे जब येशू अपन चेलनके संग घरेम एक्केली रहिँत, ते चेलनके यकर बारेम पुँछ्लाँ। 11येशू ओइन्हे कलाँ, “जे अपन जन्नीहे छुट्पत्तर देके दोसुर जहनसे भोज करत कलेसे ऊ अपन जन्नीक विरोधमे व्यभिचार करत। 12ठिक ओस्तेके यदि जन्नी मनैया अपन थरवासे छुट्पत्तर देके दोसुर जहनसे भोज करत कलेसे, ऊ फेन व्यभिचार करत।”

लरकनहे येशूक आशीर्वाद

(मत्ती १९:१३-१५; लूक. १८:१५-१७)

13तब् कौनो मनै लरकनहे येशूक थेन नन्लाँ ताकि ओइन्के उप्पर ऊ अपन हाँथ धारदिँत, पर चेलनके ओइन्हे हप्कैलाँ। 14जब येशू यी देख्लाँ तब् रिसाके चेलनहे कलाँ, “लरकनहे मोरिक थेन आई देऊ, और ओइन्हे ना रोको। काकरेकी परमेश्वरके राज ओइन्के लग हो, जेने यी लरकनके हस विश्वासयोग्य और नम्र बताँ। 15जात्तिके मै तुहुरिन्हे कहतुँ, कि जोन मनै अपनहे लरकनके हस परमेश्वरमे नै सौँपिहीँ, ओइने परमेश्वरके राजके मनै नै हुइताँ।” 16येशू उ लरकनहे अपन कोनामे बैठैलाँ, और अपन हाँथ उ सक्कुहुनके उप्पर धरलाँ, और सक्कुहुनहे आशीर्वाद देलाँ।

धनी मनैया और स्वर्गक राज

(मत्ती १९:१६-३०; लूक. १८:१८-३०)

17जसिके येशू अपन चेलनके संग फेनदोस्रे यात्रा सुरु करलाँ, एकथो मनैया दौरके आइल, येशूक आघे ठेहुनी टेकल और हुँकिन्हे पुँछल, “हे मजा गुरु, मै सदाकालके जीवन पाइक लग का करुँ?” 18येशू उहिहे कलाँ, “तुँ महिन्हे मजा कहतो, यकर मतलब का हो? जात्तिकमे परमेश्वर किल मजा बताँ। 19तुँ परमेश्वरके यी आज्ञा ते जन्थो अर्थात, हत्या नै करना, व्यभिचार नै करना, चोरी नै करना, किहुहे झूँटा दोष नै लगैना, नै ठग्ना और अपन दाई-बाबाहे आदर करना।” 20उ मनैया येशूहे कहल, “गुरुजी, यी सक्कु ते मै लौँदैमेसे मन्ती आइतुँ।” 21येशू प्रेमसे ओकर ओहोँर सोझे हेरलाँ, और उहिहे कलाँ, “तुहिन्हे एकथो आकुर काम करना जरुरी बा, जाऊ और अपन सारा सम्पति बेँच्देऊ, और सम्पति बेँच्लक पैँसा गरीबनहे बाँटदेऊ, और तोहाँर लग स्वर्गमे सम्पति रही। तब् मोरिक पाछे लग्हो।” 22जब उ मनैया येशूहे असिक कहत सुनल, तब् ओकर मुँहारमे निराशा फैलगिलिस, और दुखि होके ऊ चलगिल। काकरेकी ऊ महा धनी रहे। 23तब् येशू चारु ओहोँर अपन चेलनके ओहोँर हेरलाँ, और ओइन्हे कलाँ, “धनी मनैनहे परमेश्वरके राजमे पैँठ्ना कतरा कर्रा बतिन!” 24चेलनहे येशूक बात सुनके अचम्म लग्लिन, यी बातमे येशू ओइन्हे फेनदोस्रे कलाँ, “हेरो लरको! धनी मनैनहे परमेश्वरके राजमे पैँठ्ना महा कर्रा बतिन! 25ऊँटवाहे सुईक नाखा सोज निकरना कर्रा बा, पर एकथो धनी मनैयक लग परमेश्वरके राजमे जैना यिहिसे फेन धेउर कर्रा बा।” 26जब हुँकार चेलनके यी बात सुन्लाँ, ते ओइन्हे आकुर धेउर अचम्म लग्लिन। और ओइने एकदोसर जहनसे कहे लग्लाँ, “यकर मतलब यी हो कि किहुहे फेन ओइन्के पापके लग सजाय हुइनासे केऊ नै बँचाई सेकी।” 27येशू ओइन्के ओहोँर हेरलाँ, और कलाँ, “यी मनैनके लग अपनहे बँचैना असम्भव बा, पर परमेश्वरके लग ओइन्हे बँचैना सम्भव बा। परमेश्वरके लग सक्कु चिज सम्भव बा।” 28पत्रुस येशूहे कहल, “हमार का हुई? हम्रे अप्निक चेला बनक लग सक्कु चिज छोरदेली।” 29येशू अपन चेलनहे कलाँ, “जात्तिके, मै तुहुरिन्हे कहतुँ, मोरिक चेला हुइक लग और खुशीक खबर दोसुर जहनहे सुनाइक लग जे फेन अपन घरहे, दादूभैया और दिदी-बाबु, दाईबाबाहे, लरकनहे या जग्गा-जमिनहे छोरदी। 30ओइने पक्कै फेन यहे युगमे सतावतके संगसंगे ज्या ओइने छोरले बताँ, उहिसे सौ गुणा धेउर फिर्ता भेटैहीँ। और अइना युगमे सदाकालके जीवन भेटैहीँ। 31पर बहुत्ते मनै जेने अब्बे भारी बताँ, ओइने छुटी कराजैहीँ, और जेने अब्बे विनम्र बताँ, ओइने भारी बनाजिहीँ।”

अपन मृत्युक बारेमे येशूक भविष्यवाणी

(मत्ती २०:१७-१९; लूक. १८:३१-३३)

32येशू और हुँकार चेलनके आब यरुशलेम शहरमे जैना डगरमे जाइतिहिँत। येशू ओइन्के आघे-आघे नेगतिहिँत। चेलनहे अचम्म लग्लिन कि ऊ वहाँ जाइतिहिँत, जहाँ बहुत्ते मनै हुँकार विरोध करल रहिँत। और दोसुर मनै जेने हुँकार संग रहिँत, ओइन्हे यी बातके डर रहिन कि यरुशलेम शहरमे येशूक का हुइहिन! एकचो फेनदोस्रे येशू बाह्रथो चेलनहे अल्गे लैगिलाँ, और उ चिजके बारेम बात बत्वैलाँ, जोन हुँकिन्हे हुई जाइतिहिन। 33येशू ओइन्हे बतैलाँ, “हेरो, हम्रे यरुशलेम शहर ओहोँर जाइती। वहाँ मै, मनैयक छावा यहूदी मुख्य पुजारीनके और यहूदी कानुनके गुरुनके हाँथेम पकरवाजिम। ओइने महिन्हे मृत्युदण्ड दिहीँ, और दोसुर जातिनके हाँथेम सौँपदिहीँ। 34ओइने मोरिक मजाक उरैहीँ, मोरिकमे थुक्हीँ, महिन्हे कोर्रा लगैहीँ और महिन्हे मुवादिहीँ। पर तेसर दिन मै फेनदोस्रे जित्ती होजैम।”

याकूब और यूहन्नक बिन्ती

(मत्ती २०:२०-२८)

35तब् जब्दियक दुईथो छावन याकूब और ओकर भैया यूहन्ना अइलाँ और येशूहे कलाँ, “गुरुजी, हम्रे चहथी कि हम्रे ज्या फेन अप्निसे मंग्बी अप्नि हमार लग करदेबी।” 36येशू ओइन्हे पुँछ्लाँ, “तुहुरे का चहथो कि मै तुहुरिन्के लग करुँ?” 37ओइने येशूहे कलाँ, “जब अप्नि अपन महान राजमे राज कर्बी, तब हम्रे दुनुजाने अप्निक आँजरपाँजर अप्निक बराबरके ठाउँमे बैठे भेटाई। एकथो अप्निक दाहिन पाँजर और दोसुर अप्निक बाउँ पाँजर।” 38पर येशू ओइन्हे कलाँ, “तुहुरे नै जन्थो कि तुहुरे का माँगतो! का तुहुरे ओसिन दुःख भोगे सेक्बो, जसिन मै भोगम? का तुहुरे ओसिके मुए सेक्बो, जसिके मै मुअम?” 39ओइने हुँकिन्हे कलाँ, “हम्रे सेकदारब।” येशू ओइन्हे कलाँ, “तुहुरे ओसिन दुःख भोगे सेक्बो, जसिन मै भोगे जाइतुँ। तुहुरे ओसिके मुए सेक्बो, जसिके महिन्हे मुवाजाई। 40पर महिन्हे यी निर्णय करना अधिकार नै हो कि मोरिक दाहिन और बाउँ पाँजर आदरके ठाउँ के भेटाई। परमेश्वर उ ठाउँहे ओइन्के लग तयार करल बताँ, जिहिहे परमेश्वर उ ठाउँक लग चुनल बताँ।” 41जब औरे दशथो चेलनके यी बात सुन्लाँ। ते ओइने याकूब और यूहन्नासे रिसागिलाँ। 42तबेकमारे येशू उ सक्कु चेलनहे अपन थेन बलैलाँ। और कलाँ, “तुहुरे जन्थो कि जेने यी दुनियामे शासक मानजिथाँ, ओइने अपन अधिनमे रहल मनैनके उप्पर अधिकार जमाइक लग और ओइन्के अगुवन अपन बात मन्वाइक लग अपन अधिकारके प्रयोग करथाँ। 43पर तुहुरिन्हे असिके नै करे परना हो। बेन तुहुरिन्केमेसे जे अगुवा बने चाहत, उहिहे दोसुर जहनके सेवा करे परत। जे दोसुर जहनके अगुवाई करे चाहत, उहिहे सक्कु जहनके लग नोकर हस बनके सक्कुहुनके सेवा करे परत। 44जे अपनहे भारी मानी, उहिहे छुटी कराजाई, और जे अपनहे छुटी मानी, उहिहे भारी बनाजाई। 45मै असिके तबे कहतुँ, काकरेकी मै, मनैयक छावा, दोसुर जहनके सेवा करक लग आइल बतुँ। मै यकर लग नै अइनु कि दोसुरजाने मोरिक सेवा करिँत्। मै बहुत्ते मनैनहे ओइन्के पापसे छुटाइक लग मुए आइल बतुँ।”

बारतिमै कना आँधर मनैया

(मत्ती २०:२९-३४; लूक. १८:३५-४३)

46यरुशलेम शहर जाइबेर येशू और हुँकार चेलनके यरिहो नगरमे पुग्लाँ। जसिके येशू और हुँकार चेलनके और दोसुर मनैनके एकथो बरवार भीड़ नगरमेसे जाइतिहिँत, तब्बेहेँ एकथो बारतिमै नाउँक आँधर भिखारी मनैया डग्रिक आँरितिर बैठल रहे। ऊ तिमैक छावा रहे। 47जब ऊ मनैनसे सुनल कि नासरत गाउँक येशू यहे डगर जाइतताँ। तब उ भिखारी मनैया जोरसे गोहराइल, “हे येशू, दाऊद रज्वक सन्तान, महिन्हे दया करी!” 48बहुत्ते मनै उहिहे चुप लाग कहिके डँत्लाँ। पर ऊ आकुर जोरसे गोहराई लागल, “हे येशू, दाऊद रज्वक सन्तान, महिन्हे दया करी!” 49जब येशू सुन्लाँ ते ऊ ठरह्यागिलाँ, और पंज्रेक मनैनहे उहिहे नाने कलाँ। ओइने उ आँधर मनैयाहे बलैलाँ और कलाँ, “ना घबराऊ! आऊ! येशू तुहिन्हे बलाइतताँ।” 50तब् आँधर मनैया अपन घल्लक लुग्गा फेँकल, और येशूक थेन गैल। 51येशू उहिहे पुँछ्लाँ, “तुँ का चहथो कि मै तोहाँर लग का करदिऊँ?” उ आँधर मनैया जवाफ देहल, “गुरुजी, मै देख्नाहाँ हुई चहथुँ।” 52तब् येशू उहिहे कलाँ, “तुँ अब्बेहेँ अपन घरे जाई सेक्थो, मै तुहिन्हे चोख्वा देले बतुँ। काकरेकी तुँ महिन्हे विश्वास करथो।”

Currently Selected:

मर्कूस 10: DVGNT

Highlight

Copy