लूका 19

कर उठुइया जक्कै

1येशू यरिहो नगरमे प्रवेश करके वहाँसे जाइतिहिँत। 2वहाँ जक्कै नाउँ रहल एकथो मनैया रहे। ऊ कर उठुइयनके हाकिम रहे और ऊ धनी रहे। 3ऊ येशूहे हेरक खोजे कि ऊ कसिन बताँ, पर बौना हुइलक ओहोँरसे भीड़के कारण ऊ येशूहे देखे नै सेकल। 4ऊ येशूहे हेरक लग आघे-आघे दौड़के एकथो अञ्जीरके रुख्वामे चहुँरल। काकरेकी येशू वहे डगर होके जाइतिहिँत। 5जब येशू उ रुख्वा थेन आपुग्लाँ जेम्ने जक्कै रहे, तब् ऊ उप्पर हेरके उहिहे कलाँ, “ए जक्कै, झत्ते तरे उतरके आ, काकरेकी आज महिन्हे तोरिक घरेम बैठ्ना जरुरी बा।” 6ऊ झत्ते रुख्वामेसे तरे उतरके आइल और येशूहे अपन घरे लैजाके खुशीसे हुँकार स्वागत करल। 7जब मनै यी देख्लाँ, ओइने सक्कु जाने असिक कती गनगनाई लग्लाँ, “ऊ ते पापीक घरेम पहुना बनके गैल बताँ।” 8खाना खाइबेर जक्कै ठरह्यागिल, और प्रभु येशूहे कहल, “प्रभु येशू हेरी, मै अपन सम्पतिक आधा भाग गरीबनहे दैदेहम, और यदि मै किहुसे कर लेहेबेर अन्यायसे लैलेले बतुँ कलेसे मै ओकर चार गुणा फिर्ता करदेहम।” 9तब् येशू उहिहे कलाँ, “आज यी घरेक परिवारमे मुक्ति आइल बतिन, काकरेकी यी फेन अब्राहामके सन्तान हो। 10काकरेकी मै, मनैयक छावा हेराइल मनैनहे सदाकालके दण्डसे बँचाइक लग और मुक्ति देहक लग आइल बतुँ।”

सोनक सिक्कक दृष्टान्त

(मत्ती २५:१४-३०)

11जब मनै यी बात सुनतिहिँत, येशू अपन बात बत्वैती रलाँ, और ओइन्हे एकथो दृष्टान्त बताई लग्लाँ। ऊ यरुशलेम शहरके लग्गे रहिँत, तब् मनै सोच्लाँ कि परमेश्वरके राज सुरु हुइक लग बा। 12तब येशू कलाँ, “एकथो महा धनी मनैया रहे, ऊ रज्वा बनके अइम कहिके कौनो एकथो दूरिक देशमे गैलस। 13ऊ अपन दशथो नोकरहुँक्रिहिनहे बलाके ओइन्हे दशथो सोनक सिक्का देके कहल, ‘जबसम मै घुमके नै अइम, तबसम तुहुरे यिहिन्से व्यापार करहो।’ 14पर उ धनी मनैयक नगरमे रहुइया मनै उहिहे घृणा करिँत्, और ओइने ओकर पाछेपाछे सुराकिनहे असिक कहिके पठैलाँ, ‘ऊ हमारमे राज करे कना हम्रे नै चहथी।’ 15तब् राज करना अधिकार पाके ऊ घुमके आईल ते अपन पैँसा देलक नोकरहुँक्रिहिनहे अपन थेन बलैना हुकुम देहल। तब् व्यापारमेसे ओइने कतरा नाफा करलाँ कना ऊ जन्ना चाहल। 16तब् सुरुक नोकर आघे आके असिक कहल, ‘मलिक्वा, मै अप्निक सिक्कासे आकुर दशथो सिक्का कमाइल बतुँ।’ 17ऊ उहिहे कहल, ‘स्याबास, मजा और विश्वासयोग्य नोकर, तैँ एकदम थोरचे बातमे विश्वासयोग्य हुइले, तैँ दशथो नगरमे अधिकार जमैबे।’ 18दोसुर नोकर आके असिके कहल, ‘मलिक्वा, अप्निक सिक्कासे मै आकुर पाँचथो सिक्का कमाइल बतुँ।’ 19ऊ उहिहे कहल, ‘तैँ फेन पाँचथो नगरके अधिकार भेटैबे।’ 20तब तेसर नोकर आके असिक कहल, ‘मलिक्वा, हेरी अप्निक सिक्का यहाँ बा। उ मै रुमालमे बहानके धारल रहुँ। 21मै अप्निसे डरागिनु, काकरेकी अप्नि कठोर मनैया हुइती। ज्या नै धरथी उ लेथी, और ज्या नै बुइथी ओक्रेहे कटाई कर्थी।’ 22ऊ उहिहे कहल, ‘तोरिक मुहेँक बातसे मै तोरिक इन्साफ करम, ए दुष्ट नोकर! ज्या नै धर्नु उ लेना और ज्या नै बुइनु ओकर कटाई करुइया मै कठोर मनैया हुइतुँ कहिके तैँ जन्ले रहिस। 23तैँ मोरिक धनहे कर्जा लगानी करे परना रहे और आके मै मोरिक धन ब्याजसुन्धा फिर्ता भेटैतुँ।’ 24तब् लग्गे ठरहुइयनहे ऊ कहल, ‘उहिसे उ सिक्का लेके दशथो सिक्का रहुइयाहे देदारो।’ 25ओइने उहिहे कलाँ, ‘हे मलिक्वा, ओकर थेन ते पैलेहेँसे दशथो सिक्का पलिबतिस।’ 26तब मलिक्वा जवाफ देहल, ‘मै तुहुरिन्हे कहतुँ, जेकर थेन जत्रा बा ओत्रेहेमे ऊ विश्वासयोग्य बा कलेसे उहिहे आकुर धेउर देजाई। पर जेकर थेन जत्रा कम बा ओत्रेहेमे ऊ विश्वासयोग्य नै हो कलेसे ओकर थेन रहल थोरचे फेन उहिसे छिनाजैहिस। 27पर मोरिक उ दुश्मननहे यहाँ नानो, और मोरिक आघे मुवादारो, जेने यी नै चाहिँत कि मै ओइन्के रज्वा बनु।’”

यरुशलेम शहरमे येशूक प्रवेश

(मत्ती २१:१-११; मर्कू. ११:१-११; यूह. १२:१२-१५)

28यी बात कहिके सेकके येशू अपन चेलनके संग यरुशलेम शहर ओहोँर ओइन्के आघे-आघे नेंगत गैलाँ। 29जब येशू बेथफागे और बेथानिया गाउँक लग्गे जैतून कना पहाड़मे पुग्लाँ। ऊ अपन चेलनमेसे दुई जहनहे असिक कहिके पठैलाँ, 30“आघेक गाउँमे जाऊ और भित्तर जैती-जैती तुहुरे गडहक एकथो बछरवा बाँधल भेटैबो। जेकरमे आजसम केऊ फेन नै बैठल हो। उहिहे खोलके यहाँ लयानो। 31केऊ ‘काकरे खोलतो?’ कहिके तुहुरिन्हे पुँछी कलेसे, ‘प्रभुहे यकर जरुरी परल बतिन’ कहिके कहहो।” 32उ पठागिलक मनै गैलाँ, और येशू ओइन्हे जसिके कले रहिन ओइने ओस्तेहेँ भेटैलाँ। 33ओइने गडहक बछरवा खोलेबेर बछरवक मलिक्वन ओइन्हे पुँछ्लाँ, “तुहुरे यी बछरवा काकरे खोलतो?” 34ओइने कलाँ “प्रभुहे यकर जरुरी परल बतिन।” 35चेलनके उहिहे येशूक थेन नन्लाँ, और अपन लुग्गा गडहक बछरवक उप्पर बिछाके येशूहे ओकर उप्पर बैठैलाँ। 36येशू जाइतिहिँत ते मनै अपन लुग्गा डगरमे बिछैलाँ। 37जब येशू यरुशलेम शहरके लग्गे उ ठाउँमे अइलाँ। जहाँसे डगर तरे जैतून पहाड़ ओहोँर खल्हाए। तब चेलनके पूरा भीड़ अपन देख्लक उ सक्कु शक्तिशाली कामहे सम्झती आनन्दित होके परमेश्वरके प्रशंसा कर्ती जोरसे चिल्लाई लग्लाँ।

38“परमप्रभुक नाउँमे अउइया राजा धन्य हुइँत।

स्वर्गमे शान्ति और परमधाममे महिमा।”

39तब् भीड़के कौनो-कौनो फरिसीनके हुँकिन्हे कलाँ, “हे गुरुजी, असिन ना कहिँत कहिके अप्नि अपन चेलनहे दाँती।” 40पर येशू कलाँ, “मै तुहुरिन्हे कहतुँ, यदि यी मनै चुप लग्हीँ कलेसे पट्ठर चिल्लैना सुरु करदिहीँ।”

यरुशलेम शहरके लग विलाप

41जब येशू यरुशलेम शहरके लग्गे अइलाँ ते नगरहे देख्के ऊ रुई लग्लाँ। 42और वहाँक मनैनहे कलाँ, “ए यरुशलेमके मनै, यदि शान्ति ओहोँर लैजुइयाहे यी समयमे तुहुरे चिहिन्तो कलेसे तुहुरिन्के लग बहुत मजा हुइना रहे! पर आब यी तुहुरिन्के नजरसे नुकागिल बा। 43काकरेकी तुहुरिन्के उप्पर असिन दिन आई। जब तुहुरिन्के दुश्मनहुँक्रे तुहुरिन्के आँजरपाँजर मोर्चा बहानके घेरा दरहीँ। और सक्कु ओहोँरसे तुहुरिन्हे हमला करहीँ। 44तोरिक दुश्मनहुँक्रे तुहिहे (यरुशलेम शहरहे) पूरा रुपमे नाश करदिहीँ। और यरुशलेमके सक्कु मनैनहे मुवादरहीँ। और तुहुरिन्के घरक कौनो फेन पठराहे एकथोक उप्पर दोसुरहे जोँतल नै छोरहीँ। काकरेकी जब परमेश्वर तुहुरिन्हे बँचाइक लग आइल ते तुहुरे उ समयहे नै चिहिन्लो।”

येशू मन्दिरके भित्तर

(मत्ती २१:१२-१७; मर्कू. ११:१५-१९; यूह. २:१३-१६)

45तब् येशू मन्दिरमे पैँठ्लाँ और बिक्री करुइयनहे निकरलाँ। 46और ओइन्हे कलाँ, “पवित्र शास्त्रमे लिखल बा, ‘मोरिक घर प्राथनक भवन हुई,’ पर तुहुरे ते यिहिहे डाँकनके अड्डा बनाइल बतो।” 47येशू रोज मन्दिरमे शिक्षा देहतिहिँत। पर मुख्य पुजारीनके, यहूदी कानुनके गुरुनके और जनतनके प्रमुख मनै हुँकिन्हे मुवाई खोजिँत। 48ओइने हुँकिन्हे मरना कौनो उपाय भेटाई नै सेक्लाँ। काकरेकी सक्कु मनै हुँकार बात महा ध्यान लगाके सुनिँत।

Currently Selected:

लूका 19: DVGNT

Highlight

Copy