लूका 18

विधवा जन्नी और अधर्मी न्यायधीश

1ओकरपाछे ओइने रोज प्राथना कर्ती रहे परत, और निराश नै हुई परत कहिके येशू अपन चेलनहे एकथो दृष्टान्त कलाँ, 2“कौनो एकथो नगरमे परमेश्वरके डर नै मन्ना और मनैनके मतलब नै करुइया एकथो न्यायधीश रहे। 3वहे नगरमे एकथो विधवा रहे। ऊ न्यायधीशके थेन घनी-घनी आके कहे, ‘मोरिक न्याय करदेऊ, और महिन्हे मोरिक दुश्मनसे बँचादेऊ।’ 4ऊ बहुत दिनसम ते ओकर बात नै सुनल। पर पाछे ऊ अपन मनमे सोँचल, ‘भले मै परमेश्वरसे नै डरैथुँ, और महिन्हे मनैनसे कौनो मतलब नै हो! 5तभुन फेन यी विधवा महिन्हे सतैले बा। तबेकमारे मै ओकर न्याय करदेहम ताकि यी महिन्हे आके घनी-घनी ना सताए।’” 6प्रभु येशू कलाँ, “सुनो, उ अन्यायी न्यायधीशसे कुछु सिखो। 7परमेश्वर अपन चुनल मनैनके लग जेने रातदिन हुँकार आघे रुइथाँ, ओइन्के न्याय पक्कै फेन करदिहीँ। ऊ ओइन्हे सहायता करनामे बेर नै करहीँ। 8मै तुहुरिन्हे कहतुँ, ऊ झत्तेहेँ ओइन्के न्याय करदिहीँ। पर जब मै, मनैयक छावा फिर्ता अइम। तब मै धर्तीमे महिन्हे विश्वास करुइया कत्थुक मनैनहे भेटैम?”

फरिसी दलके मनैया और कर उठुइयक दृष्टान्त

9अपन बारेम किल सोँचुइयन और अपनहे धर्मी मनुइया और दोसुर जहनहे हेल्हा करुइयनहे येशू यी दृष्टान्त सुनैलाँ: 10“दुईथो मनै प्राथना करे मन्दिरमे गैलाँ। एकथो फरिसी दलके मनैया और दोसुर भर कर उठुइया रहे। 11फरिसी दलके मनैया ठरह्याके अपन मनमने असिक प्राथना करल, ‘हे परमेश्वर, मै अप्निहे धन्यवाद देहतुँ, मै औरे मनैन हस खराब काम करुइया, अन्यायी, व्यभिचारी या यहे कर उठुइयक हस फेन नै हुइतुँ। 12मै हप्तक दुईचो उपवास बैठ्थुँ। मै अपन भेटैलक सक्कु चिजके दशांश अप्निहे देथुँ।’ 13पर कर उठुइया भर दूरे ठरह्याके स्वर्ग ओहोँर हेरना फेन हिम्मत बिना कर्ले दुखि होके असिक कती अपन छाती ठठाइल, ‘हे परमेश्वर, मै एकथो पापी हुइतुँ। मोरिक उप्पर दया करो, और महिन्हे माफ करदेऊ।’ 14मै तुहुरिन्हे कहतुँ, असिके कहुइया फरिसी नै रहे। पर कर उठुइया मनैया रहे, जे परमेश्वरके आघे सही ठहरागिल। काकरेकी हरेक जे अपनहे भारी मानी, उहिहे छुटी कराजाई। और जे अपनहे छुटी मानी, उहिहे भारी बनाजाई।”

येशू और लरका

(मत्ती १९:१३-१५; मर्कू. १०:१३-१६)

15येशू छुदिँत कहिके मनै लरकनहे हुँकार थेन नन्लाँ। पर चेलनके यी देख्के ओइन्हे हप्कैलाँ। 16येशू ओइन्हे अपन थेन बलाके कलाँ, “लर्कनहे मोरिक थेन आई देऊ, और ओइन्हे ना रोको। काकरेकी परमेश्वरके राज ओइन्के लग हो, जेने यी लर्कनके हस नम्र बताँ। 17जात्तिके मै तुहुरिन्हे कहतुँ, कि जोन मनै अपनहे लर्कनके हस परमेश्वरमे नै सौँपिहीँ, ओइने परमेश्वरके राजके मनै नै हुइताँ।”

धनी शासक

(मत्ती १९:१६-२९; मर्कू. १०:१७-३०)

18कौनो एकथो शासक येशूहे असिक कहिके पुँछल, “हे मजा गुरु, सदाकालके जीवन पाइक लग मै का करुँ?” 19येशू उहिहे कलाँ, “तुँ महिन्हे काकरे मजा कहतो? एकथो परमेश्वर बाहेक केऊ मजा नै हो। 20तुँ परमेश्वरके यी आज्ञा ते जन्थो : ‘व्यभिचार नै करना, हत्या नै करना, चोरी नै करना, किहुहे झूँटा दोष नै लगैना, और अपन दाईबाबक आदर करना।’” 21ऊ कहल, “यी सक्कु आज्ञा ते मै मोरिक जवाने अवस्थासे पालन करल बतुँ।” 22यी सुनके सेकके येशू उहिहे कलाँ, “तुहिन्हे एकथो आकुर काम करना जरुरी बा। जाऊ, और अपन सारा सम्पति बेँच्देऊ। और सम्पति बेँच्लक पैँसा गरीबनहे बाँटदेऊ। और तोहाँर लग स्वर्गमे सम्पति रही। तब् मोरिक पाछे लग्हो।” 23पर यी बात सुनके उ शासक गजब उदास होगिल, काकरेकी ऊ गजब धनी रहे। 24पर येशू उहिहे हेरके कलाँ, “धनी मनैनहे परमेश्वरके राजमे पैँठ्ना महा कर्रा बा! 25काकरेकी ऊँटवाहे सुईक नाखा सोज निकरना कर्रा बा। पर एकथो धनी मनैयक लग परमेश्वरके राजमे जैना यिहिसे फेन धेउर कर्रा बा।” 26तब् सुनुइयन कलाँ, “यदि धनी मनै नै बँचिहीँ कलेसे केऊ फेन नै बँचे सेकी?” 27येशू कलाँ, “मनैनके लग ज्या असम्भव बा, उ परमेश्वरके लग सम्भव बा।” 28तब् पत्रुस कहल, “हेरी अपन घरद्वार छोरके हम्रे अप्निक पाछे लागल बती।” 29तब् येशू ओइन्हे कलाँ, “जात्तिके मै तुहुरिन्हे कहतुँ, जे अपन घर या जन्नी, या दादू-भैया या दाई-बाबा, अथवा छाइछावनहे परमेश्वरके राजके लग छोरत, 30उ यी समयमे बहुत्ते धेउर ईनाम भेटाई और अइना युगमे सदाकालके जीवन भेटाई।”

अपन मृत्युक बारेमे येशूक भविष्यवाणी

(मत्ती २०:१७-१९; मर्कू. १०:३२-३४)

31येशू बाह्रैथो चेलनहे अल्गे लैजाके कलाँ, “हेरो, हम्रे यरुशलेम ओहोँर जाइती और मै, मनैयक छावक बारेमे अगमवक्तनके लिखल हरेक बात पूरा हुई। 32काकरेकी ऊ गैर-यहूदिनके हाँथेम सौँपजाई, और ओइने ओकर गिल्ला करहीँ, और उहिहे दुर्व्यहार करहीँ और ओकरमे थुक्हीँ। 33ओइने उहिहे कोर्रा लगैहीँ और मरहीँ, और तेसर दिनमे ऊ फेनदोस्रे मुअलमेसे जित्ती होके उठ्जाई।” 34पर चेलनके यी बात एक्को नै बुझ्लाँ। ओइन्के लग यी बात गुप्तमे धारगिलिन, और हुँकार कलक यी बात ओइने बुझे नै सेक्लाँ।

आँधर भिखारी देख्नाहाँ हुइलक

(मत्ती २०:२९-३४; मर्कू. १०:४६-५२)

35येशू यरिहोक लग्गे पुगगिलाँ। वहाँ एकथो आँधर मनैया डग्रिक आँरितिर बैठके भीख माँगतेहे। 36एकथो भीड़ पन्ज्रेसे जाइता कहिके सुनके “यी का हो?” कहिके ऊ पुँछल। 37मनै उहिहे कलिस, “नासरत गाउँक येशू यहे डगर जाइतताँ।” 38तब् ऊ असिक कहिके गोहराइल, “हे येशू, दाऊद रज्वक सन्तान, महिन्हे दया करी!” 39आघे-आघे नेगुइयन उहिहे चुप लाग कहिके डँत्लाँ। पर ऊ आकुर जोरसे गोहराई लागल, “हे दाऊद रज्वक सन्तान, महिन्हे दया करी!” 40येशू ठरह्यागिलाँ, और उहिहे अपन थेन नन्ना आज्ञा करलाँ। उ लग्गे आइल ते येशू उहिहे पुँछ्लाँ, 41“तुँ का चहथो? मै तोहाँर लग का करदिऊँ?” ऊ कहल, “प्रभु, मै देख्नाहाँ हुई चहथुँ।” 42तब् येशू उहिहे कलाँ, “तुँ देख्नाहाँ होजाऊ। तोहाँर विश्वास तुहिन्हे चोख्वाइल बा।” 43तब् जुरतेहेँ ऊ देख्नाहाँ होगिल, और परमेश्वरके प्रशंसा कर्ती ऊ हुँकार पाछे लागगिल। यी देख्के सक्कु मनै परमेश्वरके प्रशंसा करलाँ।

Currently Selected:

लूका 18: DVGNT

Highlight

Copy