लूका 17

पाप, विश्वास और कर्तव्य

1येशू अपन चेलनहे कलाँ, “पाप करे लगैना परीक्षा ते पक्कै फेन आइत। पर धिक्कार! उ मनैयाहे जिहिसे पाप करे लगैना परीक्षा आइत! 2जोन मनैया यी छुटिसे छुटी जेकर महत्त्व नै हो, ओकरमेसे कौनो एक जहनके लग पापके कारण बनत। चाहे यी छुटी लरकक हस ना होए। उ मनैयक लग ते यहे मजा हुइहिस कि ओकर घेँचामे बरवार चकियक पठरा बहानके समुन्दरमे उहिहे फेँकादेजाए। 3हौश्यार रहो, कि तुहुरे का करतो। यदि तोहाँर विश्वासी भैया पाप करी कलेसे उहिहे गरयाऊ और ऊ अपन मन बदलके पाप करना छोरदी कलेसे तुँ उहिहे माफ करदेहो। 4यदि तुहुरिन्के विश्वासी भैया एक दिनमे सातचो फेन तुहुरिन्के थेन घुमके आके ‘मै अपन मन बदलके पाप करना छोरतुँ’ कही कलेसे तुहुरे उहिहे माफ करदेहो।”

5तब निउतरह्यन प्रभु येशूहे कलाँ, “हमार विश्वासहे बल्गर बनादी।” 6प्रभु येशू कलाँ, “तुहुरिन्केमे एकथो लहटक बिया जतरा फेन विश्वास रही कलेसे तुहुरे यी टुँटके रुख्वाहे, ‘तैँ उँखरके समुन्दरमे लागे चलजा’ कहिके कबो कलेसे उ तुहुरिन्के कलक मानजाई।”

मजा नोकर

7येशू कलाँ, “यदि तुहुरिन्मेसे केक्रो नोकर खेट्वा जोँतके या भेँरीन चह्राके घरे आइल कलेसे का तुहुरे उ नोकरहे ‘जुरतेहेँ आके खाना खाई बैठ।’ कहिके कबो का? 8तुहुरे असिके नै करे सेक्बो, बेन तुहुरे असिके कबो, ‘मोरिक लग खाना पका और खौँक, और मोरिक खा पिके नै सेकटसम तैँ करहिँऊ कसके मोरिक सेवा कर। ओकरपाछे तैँ फेन खाना खालिस।’ 9तुहुरे अपन नोकरहे उ काम कर्लक धन्यवाद नै देबो, जोन तुहुरे उहिहे करक लग कले रहो! 10ओस्तेके जब तुहुरे उ सक्कु काम कर सेकल बतो, ज्या तुहुरिन्हे करक लग कहिगिल रहे कलेसे तुहुरिन्हे असिके कहे परना हो: ‘हम्रे नालायक नोकर हुइती, काकरेकी हम्रे ते हमार कर्तव्य किल पूरा कर्ले बती।’”

दशथो कोढ़ रोग लागल मनै

11जब येशू और हुँकार चेलनके यरुशलेम शहरमे जैना डगर नेगतिहिँत। और ओइने सामरिया प्रदेश और गालील प्रदेशके बिच्चेक सिमानासे होके जाइतिहिँत। 12ओइने एकथो गाउँमे पैँठतिहिँत, तब्बेहेँ दशथो कोढ़ रोग लागल मनैनसे हुँकार भेँटा होगिलिन। 13तब ओइने दूरे ठरह्याके येशूहे जोरसे असिके गोहरैलाँ, “हे येशू, गुरुजी हमार उप्पर दया करी।” 14येशू ओइन्हे देख्के कलाँ, “यरुशलेमके मन्दिरमे जाऊ, और यहूदी पुजारीनहे देखाऊ कि ओइने तुहुरिन्हे जाँचिँत कि तुहुरे चोखागिल बतो।” जैती-जैती ओइने डग्रेहेमे चोखागिलाँ। 15पर जब ओइन्मेसे एकथो देखल कि ऊ चोखागिल बा, तब ऊ येशूक थेन फिर्ता आइल। और महा जोरसे परमेश्वरके महिमा करे लागल; 16और येशूहे धन्यवाद देके ऊ येशूक गोरामे घोपत्या परगिल। उ मनैया सामरिया प्रदेशके रहे। 17येशू कलाँ, “का चोखैलक दश जाने नै हुइताँ? ते नौ जाने कहाँ बताँ? 18का यी गैर-यहूदी बाहेक घुमके आके परमेश्वरके प्रशंसा करुइया आकुर केऊ नै हुइल?” 19तब् येशू उहिहे कलाँ, “उठो, और अपन डगर लागो। काकरेकी तोहाँर विश्वास तुहिन्हे चोख्वैले बा।”

परमेश्वरके राजके आगमन

(मत्ती २४:२३-२८,३७-४१)

20कौनो-कौनो फरिसीनके येशूहे पुँछ्ला, “परमेश्वरके राज कब अइहिन?” तब येशू ओइन्हे जवाफ देलाँ, “परमेश्वरके राज देखैना मेरके नै आइत। 21नै ते मनै कहिहीँ, ‘हेरो यहाँ बा। या वहाँ बा!’ काकरेकी हेरो, परमेश्वरके राज तुहुरेनेके बिच्चेम बा।” 22येशू अपन चेलनहे कलाँ, “उ समय आई, जब तुहुरे उ दिनहे हेरना मन करबो, जब मै, मनैयक छावा फिर्ता होके अइम, पर तुहुरे नै देख्बो। 23मनै तुहुरिन्हे कहिहीँ, ‘हेरो, ख्रीष्ट वहाँ बा! हेरो, या ऊ यहाँ बा!’ पर यी सुनके तुहुरे चल ना जैहो, ना ते ओइन्के पाछे लग्हो। 24काकरेकी जसिके बिज्ली चम्कत ते आकाशके एक छोरसे दोसुर छोरसम ओजरार पारदेहत। मै, मनैयक छावा फेन अपन दिनमे ओस्तेके हुइम। 25पर आघे महिन्हे गजब धेउर दुःख सहे परी, और यी पुस्तक मनै महिन्हे स्वीकार नै करहीँ। 26हमार पुर्खा नोअक दिनमे जस्तेके हुइल रहे। मै, मनैयक छावक दिनमे फेन ओस्तेके हुई। 27नोआ जहाजके भित्तर नै जाइतसम मनै खाइतिहिँत, पिअतिहिँत और भोजव्यहा करतिहिँत। तब जलप्रलय आइल, तब सक्कु जहनहे खतम करदेहल। 28सदोम नगरमे बैठुइया हमार पुर्खा लोतके दिनमे फेन ओस्तेके हुइल रहे। मनै खाइतिहिँत, पिअतिहिँत, किनबेँच करतिहिँत, खेती करतिहिँत और घर बनाइतिहिँत। 29पर जोन दिन लोत सदोम शहरमेसे निक्रल, तब आकाशमेसे आगी और गन्धक बरसके उ सक्कु मनैनहे खतम पारदेहल, जे-जे शहरमे रहिँत। 30मै, मनैयक छावा प्रकट हुइना दिनमे ओस्तेके हुई। 31उ समयमे बेर ना करहो, यदि तुहुरे घरक छँपरामे रबो कलेसे अपन सामान लेहे घरेक भित्तर ना जैहो। तुहुरे वहाँसे भागजैहो। जे खेट्वामे बा, ऊ कुछु लेहे घरे ना घुमे। 32लोतके जन्नीहे का हुइलिस, उहिहे याद करो। 33जे अपन ज्यान बँचाई खोजी, उ उहिहे गुमादारी। और अपन ज्यान मोरिक लग गुमुइया उहिहे बँचाली। 34मै तुहुरिन्हे कहतुँ, उ रात दुई जाने एक्के पठरीमे रहिहीँ, एकथो लैजाजाई और दोसुर छोरजाजाई। 35दुईथो जन्नी मनै चकियामे पिसे भिरल रहिहीँ, ओम्नेमेसे एकथो लैजाजाई, दोसुर छोरजाजाई। 36(दुई जाने मनै खेट्वामे रहिहीँ, एकथो लैजाजाई दोसुर छोरजाजाई।)” 37तब् ओइने येशूहे पुँछ्लाँ, “कहाँ प्रभु?” येशू ओइन्हे कलाँ, “जसिके गिद्धा फेन वहैँ जमा हुइथाँ, जहाँ मरल दङ्गर रहत। ओस्तेके हर केऊ यी जानजाई कि यी बात कहाँ हुइता।”

Currently Selected:

लूका 17: DVGNT

Highlight

Copy