मरकुस 7

परंपरा अने नियम

(मत्ती 15.1-20)

1ताहा परुसी अने काही शास्त्री जे यरूशलेमेहे रोत आये ओते तियाआ आहने टोलवात गोये, 2तिये पालील्यो का तियाआ किबी शिष्य अशुद्ध आथ न तुवता तेहलूज जेवण खात होय 3काहाके परूसी अने यहुदी आखा डायाआ रीतीही अनुसरून आथे वारुई तुवल्याशिवाय रोटू कोईत नाहा, 4ऐहलेच बाजारामेरे आवित नि उंगले तांहुजा खायलो नाहा याहारको अनेक रूढी परंपरा ओतु तियाआ ते पालीत कोईत एहलो जेहलो घागरी पितलेए बासने तुविलो. 5याहोस फरीसी अने धर्म शास्त्री इये येशुहू फ़ुस्ल्याआ, तुमाआ शिष्य रीत पालीत काहा कोईत नाहा? परंतु आपाआ रोटू आथे न तुवता आविलो खातले? 6येशु तियाहा कोयु, तुम्हाआ ढोंग कोणारो यशायाह हाजलीज भविष्यवाणी कोअयी होय जेहलो लेखिलो होय, ओ माआ सन्मान फक्त ओठेवाही कोअता परंतु तियाआ मने मापोरोत सेटे होय. 7ते व्यर्थ माआ उपासना कोअता काहाके जे शास्त्र कोईत जे हिकत्ले ते रोतेहे मांहाआ आज्ञा. 8तुमु परमेश्वरोओ आज्ञा सेटे मेकल्यी होय अने तुमु माहांआ परंपरा ची मदत लेदि होय. 9तिये तियाहा कोयु, तुमु परमेश्वरोओ आज्ञा सेटे कोईलाकाज जास्तीज चतुर उवे होय यकोअता का तुमु आपाआ रूढी परंपरा स्थापना कोहू शकहू, 10दाखलाकोजे मोशेई कोयु, आपाआ माय-बापाचा सन्मान को अने जे कोडु आपाआ माय-बापाचा सन्मान कोईत नाहा तियाहा डीलुम शिक्षाम कोईली. 11पोन तुमु कोआ जर एगदू आपाआ बाह्हाहा आपाआ याह्हीही कोयु काजे आय तुमामे पोषणाकोअता आपलो ते कुर्बान म्हणजे अर्पण कोल्यु होय. 12ताहा तुमु आपाआ बाह्हा कोआता किंवा याह्ही कोअंता आगाडी किबी कोहू आपित नाहा. 13एहला प्रमाणे तुमु आपाआ रीती चालीलो मेकीत देवोओ वचन रद्द कोअता अने याहोस फासी खूप गोठी कोअता.

मांहोहो अशुद्ध कोअनारी गुठे

14अने माहुगोदीही फासी हादीत कोयु, तुमु आखे जोओ माआ होमला अने होमजीत ल्या. 15बारथेरोत माहुहु विसमे जात तियाहा भ्रष्ट कोईत एहलो नाहा ताहा माहुहु मायरोत जे निह्तले तोज तियाहा भ्रष्ट कोअत्लू. 16जर एखाआ होमलीलो कान होय ते होमलीत लेय. 17तो माहुंगोर्दी निहित कोआ गोयू ताहा तियाआ शिष्यांनी तियाहा तियाअ दृष्टान्त विषयी फ़ुस्ल्याआ. 18तो तियाहा कोयु, तुमु तीयाहाभी एवडे आनजाड्यू होय का कि? जे किबी बारथेरोत माहुहु विसमे जाहो ते तियाहा अशुद्ध कोहू शकत नाहा ओ तुमामे होमजाडीत नाहा कि? 19काहाके ते तियाआ मोन नाहा ताहा ते पोटाम जाहो अने संडासोमे रोत बारथे पोडत्ल्ये एहलो रीतीवाही तिये आखे प्रकारोओ ओन शुद्ध ठेरव्यो. 20फासी तो तियाहा कोयु, जे माअहोम रोत बारथे निहतले तोज माहुंहु भ्रष्ट कोअते 21काहाके मायरोत म्हणजे मांहुंहु मोनम रोत वाईट विचार निकले, 22जारकर्मे, चोऱ्या, खून, व्यभिचार, लोभ, दुष्टपणा, कपट, कामातुरपणा, निंदा, गाई गाळी, अहंकार मूर्खपणा 23याआ आखे वाईट गोठी मायरोत बारथे निकले अने माहुंहु अशुद्ध कोअतली.

सुरु फिनिकी जातिई बुईई विश्वास

(मत्ती 15.21-28)

24फासी येशु ते स्थान सोडये अने सोर अने सिदोन प्रांतात गोल्यो तीही तो होमला कोअमे गोल्यो ओ कोडाआ कोडवो कायना एहलो तियाआ मोनामे ओते तेबी तियाहा गुप्त रोहिलो शक्य निमिले. 25पोन जिया हानू पोरीही अशुद्ध आत्माआ लागल्यो ओतु एहलो होमला स्त्रीने त्याविषयी लागेज होमल्यु अने तुव्या अने तियाआ गुडू पोड्यी. 26ती बुई यूनानी ओमेत सुरफुनुकी जातीइ ओती तीही तियाहा विनंती कोअयी का माआ पोऱ्यीमरोत दुष्टात्मा काढी दे. 27तो तीही कोयु, पोऱ्याहा तृप्त ओवुहू आप, काहाके पोऱ्याआ भाकर लेत कोओहो कुत्र्याआ टाकिलो ठीक नाहा. 28फासाडी तीही तियाहा उत्तर आप्लु, खोरो होय महाराज, तेबी कोओहु कुत्रेभी मेजाणीसे पोऱ्याआ आथे पोडीतरोल्यु चुरा खातले. 29तो तीही कोयु, ताआ कोईओलो गोमे, जा ताआ पोऱ्यीमरोत दुष्टात्मा निघाल्यू होय. 30फासाडी ती आपाआ कोआ गोयी, तेहलाम पोरीही खाटलापो टाक्ये होय अने दुष्टात्मा तीयीमोरोत निहित गोये होय एहलो तीही आढळून आव्ये.

येशु बोयरा अने हक्लू मांहोहो हाजु कोअयु

31फासाडीनंतर तो सोर भागुम निघाल्यू अने सिदोनापोरेत दकापलीस प्रांतातून गालील समुद्राहि फासी आवयू. 32तेहलाम माहु होमला बोयरा बोबड्या माहुंहु तिया जागे लेतआवीत आपु ह्यापो आथे मेका एह्ली तियाहा विनंती कोअयी. 33तेहलाम तिये तियाहा मांहुपोरोत एकीकडे लेतजात तियाआ कानोम आंगी लेदि अने थुंकीत तिये तियाआ जीभेहे स्पर्श कोअयु. 34अने उपो स्वर्गामेहे पालीत तिये श्वास लेदो अने कोयु, इफ्फाथाआ, म्हणजे खुली जा. 35तेहलाम तियाआ कान मोकले उवे अने तियाआ जीभी बंद लागीगोयो हुटोत तो स्पष्ट गोगू लाग्यू. 36तेहलाम ओ कोडाआ ओ कोडवो कायना एहलो तिये तियाहा निक्षून कोयु; परंतु तो तियाहा जेहलो कोयु गोल्यो तेहलूज ते जाहाकोज ओ उपदेश कोईत गोये. 37अने ते अतिशय थक्क ओतगोयु कोयु, तिये आखे किबी हाजो कोल्यु होय, ओ बोयराहा होमलाड्यू अने मुकाहा गोगीला शक्ती आपोहो.

Currently Selected:

मरकुस 7: NOINT

Highlight

Copy