मरकुस 6

नासरत मेहे येशुउ अनादर

(मत्ती 13.53-58; लूका 4.16-30)

1तीहीरोत नीहीत कोईत येशु तियाआ देश नासरेथ मेहे गोयु अने चेले भी तिया फासाडी गोया. 2जांहा शब्बाथ दीही आवयू तिये मंदिरोम जात संदेश आपलो सुरवात कोअयी तियाआ संदेश होमलित जाखो मांहे आश्चर्यचकित उवे ते कोयु, याहा ओ आखे किबी कोरात जोडयो उवे? नाहाकोत ओ ज्ञान आपलो आव्ये होय, अने याआ आथे केवडी ए महत्कृत्ये ओये? 3जो हुतार जो मरीयेचा पोऱ्या अने याकोब, योसे, यहुदा अने शिमोन याआ जो पाही तोज ओ होय ने? अने याआ बोईही इंही आपाआरी होय ने? एहलो ते त्याविषयी अडखळले. 4ताहा येशु तियाहा कोयु, संदेष्टाआ सन्मान उवनारा नाहा एहलो नाहा पोन तियाआ तियाहा तियाआ कोरयाम अथवा तियाआ कोओहो मंडलिम तिया सन्मान उवनारा नाहा. 5थोडोज बिमारयारी आथे मेकीत तिये तियाहा हाजो कोयायाशिवाय दिहरे कोढलाभी सामर्थ्य तियाहा तीही कोअता आव्ये नाहा. 6तियाआ अविश्वासोवाही तियाहा आश्चर्य कोअयो फासाडी तो शिक्षण आपित गाव-गाव फिर्यु.

येशुउ द्वारा बारा प्रेरितोहो मुकलिलो

(मत्ती 10.1,5-15; लूका 9.1-6)

7फासाडी तिया बारा जोह जागे हादीत तो तियाहा जोडी जोडीवांही मोकलीत लाग्यू तिये तियाहा अशुद्ध आत्मा पोओ अधिकार आप्यू. 8अने तियाहा आज्ञा कोअयी का वाटे कोअता काठी वासित दिहरे किबी लेऊ नाहा रोटा, खोतली कमर काहयोम पोशा लेऊ नाहा, 9तेबी खाअडे कालीत चाल्यो, बेन अंगरखे कालहू नाहा. 10अने तो तियाहा कोयु तुमु किहीबी एकदाआ कोआ उतरीलो तेहलाम ते ठिकाण सोदेतांहुंजा तिहीज रो. 11अने ज्या जागापो तुमाआ स्वागत उवे नाहा अने जीही मांहे तुमाआ होमलीनारू नाहीत तिहीरोत निहतावेले तियाहा साक्ष जोडीत कोईत आपाआ तल्वाआ धूळ तिहीज फोकडीत टाका. 12ते तिहीरोत निकलीलू अने माहु पश्चाताप कोईओलो एह्ली तिये घोषणा कोअयी 13खूप दुष्टात्मा काढीलो अने अनेक रोगी तेल लागाडित कोईत हाजो कोल्यु.

युहन्ना बाप्तिस्मा आपनाराआ हत्या

(मत्ती 14.1-12; लूका 9.7-9)

14हेरोद राजाविषयी होमल्यु, काहाके येशुउ यश निवडील्ये आखे जागापो गाज्ये ओते किबी मांहे कोयु, बाप्तिस्मे आपणारो योहान जिवंत होय त्याकोअता तीयाम महत्कृत्ये सामर्थ्य काम कोईत होय. 15दिहरे मांहे कोयु, “तो एलीया होय, किबी मांहे कोयु ओ संदेष्टा होय, म्हणजे भविष्यवक्ता पैकी च एक होय.” 16पोन हेरोद राजाआ जांहा होमल्यु तेहलाम तो कोयु, “योहान, ज्याआ आय मान काढीलो ओती तो जिवंत ओवयू होय.” 17आपाआ पाही फिलीप्प याहा लाडी हेरोदिया यी आगाडी हेरोदावाही स्वतः मांहे मोकलित योहानाआ तोईत जेलूम सिपडीत मेक्ल्ये ओते काहाके हेरोदावाही यीआरी वेहवाल कोल्यु ओते, 18अने योहान हेरोदेसोहो कोयो एहलो, तू आपाआ पाहीओ लाडी राखजी ओ हाजो नाहा. 19याकोअता हेरोदिया तियापो डाव तोईत तिया वध कोईलाकाजे पालीत ओती परंतु तीई किबी नेसाल्तु, 20काहाके योहान नीतिमान अने पवित्र माहु होय ओ जाईत हेरोद तियाआ बित तोए अने तियाआ रक्षण कोआ, तो तियाआ गोठीको होमले तेहलाम जाअखो गोंधळूम जाय तेबी तियाआ कोईओलो होमलित लेअली. 21फासाडी एक सोयीचा दीही आवयू तेहलाम हेरोदावाही आपाआ वाढदिवशी आपाआ प्रधान, सरदार अने गालीलामे प्रमुख मांहे याहा मेजवानी आप्यी. 22अने हेरोदाआ सुई नासिलो कोल्यु त्यापो आवल्या आखे प्रधान पवनु खुश उवे त्यापो राजा हेरोदावाही तीही कोयु, “मांग, जे ताहु हवे होय, आय ताहु ते आपी.” 23फासी तो तीही वचन आपित कोयु, माआ आर्धोज राज्य सुद्धा जे किबी तू मांगनारू आय ताहु आपी. 24त्यापो ती बारथे जात आपाआ याह्ही आवयी तीही फ़ुस्ल्याआ, माहु नाहाकोत मागल्यो जोवे तेहलाम तीआ याह्ही तेकोहे, बाप्तिस्मे आपनाऱ्या योहानाआ मुंडको. 25तेहलाम ती लागेज गुगदीत जात राजाआरी आवयी अने तेकोहे, माआ इच्छा होय का बाप्तिस्मे आपनाऱ्या योहानाआ मुंडको ओमे ताटूम आपलो. 26त्यापो राजा जाखो दुखी ओवयू परंतु आपाआ शपथ अने आपाआ कोआ आवल्या माहामे तो तियाअ पोरीही नकार आपुहू शकला नाहा. 27अने राजा आज्ञा आप्यी का योहानाआ मुंडको लेतावे एहलो होमला शिपायाहा कोयु, जेलूम जात योहानाआ मुंडको वाड्यो. 28अने तियाहा ताटूम मेकीत तियाअ पोरीही आप्लु अने तियाअ सुई आपाआ याह्हीही आप्लु. 29जाहा योहानाआ शिष्याने ए बातमी कोअयु तेहलाम ते आव्ये अने तियाआ प्रेत कबरेम मेकल्यी.

येशु पाच हजार मांहोहो खावाडलोओ

(मत्ती 14.13-21; लूका 9.10-17; युहन्ना 6.1-14)

30ह्या नंतर प्रेषित येशु आरी आव्ये, अने आपु जे-जे कोल्यु अने जे-जे हिकाड्ये ते आखे येशुहू कोयु. 31तेहलाम तो तियाहा कोयु, तुमु जंगलूम एकलुज साला अने थोडू विहाव ल्या काहाके तीही खूप मांहे आवीत जात होयकोत तियाहा खाअलाकाजे तीयाहाभी वेल मिलीअलो नाहाओती. 32ताहा ते नावामोरोत तिवोल एकांत जागामेहे गोये. 33माहु तियाहा निहतावेले पालील्यो अने खूप जानोतांहि तियाहा ओलखे अने तिहीई आखे गावोमेरोत मांहे पागेच निकल्ये गुगदीत जात तियाआ आगाडी तीही पुग्या. 34येशु नावामोरोत उतरीलो ताहा तिये माहुहु एक वोडी गोर्दी देखल्यी ते ताहा मेंढवालो नेसलेल्या मेंढाहोस ओते कोईत तियाहा तियाआ दया आवयू अने तो तियाआ आख्याज गोटीविषयी शिक्षण आपुहू लाग्यू. 35दीही वारुज उतरीत कोईत तियाआ तिया जागे चेले आव्ये अने कोयु, ए जंगलो जागू होय अने दीही ओमे जाअखो उतरीलो होय. 36ताहा माहु आजु बाजू गावोमेहे जात स्वतः कोअता खाकोता किबी लेदलेए कोईत तियाहा जाऊ आपलो. 37तिये तियाहा उत्तर आप्लु, तुमुज तियाहा खाकोता दया ते तियाहा कोयु नाहाकोत जात बेनहोव दिनार रोटा वेसातो घेऊन तियाहा खाकोता आप्या? 38तो तियाहा कोयु, तुमाआ जागे केतो रोटा होय? जात पाला, देखल्यापो ते तियाहा कोयु, पाच रोटा अने बेन मासे. 39फासाडी तिया आखे महाहा नीला चारापोओ गोटा-गोटा मेहे बोहाडीत दया कोयु. 40ताहा ते होव-होव अने पन्नास-पन्नास एहलो लाईन-लाईन लेतजा बोह्ये जणू नाहाकोत वाफेच. 41फासाडी तिये तियाअ पाच रोटा अने ते बेन मासे घेऊन उपो स्वर्गामेहे पालीत आशीर्वाद आप्यू अने रोटा तोड्या तियाअ तियाहा वोदिलाकाजे आपाआ शिष्यांआ आप्या ते बेन मासेभी आखाम वाटीत आप्लु 42अने आखे खात तृप्त उवे, 43अने तिये उरील्योओ तूकडआ बारा टोपल्या पोईत लेदिओलो अने माहाआ तुकडाभी लेतगोल्ये. 44जे रोटा खाणारा पाच हजार मांहे ओते.

येशुउ पाअयो पोओ साल्यु

(मत्ती 14.22-33; युहन्ना 6.16-21)

45फासाडी आय माहुगोदीही जाहू कोत्लू, अने तुमु नावूमे बोहित तिवोल बेथसैदा इंही जा एहलो कोत तिये लागेज शिष्यांआ जाहू कोयु. 46फासाडी माहुंहु जाहू कोत तो प्रार्थना कोईलाकाजे डोगोपो गोल्यो. 47अने रात उवी तेहलाम ते नाव समुद्राआ विसमे पुग्यी ओती अने येशु एखल्यू धरतीपो ओतु. 48तियाहा ते आवाज माईत-माईत हैरान उवे होय काहाके वारू जोरे मुयाआ आवीत ओतु फासाडी राती चौथो पहरच्या सुमारास तो समुद्राम पाण्यापो चालते त्याआरोत आवीत ओतु तियाआ जागेरोत आगाडी जाण्याआ बेत ओतु. 49पोन तियाहा पायापोरोत सालत्लू पालीत ओ पुत्डू होय एहलो तियाहा लाग्यो अने ते आअडीलो, 50काहाके तियाहा पालीत ते आखे बितगोये ओते ताहा तो लागेज त्याआरी गोगू लाग्यू अने तियाहा कोयो धीर तोआ आय होय. 51अने तो त्याआरोत नावूमे सोडवीत गोल्यो ताहा वारू ठावकू ओवयू फासाडी ते मोनोमेऱ्यो मोनामे पराकाष्ठतेवांहि आश्चर्यचकित उवे ओते. 52काहाके रोटीही गोठी तियाहा उमगली नाहाओती त्याआं मोन कठीण उवे ओते.

गन्नेसरत मेहे रोगी मांहो हाजु कोअयु

(मत्ती 14.34-36)

53नंतर ते तिवोल जात गन्नेसरतच्या किनारापो पुग्या अने तिये नाव बांधीत मेकल्यी. 54ते नावामोरोत उतरताज माहु तियाहा ओलखे, 55अने ते आसेपासेए भागुम सारीआर धावपळ कोईत फिऱ्ये अने जीही कोठे तो होय कोईत तियाआ कानुम आव्ये, तीही-तीही ते बीमारोहो खाटलापो कालीत तिया जागे आवहू लागाडीत. 56तो खेडापाडाम नगरोत किंवा खेत मोलाम किहीबी जावा, तीही ते बीमारोहो पो बाजारामे लेतआवीत मेकीत अने आपाआ कापडाहा तेबी स्पर्श कोहू दया एहलो तियाहा विनंती कोईत अने आपारी तियाहा स्पर्श कोईत तेतोज हाजो उवनारा.

Currently Selected:

मरकुस 6: NOINT

Highlight

Copy