मरकुस 5

दुष्टत्मा पीडीत मांहोहो हाजु कोअलोओ

(मत्ती 8.28-34; लूका 8.26-39)

1येशु अने शिष्य खाड़ीई पार कोईत गिरासेनिकराआ देशमेहे पोचीत गोये, 2येशु जाहा नावामोरोत उतरीलो अने बारथे आवीत ओतलू एक अशुद्ध आत्माआ लागल्यो मांहो कब्रोम रोत निकलित तियाहा मिल्यू. 3तो कबराम रोत ओतु अने तियाहा हाकलदंड तीयाहाभी बांधीत मेकिलो शक्य निमिले 4काहाके तियाहा खूप टायमोआ बेडीवाही अने हाकलदंड बानदल्यो ओतलू ए तिये हाकुलदंड तोडीत टाक्ये ओते, अने बेड्याआ तुकडे-तुकडे कोल्यु ओते तियाहा कोडु ए बाधीअलो शकत निमिले. 5तो कायम रातदीही कबरोमे अने डोंगामोरोत आअडित एहलो अने डोणो डोनोवांही आपाआ डील खेचीत लेत एहलो. 6येशु ला सेटेरोत पालताज तो धावून आवयू, अने तियाआ नमन पोडीत, 7अने जोरेज आयडीत कोयु, ओ येशु महान देवाच्या पोऱ्या, तू माय काहा पोडत्लू? आय ताहु देवाची शपथ घेऊन कोत्लू, माहु छळू नाहा. 8काहाके तो तियाहा कोयु, अरे, अशुद्ध आत्मा आव माअहोमारोत निह 9अने येशु तियाहा फुशु, ताआ नाव कि होय? तिये उत्तर आप्लु माआ नाव सैन्य, काहाके आमाहा खूप होये; 10अने आमाहा आव देशोमेरोत कालीत नाहा एहली तो आग्रहावाही तियाहा विनंती कोहू लाग्यू. 11तीही डोगोओ किनारोपे डुकरांआ एक वोडू टोलु चारते ओते. 12तेहलाम दुष्टात्मा येशुहू विनंती कोअयी का आमाहा तियाअ डुकराम फोइलो कोईत आमाहा आज्ञा आप. 13फासाडी तिये तियाहा परवानगी आप्यी; तेहलाम ते अशुद्ध आत्मा निहित डुकराम रीग्ये अने तो सुमारे बेन हजार डुकरांआ गोठाआ गुगदीत जात काटोपोरोत समुद्रामेहे पोडीत बुडीत मोइत गोयी. 14हूवरे चारनारे नाह्ये नगर अने गावोमेहे जात ओ वर्तमान कोयु तेहलाम नाहाकोत उवे ओ मांहे पालीला कोअता आव्ये. 15ते येशुआरी आव्ये अने पालील्यो का जो माहुहू ज्यापो दुष्टात्मा लागल्यो ओतु कापडे कालीत शुद्धीपो आवल्यु देखायू अने तियाहा बिक लागी. 16जिये ए घटना पेल्ली तिये दुष्टात्मा ओती अने उवे ते अने डुकरा बद्दल आखे माहिती कोल्यी. 17अने ते तियाहा विनंती कोअयी का तू इहीरोत निहित जा. 18अने फासी जांहा येशु नावेपो चोडिलो ओतु तेहलाम ज्या व्यक्तीम दुष्टात्मा ओतु तो माहहू येशुहू कोयु, अने विनंती कोहू लाग्योकी माहु तुमाआरी आवहू दे. 19फासी येशु तियाहा आपाआरी घेऊन जॉहु नाहाकोत कोअयी तियाहा कोयु, आपाहाज माहुंमे कोआ जा, अने तियाहा आखे कोअलो जे देवूही ता कोअता कोल्यु होय अने तियाहा ओ पोन कोअलो का देवूही तापो दया केहली कोअयी. 20तेहलाम तो निघाल्यू अने येशु जे वोडी काम त्यांकोअता कोअयी ओती ती दकापलीस भागुम उपदेश कोहू लाग्यू; तेहलाम आख्येज आश्चर्य वाटेम.

याईरो मोअली सुई अने एक रोगी बुई

(मत्ती 9.18-26; लूका 8.40-56)

21फासाडी येशु नावूमे बोहित फासी गोयू ताहा त्याजागे माहुहु वोडी गोर्दी आवयू तो समुद्राआरी ओतु 22अने याईर नावाआ सभास्थानआ एक अधिकारी आवयू, अने तियाहा पालीत तिया गुडू पोडीत, 23तिये आग्रहावाही तियाहा विनंती कोअयी का माआ हानी पोऱ्यी मोईलाकाजे टेकाडयी होय तीही हाजो ओतगोयु जिविलो कोईत आपु आविलो तीपो आथे मेकीलू. 24ताहा येशु त्याआरी नीह्यू; अने खूप मांहे तिया फासाडी जातले ओते अने त्यापरोत गोर्दी एती का पोडीत जाय. 25अने तीही रक्तस्रावाने बारा वर्ष एक बुई ओती. 26तीही आख्याज वैद्याआ आथे खूप हाल सहित आपारी जे ओते निमिले ते आखे खर्चित टाक्ये ओते तेबी तीही हाजो लाग्यो नाहा पोन आजार वोदते रोयु ओतु. 27जाहा तीही येशूविषयी होमल्यु ताहा ती गर्दीमे तिया फासाडी आवयी अने तियाआ कापडाआ गोंडाहा स्पर्श कोअली, 28काहाके ती कोयो ओती, फक्त तियाआ कापडाहा स्पर्श कोअयु तेबी हाजी उवे. 29अने लागेज तिई रक्त वोहीलो बोंद ओत गोयो अने ती आपाआ डीलामेहे जाईत लेदी का आयती बीमारीमेहे रोत हाजी ओत गोई. 30आपापाय शक्ती निहथी होय ओ येशुई आपाआ तियाहा लागेज ओलखे अने गर्दीमे वोलीत कोयु, माआ कापडाआ कोडु हिविलो? 31तियाआ शिष्य तियाहा कोयु, मांहे जमाव आपारी गोर्दी कोईत होय ओ आपु पालता तेबी आपु कोआ कोडू माहु हिविलो? 32फासाडी जीयी ओ कोल्यु ओते तीही पालीला कोअता सभोवार पालील्यो, 33तेहलाम ती बुई आपाआ बाबतीम जे किबी घोडये ते जाईत बित अने कापीत तिया जागे आवयी अने तियाआ पाया पोडीत तीही तियाहा आखे खोरो-खोरो जे घोडये ते कोयु, 34तो तीही कोयु, बेटी, ताआ विश्वास ताहु हाजो कोल्यु होय; शांतीई जा ताआ पिडपोरोत मुक्त होय. 35तो बारथे ओतु एतांम यहुदी सभास्थानाच्या अधिकाऱ्याआ कोअही रोत किबी मांहे आवयी अने तियाहा कोयु, आपाआ पोऱ्यी मरण पाव्यी ओमे गुरुजींना त्रास काहा आपलो? 36पोन येशु तियाआ गोगीलाही लक्ष्य न आपलो सभास्थानाच्या अधिकाऱ्याआ कोयु, भिईलो नाहा विश्वास पोन तो. 37येशु पेत्र याकोब, याकोबाआ पाही योहान याआशिवाय कोडोबी आपाआरी आवहू आप्लु नाहा. 38फासाडी ते सभास्थानाच्या अधिकाऱ्याआ घराजवळ आवेताहा ओक्साबोक्शी रोडनारे अने आकांत कोअनारे यांआ गोधळ जानारू तिये पाल्यू. 39येशु विसमे जात तियाहा कोयु, तुमु काहा गोधळ कोअता अने रोडता? सुई मोअये नाहा निंदोम होय. 40तेहलाम ते ओहुहू लागाडीत; पण तिये तियाअ आखाहा बारथे मोकलित आप्लु अने पोऱ्यीइ याह्ही बाह्हू अने आपा आरीई मांहे घेऊन पोऱ्यी ओती तीइही ते गोये. 41फासाडी पोऱ्यीइ आथ तोईत तो कोयु, तीलीमा कुम; याआ अर्थ पोयरयी आय ताहु कोत्लू उठ. 42अने लागेज ती पोऱ्यी उठित चालीलो लागीई; काहाके ती बारा वर्षाची ओती तेहलाम ते लागेज आश्चर्य चक्कित उवे. 43ऐ कोडाआ मुंदुपोडता कामा कायना एह्ली तिये तियाहा निक्षून आज्ञा कोअयी फासाडी तियाहा कोयु का यीही खांहु किबी आपलो.

Currently Selected:

मरकुस 5: NOINT

Highlight

Copy