मरकुस 13

येशु द्वारा मंदिरों विनाशो भविष्यवाणी

(मत्ती 24.1-44; लूका 21.5-33)

1जाहा तो मंदिरोमेहे रोत नीहतु ओतुताहा तियाहा तियाआ चेलामेहेरोत एक जोंओ तियाहा कोयु ऐ गुरू पाल केहला वोडा दोणा अने केहलु वोडू बोंगलू होय. 2अने येशु तियाहा कोयु, तुमु आव वोडो मंदिराआ पालल्ते? एक डोणो पण सुटे नाहा जो पोडीत जानारू नाहा.

आखरी दिहोहो चिन्ह

3जाहा तो मंदिराआ आगाडी जैतुनाआ डोगोपो बोहयु ओतु तेहलाम पेत्र याकोब योहान अने आंद्रिया लेतजा एकांत तियाहा फ़ुस्ल्याआ, 4आमाहा कोआ का याआ गोठी कोयो उवे होय जांहा याआ आखे गोठी पुरो उवे होय ताहा याआ निशानी नाहाकोत रोही? 5अने येशु तियाहा कोहू लाग्यू, सावध रो, कोडु तुमामे ठोगीत कायना. 6केते माआ नावामेहे ते कोयु आविलो आय तोज होय अने ते कोअता जो ठोगील्यो. 7स जाहा तुमु लढाया विषयी होम्लाहा किंवा बातम्या होमलीनारू ताहा बित नाहा याआ गोठीही उवे आवश्यक होय तेबी पण तियाअ समयी अंत उवे नाहा. 8होमला जातीविरुद्ध दिहरि जात अने होमला राज्याविरुद्ध दिहरे राज्य उठित उभे रोही जास्तीज जाग्तली भूकंप उवे अने दुष्काळ पण पोडी याआ आखे गोठी वेदनांआ अने दुखोओ सुरवात उवे. 9पोन तुमु सावध रो, काहाके मांहे तुमामे सभास्थानामेहे लेत जानारू, मंदिरोम चापके देही तुमु माआ वोजोसे अधिकाऱ्याआ अने राजाहा आगाडी साक्ष आपलो कोअता उभे रोही. 10अने आवश्यक होय का पहीले आखे जातीमेहे सुसमाचार प्रचार कोअयी जोवे. 11जाहा ते तुमामे बंदी कोईत होफहोपिन आपी ताहा पेलरोत चिंता कोहू नाहा का आमाहा नाहाकोत कोअही पोन या तिया समयी तुमामे जे किबी आप्लु जाइअलो ते तुमु कोओलो होय काहाके गोगनारे तुमु नाहा पण पवित्र आत्माआ होय. 12पाही पायहोहो अने बाह्हू पोऱ्याहा च देउलाकोअता तोईत आपी अने पोऱ्ये आपाआ याह्ही बाह्हाआ विरोधाम उभे रोत तियाहा माईत टाकही. 13अने माआ नावोवाही आखे तुमाआ द्वेष कोअनारू पण जो आखिर पर्यंत धीर तोईत रोही तीयाआज तारण उवे.

माहाकष्टो टाईम

14पोन जाहा तुमु अशुद्ध कोईत टाकही, घृणित वस्तु पाल्हा, ताहा वासनारावाही होमजीत जानारू ताहा जे यहुदियाम होय तिये डोगोम नाहीत जायलो होय. 15अने जे कोओओ छत्तावर होय तिये निसे उतरुहू कायना अने किबी लेई कोअमे सुद्धा जाऊ नाये. 16अने जे खेतुम होय तिये आपाआ कापडे लेणेकोअता फासाडी वोलुहू कायना 17पोन तिया धिक्कार होय जे तियाअ दिहोम गर्भवती रोही अने जे पोऱ्याहा दुध पिवाडीही. 18प्रार्थना को का ओ हियालाम ओवुहू कायना. 19काहाके तेदीही एहलो दुखामे होय जेहलो धरतीई पेलेरोत ओमेजा उवे नाहा अने फासाडी ए खोरोज देव नाहा. 20जर परमेश्वराने तियाअ दिहीहो कोम वचकोल्यु कायना ओतो ताहा कोडलो प्राणी बी नि वासते पण तियाअ निवडिल्या वांही तियाहा तिये निवडील्ये होय त्याकोअता ओ दीही कोम कोल्यु होय. 21तेहलाम जर कोडु तुमामे कोअही, पाला, ख्रिस्त इंही होय किंवा पाला तो तीही होय ताहा विश्वास कोहू नाहा. 22काहाके खोटो ख्रिस्त अने खोटो भविष्यवक्ता उठित उभे रोही अने जर शक्य उवेताहा जे निवडील्ये होय तियाहा पण ठोगीत सेकतेहे अने तियाहा अदभूत काम अने चिन्हे देखाडीही. 23पोन सावध रोयला, पाला आय पहिलुच तुमामे कोत आप्लु होय.

येशुउ इजी आवलोओ

24पोन तिया दिहोम तियाअ दुखोम, दिह काळा ओतगोयु जानारू अने चंद्र आपाआ उजालो आपी नाहा. 25अने जुगोमोरत तारे तुटीत रोही अने जुगाआ शक्ती आलाळीत जानारू. 26तेहलाम मांहे माअहा पोऱ्याहा वोडो सामर्थ अने गौरवासह जुगोम आविलावेले पालनारू. 27तिया टायमोमें ते आपाआ स्वर्गदूत ताहा मोकलित धरतीई आव तीवोगरोत जुगोओ तियाअ टोकापोजा चारू साइतटूमे आपाआ निवाडीत एकठे कोअही.

अंजीरो साड़ोओ दृष्टांत

28अंजिराआ साडोपोरोत ओ उदाहरण हिकिलो जांहा तियाआ डाली कोमल ओतगोयु जाहो अने तीयाम पाने फुटहू लागत्ले तेहलाम तुमु जाईत लत्ले का उनालू जागे आवयू होय. 29ह्याप्रमाणे तुमु पण याआ गोठी उवेताहा पालीलो ताहा होमजीत लेअलो का तो दीही जागे आवयू होय नहाते बाअणापो तो आवयू होय. 30आय तुमामे खोरोज कोत्लू का, जोपोरोत याआ आखे गोठी पुरो उवनारा नाहा तोपोरोत ए पिढी नष्ट उवे नाहा. 31जुग अने धोरती नाहा एह्ली ओतगोयु जानारू पण माआ वचन रद्द उवे नाहा.

कायम जागते रोवा

32पोन तो दीही किंवा वेलाआ विषयाम कोडोबी मालुम नाहा स्वर्गदूतो नाहा अने पोऱ्याहा पण नाहा फक्त बाह्हाहा मालुम होय. 33सावध ओतगोयु जा, जागतू रो अने प्रार्थना को काहाके तुमामे मालुम नाहा का तो ठराविक वेल कोयो आविलो. 34ओ आव मांहाहोस होय जो आपाआ को सोडीत प्रवासाम गोल्यो आपाआ नोकराहा अधिकार आपित तिये आखाहा आप आपाआ काम कोयु अने बाआणु रखवालाहा पण जागतू रोइला कोअता आज्ञा कोयु. 35त्यापोत जागतू रो काहाके तुमाआ कोओ मालिक अथवा आविलो होय हांजेपो, राती, कुकडू आअडिलो टायमोमें किंवा वेगीई. 36केधी एहलो उवूंहू नाहा का अचानक तो आविलो जानारू अने तुमामे हुवतले पालनारू. 37अने जे आय तुमामे कोत्लू तोज आखाज कोत्लू, “जागतू रो.”

Currently Selected:

मरकुस 13: NOINT

Highlight

Copy