मत्ती 9

एक लखवा रोगिही हाजु कोअलोओ

(मरकुस 2.1-12; लूका 5.17-26)

1तो नावूमे बोहित तिवोल गोल्यो अने आपाआ नगरामे आवयू. 2अने पाला, मांहे एक लोखवू उवल्याहां मांहाहा खाटलापो हुवाडीत तियाआ ईही लेत आव्ये, येशु तियाआ विश्वास पालीत लोखवू उवल्या मांहाहा कोयु, माआ पोऱ्या, धीर तो, आय ताआ पाप क्षमा कोअयुहु. 3अने पाला, केते शास्त्री आपाआ मोनामे कोयु, ओ ताहा परमेश्वरोओ निंदा कोअत्लू. 4येशु तियाआ मोनामेऱ्या विचार होमजीत तियाहा कोयु, तुमु आपाआ मोनुमे काहा वाईट विचार कोईत होय? 5सोपो की होय? ओ कोओलो का, ताआ पाप क्षमा उवे होय, का फासाडी उठ अने चालु लाग. 6पोन याकोअता तुमु जांहु जोवे का माअहा पोऱ्याहा धोरतीपो पापापो माफी आपलो ओ अधिकार होय. तेहलाम तिये लाखवा उवल्यू पीडी ओयत्याहा कोयु, उठ, आपाआ खाटलो वीसे अने कोआ जा. 7तो उठित आपाआ कोअ निहित गोल्यो. 8जांहा ओ मांहे समुदायांनी पाल्लये, तेहलाम ते बितगोये अने चकित मांहे परमेश्वरोओ स्तुती कोहू लागाडीत. जीआ मांहाहा एहेलू अधिकार आप्यू होय.

येशु मत्तिही हाद्यू

(मरकुस 2.13-17; लूका 5.27-32)

9जेहेलो येशु तिहीरोत आगाडी गोल्यो मतय नावाआ एक माहुहू वसुलीई नाकापो बोहीतरोल्यु पालीत तिये तियाहा कोयु, माफासाडी आव, तो उठ्यू अने तियाआ फासाडी चालीलो लाग्यू. 10फासाडी एहलो उवे का जांहा तो कोअमे रोटूखाहू बोहयु ओतु, तेहलाम पाला, केते को लेनारा अने पापी आविलो येशु अने तियाआ शिष्याआरी रोटू कोहू लागाडीत. 11अने जांहा परुश्यांहि ओ पालील्यो तेहलाम ते येशुउ शिष्यांआ कोहू लागाडीत, तुमाआ स्वामी को लेनारे अने पापी मांहाआरी काहा रोटू खात्लू? 12फासाडी तिये होमल्यु तेहलाम तिये कोयु, हाजा मांहोहो वैदयाची गोरोज नाहा पण मांदवाड्यू मांहोहो होय. 13याकोअता तुमु जा अने होमजीतल्या का शास्रामे आव वचनाचा अर्थ कि होय; माहु बलि नाहा पण दया जोवे काहाके आय नितीमानांहा नाहा पण पाप्यांहा हादिलाकाजे आवयू होय.

युहन्ना चेलाआ उपवासो प्रश्न

(मरकुस 2.18-22; लूका 5.33-39)

14तेहलाम योहानाआ शिष्य त्याजागे आविलो कोहू लागीई, कि काहाके होय का आमाहा अने परुसी उपास कोअता पण ताआ शिष्य उपास कोईत नाहा? 15येशु तियाहा कोयु, जोपोरोत उपो वोराडवालारी होय तोपोरोत ते शोक कोहू सेकेहे कि? पण तेदीही आविलो जांहा वोरोहो वोराडो वालापोरोत जुदो कोअयु जाइअलो, अने ते उपास कोअनारू. 16जुनो कपडाहा कोडु नव्यो कापडा बोटकु लागाडीत नाहा काहाके तो बोटकु तियाअ आगला फाडते अने तो पेलरोत जाखो फटीत जात्लू. 17नाहा कोडु जुनो बुधलाम नवो द्राक्षरस पोईत नाहा, काहाके एहलो कोलाकोता बुधले फुटीत जातेहे अने द्राक्षरस बारथे वोहीत जात्लू अने बुधले नष्ट ओते पण नवो द्राक्षरस नव्यो बुधलाम भरतात तेहलाम बुधले अने द्राक्षरस बेन हाजूहोय रोत्ले.

मोअली सुई जीवति ओवयी

(मरकुस 5.21-43; लूका 8.40-56)

18तोओ कोयु ओतु एवडाम पाला, यहुदी धर्म सभांआ एक अधिकारी तीही आवयू अने तियाहा नमन कोईत कोहू लाग्यू, माआ पोऱ्यी ओमेज मोयी होय, पण आपु साला अने तिया मुंडकापो आथे मेका, ती जिवंत ओत जाणारी. 19येशु उठ्यू अने तिया फासाडी शिष्याआरी चालु लाग्यू. 20अने पाला, एक बुई जी बारा वर्षापोरोत रक्त वाहण्याच्या बिमाराहा पीडी ओती, तीही तियाआ फासाडी आवीत तियाआ कापड़ा गोंडाहा स्पर्श कोअयु. 21काहाके ती आपाआ मोनामे कोयो ओती, जर आय तियाआ कापडाहा स्पर्श कोअहि तेबी आय हाजी उवीही. 22ताहा येशु फासाडी फिरीत पालील्यो अने तीही कोयु, बेटी धीर तो, ताआ विश्वास ताहु हाजो कोल्यु होय, अने ती बुई तियाआ वेले हाजी उवी. 23जांहा येशु तियाअ अधिकाऱ्याआ कोआ पोचुज ताहा तिये पावी वाजीलो अने एकठे उवल्या गोर्दी शोक कोअत्लू तेहलाम पालील्यो, 24तिये तियाहा कोयु, निहित जा काहाके सुई मोयी नाहा ताहा हुवयी होय, यापो ते तियापो ओहुहू वोल्ये. 25पण जांहा मांहो गोर्दिही ही बारथे काढीत आप्लु, अने येशु कोअमे गोल्यो अने सुई आथे तोईत तीही उठविले अने सुई उठित बोही. 26ओ संदेश तियाअ आखे देश मेहे पसरला गोल्यो.

आंदलाआ विश्वास

27जांहा येशु तिहीरोत आगाडी गोल्यो तेहलाम तियाआ फासाडी बेन आंदले ओ आअडित अने गोगीत जातले, ओ दाविदाआ पोऱ्या, आमापो दया को, 28अने जांहा तो कोअमे निहित गोल्यो तोयो ते आंदले त्याजागे आव्ये, येशु तियाहा कोयु, नाहाकोत तुमु विश्वास कोअता काहा का आय ओ कोहू शकतो; होय प्रभू. 29ताहा ओ कोयु तियाआ डोआहां स्पर्श कोल्यु, तुमाआ विश्वासामेहे तुमाआरी उवे 30अने त्याआं डोआं उगाडीत गोये, तेहलाम येशु तियाहा चेतावणी आपित कोयु, ओ कोडोबी कोहां मा. 31पण तिये जात तियाअ आखे भागुम याहा चर्चा कोअयी.

एक मुकाहा हाजु कोअयु

32जाहा ते बारथे जात ओते, ताहा मांहे होमला मुक्यो माहुंहु जो दुष्टात्मा सी पीडीत ओतु, येशुआरी लाविले. 33अने ताहा दुष्ट आत्माआ काढीत टाक्ये गोये ताहा मुको गोगुहू लाग्यू योपो लोकसमुदाय आश्चर्य कोईत कोडु लागीई, इस्राएल मेहे एहलो केधीज पाल्लये नाहा. 34पण परुसी कोहू लागाडीत, ओ दुष्ट आत्माआ सरदारच्या मदतीवाही दुष्ट आत्माहा बारथे काडत्लू.

मजदुरोहो मुकलिलो विनती

35येशु आखे नगरांमे अने गावोमे जात तियाआ सभास्थानात जात हिकाडतो, राज्याआ सुसमाचार कोईत अने आखे प्रकारोओ रोग अने आखे प्रकाराआ दु:ख हाजो कोईत रोला. 36ताहा माहाआ गोर्दी पालीत माहाहूपो तरस आवयू काहाके ते तियाअ मेंढाहोस ते गांजलेले अने पाग्लेले ओते ज्या मेंढवालो नाहा. 37ताहा तिये आपाआ शिष्यांआ कोयु, पाकल्ये खेत जास्तीज होय, पण कामकरी कोम होय, 38याकोईत खेतोओ मालकोहो विनंती को का, ओन काटीलोकोता कामकरी मोकलित आपलो.

Currently Selected:

मत्ती 9: NOINT

Highlight

Copy