मत्ती 8

कोडी मांहोहो आथ लागाडित हाजो कोअलोओ

(मरकुस 1.40-45; लूका 5.12-16)

1जांहा येशु डोगोपोरोत उतरीलो, तेहलाम एक वोडी गोर्दी तियाआ फासाडी साली वोल्यी. 2अने एक कुष्ठरोगी त्याजागे आवयू अने नमन कोईत कोयु, ओ प्रभू, जर ताआ इच्छा ओय ताहा माहु शुद्ध कोअहू शकतो. 3येशु आथ आगाडी कोईत तियाहा स्पर्श कोल्यु अने कोयु, माआ इच्छा होय, तू शुद्ध ओत जा, अने लागेज कुष्ठ रोगापो रोत हाजू ओवयु. 4अने येशु तियाहा कोयु, पाल, कोडाआ बी माआ कोही पोन जात स्वतःहा याजकाहा देखाड, अने मोशेद्वारे ठरावीत भेट अर्पण कोईत साक्ष उवे.

सूबेदारों विश्वासपो येशुउ प्रशंसा

(लूका 7.1-10; युहन्ना 4.43-54)

5अने जांहा येशु कफर्णहुम शहर मेहे प्रवेश कोअयु तेहलाम एक सुबेदार त्याजागे आवयू अने विनंती कोहू लाग्यू, 6अने कोहू लाग्यू, ओ प्रभू, माआ सेवक कोअ लखवा सी पिडीत होय. 7तिये तियाहा कोयु, आय आविलो तियाहा हाजो कोअनारू. 8पोन तिया सुबेदार वाही उत्तर आप्लु, आय याआ लायक नाहा का तू माआ कोअ आवे, पण फक्त आज्ञा आप माआ सेवक हाजू ओत जानारू. 9काहाके आय पण न्यायाआ आधीन होय अने माआ आधीन माआ शिपाई होय, जांहा आय एकाहा कोत्लू, जा, ताहा तो जात्लू अने दिहराहा कोत्लू, आव, ताहा तो आवत्लू अने जांहा आपाआ पावरोहो कोत्लू ओ कोताहा तो ते कोअत्लू, 10जांहा येशु ओ होमल्यु तेहलाम आश्चर्यचकित ओवयू, अने आपाआ फासाडी आवनाराहा कोयु, आय तुमामे खोरोज कोत्लू का, माहु इस्राएल मांहो मेहे बी एहेलू विश्वास पाल्यु नाहा. 11आय तुमामे कोत्लू का, पूर्व अने पश्चिमेरोत केते मांहे अब्राहम, इसहाक अने याकोब त्याआरी होर्ग्याआ राज्याम बोहोनारो. 12पोन राज्याआ पोऱ्ये बारथे आंदाराम टाक्यो जाइअलो तीही रोडीलो अने दात साविलो रोय. 13अने येशु सुबेदाराआ कोयु, जा, ताआ विश्वासामेहे होय अने सेवक तियाआ समयी हाजू ओत गोल्यो.

पतरोसो कोअमेहे ईस्ताज रोगिही हाजु कोअयु

(मरकुस 1.29-34; लूका 4.38-41)

14जांहा येशु पेत्राआ कोअ आवयू तेहलाम तियाआ हाविह्ही जाखो ताव पिडावांहि आथरील्यापो पोड्ये पाल्लये. 15तिये तिया आथ तोईत कोअयु, अने तीई ताव निहित गोल्यो अने ती उठित तियाआ सेवा कोहू लागीई. 16जाहा दिह बडेताहा हांजेपो उवी तेहलाम माहु दुष्ट आत्माने पीडी खूप मांहोहो तिया जागे लाविले अने तिये फक्त होमला शब्दामे दुष्टात्मांना बारथे काढ्ये अने तियाअ आखाहा हाजो कोल्यु, जे मांदवाड्यू ओते. 17ज्यायाकोलो जे वचन यशायाह संदेष्टाद्वारे कोयु ओते ते पुरो उवे, ते असे तिये स्वतः आमाहा कोमजोरी लेधलो अने आमा रोगामेहे हाजो कोल्यु.

येशुउ चेलू बनलोओ मूल्य

(लूका 9.57-62)

18येशु जांहा आपाआ चारू सेटे लोकसमुदाय पाल्लये तेहलाम अने तियाहा कोयु चाला आपु तिवोल जाण्याआ आज्ञा आप्यी. 19अने कोडू एक शास्त्री आवीत तियाहा कोयु ऐ, गुरुजी, जीही किहीबी तू जानारू आयताआ फासाडी सालनारू. 20येशु तियाहा कोयु, कोल्याआ दोर अने आकाशो सिडाआ खोटो रोत्ले पण माअहा पोऱ्या मुंडको टेकीलाकोता बी जागू नाहा. 21तियाआ शिष्यांमेरोत कोडू एक तियाहा कोयु, प्रभू, माहु आज्ञा आप का, आय जात आपाआ बाह्हाहा बुजीत आवोहो. 22येशु तियाहा कोयु, तू मा फासाडी आव, अने मोल्याहा तियाआ मोल्याहा गाडूहु दे.

आंधी अने वाराहा शांत कोअलोओ

(मरकुस 4.35-41; लूका 8.22-25)

23जाहा ते नावेपो सोडित गोल्यो ताहा तियाआ शिष्य तियाआ फासाडी जाऊहु लागे. 24अने पाला, समुद्रामे एक वोडू वादोल उठ्यू, तीयावाही नाव लाटांनी टापिलो लागीई तो ताहा निदेम गोल्यु. 25ते तियाआ जागे आव्ये अने तियाहा ओ कोयो उठाडीत ओते, प्रभू, आमाहा वासाड आमाहा नाश उवनारा होय. 26तिये तियाहा कोयु, ओ अल्पविश्वसी, तुमु एवडे बितगोये काहा? तेहलाम उठित तिये वादलाहा धमकाव्यो, अने आखो निवांत ओत गोयो. 27अने तियाअ मांहोहो आश्चर्य कोईत कोयु, ओ कोडला प्रकारचा मांहे होय का वारे अने दर्या ए ह्याआ मानित लेदे.

दुष्ट आत्माहा हुवरया गवारामेहे मुकल्यु

(मरकुस 5.1-20; लूका 8.26-39)

28ताहा तो दिहरा जागापो गदरेकरांआ प्रदेशाम पुग्यु, तेहलाम बेन मांहे जियाम दुष्टात्मा ओती ते कब्रस्थानाम रोत निहित तियाहा जोडीहो ते एवडे प्रचण्ड ओते का कोडूच तियाअ सोडकोपो नि जात सेकत्लू. 29अने पाला, तिये आयडीत कोयु, ओ परमेश्वरोओ पोऱ्या, आमाआ ताआरी की काम? के इही तू आमाहा टाईमोओ पेल्योओ त्रास आपुहु आवयू होय. 30थोडा अंतरापो डुकरांआ एक टोलू चोरतू ओतु. 31दुष्टात्मा तियाहा ओ विनंती कोअयी का कोयु, जर तू आमाहा काडत्लू होय ताहा आमाहा डुकरांचा टोलाम मोकलित दे. 32तिये तियाहा कोयु, जा, अने ती डुकरांमेहे जात फोहये अने पाला, अने तो पुरो टोला जोरे जात कोठोपोरोत समुद्रामेहे पोडीत बुडीत मोईत गोयी. 33हूवरे चारनारे गुगदीत जात नगरोमेहे गोये, अने दुष्टात्मा पीडीत माहा बाराम जे उवे ते अने जे-जे उवे ते आखे कोत देखाडीलाआ. 34अने पाला, आखे नगरामारोत मांहे येशुहू मिलीला आव्ये अने जांहा तिये पाल्लये तेहलाम तिये तियाहा विनती कोअयी का आमा प्रदेशामोरोत बारथे निहित जा.

Currently Selected:

मत्ती 8: NOINT

Highlight

Copy