मत्ती 21

येशुउ यरूशलेम मेहे विजय प्रवेश

(मरकुस 11.1-11; लूका 19.28-38; युहन्ना 12.12-19)

1जाहा येशु अने शिष्य येरुशालेमेओ आहाने पोचे अने जैतून डोगाआ पोओ बैतफगे ऐ आहाने आवे ते येशु बेन चेलाहा एहे कोईत मोकल्या, 2अने तियाहा कोयु आपाआ आगाडी गावून जा तीइही पोहचताच तुमामे एक गोदडीआरी एक गोदडा पिलो बांधीत मेकल्ये जोडीत तियाहा सोडीत मा आहने घेऊन आव. 3जर कोडु तुमामे कोडु किबी कोअही ताहा कोओलो प्रभूहु याआ गोरोज होय अने लागेज तियाहा तो मोकलित आपी. 4ओ यकोअता उवे काजे वचन संदेष्टा त्यापोरत कोयु ओते ते पुरो उवे ते एहलो का, 5सियोनाहा पोरीहा कोआ पाला ताआ राजा तापो आवीत होय तो नम्र होय अने तो गोदडीइ गोदडापिलापो नाहा पण रक्ताआ बोसापो बोहयु होय. 6शिष्यांनी जेहलो येशु तियाहा कोयु तेहलूज कोल्यु. 7तिये गोदडीइ पिलाहा म्हणजे गोदडापिला घेऊन आव्ये तियापो आपाआ कापडे अने प्रवासाहा निकलीलू. 8गर्दीमेहे केते माहुहु आपाआ कापडे वाटेपो पोस्राव्यी अने दिहराआ साडोपो डाली तोडीत वातेम पोसराव्या. 9जी गोर्दी त्याआगाडी जात ओती आयडीत-आयडीत कोअला, दाविदा सुआ होसान्ना, धन्य होय जो प्रभूउ नावामेहे आवत्लू आकाश मेहे होसान्ना. 10जांहा तिये यरुशलेमेत प्रवेश कोल्यु ताहा आखे शहरामे गोधळ फैलावीत गोयी अने आखे कोलाकोता लागाडीत ओ कोडू होय? 11अने गर्दीमेऱ्ये मांहे कोयु ओते ओ गालीलामे नसरेथ चा संदेष्टा येशु होय.

मंदिरोम रोत बेपारीही काडलोओ

(मरकुस 11.15-19; लूका 19.45-48; युहन्ना 2.13-22)

12येशु मंदिरोम प्रवेश कोईत तियाअ आखाहा जे मंदिरोम लेनदेन कोईत ओते तियाहा बारथे काढीत आप्लु सराफाअ चौरंग अने कबूतर वेचणारा टेबाल, पिंजरु पोटाळीत आप्लु. 13अने तियाहा तिये कोयु लेखिलो होय का, माआ को प्रार्थनाआ कोअ कोवाय पण तुमु ताहा लुटणाराआ गुफा बोनाडी होय. 14तेहलाम आंदले अने लेगडे त्याजागे मंदिरोम आव्ये अने तिये तियाहा हाजो कोल्यु. 15पण मुख्य याजक अने शास्त्री इये तियाअ आश्चर्य कामोवांही जे तिये कोल्यु ओते तिये पाल्लये अने पोऱ्याहा ओ कोयु ओते दाविदाआ पोऱ्याहा मंदिर होसान्ना, तेबी ते क्रोधीत ओतगोयु गोये. 16अने तिये तियाहा कोयु नाहाकोत तू होमलित होय काहा का ओ नाहाकोत कोयु होय येशु तियाहा कोयु ओ पण नाहाकोत तुमु ओ वाचले नाहा काहा? हानू पोऱ्यो अने पोऱ्यापोरोत तू स्तुती पुरो कोअयी होय. 17तेहलाम तो तियाहा सदोन शहराआ बारथे बैथानिया निहित गोल्यो अने तिहीज रोला.

अंजीरो साड़ोसी सिक्षा

(मरकुस 11.12-14,20-24)

18फासाडी होमला टायमोमें तो फासी शहरामे आविलावेले भूक लागीई, 19तेहलाम तो होमला अंजिराआ सोडोहो पालहु त्याजागे गोल्यो पण तियापो पानोहो सोडीत किबी जोडल्यो नाहा तेहलाम तियाहा कोयु, ओमोरोत तांआम खोरोज फोल लागे नाहा अंजिराआ साड तियाआ टायमोमें उगाईत गोये. 20ओ चेले पालीत चक्कित ओतगोयु कोहू लागाडीत अंजिराआ साड केहलो उगाईत गोये? 21येशु कोयु आय तुमामे खोरोज कोत्लू जर तुमु विश्वास मेकही अने शंका कोअनारू नाहा ताहा तुमु एवडोज कोअनारू नाहा जे अंजिरो साडांआरी कोल्यु नाहा पण आव डोगोहो पण कोअही तू उपटीत जा अने समुद्रामेहे जात गुगदेए ताहा ते ओतगोयु जानारू. 22अने जे किबी तुमु प्रार्थनाम विश्वासा मागोईला ते तुमामे जोडीत.

यहूदी पुडारीही येशुउ अधिकार पोओ संदेह

(मरकुस 11.27-33; लूका 20.1-8)

23जांहा येशु मंदिरोम आविलो हिकाडतो ओतु तेहलाम मुख्य याजक अने आंबहाही इये आविलो कोयु, तू कोडला अधिकाराआ ओ काम कोअतलो अने कोडु ओ अधिकार आप्यू होय. 24येशु उत्तर आप्लु आय पण तुमामे एक गोठी फुसल्यू जर तुमु तियाआ उत्तर आपी ताहा आय पण तुमामे कोअही का आय कोडला अधिकाराआ ओ काम कोअत्लू. 25योहानाआ बाप्तिस्मे कोडापरोत ओते होर्गापोरोत किंवा मांहुपोरोत? अने ते ओ कोत आपसामेहे चर्चा कोहू लागाडीत, जर आपु कोहू का होरगापोरोत ताहा तो कोअही ताहा तुमु तिया विश्वास काहा कोअयु नाहा? 26पण जर आमाहा कोहू का मांहुपोरोत ताहा आपाहा गर्दीई बित होय काहाके ते आखे योहानाआ संदेष्टा कोतेहे. 27तेहलाम तिये येशुहू उत्तर आप्लु आपाहा मालुम नाहा तेहलाम तिये तियाहा उत्तर आप्लु ताहा आय पण तुमामे कोअही नाहा का आय कोडला अधिकाराआ ओ काम कोअत्लू.

बेन सुआआ दृष्टांत

28पण तुमु की विचार कोईत होय? कोडु होमला मांहाआ बेन पोऱ्ये ओते अने तिये पेलापहाय जात कोयु पोऱ्या, जा आज द्राक्षावाडी काम को. 29अने तिये तियाहा उत्तर आप्लु ठीक होय आय जानारू पण तो गोल्यो नाहा. 30फासाडी बाह्हू दिहराआरी जात तेहलूज कोल्यु, पण तिये उत्तर आप्लु आय जानारू नाहा तेबी पण नंतर पश्चताप कोईत नंतर तो गोल्यो. 31आव बेनुरोत कोडु आपाआ बाह्हाहा इच्छा पुरो कोअयी? तिये कोयु दिहरा येशु तियाहा कोयु तुमामे खोरोज कोत्लू का तुमाआ पेल्लु जकातदार अने वेश्या परमेश्वरोओ राज्याम प्रवेश कोअनारू. 32काहाके योहान तुमापोओ धार्मिकाआ वाट देखाडल्याकोता आवयू पण तुमु तियापो विश्वास कोअयु नाहा पण जकातदार अने वैशावाही तियापो विश्वास कोअयु ओ पालीत सुद्धा तुमामे पश्चताप आवयू नाहा का तियापो विश्वास कोअयु ओतलू.

दुष्ट शेतकरीई दृष्टांत

(मरकुस 12.1-12; लूका 20.9-19)

33एक दृष्टान्त फासी होमला, एक मालिक ओतु, जीआ द्राक्षमोलु लागाड्यू अने वाडा कोल्यु अने तियाआ द्राक्षारसा कोअता कुंड खोअयु अने तिये मजुरा तीइही मेकीत प्रवासाम निहित गोल्यो. 34जाहा फडआ वेल आवयी तेहलाम तिये आपाआ पावरोहो तियाअ मोजऱ्याआ जागे मोक्ल्यीत उत्पन्न लेविलेओता. 35पोन तिया मजुराहा पावरोहो तोईत माअये, दिहीराहा माईत टाक्ये अने तिसराहा डोन्योमार कोअयी. 36फासी तिये आपाआ पावरोओ एक टोळी मोकलिली जो पेलापोरोत जाखो वोडू ओतु अने तिये त्याआरी पण तेहलूज कोल्यु. 37पण आखरी तिये आपाआ पोऱ्याहा आव आशेने मोक्ल्यीत ओ माआ पोऱ्याहा सन्मान कोअनारू. 38पोन मजुराहा जांहा पोऱ्याहा पाल्लये तेहलाम कोडु लागाडीत ओ ताहा वारीस होय साला आपु याहा माईत टाकुहू अने तियाआ वारीसपणा मागित लेऊ. 39आखरी तिये तियाहा तोअल्यो अने द्राक्षवाटीई बारथे काढीत माईत टाक्ये. 40कोईत जांहा द्राक्षवाटीकाआ मालिक आविलो ताहा त्याआरी नाहाकोत कोअनारू? 41तिये तियाहा कोयु तो तियाअ दुष्टाआ वाईट आखिर कोअनारू अने द्राक्षवाटिका दिहरा मोजरयाहा आपित टाकही जे योग्य टायमोमें तियाहा उत्पन्न आपी. 42येशु तियाहा कोयु नाहाकोत तुमु पवित्र शास्त्रात खोरोज वाचले नाहा काहा ज्या डोणुहु राजमिसऱ्यांनी बेकार सोमज्ये तोज कोडाआ (महत्वाचा) डोणो बोल्यू तोज प्रभूपोरोत उवे होय, अने आमा नजरोम आश्चर्यकारक होय? 43त्यापोत आय तुमामे कोत्लू का परमेश्वरोओ राज्य तुमापोरोत लेधलो जाइअलो, अने एहलो जातीही जो तियाआ फोल लेतआविही आपलो आवे. 44जो कोडु आव दोणोपो पोअनारू तो तुकडे-तुकडे ओतगोयु जानारू पण ज्यापोओ डोणो पोअनारू तियाहा चूर बोणाडीत आपी. 45जांहा मुख्य याजक अने परुश्यांहि येशुउ ओ दृष्टान्त होमल्या, तेहलाम होमजीत गोये का, तू आमाबोद्द्ल कोयु होय. 46अने जांहा तिये तियाहा तोओला कोता पाल्लये पण ते गोर्दी पालहु बितगोये, काहाके तियाहा मांहे संदेष्टा मानीत ओते.

Currently Selected:

मत्ती 21: NOINT

Highlight

Copy