मत्ती 20

द्राक्षा वाडीई मजदूरो दृष्टांत

1होर्गाराज एखु कोओ मालक्याआ होस होय जो वेगरूऊ निकल्यु का आपाआ द्राक्षाआ मोलामेहे मोजर्या हा लागाडनारू. 2अने तिये कामकोणारा रोज पोशाआ ठेरवीत तियाहा आपाआ द्राक्ष मोलाम मोकल्ये. 3फासाडी ते तिसऱ्या तासा सुमारास बारथे गोल्यो अने तिये बाजारोम केताहा बेकार उभे रोहीत्ले पहीले, 4तो तियाहा कोयु, तुमुबीही द्राक्षा मोलाम जा, जे योग्यते आय तुमाहा आपही; अने ते गोये. 5फासी सहावू अने नवव्या तासा सुमारास तिये बारथे जात तेहलूज कोल्यु. 6फासाडी अकरावे तासा सुमारास तो बारथे गोल्यो तेहलाम फासी केतेहे उभे रोहीत्ले तियाहा आडल्योत्याहा तिये कोयु, तुमु सारा दीही इंही बेकार काहा उभे रोला होय? 7ते तियाहा कोयु आमाहा कोडु का मापो लेधलो नाहाकोईत तिये तियाहा कोयु तुमुबीही द्राक्षा मोलाम जा. 8फासाडी हांजेपो उवेताहा द्राक्षमोलाआ मालक आपाआ कारभाऱ्याआ कोयु, कामकोनारा गोगीलो अने पासोल्यापोरोत आरंभ कोईत पाल्या पर्यंत तियाहा मोजरी आप. 9तेहलाम ते अकरावे तासा सुमारास लागाड्ये ओते ते आवेताहा तियाहा पोशाआ मिल्यू. 10फासाडी जे पहीले आव्ये तियाहा आपाहा जाखा जोडयेहे एहलो तियाहा वाटेम तेबी तियाअहाई पोशाआ रुपयाआ मिल्यू. 11तो तिये लेदलापो घर धन्या विरुद्ध कुरकुर कोईत कोयु, 12याआ आखरी वालाहा एकुच तास काम कोल्यु, आमाहा दिही पोईत उन्हातान्हात मेहनत कोल्यु अने आमाहा अने तियाहा आपु सारखो लेखिलो? 13तेहलाम तिये तीयाम एकाहा उत्तर आप्लु, गाड्या, आयताआ अन्याय कोईत नाहा; तू माआरी रुप्याआ ठेराव कोअयु का नाहा? 14तू आपाआ पोशाआ घेऊन चालुला कोअता लाग; जेहलो ताहु तेहलूज याआ आखरी वालाहाभी आपलो एह्ली माआ इच्छा होय; 15जे माआ होय तियाआ आय आपाआ मर्जीवाही कोईलाकाजे मुखत्यार नाहा नाहाकोत? अथवा आय हाजो होय ओ ताआ डोआम सतले नाहाकोत? 16ह्याप्रमाणे शेवटयो ते पहीले अने पहीले ते शेवटयो होय.

तियाआ मोअलो अने पुनरुस्थानो विषय मेहे इजी भविष्यवाणी

(मरकुस 10.32-34; लूका 18.31-34)

17येशु उपो यरुशलेमे होस जाला बेतुम ओतलू तिये बारा शिष्यांआ वाटेहे एकीकडे लेतजात कोयु, 18पाला, आपु उपो येरुशलेमेस जात आहो अने माअहा पोऱ्याहा मुख्य याजकांच्या अने शास्त्री याहा आथे तोईत आपलो आवे; ते तियाहा मोहि दंड ठेरवे, 19अने थट्टा कोईलाकाजे, फटके माईलाकाजे अने वधस्तभावर खिलीलाकाजे तियाहा अन्यजाति होपित कोआ; अने तिसऱ्या तेदीही तो फासी उठाडीते जाइअलो.

एक याह्हीई तियिई सोआ कोअता आग्रह

(मरकुस 10.35-45)

20तेहलाम जब्दीच्या पोऱ्याआ याह्ही आपाआ पोऱ्याहा तियाआ जागे आविलो तियाआ गुडू पोडीत त्याजागे किबी माग्ये. 21तिये तीही कोयु, ताहु कि जोवे? ती तियाहा तेकोहे, तुमाआ राज्याम माआ याआ बेनु पोऱ्यामरोत एकाने तुमाआ हाजावोगे अने एकाने डावासाईटोहो बोहजी एह्ली आज्ञा को. 22येशु कोयु, तुमु नाहाकोत मागतेहे ओ तुमाहा होमजाडीत नाहा; जो पिदो आय पीही होय तो तुमामे बाह्हू आवे कि? ते तियाहा कोयु बाह्हू आवे. 23तिये तियाहा कोयु माआ पिदो तुमु पिणारे खोरो, पण माआ हाजावोगे अने माआ डावासाईटोहो बोहीलाआ अधिकार आपलो मांही नाहा, जर ज्याआ याकोअता माआ बाह्हाही ओ सिद्ध कोअयु त्याकोआता तो होय. 24ए गोठी होम्लाडित दहा शिष्यांआ तियाअ बेनु पाही खोत आवयू. 25पण येशु तियाहा गोगीत कोयु, अन्यजाति तियाआ अधिकारी प्रभुत्व चालाडहे अने वोडो माहाआ अधिकार कोत्ले, ओ तुमाहा मालूमे होय 26तेहलूज तुमाहामे नाहा; ताहा जो कोडु तुमाहामे श्रेष्ठ ओवुहू पालत्लू तो तुमाआ सेवक उवे, 27अने जो कोडु तुमाहामे पेल्ल्लु ओवुहू पालत्लू तो तुमाआ दास उवे, 28ह्याप्रमाणे माअहा पोऱ्या सेवा कोईत लेअलाकाजे नाहा, ताहा सेवा कोईलाकाजे अने ईस्ताज जोआ छुटकारा कोअता तिया जीव आपे.

बेन आन्दलाहा दृष्टिदान

(मरकुस 10.46-52; लूका 18.35-43)

29फासाडी ते यरीहो शहर रोत जात ओयताहा वोडू लोकसमुदाय तिया फासाडी रोत जातलू. 30तेहलाम, पाला वाटेपो बोहितरोलो बेन आंदले येशु जागेरोत जात होय ओ होमलित आयडीत कोयु, ओ प्रभू, दाविदाआ पुत्रा, आमाहा दया को. 31तिये उगे रोअलो कोईत माहु त्यांहा धमकाव्यो; तेबी ते जाहाकोज आयडीत कोयु; प्रभू, दाविदाआ पुत्र आमाहा दया को. 32येशु उभे रोत, तियाहा गोगीत कोयु, आय तुमाकोता नाहाकोत कोहू? तुमाआ कि इच्छा होय? 33ते तियाहा कोयु, प्रभुजी, आमाहा डोआं उगाडे. 34येशुहू त्यापोओ तरस आवी तिये तियाआ डोआहा स्पर्श कोअयु; ताहा तियाहा तत्काळ देखा लाग्यो अने ते तियाआ फासाडी सालुहू लागे.

Currently Selected:

मत्ती 20: NOINT

Highlight

Copy