मत्ती 15

परंपरा अने आज्ञाआ उल्लंघनो प्रश्नों

(मरकुस 7.1-23)

1ताहा यरुशालेमेहे काही परुशी अने शास्त्री येशुउ आहाने आवित कोहू लागे, 2ताआ शिष्य पूर्वजांआ परंपरेआ काहा उलघना काहा कोअता? ते भाकर खाआलावेले आथे तुवीत नाहा? 3तिये उत्तर आप्लु, आपाआ परंपराकोता तुमु स्वतः परमेश्वरोओ आज्ञा उलघन काहा कोअता? 4काहाके परमेश्वराने कोयु होय, आपाआ याह्ही बाह्हाआ सन्मान कोए जो कोडु बाह्हाहा अने मायला वाईट कोअही तियाहा माईत टाक्ये जाइअलो. 5पण तुमु कोयु होय का जर आपाआ बाह्हू अने मायला कोअही तुमामे जो माआरी जे पण आपलो भाग होय आप देवोहो अर्पण कोल्यु होय, 6ताहा तियाहा आपाआ बाह्हू माय चा सन्मान कोअला गोरोज नाहा अने याकोईत तुमु परंपराकोता परमेश्वरोओ आज्ञा व्यर्थ कोल्यु होय. 7ओ ढोंग्याहोस, यशायाह तुमा बारामे ओ भविष्यवाणी आरीज कोल्यु होय, 8ओ मांहे ओठेवाही ताहा माआ सन्मान कोअता, पण त्याआं मोनाहा मारोत सेटे होय. 9ओ व्यर्थ माआ उपासना कोअत्ले ऐन माअहा शिक्षणाला धर्माआ आज्ञा बोनाडीत हिकत्ले.

अशुद्ध कोअनारी गुठ्या

10अने येशु मांहोहो आपाआ जागे हादीत तियाहा कोयु, होमला अने सोमजा. 11जे सोबिम जाहो ते मांहोहो अशुद्ध कोईत नाहा पण जे सोबिमरोत निह्तले ते मांहोहो अशुद्ध कोअते. 12तेहलाम शिष्यांनी आविलो तियाहा कोयु, नाहाकोत ओतू मुदुह काहा? का ओ होमलिते परुसी रागाकोहे? 13पण तिये उत्तर आप्लु, हर एक साड ज्याहा माआ होर्गाआ बाह्हू लागाडले नाहा उपटीत टाक्ये जाइअलो. 14तियाहा रोहू दया ते आंदले मार्ग देखाड्यो होय, अने आदोलो आंदला मार्ग देखाडीही ताहा बेन खाडाम पोअनारू. 15पेत्राई कोयु, ओ दृष्टान्त आमाहा होमजाडीत आप. 16येशु कोयु, की तुमामे पण ओमेजा होमज्ये नाहा? 17की तुमु होमजाडीत नाहा काहा का, जे सोबिम जाहो ते पोटाम जाहो अने शौचकुपात टाकिला येत? 18पण जे सोबिमरोत बारथे निह्तले तोओ मोन सी निकलित्लो अने तोज माहुंहु अशुद्ध कोईत ओते. 19काहाके मोनामेहे रोतुच वाईट विचार खून व्यभिचार, जारकर्मे, चोरी, झूठी साक्ष अने निंदा ए निह्तले. 20याआ तियाआ गोठी होय ज्या मांहोहो अशुद्ध कोअता, पण आथे तुवल्याशिवाय रोटू कोअला माहुंहु अशुद्ध कोईत नाहा.

कनानी जातीई बुई विश्वास

(मरकुस 7.24-30)

21येशु तिहीरोत निहित सोर अने सिदोन प्रदेशाम निहित गोल्यो. 22अने पाला, तियाअ प्रदेशाआ एक कनानी बाय आवयी, अने आयडीत कोडु लागीई ओ प्रभू दाविदाआ वंश, मापो दया को माआ पोऱ्यी वाईट प्रकारे दुष्टात्मा वेला पाडेहे. 23पण तिये तीही किबी उत्तर आप्लु नाहा शिष्य त्याजागे आविलो कोहू लागाडीत, यीही सेटे कोईत आप, काहाके ए आअडित आमा फासाडी लागीई होय. 24पोन तिये तीही उत्तर आप्लु, माहु फक्त इस्राएल गोमेर्योत ताकालाआ मेंढरापोरोत मोकोल्या होय. 25पोन कनानी बुई आवयी अने प्रणाम कोहू लागीई, प्रभू माहु मदत को. 26तिये तीही कोयु, पोऱ्याआ जेवण घेऊन कुत्र्यांपुढे टाकिलो योग्य नाहा. 27यापो तियाअ बाईने कोयु, होय, प्रभू, पण कोओहु कुत्रे भी मालकाहा टेबलापोरोत पोडल्ये चूर खातले. 28तेहलाम येशु कोयु, ओ बाय, ताआ विश्वास वोडू होय, जेहलो ताहु लागेहे तेहलूज ता कोअता ओवो, तीआ पोऱ्यी लागेज हाजी ओत गोयी.

इस्ताज रोगिही हाजु कोअलोओ

29तिहीरोत आगाडी येशु गलीलच्या समुद्र किनाऱ्यापो गोल्यो, तीही डोगोपो सोडवीत बोहित गोल्यो. 30अने वोडू लोकसमुदाय तियाआ जागे आव्ये अने ते आपाआ आरी लेगडे लुले, आंदले, मुक्कु, अने खूप दिहरू मांहुंहु घेऊन आव्ये अने तियाआ गुडाजागे मेकीत आप्लु, अने तिये तियाहा हाजो कोल्यु. 31त्यापोत जांहा गोर्दी पालील्यो का मुक्कु गोगत्ले, लुले हाजो उवे, लेगडे सालतेहे, आंदले पालल्ते ओ पाल्हू मांहे आश्चर्यचक्कीत ओतगोयु गोये अने तिये इस्राएलाआ परमेश्वरोओ स्तुती कोअयी.

चार हाजार मांहोहो खावडलो

(मरकुस 8.1-10)

32येशु आपाआ शिष्यांआ जागे हादीत कोयु, माहु आव माहाहूपो दया आवयी होय काहाके ओ मांहे तीन दिहीरोत माआरी होय अने यांआरी खाहुं किबी नाहा माहु तियाहा फुकल्यु मोकलीलो नाहा एहलो उवूंहू नाहा का ते वातीमेज कोमाईला होस ओतगोयु जानारू. 33शिष्यांनी तियाहा कोयु आमाहा आव जंगलूम एहलो वोडो माहुगोदीही तृप्त कोइला कोअता एवढया जाखो रोटा कोठे जोडनारू? 34येशु तियाहा कोयु, तुमापोओ केतो रोटा होय? तिये कोयु, सात रोटा अने थोडोज हानू मासे होय. 35ताहा येशु मांहोहो धरतीपो बोहीलाआ आज्ञा कोअयी. 36ताहा तिये सात रोटा अने थोडोज मासे ओते ते लेधलो अने धन्यवाद आपित ते तोड्या अने शिष्यांआ दयायआ सुरवात कोअयी अने शिष्यांनी मांहोहो दयायआ सुरवात कोअयी. 37ते आखे खात तृप्त उवे अने तिये उरील्योओ तुकडा कोईत सात टोपल्या बोल्या विश्या. 38अने ते आखे खादे, तीयाम बोईही अने पोऱ्याहा सोडीत च्यार हजार माहुहू ओते. 39ताहा गोर्दी खोबोर आप्यू अने मोकलित आपित तो नावूमे सोडवीत गोल्यो अने मगद्दनाहा भागुम आवयू.

Currently Selected:

मत्ती 15: NOINT

Highlight

Copy