मत्ती 16

फरीसी द्वारा येशुहू फारक्या

(मरकुस 8.11-13; लूका 12.54-56)

1परुशी अने सदुकी तियाआ आहाने आवित ते तियाहा पारखुहु कोया आमाहा होर्गा काही निशानी देखाड. 2तिये तियाहा उत्तर आप्लु, हांजेपो तुमु कोतले, हवामान हाजो रोही, काहाके जुग तांबूस होय, 3अने अगड ला कोतले आज आभाळ सुटे, काहाके का जुग तांबूस होय अने अगड होय तुमु जुगुओ लक्षण पालहु तिया स्वरूप कोहू शकहू, परंतु काळाआ लक्षणे काहा नाहा कोहू शकत? 4आव दुष्टाआ अने व्यभिचार मांहे चिन्ह होदित होय, परंतु योनाआ चिन्हावाचून तियाहा फासी किबी चिन्ह न आप्लु जानारू अने ते तियाहा सोडीत निहित गोये.

फरीसी अने सदिकी खमीर

(मरकुस 8.14-21)

5शिष्य गलीलो समुद्राआ तिवोल गोये, पण ते जेवण लेई विहरात गोये. 6येशुनी तियाहा कोयु, पाला परुसी अने सदुकीच्या खमीर विषयी सावध रो. 7ते आपसामेहे चर्चा कोहू लागाडीत, आमाहा रोटा नाहा लेताव्या याकोअता तो तेह्लू कोत्लू. 8ओ ओलखीत, येशुनी तियाहा कोयु, अरे अल्प विश्वासी, तुमु आपसामेहे नाहाकोत चर्चा कोईत होय का आमा कढे भाकर नाहा? 9के तुमु फासी नाहा होमज्ये? के तुमामे तियाअ पांच हजाराचे पांच रोटा स्मरण नाहा, अने तुमु केते टोपल्या विशी ओती? 10अने तेहलूज ते च्यार हजारोहो सात रोटा, अने तेहलूज ओ का तुमु केतो टोपल्या पोईत लेदिओलो? 11तुमु काहा नाहा होमज्ये का आय तुमामे रोटा विषयी आय नाहा कोयु, पण ओ का परुशी अने सदुकीच्या खमीर विषयी सावध रो. 12तेहलाम शिष्यांहा होमज्ये का तियाआ रोटाहा खमीर विषयी नाहा, पण परुसी अने सदुकीयाआ शिक्षणाशी सावध रोअलाकाजे कोयु ओते.

पतरसो येशुहू ग्रहण कोअलो

(मरकुस 8.27-30; लूका 9.18-21)

13येशु कैसरिया फिलीप्पी भागुम आवयू, अने आपाआ शिष्यांआ फुसिलो लाग्यू, मांहे माअहा पोऱ्याहा की कोतेहे? 14शिष्यांनी कोया, केते योहान बाप्तिस्मे कोअनारू कोतले अने केते एलिया, अने केते यिर्मया कोयो संदेष्टामें वक्ता कोडु एक कोतेहे. 15येशु तियाहा कोयु, पण तुमु माहु की कोतले? 16शिमोन पेत्रा तियाहा उत्तर आप्लु, तू जिवंत परमेश्वरोओ पुत्र मसीह होय. 17येशुनी तियाहा उत्तर आप्लु, अरे शिमोन, बार्योनाआ पुत्र, तू धन्य होय; काहाके मांस अने रक्त यांहि ताहा, पण माआ बाह्हू तो होर्गाम होय, ए गोठी तुमाहा प्रगट कोअली होय. 18अने आय पण ताहु कोत्लू का तू पेत्र होय, अने आय आव दोणोपो आपाआ मंडली बोनाडनारू, अने अधोलोकाआ बायनाहा किबी सालनारू नाहा. 19आय ताहु होर्ग्याआ राज्याआ किल्ली आपी अने जे किबी तू धोरतीपो मोकले कोअनारू, ते होर्गांम उगड्यो जाइअलो 20ताहा तिये शिष्यांआ चेतावनी आप्यू का कोडाआ नाहा कोलु का आय ख्रिस्त होय.

तियाआ मोअलो विषय मेहे येशुउ भविष्यवाणी

(मरकुस 8.31-9.1; लूका 9.22-27)

21ते तियाअ टायमामोरोत येशु आपाआ शिष्यांआ कोहू लाग्यू, गरजेए होय का आय यरूशलेमाआ जात अने बाह्हू, अने मुख्य याजक अने शास्त्री याआ त्यापोरोत खूप दु:ख सोसावे, अने माअये जालो; अने तिसऱ्या तेदीही जिवंत उवे. 22यापोरोत पेत्र येशुहू सेटे लेतावीत धमकाव्यो, अरे प्रभुजी देव न कोआ ताआ आरी एहलो केधी ने ओवो. 23येशु फासाडी फिरित पतरसोहो कोयु, हे शैतान, माआ आगला रोत सेटे घेऊन जातू ता कोअता ठेचचा काहाके होय; काहाके तू परमेश्वरोओ गोठीपो नाहा; ताहा मासाहा गोठीपो मोन लागाडीत होय.

येशुउ फासाडी जाअलो मतलब

24ताहा येशु आपाआ शिष्यांआ कोयु, जर कोडु माआ फासाडी आवहू इच्छा कोअत्ले, ताहा स्वताचा त्याग कोअही ताहा आपाआ क्रूस विसित, अने माआ फासाडी सालीलो. 25काहाके आपाआ जीव वासाडलो आलीही, तो तियाहा गोमावीत टाकही; अने जी कोडु माआ याकोअता आपाआ जीव टाकणारे, तो तियाहा जोडीत. 26जर मांहुहू आखा जगाला मेलविनारो, अने आपाआ जिवोअ नुकसान उठावनारो, ताहा तियाहा की लाभ? जर मांहु आपाआ जीवनाआ बदली की आपी? 27माअहा पोऱ्या आपाआ स्वर्गदूत आरी आपाआ बाह्हाआ महिमा आविलो, अने तियाअ टायमोमें तो आखाहा तियाआ कामाला प्रतिफोल आपी. 28आय तुमामे खर कोत्लू काजे इही उभे होय, तीयामरोत किबी एहलो होय का ते तोपोरोत माअहा पोऱ्याना तियाआ राज्याम आविलावेले न पालजी, तो पर्यंत मोईला अनुभव किदरेहे आविलो नाहा.

Currently Selected:

मत्ती 16: NOINT

Highlight

Copy