मत्ती 13

फ़क्त हाजा जागामेहे फलवा उत्पादनों दृष्टांत

(मरकुस 4.1-9; लूका 8.4-8)

1तेदिहिज येशु कोअ रोत निहित गलीलो समुद्र मेरे जात बोहयु. 2अने तियाआ जागे एह्ली वोडी गोर्दी जमा उवी का तो नावे उपो सोडित गोल्यो अने आखी गोर्दी किनारावपो उबी रोली. 3अने तिये दृष्टान्त माय जाअखो गोठी कोयु एक बी पेअनारू बीज पेंहु निघाल्यू. 4बीज पेरत्लू काहि बी वाटेए किनारावपो पोडये अने सिडे आवीत तियाहा खात गोये 5थोड़ेबीज खोडका जोमनिपो पोडये तीही तियाहा कादु नाहा जोड्यु कोईत ते वेगु उगीते आव्ये. 6तेबी दिह निकलीलो पोओ ते बोलीते गोये अने मुळ न तोअया मुळे ते उगाईत गोये. 7थोड़ेबीज झाडापे पोडये साडे वोडो होतगोयो तियाहा दाबीन टाक्ये. 8थोड़ेबीज हाजा जोमनिपो पोडये अने फोल आप्लु कोडू होव पट, कोडू साठ पट, अने कोडू तीस पट. 9ज्याआ कान होय तिये होमले.

दृष्टांतोओ उद्देश

(मरकुस 4.10-12; लूका 8.9-10)

10अने शिष्यांनी जागे आवीत तियाहा कोयु, तू माहुआरी दृष्टांत मेहे काहा गोठी कोईत होय? 11तो तियाहा कोयु परमेश्वरोओ होर्ग्याआ राज्याआ गूढ भेदोओ समज तुमाहा आप्युहू पण तियाहा नाहा. 12काहाके जियाप होय तियाहा आपे अने तियाप जाअखो उवनारा जाय पोन जियाप किबी नाहा तियाआ जागेरोत जे होय ते पण लेधलो जाय. 13आय त्याआरी दृष्टांत मेहे याकोअता गोठी कोअत्लू का ते पालीत नि पालत्ले नाहा अने होमलित ओमे नि होमलीत्ले अने नाहा होमजाडीत. 14तियाआ विषया माया यशायाह ची ए भविष्यवाणी पुरो उवनारा होय तुमु कानाकी ताहा ऐकाल-पण होमजुत्लू नाहा अने डोआवाही पाल्हा तेबी नाहा होमजुत्लू. 15काहाके तियाअ माहा मोन कठोर होतगोयो अने ते कानामे जूरे होमलित्ले तिये आपाआ डोआं बंद कोल्यु होय केधी एहलो न ओवो का ते डोआवाही पालीही अने कानाकी होमले अने मोनामोरोत होमजीहो अने फाशी जाहू तियाहा अने आय तियाहा हाजो कोहू. 16पण धन्य होय तुमाआ डोआं जे पालल्ते अने तुमाआ कान होमलिताहा. 17काहाके आय तुमामे खोरो कोत्लू का जाअखो भविष्यवक्ता अने धार्मीकांनी जान्ये का जी गोठी तुमु पालीत होय पालीत न देखल्यी अने जी गोठी तुमु होमलित होय होमलित नि होमले.

हाजा जागाआ दृष्टान्तो व्याख्या

(मरकुस 4.13-20; लूका 8.11-15)

18ओमे तुमु उरणारा दृष्टांतो अर्थ होमला, 19जो कोडू राज्याआ वचन होमलितु नाहा होमजाडीत तियाआ मोनामे जे उरालो होय तियाहा तो शैतान आवीत सांडाडित लेत जात्लू ते ओच होय जे वाटेपो पेहे गोये ओते. 20अने जे डोळा जोमनिपो पेहे गोये होय जो वचन होमलित वेगु आनंदाआ भरात मानीत लेहो. 21पण आपाआ माय मुळ न मोकिलाज कारनोवाही तो थोडो दिहोकोअता होय अने वचनाआ त्रस अने उपद्रव ओतू तो तात्काळ ठोकर खाहोव. 22जे झाडोपे उरालो गोये होय ते ओ होय जो वचनाआ मानत्लू तो आव संसाराआ चिंता अने धनोओ धोका वचनाआ दाबत्लू अने ते फोल आवीत नाहा. 23जे हाजा धरतीपो पेअल्यो गोये ते ओ होय जो वचनाआ होम्लाडित होमजीत लेहो अने फोल आपोहो कोडु होव पट, कोडू साठ पट, अने कोडु तीस पट.

गहू अने जंगली बीजो दृष्टांत

24येशु तियाहा एक फासी दृष्टान्त आप्यू स्वर्गाचे राज्य तियाअ मांहाहा सारखो होय तियाआ आपाआ खेतुम हाजो बी उरालो. 25पण जांहा मांहे हुविलो ओते तेहलाम दुश्मन आवीत गवोओ बी माय जंगली बी पेईत निहित जातलू गोल्यो. 26जांहा रोप आवयी पाले आवयी तेहलाम जंगली बी तियाआ पण रोपे पण देखिलो लागीई. 27तेहलाम को धन्यांनी आवीत तियाहा कोयु तेहलाम घरधन्याच्या पावरोवही आवीत कोयु ओ को धन्या तू आपाआ खेतुम हाजो बी नाहा काहा उरयू? ताहा जंगली बी तियाआ रोपे तीयाम किहीरोत आव्ये. 28तिये तियाहा कोयु ओ कोडले तेबी दुश्मन तियाआ काम होय पावरोवही तियाहा कोयु नाहाकोत ताआ इच्छा होय का, आमाहा जात ते जमाडीने लेदलेए? 29तिये कोयु का, नाहा न ओवो का जंगली बी तियाआ रोपे टोलुवालीलावेले तुमु तियाआ आरी गवोओ पण उपटीत टाकही. 30वाडीलो पर्यंत बी ला आरी वाईहु आपा अने काटीलो टायमोमें वाडीलो कोअनाराहा कोयु जंगली दाना तियाआ रोपे जमाडीने जडूकोता तियाआ पारू बाधित ल्या अने गवोओ माआ खोलामेहे जमाडीने ल्या.

राई दानाआ दृष्टांत

(मरकुस 4.30-34; लूका 13.18-21)

31तिये तियाहा फाशी एक दृष्टांतमेहे आप्यू होर्गाराज होमला मोहरी दाणाहोस होय ज्याहा कोडु मांहु लेत आपाआ खेतुम पेअत्लू. 32तो आखे बी पेक्षा हानू ताहा रोतो पण जांहा तो वोदित जात्लू तेहलाम आखे भाज्या पेक्षा वोडू होतगोयो जात्लू अने एहलो साड होतगोयो जाहो का, आकाशा मेहे सिडे आवीत तियाआ फांदीपो वस्ती कोत्ले.

खमीरोओ दृष्टांत

(लूका 13.20-21)

33तिये एक फाशी दृष्टांतमेहे तियाहा होमलावल्यो स्वर्गाचे राज्य खमिराहोस होय ज्याहा कोडु बुई लेतजा लेत तीन मापे पिठामेहे मिलवीत आप्लु अने मिल्यो-मिल्यो ते आखे खमीर होतगोयो.

दृष्टान्तो प्रयोग

34आव आखे गोठी येशु होपनाआ माय माहुंहु कोयु अने विना दृष्टांतो तियाहा तिये किबी कोयु नाहा, 35काजे वचन भविष्यवक्ताच्या त्यापोरत कोयु गोये ओते ते पुरो ओवो आय दृष्टान्त कोल्याकोता आपाआ सोब उगड्यो आय तियाअ गोठीही जे जगोआ उत्पत्ती पोरोत गुप्त रोली होय ती प्रगट कोअही.

जंगली बीजाआ दृष्टान्तो व्याख्या

36तेहलाम ते गोर्दी ला सोडीत कोअमे आवयू अने तियाआ शिष्यांनी तियाआ जागे आविलो कोयु, खेतुमेऱ्यो जंगली बी चा दृष्टांतमेहे आमाहा होमजीत आप. 37तिये तियाहा उत्तर आप्लु हाजो बी तियाआ पेईलो कोअनारू माअहा पोऱ्या होय. 38खेत संसार होय हाजो बी राज्याआ पोऱ्ये होय अने जंगली बीज वाईटाची पोऱ्ये होय 39ज्या शत्रू तियाहा उरुहू तोओ शैतान होय वाडलो जगतो आखरी होय अने वाडीलो कोअनारे स्वर्गदूत. 40आखरी जेहलो जंगली दाने जोमडीही जाहो अने बालते जाहो तेहलूज जुगाआ आखरी उवे होय. 41माअहा पोऱ्या आपाआ स्वर्गदूत ताहा मुकलिही अने ते तिया राज्यामेरोज आखे ठोकेला कारनोवाही अने पाप कोअनारे एकठे कोअही, 42अने तियाहा आगीम कुण्डणीत टाक्ये जेहेलो रोडीलो अने दात खायलो होय. 43त्या टायमोहो धोर्मी आपाआ बाह्हाआ राज्याम सूर्या सारखो पिपलीताआ कान होय तो होमलित ले.

गुप्त धन

44स्वर्गाचे राज्य खेतुम लागाडल्यी धना सारखो होय ज्याहा कोडु माहाआ मिलवी अने दोबावीन आप्लु अने आनंदाआ पाराम जात आपाआ आखे वेसेत टाक्ये अने तियाअ खेताहा वेसातो लेधलो.

अनमोल मोती

45फाशी स्वर्गाचे राज्य एक व्यापाऱ्या सारखो होय, जो हाजा मोतीइ होदिअलो ओतु. 46तेहलाम तियाहा एक बहुमुल्य मोती मिल्यू ताहा तिये जात आपाआ आखे वेसेत टाक्ये अने तियाहा वेसातो लेधलो.

जालाआ दृष्टांत

47फाशी स्वर्गाचे राज्य तियाअ वोडा जालो सारखो होय जो समुद्राम टाक्यू ओतु अने आखे प्रकारोओ मासे एकठे कोल्यु. 48अने जांहा जाळे पोईत गोये तेहलाम मासे तोअनारे किनारावपो लेत आव्ये अने बोहित चांगले-चांगले बासनाम एकठे कोल्यु अने खराब-खराब मासे टाकीत आप्लु. 49जुगाआ आखरी ऐहलेच उवे स्वर्गदूत आवीत दुष्टांहा धार्मीक जनोपोरोत अलग कोअही, 50अने तियाहा आग कुण्ड मेहे टाकही तीही रोडीलो अने दात खायलो होय.

नवली अने जुनली सिक्षाआ महत्व

51नाहाकोत तुमु ए आखे गोठी नाहा होमजयोके? तिये तियाहा कोयु होय. 52तिये तियाहा कोयु याकोअता सोण एक शास्त्री जो होर्ग्याआ राज्याआ शिष्य बोल्यू होय तियाअ गृहस्थ सारखू होय जो आपाआ भांडारामोरोत नवो अने जुनो वस्तू काडत्लू.

येशु नासरत मेहे इजी आवयु

(मरकुस 6.1-6; लूका 4.16-30)

53जाहा येशु ओ दृष्टान्त कोत तीहीरोत जातु रोयु 54आपाआ नगरामे आविलो तियाआ सभास्थानात तियाहा एहेलू संदेश आपुहू लाग्यू किते चकित ओतगोयु कोहू लागाडीत याहा ओ ज्ञान अने सामर्थ्याचे काम कीहीरोत जोडयेहे? 55काहा ओ हुतारोंअ पोऱ्या न? अने याआ याह्ही तियाआ नाव मारिया अने तियाआ पाही नाव याकोब, योसेफ, शिमोन अने यहुदाने? 56अने याआ आखे बोईही आपाआ आरी नाहा रोत ताहा याहा ओ आखे कोरात जोडयेहे? 57आव प्रकारे तिया तियाआ कारनोवाही ठोकर खादल्यी पण येशु तियाहा कोयु भविष्यवक्ताला आपाआ देश अने को सोडीत पोन सन्मान मिलीअलो नाहा. 58अने तिये तीही आपाआ अविश्वासाआ कारनोवाही जाअखो पुरो सामर्थ्याचे काम नाहा कोल्यु.

Currently Selected:

मत्ती 13: NOINT

Highlight

Copy