मत्ती 12

येशु सब्तओ प्रभु

(मरकुस 2.23-28; लूका 6.1-5)

1तेहलाम येशु शब्बाथाआ तेदीही खेतोमेरोत निघाल्यू, तेहलाम तियाआ शिष्यांआ भूक लागीई, अने ते कोंहे तोडीत खाऊ लागाडीत. 2पण जांहा पारुश्यानी ओ पाल्लये तेहलाम तियाहा कोयु, पाला, ताआ शिष्य जे काम कोईत होय ते शब्बाथाआ तेदीही कोअला हाजो नाहा. 3त्यापो तिये तियाहा कोयु, कि तुमु वाचले नाहा का जांहा राजा दाविद अने तियाआ हेगांति यांहा भूक लागीई ओती, तेहलाम तिये कि कोल्यु? 4राजा दाविद ताहा परमेश्वरोओ मंदिरोम जात अर्पण कोईओलो रोटा खाद्या. त्याकोअता अने तियाआ मित्राकोता पण नाहा परंतु याजकां कोअता हाजो ओते. 5आव तुमु नियम शास्त्रात वाचले नाहा का शब्बाथाआ तेदीही मंदिरोम शब्बथाआ विधीला तोडतेहे तेबी पण याजक निर्दोष रोतेहे. 6पण आय तुमामे कोयु होय का, जे ओ होय ते मंदिर रोत पण वोडो होय. 7जर तुमु याआ अर्थ होमज्ये ओते, माहु दया जोवे अर्पण नाहा ताहा निर्दोषाला दोषी ठेरव्यो कायना ओतो. 8काहाके माअहा पोऱ्या शब्बाथआ दिहिओ पण प्रभु होय.

उगालू आथोवालो मांहो

(मरकुस 3.1-6; लूका 6.6-11)

9तिहीरोत निहित फासाडी तो तियाआ मंदिरोम गोल्यो. 10पाला, तीइही एक उगालू आथाहा एक माहुहू ओतु. तिये येशुपो दोष लागाडीलो विचाराआ ओ प्रश्न कोअयु नाहाकोत शब्बाथआ तेदीही हाजो कोअला आरी होय? 11तिये तियाहा कोयु तुमा मेहेरोत एहेलू कोडू होय ज्याचा एक मेंढो होय अने ते शब्बाथाआ तेदीही खाडाम पोडीत गोये ताहा तियाहा बारथे काडनारू नाहा कि? 12ताहा एक माहाआ किमोत होमला मेंढरापोरोत केतो जाखो होय त्यापोत शब्बाथआ तेदीही हाजो कोअला आरी होय. 13तेहलाम येशु तियाअ मांहाहा कोयु ताआ आथे वोडाव तिये वोदाडयु अने तो दिहरा आथोहोस हाजू ओवयू. 14तेहलाम परुसी बारथे निकलीलू अने तिये तियाआ विरूध योजना बोनाडी का तियाहा केहकोइत नाश कोईओलो.

परमेश्वरो निवडीलू सेवक

15परंतु येशु ओ होमजीत तिहीरोत निहित गोल्यो जास्तीज मांहे तियाआ फासाडी जाने वोल्ये, अने तिये तियाअ आखाहा हाजो कोल्यु, 16अने तिये तियाहा आज्ञा कोअयी का माहु प्रकट कोईओलो नाहा, 17ज्यायाकोलो जे यशायाह संदेष्टाआ त्यापोरत कोयु ओते ते पुरो उवे 18पाला, माआ सेवक ज्याहा आय निवडिले होय माआ परम प्रिय होय ज्यापोरोत माआ मोन अति प्रसन्न होय आय तियापो आपाआ आत्माआ टाकही अने तो दिहरी जातीपो उपो योग्य न्यायाआ सुवार्ता कोआ. 19तो लोढात नाहा अने आअडीही पण नाहा अने तिया आवाज गोल्लीमे पण होमला आविलो नाहा. 20तो सिपडील्या बोरुला तोडहि नाहा अने मिणमिणती बत्तीलाहा उलीवणार नाहा जो पर्यंत न्यायाहा विजय बोडाविही नाहा तोपोरोत एहलो उवे. 21अने तियाच नावामें अन्यजाति आशा तोणार.

येशु अने दुष्ट आत्माआ शासक

(मरकुस 3.20-30; लूका 11.14-23; 12.10)

22येशुआरी एक दुष्टात्मा सी माहुंहु लाविले जो आदोलो अने मुकु ओतु तिये तियाहा हाजो कोल्यु अने तो मुकु माहुहू गोगुहू अने पालाहू लाग्यू. 23योपो आरन्यो लोकसमुदाय चक्कित ओत कोने वोल्ये ओ माहुहू दाविदाआ पुत्र ओवुहू शकतो? 24पण परुसी माहु ओ होमल्यु ताहा कोयु ओ माहुहू दुष्ट आत्माहा फक्त तिया सरदार शैतानांआ सहायाने दुष्ट आत्माहा काडतलु. 25तो त्याआं मोनामेरी गोठ होमजीत तिये कोयु, ज्या राज्याआ फुट पोडतली होय ते तो नाश ओतगोयु होय अने तो उजाड ओतजात्लो होय नगरामे किंवा कोअमे फुट पोडले ते स्थिर रोही नाहा. 26अने जर शैतानच शैतानाला काडनारू ताहा आपाज विरोद्धी ओतगोयु जात्लू ताहा तियाआ राज्य एहलो टिकणार? 27फासाडी आय जर शैतानाचा सहायाने दुष्टात्मा काडत्लू होय ताहा तुमाआ मांहे कोडाआ सहायाने काडीलो तेह्लाम? त्यापोत तोज तुमाआ न्याय कोअनारू. 28पोन आय जर परमेश्वरोओ आत्माआ त्यापोरत दुष्ट आत्माहा काडत्लू ताहा परमेश्वरोओ राज्य तुमामे आविलो गोये होय. 29किंवा कोडु ताकतवान माहुहु कोआत रीतीते कोडु तियाआ धनदौलत केहलु लेऊ शकतो? जोपोरोत तिये तियाअ ताकतवान माहुंहु बांधनारो अने फासाडी तो तियाआ को लुटीलो. 30जो माआरी नाहा तो माआ विरोधाम होय अने जो माआरी एखटो कोईत नाहा वेरित टाकोहो. 31कोईत आय तुमामे कोत्लू मांहाआ हर एक पाप अने निंदा कोअल्याहा क्षमा कोअलाआ आवे पोन पवित्र आत्माआ नींदा कोओनाराहा माफी ने जोड़े. 32अने जो कोडु माअहा पोऱ्याआ विरोद्धामे एखादी गोठी कोअही ताहा तिया अपराध क्षमा कोअलाआ आवे पण जो पवित्र आत्माआ विरूध किबी गोगनारू तिया तो अपराध याआ जुगोम पण नाहा अने आवनाराआ जुगोम पण क्षमा कोअनारू नाहा.

एक साड तिया फलवासी उलखात्लू

(लूका 6.43-45)

33साड हाजो अने तियाआ फोल पण हाजो कोआ अथवा साड वाईट अने तियाआ फोल वाईट एहलो कोला काहाके फलोपारोत साड ओलखीत्लू. 34ओ हापोओ पिलाआ, तुमु वाईट ओतलू हाजा गोठी केहलो आखू सेकतेहे, काहाके जे मोनामेहे पोअल्ये ओते तोज सुबीपो येत 35हाजू माहुहू आपाआ हाजा भांडारामोरोत हाजा गोठी काडत्लू अने वाईट माहुहू आपाआ वाईट भांडारामोरोत वाईट गोठीच काडत्लू. 36आय तुमामे कोत्लू का जो पण व्यर्थ शब्द बोबेल तियाहा न्यायाआ तेदीही तियाहा हिशोब आपा लागे. 37काहाके आपाआ शब्दाआ त्यापोरत तू निर्दोष अने शब्दाआ द्वारेच तू दोषी ठेरव्यो जानारू.

येशुपो चिन्हों मांग

(मरकुस 8.11-12; लूका 11.29-32)

38ताहा तीही शास्त्री अने परुशी यांहि तियाहा कोयु, मालिक, आमाहा ताआपोरोत किबी चिन्ह पालीलो होय 39पोन तोओ उत्तर आप्लु, ओ खराब अने व्यभिचारनी पिढी चिन्ह पालुहू मागेहे, तेबी पण याहा योना संदेष्टाआ चीन्हावाचून दिहरे चिन्ह आप्लु जानारू नाहा. 40काहाके जेहलो योना तीन दीही अने तीन रात मासाआ पोटाम रोला त्याप्रमाणे माअहा पोऱ्या पण तीन दीही अने तीन रात धरती पोटाम रोही. 41न्यायाआ तेदीही निनवेचे मांहे आव पिढीई मांहाआरी उठित उभे रोही अने तियाहा दोषी ठरवीही, काहाके तिये योनाआ संदेश होम्लाडित पश्चताप कोअयु अने पाला, इंही जो होय तो योनाहुपोरोत वोडू होय. 42न्यायाआ तेदीही दक्षिण हेरोन राणी याआ पिढीई मांहाआरी उठित उभे रोही अने याहा दोषी ठरवीही काहाके ते सलमोनाआ ज्ञान होम्लाड़लो कोअता धरतीई कोअहा आवयी ओती पाला, तो इंही होय जो शलमोनपेक्षा वोडू होय.

अशुद्ध आत्मा कोओ हूदत्ली

(लूका 11.24-26)

43जाहा दुष्ट आत्माआ कोडु महापोरोत निकलोलो तेहलाम विसावाकोता पाईनाहा ठीकानाम फिरीत रोतलू पण भटकोट नाहा. 44ताहा ते कोतली का ज्या कोअमे रोत आव्ये ओते आपाआ तियाआ कोअमे फासी फिरीत जानारू अने ते फिरीत येत ताहा तियाहा निसे ओवल्यु अने होबाडीलो पालत्ली. 45ताहा ते जात खुदोप रोत जाखा खराब सात आत्माहा लेत येत ते तीइही प्रवेश कोईत रोहू लागत्ले अने तियाअ माहाआ फासाडीई परिस्थिती पेक्षा जाखो वाईट ओतगोयु जाहो याआ खराब पिढीआरी पण ऐहलेच उवे.

येशुउ खरु परिवार

(मरकुस 3.31-35; लूका 8.19-21)

46तो तियाअ माहाआगोदिरं गोगीतीज ओतु तेहलाम तियाआ याह्ही अने पाही बारथे उभे ओते, अने त्यांआरी गोगीला ओते. 47अने कोडु येशुहू कोयु पाला, ताआ याह्ही अने पाही बारथे उभे होय, ते ताआरी गोगीला मागतले 48पोन तियाअ कोनारा उत्तर आपित तिये कोयु, कोडू होय माआ याह्ही अने कोडू होय माआ पाही? 49अने आपाआ चेलाही आथे देखाडीत तिये उत्तर आप्लु, पाला, माआ याह्ही अने पाही. 50काहाके जो कोडु माआ बाह्हाआ जो होर्गाम होय तो तियाआ इच्छापूर्ण कोअत्लू तोज माआ पाही माआ बोईही अने याह्ही होय.

Currently Selected:

मत्ती 12: NOINT

Highlight

Copy