लूका 5

येशुउ पेल्लूउ चेलू

(मत्ती 4.18-22; मरकुस 1.16-20)

1जाहा गोर्दी परमेश्वरोओ वचन होम्लाड़लो कोअता त्याजागे जात ओती, अने गनेसरेताआ तलावोओ किनारापो उबु ओतु, फासाडी एहलो उवे 2का तिये तलावोओ काठी बेन नाव उबी मेकली देखल्यी, अने कोळी निसे उतरित जाली तुवीत ओते. 3तिया नावोमेरोत एक जो शिमोन नावाआ ओतु, सोडवीत तिये तियाहा विनंती कोअयी का किनाराप रोत थोड सेटे घेऊन साल तेहलाम तो बोहित माहुंहु मोचाण्यापोरोत शिक्षण आपुहू लाग्यू. 4जाहा ती गोठी कोत उवी तेहलाम शिमोनाहा कोयु, उंडा पाअयोम घेऊन साल, अने मासे तोईला कोअता जालो टाका. 5शिमोनने तियाहा उत्तर आप्लु, “ओ गुरुजी, आमाहा पुरो राती मेहनत कोल्यु अने किबी तोअये नाहा; तेबी तुमाआ कोअल्यावाही जाली टाकोहो.” 6जाहा तिये तेहलूज कोल्यु, ताहा जाखो मासे एखटो उवे, अने तियाआ जालो फाटू लाग्या. 7यापोरोत तिये आपाआ होबतीई जे दिहरा नावापो ओते, कोयु का आविलो आमाआं मदत को, अने ते आविलो बेनु नावे इहिंजा पाअये का ते बुडहू लागाडीत. 8ऐ पालहु शिमोन पेत्र येशुउ पाया पोडीत कोयु, “प्रभुजी, मापोरोत जा, काहाके आय पापी मांहु होय.” 9काहाके एवडे मासे धरणाआ काहाके तियाहा अने तियाआ आरी ओते तियाहा खुप नवल वाटेम, 10अने तेहलूज जब्दीचा पुत्र याकोब अने योहानाआ पण जे शिमोन आरी सहभागी ओते, थक्क उवोताहा येशुनी शिमोनाहा कोयु, “नाहा बित; ओमे पोरोत तू माहुहुं जिवंत तोअही” 11फासाडी ते नावोओ किनारे घेऊन आव्ये आखे किबी सोडीत तियाआ फासाडी चालीलो लागाडीत.

कोडीही शुद्ध कोअयु

(मत्ती 8.1-4; मरकुस 1.40-45)

12तेहलाम तो होमला गावोम ओतु, ताहा तीइही कुष्ठरोग लागल्यो एक मांहु आवयू; अने तो येशुहू पालहु पाया पोडीत अने विनंती कोअयी, “ओ प्रभुजी जर ताआ इच्छा होय ताहा माहु शुद्ध कोहू सेकतेहे” 13तिये आथे आगाडी कोईत तियाहा स्पर्श कोल्यु अने कोयु, “माआ इच्छा होय, तू शुद्ध ओत जा.” अने तिया कुष्ठरोग लागेज हाजू ओवयू 14फासाडी तिये तियाहा निक्षून कोयु, “कोडाआ नाहा कोहू, पण जात आपाआ खुद ला याजकाहा देखाड, अने आपाआ शुद्ध उविला विषयी जे किबी मोशेई नेमित आप्यो तीयावाही तियाहा अर्पण को का तियापो साक्ष बोने.” 15पोन तियाआ गोठी फासी फैलीत गोयी, अने गर्दीइ गोर्दी तियाआ होम्लाड़लो कोअता अने आपाआ बिमारीमरोत हाजो उविला याकोअता एकठे उवे 16पोन तो जंगलूम जुदो जात प्रार्थना कोईत ओतु.

येशु द्वारा लाखवा रोगिही हाजु कोअलो

(मत्ती 9.1-8; मरकुस 2.1-12)

17एक तेदीही एहलो उवे का तो शिक्षण आपित ओतु, अने परुशी अने शास्त्री तीइही बोहितरोलो ओते जे गालीलामे अने यहुदियाहा हर एक गावोमेरोत अने यरुशलेमाम रोत आव्ये ओते, अने हाजो कोइला कोअता प्रभूऊ सामर्थ्य तियाआ आरी ओती. 18अने पाला मांहे एक मांहाहा जो लोखवू उवल्यु ओतु, खाटलापो लावीत अने ते तियाहा विसमे लेत जाहू अने येशुउ आगाडी मेकीईला प्रयत्न कोते ओते. 19जाहा गर्दीइ कारनो कोईत तियाहा माय नाहा घेऊन जाऊ सेकेले ताहा तिये कोअलापो सोडवीत अने नाल्ये सेटे कोईत, तियाहा खाटलाआरी विसमे येशुउ आगाडी उताऱ्यो. 20तिये तिया विश्वास पालीत तियाहा कोयु, “ओ मांहु, ताआ पापापो क्षमा उवी होय.” 21तेहलाम शास्त्री अने परुशी वादविवाद कराय लागाडीत, “ओ कोडू होय जो परमेश्वरोओ निंदा कोअत्लू? देवोहो सोडीत फासी कोडू पापापो क्षमा कोहू शकतो?” 22येशु तियाआ मोनाआ गोठी होमजीत, तियाहा कोयु, “तुमु आपाआ मोनामे नाहाकोत विचार कोईत होय?” 23सोपो नाहाकोत होय? नाहाकोत ओ कोअलो, का ताआ पापापो क्षमा उवी होय, पोन ओ कोअलो का “उठ अने चाल?” 24पोन यकोअता का तुमामे होमजो का माअहा पोऱ्याहा धोरतीपो पापापो क्षमा कोअलाआ पण अधिकार होय, त्याने तिया लाखवावालाहा कोयु, “आय ताहु कोत्लू, उठ अने आपाआ खाटलो विसित आपाआ कोआ निहित जा.” 25तो लागेज तियाआ आगाडी उठ्यू, अने ज्यापो पोडीतरोल्यु ओतु तियाहा विसित, देवाची स्तुती कोईत आपाआ कोआ निहित गोल्यो. 26तेहलाम आखे थक्क उवे अने देवाची महिमा कोहू लागाडीत अने जाखो भिईल्यो कोइत्लु लागाडीत, “आज आमाहा ओनजानी गोठी देखल्यी.”

मत्ती ही हाद्लोओ

(मत्ती 9.9-13; मरकुस 2.13-17)

27तिया फासाडी तो बारथे गोल्यो अने लेवी नावाआ एक जकातदाराला जकातीइ नाकापो बोहीतरोल्यु पाल्यू, अने कोयु, “माआ फासाडी आव” 28तेहलाम तो आखे सोडीत उठ्यू, अने तियाआ फासाडी गोल्यो.

पापिरी खाअलो

29तेहलाम लेवीणे आपाआ कोअमे त्यांकोअता एक वोडी मेजवानी आप्यी; जकातदाराआ अने दिहरे मांहे जे तियाआ आरी रोटूखाहू बोह्ये ओते, एक वोडी गोर्दी ओती. 30यापोरोत परुशी अने शास्त्री तियाआ शिष्यांआ ओ कोत कुरकुर कोहू लागाडीत, “तुमु वासुलीदार अने पापी मांहे काहा खाता-पितात.”

उपवासो पोओ येशुउ मत

31येशु तियाहा उत्तर आप्लु, “वैद्य हाजाकोअता नाहा ताहा, पण बिमाऱ्याकोता गरजेए होय 32आय धर्मि कोअता नाहा, ताहा पापीही पश्चातापासाठी होदिलापो आवयू होय.”

(मत्ती 9.14-17; मरकुस 2.18-22)

33तिये तियाहा कोयु, “योहानाआ शिष्य ताहा आरी उपास कोअता अने प्रार्थना कोईत रोत्ले, अने तेहलूज परुश्या शिष्य पण, पण ताआ शिष्य ताहा खाता-पितात” 34येशु तियाहा कोयु, “नाहाकोत तुमु वेहवाला आरी, जोपोरोत वारराजू तियाआ आरी रोही, उपास कोईतलेई सेकतेहे? 35पोन तेदीही आविलो, तीयाम नवरदेव तीयामरोत जुदो कोअयु जानारू, तेहलाम ते तिया दिहोम उपास कोअनारू.” 36तियाआ एक फासी दृष्टान्त पण तियाहा कोयू “कोडु मांहु नवो कापडे फाडीत जन्या कापडाहा ठिबकू नाहा लागाडीत, नाहा ताहा नवो फटीत जानारू अने ते ठिबकू जुनामेहे मेल नाहा. 37अने कोडु नवो द्राक्षरस जुनो बुधलाम नाहा पोईत, नाहा ताहा नवो द्राक्षरस बुदालाहा फटीत वोहीत जानारू अने बुधलाआ पण नाश उवे. 38पोन नवो द्राक्षरस नवो बुधलाम पोओयो जोवे. 39काडेलु मांहु जुनो द्राक्षरस पित नोवाआ इच्छा कोअत्लू काहाके तो कोयु होय, का जुनोज हाजूहोय.”

Currently Selected:

लूका 5: NOINT

Highlight

Copy