लूका 13

पच्चाताप कोआ निते नाश ओवा

1तिया टायमोमें तियाअ जागापो उपस्थित किबी माहु येशुहू तियाअ गलालीलाबद्दल कोयु, तियाआ रक्त पिलातुसो वांही तियाआ बलिदानो आरी मिलवीत आप्लु ओते. 2तेहलाम येशु तियाहा कोयु, तुमु नाहाकोत विचार कोअता, का ओ गलाली दिहरा आखे गलाली पेक्षा खराब पापी ओते तियाहा याआ गोठी भोगिला लाग्या? 3नाहा, आय तुमामे कोयु होय जर तुमु आपाआ मोन बोदालीत गोयो नाहा ताहा तुमु पण ऐहलेच मोअहा, जेहलो ते मोऱ्यू ओते. 4अने तियाअ अठरा व्यक्तीई विषयी तुमु नाहाकोत विचार कोअता शिलोहामेऱ्यो बुरुज पोडीत तियाहा माअये नाहाकोत विचार कोअता, ते यरुशलेमो रोणाआरा दिहरा आखे माहुपेक्षा जाखा अपराधी ओते? 5नाहा आय तुमामे कोत्लू का जर तुमु मोन बोदालीत गोयो ताहा तुमु आखे पण तेहलूज मोअहा.

बिगर फलवाआ अंजीरो साड

6फासाडी तिये ओ दृष्टान्त कोयू, “कोडा होमला आपाआ द्राक्षमोलम एक अंजिराआ साड लागाडले ओते तो तियापो फोल होदित आवयू ओतु परंतु तियाहा मिल्ये नाहा. 7यापो तिये मालीम फ़ुस्ल्याआ, ओमे पाला आय तीन सालपोईत अंजिराआ सोडोहो फोल होदित आवयू होय परंतु माहु एकपण फोल जोडयेहे नाहा याकोअता याहा तोलीत टाक ओ धरतीपो व्यर्थ एकाहा होय? 8मालीमे तियाहा उत्तर आप्लु, ओ गुरु याहा याआ वोऱ्ही सोडीत आप, ताअहुजा आय याआ आगाडी फासाडी खाडू खोदित खत कालीही. 9फासाडी आगाडी वोऱ्ही फोल आपी ताहा हाजो होय जर फोल आप्लु नाहा ताहा तू याहा तोडीत टाकुहू शकतो.”

कुबड़ी बुईही हाजु कोअयु

10एक दिह प्रार्थना सभाम शब्बाथ तेदीही येशु जांहा संदेश आपित ओतु. 11तेहलाम त्याजागे एक एह्ली बुई ओती तीयीय खराब आत्माआ वास कोयु ओते तीही अठरा वर्ष आजाराम एक बुई ओती ती टूगुवोलीत टूगली उवी ओती अने ती थोडोज पण हीदू उवनारा नाहाओती. 12येशु तीही जांहा पहीले तेहलाम जागे हादाडये अने कोयु, ओ बुई ताहु आपाआ रोगोपोरोत मुक्त उवी एहलो कोत्लू. 13तिया मुंडकापो आथे मेक्ल्ये अने ती लागेज हीदू उबी रोली, ती परमेश्वरोओ स्तुती कोहू लागीई. 14येशु लेतजा शब्बाथ तेदीही तीही हाजो कोल्यु याकोअता का प्रार्थना सभामेहे मत्र्याआ आअडित कोईत माहुंहु कोयु काम कोअला सहा दीही रोतेहे ताहा तियाअ दिहोम आव अने आपाआ रोग सेटे को परंतु शब्बाथ तेदीही माद्वाड्यो हाजो कोहू कायना. 15प्रभू लेतजा उत्तर आपित तियाहा कोयु, “ओ कपटी मोनाआ” नाहाकोत तुमामेरयु हर एक शब्बाथ तेदीही आपाआ बोलोद अने आपाआ गोदडाहा गोड्यावरून सोडीत तियाहा पाई पिअलाआकाजे घेऊन जात नाहा नाहाकोत? 16ओमे ए बुई अब्राहमोओ पोऱ्यी होय अने तीही शैतान अठरा वर्ष बिमारूम ओती नाहाकोत यीही शब्बाथ तेदीही तिया बांधित मेकल्यामरोत तीही सोडवुई नाहा नाहाकोत? 17जांहा तिये ओ कोयु, तेहलाम तियाहा विरोध कोअनारे आखे मांहे लाजीत ठोगायु उवे त्याजागे आखे गोर्दी तियाआ महिमा कामामुळे जे तिये कोल्यु ओते खुश उवे ओते.

राई दाना अने खमिरो दृष्टांत

(मत्ती 13.31-33; मरकुस 4.30-32)

18त्याजागे येशु कोयु, परमेश्वरोओ राज्य केहलो होय अने आय तियाआ तुलना काहयो आरी कोहू? 19ते मोहरी दाणाहोस होय ज्याहा कोडु घेऊन आपाआ जंगलूम पेहे ते वोडो उवे अने एक साड बोन्यो फासाडी जुगोमेरयो सिडे आविलो तियाआ डालीपो खोटो बोनाडल्ये 20तिये फासी कोयु परमेश्वरोओ राज्याआ तुलना आय केहला आरी कोहू? 21ते खामिरासारखे होय, ज्याहा होमला स्त्रीने घेऊन तीन माप लोटोमेहे मिले अने ते आखे पीठ खमीर सारखू ओवयू.

हाकड़ो बाअणों

22येशु जांहा नगरामे अने गावोहीरोत संदेश आपित यरुशलेम जात ओतु, 23तेहलाम तियाहा कोडु फ़ुस्ल्याआ, “प्रभू नाहाकोत थोडोज माहुऊ तारण उवे?” तिये तियाहा कोयु, 24हाकडी बाअणामोरोत जाअलाकाजे शक्यतो हर एक माहू प्रयत्न को, काहाके आय तुमाहा कोत्लू का जागे जाण्याआ प्रयत्न जास्तीज कोआ पोन ने जाता आवे. 25जांहा कोआआ मालिक एकवा उठित दरवाजू बंद कोईत आपोहो ताहा तुमु बारथे उभे रोत दरवाजू ठोकीत कोअही, “ओ मालिक आमा कोअता दरवाजू उगाडीत आप”, परंतु तो तुमामे उत्तर आपही, आय तुमामे उलखित्लू नाहा, तुमु कारोत आव्ये होय? 26तेहलाम तुमु कोअही, आमाहा ताआरी रोटूखादू, ताआरी पिदलू, तू आमाहा आमा गोल्लीमे शिक्षण आप्लु. 27परंतु तो तुमामे कोअही, आय तुमामे उलखित्लू नाहा तुमु कारोत होय ते? ऐ खराब काम कोअनारा माआ त्यापोरोत नाहीत जा, 28तुमु अब्राहम, इसहाक, याकोब, तेहलूज आखे संदेष्टाहा परमेश्वरोओ राज्याम पालनारू परंतु तुमामे बारथे ढेपलीत आपलो आवे, त्याजागे फक्त रोडीलो अने दात साविलो रोय, 29फासाडी पूर्व अने पश्चिम, उत्तर अने दक्षिण त्यापोरोत मांहे परमेश्वरोओ राज्याम आविलो रोटाआ भागी उवे. 30लक्षाम रोहू दया का त्याजागे जे आखरी होय, पहीले उवे अने जे पहीले होय ते आखरी उवे.

हेरोदेसो दुश्मनी

(मत्ती 23.37-39)

31तिया टायमोमें येशुआरी किबी परुसी आव्ये अने तियाहा कोयु, “हेरोद ताहु माआहि इच्छितो याकोअता ईहिरोत एगदा जागापो निहित जा” 32तेहलाम तिये तियाहा कोयु, जा अने तियाअ कुल्याहा कोअलो, होमले आय माहुमेरोत दुष्टात्मा काडनारू, आय आज पण हाजो कोअनारू. 33अने उजाला फासाडी तिसऱ्या तेदीही आय आपाआ काम पुरो कोअनारू भविष्यद्वक्ता यरूशलेमो बारथे माअलोम आवे.

यरूशलेमो कोअता विलाप

34ऐ यरुशलेमो मांहे, ओ यरुशलेम मांहे, तू संदेष्टाआ जीव लेत होय अने परमेश्वराने जीआ तापो मोकल्ये होय, तियापो डोणो टाकीत होय आय केतीवा ताआ माहुंहु एकठे कोईत ओते जेहलो एक कुकडी आपाआ पिलांहा आपाआ फाकडाआ निसे एकठे कोईत ओते परंतु तुमामे गोमे नाहा. 35पाला, ता कोअता ताआ को परमेश्वरोओ त्यापोरत आप्लु होय आय ताहु कोयु होय, तू कोअही, धन्यवादित होय तो जो प्रभूउ नावामेहे आवीत होय तू माहु तियाअ टायमोपो रोत फासी पालनारू नाहा जोपोरोत वेल आवयी ने ओय.

Currently Selected:

लूका 13: NOINT

Highlight

Copy