लूका 11

प्रार्थनाआ सिक्षा

(मत्ती 6.9-15)

1येशु कोडला तेबी जागापो प्रार्थना कोईत ओतु जांहा तो प्रार्थना कोईत सेलाडये ताहा तियाआ शिष्यामेरोत एकाने कोयु, ओ प्रभू जेहलो योहानाई आपाआ शिष्यांआ प्रार्थना कोइला कोअता हिकाड्ये, तेहलूज आमाहा हिकाडीत आप. 2तिये तियाहा कोयु, जांहा तुमु प्रार्थना कोअनारू ताहा एहलो कोआ, ओ ओबा, ताआ नाव पवित्र मानाय ताआ राज्य आवे, 3आमाआ दीहोओ रोटू आमुह दाडीई दीही आपतू रो, 4आमा पाप माफ को, काहाके आमू पोन आमा हर एक अपराध्याहा माफ कोअत्लू अने आमाहा परीक्षेमेहे नाहा लेताविही.

मांगते रोवा

(मत्ती 7.7-11)

5ताहरू येशु शिष्याहा कोयु, तुमाआ मायरोत कोडू होय तो तिया एक हेगांति होय अने तो आर्दी राती जात त्याजागे कोअही ओ दोस्ता, माहु तीन रोटा आप. 6काहाके एक प्रवासी हेगांति मा आहने आवयू होय, अने आगाडी मेकुहू मा आहने किबी नाहा; 7अने तो मायरोत उत्तर आपी माहु त्रास आपुहू नाहा; ओमे दरवाजू बंद होय अने माआ पोऱ्ये मा आहने होय त्यापोत आय उठित ताहु आपुहू शकत नाहा. 8आय तुमामे कोत्लू जर तिया हेगांति ओमेत पण तियाहा आपित नाहा तेबी पण लाज सोडीत मागीतलावाही तियाहा आवश्यक ओते तेवडो उठित आपी. 9अने आय तुमामे कोत्लू का मागा म्हणजे तुमामे आप्लु जाइअलो; होदित म्हणजे तुमामे जोडीत; ठोका म्हणजे तुमा कोअता उगड्यो जाइअलो. 10काहाके जो कोडु मागोहो; जो होदत्ले तियाहा जोडत्लो; अने जो ठोकत्लू त्यांकोअता उगड्यो जाइअलो. 11तुमाआ माय एहलो कोठले बाह्हू होय का जांहा तिया पोऱ्या भाकर मागोईला तियाहा डोणो आपी अने मासे मागोईला ताहा मासाआ बोदलाम तियाहा हाप आपे? 12किंवा इंडे मागोईला ताहा तियाहा विसीई आपी? 13कोईत जांहा तुमु वाईट ओमेत सुद्धा आपाआ पोऱ्याहा हाजा वस्तु आपलो होमजतोलो ताहा होर्गाआ बाह्हाहा आपाआ मागनाराहा पवित्र आत्माआ काहा आपी नाहा.

येशु अने दुष्टत्माआ शासक

(मत्ती 12.22-30; मरकुस 3.20-27)

14फाशे तो तीही मुकु दुष्ट आत्माहा काड्येहे, जाहा दुष्ट आत्माआ निहित गोल्यो ताहा मुकु गोगुहू लाग्यू; अने माहुंहु आश्चर्य कोअया. 15पण तीयामरोत किबी जानोतांहि कोयु ओ ताहा शैतान नावोओ दुष्ट आत्माआ सरदारच्या मदतीवाही दुष्ट आत्माआ काडत्लू. 16दिहरा तियाआ परीक्षा कोइला कोअता त्यापोरोत जुगोमोरत एक निशाणी मागिही. 17पण तिये तियाआ मोनोमरोत गोठी होमजीत तियाहा कोयु ज्या-ज्या राज्याम फुट ओते ते राज्य उजाड ओतगोयु जाहो; अने ज्या कोअमे फुट पोडत्ल्ये ते नाश ओतगोयु जाहो. 18जर शैतान खुदोओ विरोध कोनारो ओतगोयु जानारू ताहा तियाआ राज्य केहलो बोणीत रोही? काहाके तुमु माआ विषयाम कोतले का ओ शैतान मदतीवाही दुष्टात्मा काडत्लू. 19हाजो आय शैतान मदतीवाही दुष्टात्मा काडत्लू ताहा तुमाआ पोऱ्ये कोडाआ मदतीवाही काडीलो तेह्लाम? त्यापोत तोज तुमाआ न्याय कोअनारू. 20पोन जर आय परमेश्वरोओ सामर्थ्यावाही दुष्ट आत्माहा काडत्लू ताहा परमेश्वरोओ राज्य तुमापोओ आविलो गोये होय. 21जाहा बलवान माहुहू मअनारे बांधीत आपाआ कोअ राखिलो कोअत्लू तेहलाम तियाआ धनदौलत वासित रोनारे. 22पोन त्यापोरोत जाखा बलवान तियापो चोडिलो कोईत तियाहा जिकीत लेहो ताहा तियाआ ते हत्यार ज्यापो तिया विश्वास ओतु मागित लेहो अने तियाआ धनदौलत मागित वाटीत आपोहो. 23जो माआरी नाहा तो माआ विरोधाम होय अने जो माआरी नाहा जो माआरी एखटो कोईत नाहा तो वेरत्लू.

अशुद्ध आत्माहा कोओओ तलाश

(मत्ती 12.43-45)

24जाहा दुष्ट आत्माआ माअहोमारोत निहित जाहो तेहलाम उगाल्या जागाम आराम होदित फिरनारो अने जांहा मिलीअलो नाहा ताहा कोतली आय आपाआ तियाआ कोअमे जीहीरोत निहयू ओतू फिरीत जानारू. 25अने फासी आविलो तिये गोलीत पोडल्ये अने होबाडल्यो पाल्लये. 26ताहा तो जात आपाहा खराब फासी सात आत्माहा आपाआरी घेऊन आवत्लू अने ती तीयाम वस्ती कोअत्ले एने तियाअ माहाआ फासाडीई परिस्थिती पेल्यापो रोत वाईट ओतगोयु जाहो. 27जांहा येशु याआ गोठी कोताच ओतु तेहलाम गर्दीमेऱ्यो होमला स्त्रीने वोडो शब्दावाही कोयु, धन्य होय ते पेट ज्याम तू रोला अने धन्य होय ते दुध ज्याहा तू पीदु 28तिये कोयु ओ; पण धन्य होय जे परमेश्वरोओ वचन होमलित अने मानतेहे.

होरगाआ प्रमाणों मांग

(मत्ती 12.38-42; मरकुस 8.12)

29जाहा वोडी गोर्दी एकठे ओतगोयु जोमित ओती तेहलाम तो कोहू लाग्यू आव कालोओ मांहे वाईट होय; ते चिन्ह होदतेहे पण योनाआ चिन्हाहा सोडीत दिहरे चिन्ह तियाहा आप्लु जानारू नाहा. 30जेहलो योना निनवेए मांहाकोअता चिन्ह ठरवील्यु तेहलूज माअहा पोऱ्या पण आव कालामे मांहाकोअता चिन्ह ठराविलो. 31दक्षिनाआ राणी न्यायाआ तेदीही आव टाईमोओ मांहाआरी उठित तियाहा दोषी ठरवीही काहाके ते सुलेमानाआ ज्ञान होम्लाड़लो कोअता धरतीई तीवोगरोत आवयी, अने पाला, इही तो होय जो सुलैमानपो रोत वोडू होय. 32निनवेचे मांहे न्यायाआ तेदीही आव कालोंओ मांहाआरी उभे रोत तियाहा दोषी ठरवीही; काहाके तिये योनाआ प्रचार होमलित मोन फिरवले ओते अने पाला इही तो होय जो योनाहुपोरोत वोडू होय.

डीलोओ दिवू

(मत्ती 5.15; 6.22-23)

33कोडो माहुहू दिवू लागाडी तल कोअमे किंवा मापाआ निसे मेकीत नाहा पण देवठानिपोरोत मेकतलु म्हणजे कोअमे आवणाराहा प्रकाश मिळूहुजोवे. 34ताआ डीलाआ डोउ ताआ दिवू होय त्यापोत जांहा ताआ डोउ साप होय ताहा ताआ आखे डील पण प्रकाशाम होय पण जांहा तो वाईट रोतो तेहलाम डील पण आंदाराम होय. 35त्यापोत सावध रोलो का जो प्रकाश तांआम होय तो आंदारो बोनिलो नाहा. 36त्यापोत ताआ आखे डील प्रकाशाम जोवे अने तियाआ कोड्लाज भागुम आंदारो रोंहु नाहा तेहलाम आखे एहलो प्रकाशाम उवे जेहलो तियाअ टायमोने ओते, जांहा दिव आपाआ उजवोडावाही ताहु प्रकाश आपित ओतु.

शास्त्री अने फरीसीही फटकार

(मत्ती 23.1-36; मरकुस 12.38-40; लूका 20.45-47)

37जाहा येशु गोगीत ओतु तेहलाम होमला परुश्याआ तियाहा विनंती कोअयी का मांही रोटू कोईओलो तो विसमे जात खाअलाकाजे बोहयु. 38फरीसी ओ पालीत नवल वाटेम का तिये रोटू कोइलाआ आगाडी आथे गुडू तुव्या नाहा. 39प्रभूऊ तियाहा कोयु, ऐ परुश्याआ, तुमु ताठ अने वाटीत आव्यु बारथेरोत कोह्डीत्यले पण तुमामे आंदारो अने खराब पणा पोअल्यी होय. 40ऐ मुर्खाआ, जीआ बारथे भाग बनविल्यो होय नाहाकोत तिये विसमे भाग बनविल्यो नाहा नाहाकोत 41पोन ओ मायत्या वस्तूऊ तुमु दान कोईत दया ताहा पाला आखे किबी तुमा कोअता शुद्ध ओतगोयु जानारू. 42पोन ऐ पारुश्यानी तुमापो हाय तुमु पोदिन अने सुदाबाचे अने जुदेजुदे कोयो पाताचा दहावू भाग आपत्ले पण न्याय अने परमेश्वरोओ प्रेमहा टालीत आपत्ले; जोवे ओते का याहा पण कोईत रोंहु जोवे ओते याहा सुडुहु नाहा ओते. 43ओ परुसी तुमापो हाय तुमु मंदिरोम मुख्य आसने अने बाजारामे नमस्कार कोईलाकाजे मागतेहे. 44हाय तुमापो काहाके तुमु नीकाईसरोल्या कब्रो होस होय जियीपो मांहे सालतेहे पण होमजाडीत नाहा. 45तेहलाम होमला शास्त्री तियाहा उत्तर आप्लु, ऐ गुरु, आव गोठीही कोल्यावाही तू आमाहा निंदा कोअत्लू 46येशु कोयु तुमापो हाय तुमु व्यवस्थापक बोजो जो विसुंहु कठीण होय तो माहुंपो मेकात्ले पण तुमु स्वतः तियाअ वोजाआ आपाआ होमला आंगठीवाही पण स्पर्श कोईत नाहा. 47हाय तुमापो तुमु तियाअ भविष्यवक्त्याआ कबरे बनवीतलो ज्याहा तुमाज बाह्हू दादाआ माईत टाक्ये ओते. 48कोईत तुमु साक्षी होय अने आपाआ बापदादाआ कामोम सहभाग होय; काहाके तिये तियाहा माईत टाक्ये अने तुमु त्याआं कबरे बनवीतलो. 49यामुळे परमेश्वरोओ ओक्कल पण कोयु होय आय तियाआ जागे भविष्यवक्ता अने प्रेषितांहा मोकलीही, अने ते तियाआ मेरोत केते जोह माईत टाकही अने किबी जनआ शळ कोअनारू. 50त्यापोत जेवडो भविष्य वक्त्यांआ रक्त जुगाआ उत्पतीपोरोत वोहयो होय आखाआ हिशोब आव पिढीई महापरोत लेधलो जाइअलो. 51हाबेलांआ खुनापोरोत जखऱ्याआ खुनापोरोत जो वेदी अने मंदिराआ माय घात कोअयु ओतु आय तुमामे खोरोज कोत्लू याआ आखे गोठीही हिशोब याआ पिढीई माहापो रोत लेदो जाइअलो. 52हाय तुमु शास्त्रीपो तुमु ज्ञानाआ चाबी लेदि होय पण तुमु स्वतः च प्रवेश कोअयु नाहा अने प्रवेश कोआनाराहा पण थोबाडीत मेक्ल्ये होय. 53जाहा येशु तिहीरोत निघाल्यू तेहलाम शास्त्री अने परुसी वाईट प्रकारे तियाआ फासाडी पोडीत गोये त्रास आपुहू लागाडीत का तो त्याआरी फासी गोगीला जोवे, 54अने आव नदोम रोल्या एकजूट तियाआ सोबिई कोडलो तेबी गोठीकोता तोहू.

Currently Selected:

लूका 11: NOINT

Highlight

Copy