लूका 1

लूकाआ उद्देश

1जास्तीज माहुहु तियाअ गोठीई खात्री लिखुहुं आपाआ आथोमेहे लेधलो जे आमा माय घोडये होय, 2हारको तियाआ गोठी ज्या आमाहा माहापो रोत जोड्या होय जिये याआ गोठी पेलेरोत पालल्या कोयु अने जे वचनाआ सेवक ओते. 3त्यापोत ऐ स्नमानोवाही योग्य थियुफिलुस पेलेरोत याआ आखे गोठी सावधानी पुर्वोज अने आरी होद कोईत माहु ओ हाजो होमज्ये का आय पण ताहु लाइनिमेहे लिखेहू. 4म्हणजे तू आव गोठी निश्चितपणे जाईत ले ज्याआ ताहु शिक्षण जोडयेहे होय.

जकर्याह अने एलीशिबा

5यहूदिया राजा हेरोदाआ टायमोमें जखऱ्या नावाआ एक याजक ओतु जो अबियाआ वर्गामे ओतू एन तियाआ लाडीई नाव एलीशिबा ओते जी हारूनआ कुलामेरयु ओती. 6ते बेन परमेश्वरोओ राज्याम धोर्मी ओते तियाआ वागनुक परमेश्वरोओ विधीने अने आज्ञा निर्दोष ओते. 7त्याआं किबी पोऱ्यो निमिले काहाके एलीशिबा वांझ ओती अने बेन डाये उवे ओते.

स्वर्गदूत द्वारा युहन्ना जन्मो भविष्यवाणी

8एहलो उवे का तो आपाआ वर्गाआ नंबर आवयू तेहलाम परमेश्वरा आगाडीही लेवीई काम कोईत ओतु 9ताहा लेवीई रीतीनुसार तो चिठी टाकीत निवडीला आवयू का परमेश्वरोओ मंदिरोम जात धूप बलीलो. 10धूप पेताडीलाआ टायमोमें आखे मांहे बारथे उभे रोत प्रार्थना कोईत ओते. 11अने तियाहा धूपआ वेदीई हाजावोगे परमेश्वरोओ एक स्वर्गदूत उबु रोतगोल्यु देखायू. 12तियाहा पालीत जखऱ्या भिईल्यो गोल्यो अने बितकोईत ओवयू. 13पण स्वर्गदूतोवाही तियाहा कोयु, ओ जखऱ्या बितकोईत ओवुहू नाहा काहाके ताआ प्रार्थना होमलित आवयी होय ताआ लाडी एलीशिबा त्यापोरोत ताहु एक पोऱ्या उवे अने तू तियाआ नाव योहान मेकीला. 14ताहु आनंद अने आनंद लागे अने तियाआ जल्माआ तेदीही जाखो मांहे आनंद कोअनारू, 15काहाके प्रभूउ नजरेम तो वोडू ओयताहू द्राक्ष रोह अने मद्द्य पीही नाहाएने तिया याह्हीई पोटामेज तो पवित्र आत्मावांहि जाअखो ओतगोयु जानारू, 16तो इस्राएलोओ पोऱ्यामरोत ताहा कोअता जो तो आपाआ प्रभू परमेश्वराही घेऊन आविलो. 17अने तो तियाआ आगाडी एलियाआ आत्माम अने सामर्थ्याआ माय पोईत चाले का बाह्हाआ मोनाहा पोऱ्या हनापोऱ्यापो घेऊन आविलो अने आज्ञा न मानणाराहा धार्मिका वाटेपो घेऊन आविलो किबिकोईत तो प्रभु कोअता योग्य एह्ली प्रजा तीयार कोअनारू. 18जखऱ्यावाही स्वर्गदूतोहो फ़ुस्ल्याआ आय याहा काहयो पोरोत होमज्यू शकतो? काहाके आयताहा डायू होय माआ लाडी पण डाई होय. 19स्वर्गदूतांवाही उत्तर आप्लु “आय गब्रिएल होय जो परमेश्वरोओ आगाडी उभे रोतलू माहु यकोअता मोक्ल्यीत होय का आयताआ आरी गोगू अने ए सुसमाचार कोव” 20पाला, ज्या दिहेजा ए गोठी पुरो उवनारा नाहा तू गुटू रोही अने गोगू सेकेहे नाहा काहाके तू माआ गोठीपो विश्वास कोअयु नाहा जी योग्य टायमोमें पुरो उवे. 21मांहे जखऱ्याआ वात पालीत ओते अने तियाहा आश्चर्य वाटत ओते का तियाहा मंदिरोम ऐतू वेल काहा लागित होय? 22पोन जाहा तो बारथे आवयू तेहलाम तो कोहू शकला नाहा अने ते होमजीत गोये का मंदिरोम तियाहा किबी तेबी दर्शन जोडयेहे होय तो खून कोईत देखाडीत रोला अने मुक्कोज रोला. 23अने एहलो उवे का जांहा तियाआ लेवीई काम पुरो उवे तेहलाम तो आपाआ कोआ गोल्यो. 24आव दिहो नंतर तियाआ लाडी एलीशिबा गर्भवती रोली अने तीही ओ कोत स्वतःहा पाच मोयना निकाडीत मेकल्ये, 25तिया दिहोम मापो कृपा नजर कोईत माहुमो माआ बदनामी सेटे कोयालाकोताच प्रभू परमेश्वराने माआरी एहेलू व्यवहार कोअयु होय.

स्वर्गदूत मरियमो सामने प्रगट ओवयु

26सहावू मोयनाम परमेश्वारापोरोत गब्रिएल स्वर्गदूत नासरेथ नावोओ गालील नगरामे, 27होमला कुवारी जागे मोक्ल्यीत गोये जीई मंगनी होमला योसेफ नावोओ मांहाआरी उवी ओती तो दाविदाआ कुलामोरोत ओतु अने तियाअ कुवारीई नाव मरिया ओते. 28अने विसमे आविलो तीही स्वर्गदूतोवाही कोयु, ओ प्रभूउ कृपा पावलेली बुई नमस्कार, प्रभू ताआरी होय. 29आव आभार मानिला होमलित ती घाबरील्यो गोयी अने विचारोम पोडीत गोयी का ओ कोडला विषयाहा आभार मानत्लू ओवुहू सेकोहो? 30तेहलाम स्वर्गदूतांवाही तीही कोयु, ओ मरिया, बित नाहा काहाके तापो परमेश्वरोओ कृपा उवी होय. 31पाल तू गर्भवती उवे अने होमले पोऱ्याहा जोल्मो आपी अने तू तियाआ नाव येशु मेकीला. 32तो वोडू उवे अने परमप्रधानो पोऱ्या कोअहो जाइअलो प्रभू परमेश्वर तिया बाह्हू तियाहा दाविदाआ सिहासन तियाहा आपी. 33अने तो याकोबाआ कोऱ्यापो कायम काळपर्यत राज्य कोअनारू अने तियाआ राज्याआ अंत उवे नाहा. 34मरीयाई स्वर्गदूतो कोयु ओ केहलो ओवुहू सेकोहो? काहाके आयताहा कुवारी होय? 35स्वर्गदूतोवाही तीही कोयु, पवित्र आत्माआ अने परमप्रधानो सामर्थ्य तापो सावलू कोअही ह्याप्रमाणे जो उत्पन्न उवे तो परमेश्वरोओ पोऱ्या कोअहो जाइअलो 36पाला ताआ होगवाड्ये एलीशिबाहा पण आव डायू पाणोम पोऱ्या उवे होय अने ती जी वांझ कोल्यी जात ओती तीई सहावू मोयनु चालीलो होय. 37काहाके परमेश्वरा कोअता किबी कठिन नाहा 38मरीयेअ कोयु पाला, आयताहा प्रभूऊ दासी होय ताआ वाचनाहोस माआरी ओवुहू आप तेहलाम स्वर्गदूत तिया त्यापोरोत निहित गोल्यो.

एलीशिबा जागे मरियम गोयी

39तेहलाम तियाआ दिहोम मारिया उठित वेगुज डोगु भागुम यहुदा नगरोत गोयी, 40अने जखऱ्याआ कोअमे जात तीही एलीशिबाहा नमस्कार कोल्यु. 41एहलो उवे का जेहलो मरीयेअ अलीशिबा भेट लेदि तीई पोटाम पोऱ्यो उधलील्या अने एलीशिबा पवित्र आत्मावांहि पुरोओत उवी. 42तिये वोडो आवाजोमें ती गोगल्यी, तू बुई माय धन्य अने ताआ पोटामे पोऱ्यो पण धन्य होय 43मापो ए कृपा केहली उवी का माआ प्रभूऊ याह्ही मा आहने आवयी? 44पाला, ताआ नमस्कार शब्द माआ कानोम पोडये अने माआ पोऱ्यो उधलील्या. 45धन्य होय ती बुई जीयी विश्वास कोअयु काजे किबी परमेश्वराने तीही कोयु होय ते पुरो उवे.

मरियमो द्वारा परमेश्वरो स्तुति

46तेहलाम मरीयेअ कोयु, “माआ जीव परमेश्वरोओ गौरव कोईत होय.” 47अने माआ आत्माआ माआ तारणाऱ्याआ परमेश्वर मेहे आनंदाम ओवयू होय, 48काहाके तिये आपाआ दासीई गरिबीई परीस्थीतीम दया कोअयी होय त्यापोत पाला, ओमोरोत पिढ्यानपिढ्या ताहु धन्य कोअही, 49काहाके परात्परावाही माकोअता वोडो काम कोल्यु होये आने तियाआ नाव पवित्र होय, 50अने तियाआ दया पिढ्यानपिढ्या पर्यंत तियापो जे तिया बित मानतेहे तियापो रोही. 51तिये आपाआ बाह्हा वाही पराक्रमाआ काम कोल्यु होये आने तियाहा तितर बितर कोईत आप्लु जे आपाआ मोनम गर्वकोतारू ओते. 52तिये अधिपती सिहासनपो रोत पोडीत आप्लु अने गोरब्योहो वोडो कोईत आप्लु. 53तिये फुक्ल्याहा हाजा वस्तूवाही तृप्त कोल्यु होय अने जे श्रीमंत तियाहा निसे ओतु कोईत काढीत आप्लु 54जेहलो तिये आमा सेवक इस्रायलोहो सामाल्यू तेहलूज तिये दया ओर कोए, 55आब्राहम अने तियाआ वंशाआ प्रती आपाआ दया ओर कोईत इस्राएल ची सेवा कोअयी 56मरियम तियाआरी तीन मोयना रोत आपाआ कोअ फासी आवयी.

युहन्ना बप्तिस्मा आपनाराआ जन्म

57ताहा एलीशिबाआ ठाल्ली उविला दीही पुरो उवे अने तीही होमला पोऱ्याहा जोल्मो आप्लु. 58तियाआ जागरयु अने कोऱ्यामाहुहू ओ होमल्यु तेहलाम प्रभूऊ तीपो दया नजर कोअयी होय ताहा तिये आनंद कोअयु, 59अने एहलो उवे का मांहे आठवो तेदीही पोऱ्याहा सुंता कोइला कोअता आव्ये तेहलाम तियाआ बाह्हाआ नावोहोस तियाआ नाव पण जखऱ्या मेकहु लागाडीत. 60यापो तियाआ याह्ही कोयु नाहा, तियाआ नाव योहान मेकण्याम आवे. 61तेहलाम तिये तीही कोयु, तुमाआ होगावढ्यामेहे ताहा कोडाआज एहलो नाव नाहा. 62तिये तियाआ बाह्हाहा निशाण लेखित फ़ुस्ल्याआ का ताहु तियाआ नाव नाहाकोत मेकीला होय? 63साहा तिये लेखिलाआ पाटी मागित ह्यापो लेखिलो ह्याआ नाव योहान होय अने आखाहा आश्चर्य वाटेम. 64लागेज तियाआ सोब अने जीभ उगडाव्यी अने तो परमेश्वरोओ गौरव कोईत गोगू लाग्यू. 65योपो आगाडी फासाडी रोणारे मांहे बितकोईत ओतगोयु गोये अने यहुदाआ आखे डोगुमेह भागुम आव आखे गोठीई चर्चा ओवुहू लागीई, 66जिये ओ आखे होमल्यु तियाअ आखाहा आप आपाआ मोनामे विचार कोईत कोयु, “ओ पोऱ्यो केहलु होय?” काहाके खरोज प्रभूआ आथे तियापो ओतु.

जकर्याहआ भविष्यवाणी

67अने तिया बाह्हू जखऱ्या पवित्र आत्मावांहि जाअखो ओवयू अने ओ कोत भविष्यवाणी कोहू लाग्यू. 68इस्राएलाआ प्रभू परमेश्वर धन्य होय काहाके तिये आमाआं कालजी लेदि होये आने आपाआ मांहाहा छुटकारा काम पुरो कोल्यु होय, 69अने आमा कोअता आपाआ सेवक दाविदाआ गारानाम उद्धारो एक सिंग काड्यू, 70जेहलो तिये धोरती पेलरोत आपाआ पवित्र भविष्यवक्ता सोबिमरोत कोहू लागाडले ओते, 71का आमा दुश्मनापोरोत अने आमा आरी द्वेष कोअनाराआ आथोम रोत आमाहा तारण उवे, 72का आमा आगाडी दया को अने आपाआ पवित्र करार ओर को, 73कोअतीज ती शपथ जी आमाआ बाह्हू अब्राहमोओ आरी कोअयी ओती, 74का आमाहा ओ वरदान आप का आमाहा आपाआ दुष्मनांआ आथोम रोत सोडव्ये जात, 75आगाडी पवित्रता अने धार्मिकतेवाही जीवन पोईत नारू रोत याहा सेवा कोईत रो. 76अने तू ओ पोऱ्या परमप्रधान भविष्यवक्ता कोयू जानारू काहाके तू प्रभूआ वाट तीयार कोइला कोअता तियाआ आगाडी-आगाडी सालनारू होय, 77का तियाआ मांह्हू उद्धारो ज्ञान आप जो तियाआ पापोओ माफिवाही जोडयो ओते. 78ओ आमा परमेश्वरोओ तियाअ वोडो दयावाही उवे, याकोअता उसेरोत आमापो वेगऱ्यू प्रकाश आमापो उगे, 79का आंदारो अने मोईला सावलामे बोहणाराहा प्रकाश आपी अने आमा गुडाहा शांती वाटेमे वारुई सालाडणारु. 80तो पोऱ्यो वोदतो अने आत्मा मेहे ताकतवालू ओवतु गोयु अने इस्राएलापोओ प्रकट उविलाआ दिहेजा जंगलूम रोल्यु.

Currently Selected:

लूका 1: NOINT

Highlight

Copy