लूका 2

बेथलम मेहे येशुउ जन्म

(मत्ती 1.18-25)

1तिया दिहोम ओगुस्त कैसर याहा त्यापोरोत आज्ञा आवयी का आखा जगोमेऱ्या मांहो नाव लेखाय. 2एज पेल्ली नावनिसी तियाअ वेले उवी, तेहलाम क्विरीनीय दिहाआ सीरिया सुभेदार ओतु. 3जाहा मांहे नाव लेखीलाकोता आप आपाआ नगरामे आव्ये. 4आखरी योसेफ पण यांकोअता का तो दविदाआ कोऱ्यामेऱ्यू अने वंशाआ ओतु गालीलामेऱ्यु नासरेथ गावून यहुदियामे दाविदाआ गावून बेथलेहेमाआ गोल्यो, 5का आपाआ मंगनी उवलो मारिया आरी जी गर्भवती ओती नावे लेखली. 6तियाआ इहीरोत ओतलू तियाआ जोल्मो आपलो दीही पुरो उवे, 7अने तीही आपाआ पेल्लाज पोऱ्याहा जोल्मो आप्यू अने तियाहा कापडाम गुंडालीत गोठाम मेक्ल्ये; काहाके तियाआ याकोअता धर्म शाळाम जागू नि ओतु.

गुवाल्याहा स्वर्गदूतो सन्देश

8अने तिया तियाहा केतो मेंडावालो ओते, जे राती मैदानूम रोत आपाआ गोठाआ पहरा कोईत ओते. 9अने प्रभूआ एक दूत आविलो तियाआ जागे उबु रोला, अने प्रभूऊ तेज तियाआ सोमकिर चमकील्यो, अने ते जाखो बिही गोये. 10जाहा स्वर्गदूताई तियाहा कोयु, बित नाहा; काहाके आय वोडो आनंदाआ सुसमाचार होमलाडत्लू जो आखे मांहो कोअता होय, 11ती आज दाविदाआ नगरामे तुमा कोअता एक उद्धार कोअता जन्म उवलू होय, अने ओच मसीहा प्रभू होय. 12अने याआ तुमा कोअता एज चिन्ह का तुमु होमला पोऱ्याहा पोटकाम वालीत मेकल्यो अने गोठाम पडल्यू पालिलो; 13जाहा होमला एक तियाअ स्वर्गदूताई आरी स्वर्ग दूतांआ जमावे परमेश्वरोओ स्तुती कोईत ओतलू अने ओ कोयु देखाहे देखायो, 14“आकाश मेहे परमेश्वरोओ महिमा अने धोरती उपो तियाअ माहामोरोत तियापो तो प्रसन्न होय शांती होय”.

गुवाल्या बेथलेम मेहे गोया

15जाहा स्वर्गदूत त्यापोरोत होर्गाम निहित गोये, तेहलाम मेढेवालाई आपसामेहे कोयु, आव आपु बेथलेहेम ला जाहू ए गोठी जी उवी होय, अने ज्याहा प्रभूऊ आमाहा कोयु होय. 16अने ते लागेज जात मारिया अने योसेफाहा अने गूठाम तिया पोऱ्याहा मेकीत्तरोल्यू पेल्लु. 17तियाहा पालहु तिये ए गोठी जी याआ पोऱ्याआ विषयी तियाहा कोयु गोयी ओती प्रगट उवी, 18अने आखे होमलिनारे तियाअ गोठीईरी जी मेंढावालाई तियाहा कोल्यी आश्चर्य कोल्यु. 19जाहा मारियाओ ओ आखे गोठी आपाआ मोनामे मेकीत विचार कोईत रोली. 20अने मेढपाळाआ जेहलो तियाहा कोयु गोये ओते, तेहलूज आखे होमलित अने पालहु परमेश्वरोओ महिमा अने स्तुती कोईत निहित गोये.

येशुउ खतना अने नामकरण

21जाहा आठ दीही पुरो उवे अने तियाआ सुंताआ दीही आवेताहा, ताहा तियाआ नाव येशु मेक्ल्ये गोये जे स्वर्गदूताकोई तिया पोटामोरोत आविलाआ आगाडी कोयु ओते. 22जाहा मोशेए नियम शास्राहोस तियाआ शुद्ध ओनारो दीही पुरो उवे, तेहलाम तो तियाहा यरुशलेम माय घेऊन गोये, का प्रभूउ आगाडी आवे, 23जाहा का प्रभूउ नियम शास्त्रात लेखिलो होय, “हर एक पेल्लु प्रभूकोता पवित्र ठरेल.” 24अने प्रभूउ नियमशास्त्राआ वोचाना प्रमाने, “ओलाआ एक जोड, नाहा ताहा कबूतर तियाआ बेन पिल्ले” घेऊन बलिदान कोईओलो.

शमोनो भविष्यवाणी

25यरुशलेम माय शिमोन नावाआ एक माहु ओतु, अने तो मांहु धोर्मी अने भक्त ओतु; अने इस्रायलाआ शांतीई वात पालीत ओतु, अने पवित्र आत्माआ तियापो ओतु 26अने पवित्र आत्माआ त्यापोरत तियाहा प्रकट उवे ओते का जो पर्यंत तो प्रभूउ ख्रिस्ताहा पालहु नाहा लेत, तो पर्यंत देही नाहा. 27तो आत्माआ हिकाडल्यावाही मंदिरोम आवयू; अने जांहा याह्ही अने बाह्हू तियाअ पोऱ्यो येशुहू जागे लाविले, का तियाआ याकोअता पवित्र शास्त्राआ नुसार कोअही. 28तेहलाम तिये तियाहा आपाआ माडीत लेधलो अने परमेश्वरोओ धन्यवाद आपित कोयु. 29ओ स्वामी, ओमे पर्यंत तू आपाआ दासाहा आपाआ वासिला नुसार शांतीई सोडीत आपोहो, 30काहाके माआ डोआवाही ताआ उद्धार पालीत लेधलो होय, 31काहाके ज्याहा तू आखे देशाआ माअहाआ आगाडी तीयार कोअयुहु, 32काहाके का तो अन्यजाति प्रकाश आपलो कोअता उजालो, “अने ताआ निसाऱ्ये मांहे इस्राएल ची महिमा होय” 33त्यापो बाह्हू अने याआ याह्ही आव गोटीविषयी जी तियाआ विषयामे कोल्यी जात ओती, आश्चर्य कोईत ओते. 34तेह्लाम शिमोनाआ तियाहा आशीर्वाद आपित, तियाआ याह्ही मरीयाहा कोयु, पाला, तो ताहा इस्रायला मेहे जाअखो निसे पडणे अने उठाडीला काजे, अने एक एहलो चिन्ह उविला कोअता ठरव्येहे गोये होय, तियाआ विरोधाम गोठी कोअल्यो जाइअलो. 35नहाते ताआ जीव पण तलवारी कोईत आरपार छेदुन जाय यापोरोत जाअखो मोनाआ विचार प्रकट होय.

हन्ना द्वारा गवाही

36आशेर वशामेरया हन्ना नावाआ फणुएआ पोऱ्यी एक भविष्यद्वक्तिन ओती ती जाखो डायु ओती एने वेहवाल ओवल्यु फासाडी सात वर्ष आपाआ डोहा आरी रोहू शकली ओती. 37ते चोवरासी वर्षापोरोत रोंडाली ओती अने मंदिराहा सोडीत नेओती, पण ती उपास अने प्रार्थना कोईत रातदीही उपासना कोइलाआ. 38फासाडी अने ती तियाअ टायमोमे आविलो परमेश्वरोहो धन्यवाद आपुहू लागीई, अने तियाहा आखाहा, जे येरुशलेमाआ छुटकाराआ वात पालीत ओते, तीइही तियाअ पोऱ्याआ विषया माय कोहू लागीई.

युसूफ अने मरियम कोअ आवये

39फासाडी जाहा ते प्रभूउ नियम शास्त्रानुसार आखे किबी पुरो कोईत उवे आय आपाआ नगरामे गलील नासरेथला फासी निहित गोये. 40अने पोरयु वोदते अने ताकतवालो उवते गोल्यो अने बुद्धि पुरोओत उवनारा गोल्यो; अने परमेश्वरोओ अनुग्रह तियाआ उपो ओतु.

बालक येशु मंदिर मेहे

41तियाआ याह्ही बाह्हू प्रत्येक वोऱ्ही वल्हाडणआ हुना फासाडी यरुशलेम माय जात रोत्लो. 42तेहलाम येशु बारा सालाआ ओवयू, तेहलाम ते पूर्वीच्या रोतीई नुसार यरुशलेमो गोये 43तेहलाम तेदीही पुरो कोईत निहीला लागाडीत, ताहा पोऱ्यो येशु यरुशलेम मायरोत गोल्यो; अने ओ तियाआ याह्ही बाह्हाहा मालुम निमिले. 44ते ओ होमजाडीत ओते का तो दिहरा प्रवासा आरी होय, होमला दिहिओ प्रवास जाआलो आगाडी कोअयु; अने तियाहा आपाआ होगवाड्याआ माय अने ओलखिई माहुंमे होधुहू लागाडीत. 45परंतु तो मिल्यू नाहा, ताहा ते होदित-होदित यरुशलेमे माय फासी निहित गोये, 46अने तिन दिहे फासाडी तिये तियाहा मंदिरोम गुरुजनांमेहे बोहीतरोल्यु तियाआ उनाता अने तियाहा प्रश्न फुसतावाही पालील्यो. 47जेवडे पण तियाआ होमलिते ओते, ओ आखे तियाआ बुद्धी वरून अने तियाआ उत्तरावाही चकित ओते. 48तेहलाम ते तियाहा पालीत चकित उवे अने तियाआ याह्ही तियाहा गोगल्यी, “ओ पोऱ्या तू आमा आरी एहेलू काहा वेवारो कोअयु पाला, ताआ बाह्हू अने आय ताहु मेहनती होतगोयो होद लेत ओतू.” 49तिये तियाहा कोयु, तुमु माहु काहा होदित ओते? नाहाकोत तुमामे मालुम नाहा का तुमु माहु माआ बाह्हाआ कोअमे रोहू आवश्यक होय? 50पोन जी गोठी तिये तियाहा कोयु, तिये तियाहा होमजाव्ये. 51तेहलाम तो तियाआ आरी गोल्यो, अने नासरेथ माय आवयू, अने तियाआ वंशामेह रोला; अने तियाआ याह्ही ए आखे गोठी आपाआ मोनामे मेकल्यी 52अने येशु बुद्धि अने डीलोवाही, अने परमेश्वरोओ अने मांहाहा अनुग्रह मेहे वोद्यु.

Currently Selected:

लूका 2: NOINT

Highlight

Copy