युहन्ना 5

अड़तीस सालोओ रोगिही हाजु कोअयु

1ई गोठीई फासाडी यहुदीई तीवार ओतु अने येशु यरूशलेमोम गोयु. 2यरुशलेमोमे एक कुंड होय मेंढरांहा बाअणाआरी ज्याहा इब्रानी भाषम बेथसदा कोयू जात्लू; तियाआ पाच पाडव्या होय. 3यामे जास्तीज मांदवाड्यू, आंदले, लेंगडे अने उगाल्या डीलोओ (पाई आलीलाआ आशामे) पोडीत रोये ओते. 4काहाके निवडीलिया वेलो पोओ परमेश्वरोओ स्वर्गदूत कुंडा मेहे उतरित कोईत पा आ याहा आलवित कोईत रोते ओते पाई हालताज जो कोई पेल्लू उत्रीत्लू तो हाजु ओत जातु ती कोडी बी बीमारी केहे ने रोय. 5तीही एक माहुहू ओतु तो अडोतीस वर्षापोरोत मांदवाड्यू पोडीत ओतु. 6येशु तियाहा पोडल्ये पालीत ओ मालुम उवेताहा का तो जास्तीज दिहीआ आव परीस्थीतीम पोडीतरोल्यु होय तियाहा फ़ुस्ल्याआ, नाहाकोत हाजो उविलो होय नाहाकोत? 7तिया आजाराम ओतु तियाहा उत्तर आप्लु, “ओ प्रभू माआ जागे कोडु माहुहू नाहा, का जाहा पाई आलाड्ये जाहो तेहलाम माहु पाअयो कुंड मेहे उतरीवीही” पण माआ पुग्लो आगाडीच दिहरू उतरित जात्लू. 8येशु तियाहा कोयु, “उठ, आपाआ खाटलो विस्तीत अने सालता व्हा” 9तो माहुहू लागेज हाजू ओवयू अने आपाआ खाटलो विसित चालीलो फिरूहु लाग्यू. 10तो शब्बाथाचा दीही ओतु त्यापोत यहुदी तियाहा जो हाजू ओवयू ओतु, कोहू लागाडीत, आज शब्बाथाचा दीही होय ताहु खाटलो विसिलो योग्य नाहा. 11तिये तियाहा उत्तर आप्लु, “जीआ माहु हाजो कोल्यु, तिये माहुंज कोयु, आपाआ खाटलो वीस अने सालता व्हा” 12तिये तियाहा फ़ुस्ल्याआ, “तो कोडु माहुहू होय जीआ ताहु कोयु, खाटलो वीस अने सालता व्हा?” 13पोन जो हाजू ओवयू ओतु तियाहा मालुम निमिले का, काहाके तियाअ जागाम गोर्दी होयकोत येशु तिहीरोत निहित गोल्यो ओतु. 14आव गोठीफासाडी येशु तियाहा मंदिरोम मिल्यू, येशु तियाहा कोयु, “पाला तू हाजू ओवयू होय फासी पाप कोहू नाहा, एहलो उवूंहू नाहा का त्यापोरोत जाखा समस्या तापो आविलो जावा” 15तिया माहुंऊ जात यहुदीना कोत आप्लु का जीआ माहु हाजो कोल्यु तो येशु होय. 16त्यापोत यहुदी येशु फासाडी लागाडीत, काहाके तो एहलो काम शब्बाथाआ तेदीही कोईत ओतु 17यापो येशु तियाहा कोयु, “माआ बाह्हू ओमेजा काम कोईत होय, अने आय पोन काम कोअत्लू” 18त्यापोत यहुदी फासी जाखो तियाहा माईत टाकिलाआ प्रयत्न कोहू लागाडीत काहाके तो शब्बाथाआ विधीला तोडत्लू एहलो नाहा ताहा परमेश्वरोओ आपाआ बाह्हू कोत स्वतः परमेश्वारा सारखू ठरावीत ओतु.

सुआआ अधिकार

19यापो येशु तियाहा कोयु, “आय तुमामे खोरोज-खोरोज कोयु होय, पोऱ्या स्वतः किबी कोअहू शकत नाहा फक्त तोज जे बाह्हाहा कोअत्लू तेहलाम पालत्लू काहाके ज्या-ज्या कामाकोता तो कोअत्लू तियाहा पोऱ्या पण तियाआ प्रमाणोओ कोअत्लू. 20काहाके बाह्हू पोऱ्यापो प्रेम कोअत्लू अने जे-जे काम तो स्वतः कोअत्लू ते आखेज तियाहा देखाडोहो; अने तो तियाहा यापोरोत वोडो काम तियाहा देखाडीही म्हणजे तुमु आश्चर्य कोहू सेकतेहे. 21जेहलो बाह्हू मोल्याहा उठाडत्लू अने जिवंत कोअत्लू तेहलूज पोऱ्या पण जो तियाहा गोमत्लू तियाहा जिवंत कोअत्लू. 22बाह्हू कोडाआ न्याय कोईत नाहा पण न्याय कोईओलो आखे काम पोऱ्याहा होफहोपिन आप्लु होय. 23का आखे मांहे जेहलो बाह्हाआ सन्मान कोअता तेहलूज पोऱ्याआ पण सन्मान कोअला जोवे जो पोऱ्याआ सन्मान कोईत नाहा तो बाह्हाआ जीआ तियाहा मोक्ल्यीत होय तियाहा सन्मान कोईत नाहा. 24आय तुमामे खोरोज कोत्लू जो माआ वचन मानत्लू माहु मोकलीनारापो विश्वास कोअत्लू अनंत जीवोन तियाआ होय; अने तियापो दंड आज्ञा आविलो नाहा पण तो मोईलामरोत पार ओतगोयु जीवनामे प्रवेश कोल्यु होय.” 25“आय तुमामे खोरोज-खोरोज कोत्लू का ती वेल आवीत होय अने ती वेल ओमे होय, जियाम मोअले परमेश्वरोओ पुत्रोओ आवाज होमले अने जे होमलीनारू ते जिवंत उवे.” 26काहाके ज्यपोरोत बाह्हू स्वतः माय जीवोन मेकोहो तियाआ प्रमाणोओ तिये पोऱ्याहा पण ओच अधिकार आप्यू होय का, स्वतः माय जीवोन मेकिलो; 27एवडोज नाहा ताहा न्याय कोईओलो पण अधिकार आप्यू होय, यावाही का तो माअहा पोऱ्या होय. 28यावांही आश्चर्य कोहू नाहा, काहाके तो वेल आवीत होय का जेवडे कब्रोमेहे होय तिया शब्द होमलीताज निहित आविलो. 29जीआ हाजो काम कोल्यु होय ते जीवनाआ पुनरुस्थाना कोअता उठनारू अने जीआ वाईट काम कोल्यु होय ते न्यायाआ पुनरुस्थाना कोअता जिवंत उठनारू.

येशु बाराम गवाही

30आय स्वतः किबी कोहू शकत नाहा; जेहलो मानत्लू तेहलूज न्याय कोअत्लू अने माआ न्याय खोरो होय आय माआ इच्छा नाहा पण माहु मोकलीनाराआ इच्छा जोवे. 31जर आय स्वतः माआ साक्ष कोहू ताहा माआ साक्ष खोरी नाहा. 32एक दिहरू होय तो माआ साक्ष आपोहो माहु मालुम होय माआ साक्ष जो आपोहो ती खोरी होय. 33तुमु योहानाआ फुसुहू लागाडले अने तिये खोरी साक्ष आप्यी होय. 34पोन आय स्वतः विषयी माहाआ साक्ष नाहा जोवे; तेबी पण आय याआ गोठी यावाही कोत्लू का तुमामे तारण मिलूहु जोवे. 35तो ताहा बालनारू अने सोमकीनारू दिव ओतू एन तुमामे किबी टाईमापोजा तियाआ उजवोडाम आनंदाम उविला हाजो लागेहे. 36पोन मांही जी साक्ष होय ती योहानाआ साक्ष पेक्षा वोडी होय काहाके जे काम बाह्हू माहु पुरो कोइला कोअता होपण्ये होय कोअतीज ओ काम जे आय कोअत्लू ते माआ साक्ष होय का बाह्हू माहु मोक्ल्यीत होय. 37अने बाह्हू जीआ माहु मोकल्यीत होय तीयेज माआ साक्ष आप्यी होय तुमुबीही तियाआ शब्द होमल्यु नाहा अने तिया चेहरू पण पाल्यू नाहा; 38अने तियाआ वचनाआ मोनुमे स्थिर मेकीत नाहा काहाके ज्याहा तिये मोक्ल्यीत होय तुमु तिया विश्वास कोईत नाहा. 39तुमु पवित्र शास्त्रामेहे होदतेहे काहाके तुमामे मालुम होय का तुमामे अनंत जीवोन जोळे; अने ओ तोज होय काजे माआ साक्ष आपत्ले; 40तेबी पण तुमु जीवोन मिलविला कोअता मा आहने आवीत नाहा 41माहु महांआ त्यापोरोत सन्मान नाहा जुवे. 42पोन आय तुमामे होमजीत्लू का तुमामे परमेश्वरोओ प्रेम नाहा. 43आय आपाआ बाह्हाआ नावामेहे आवयू होय अने तुमु माहु ग्रहण कोईत नाहा जर कोडु स्वतःआ नावामेहे आवे तियाहा ग्रहण कोईत लेही. 44तुमु जे एकादिहराप रोत सन्मान लत्ले अने तो सन्मान जो फक्त परमेश्वारापोरोत होय लेत नाहा कोडला प्रकारे विश्वास कोहू सेकतेहे? 45एहलो होमज्यू नाहा का आय बाह्हा आगाडी तुमापो दोष लागाडनारू; तुमापो दोष लागाळणारू ताहा मुसा होय ज्यापो तुमु भोरुसो मेकलू होय. 46जे तुमु मुसाआ विश्वास कोअयु ओतलू ताहा माआ पण विश्वास कोअयु ओतलू यामुळे का तिये माआ विषयी लेखिलो होय. 47पोन जर तुमु तियाआ लेखल्यो गोठीपो विश्वास कोईत नाहा ताहा माआ गोठीपो केहलो विश्वास कोअनारू?

Currently Selected:

युहन्ना 5: NOINT

Highlight

Copy