युहन्ना 6

पाच हाजार मांहोहो खावाड्यु

(मत्ती 14.13-21; मरकुस 6.30-44; लूका 9.10-17)

1तियाआ फासाडी येशु गलीलआ म्हणजे तिबिर्या समुद्राआ ती पार गोयु. 2अने एक वोडी गोर्दी तिया फासाडी आवहू लागीई काहाके आश्चर्य काम बिमारीवालापो तो देखाडीत ओतु तियाहा तो पालीत ओतु. 3तेहलाम येशु डोगोपो सोडवीत आपाआ शिष्याआरी बोहित गोल्यो. 4अने यहुदीयाआ वल्हांडण तिवार जागे ओतु. 5जाहा येशु आपाआ डोआं उपो कोईत एक वोडी गोर्दी त्याजागे आविलावेले देखल्यी ताहा फिलिप्पुस कोयु, “आमाहा याहा खाअलाकाजे कोरात रोटा वेसातो लेतआविही?” 6तिये ए गोठी तियाहा फारकीलोकोता कोल्यी काहाके तियाहा स्वतःहा मालुम ओते का तियाहा नाहाकोत कोईओलो होय. 7फिलीप्प तियाहा उत्तर आप्लु, “बेनहोव दिनाराआ भाकर पण यांकोअता उरीलो नाहा का यामेरोते आखाहा थोडो-थोडो मिले” 8तीही शिष्यामेरोत शिमोन पेत्राचा पाही आंद्रिया तियाहा कोयु, 9“इही एक पोऱ्या होय ज्यापो जवोओ पाच रोटा अने बेन मासे होय पण एवढ्या माआहुकोअता ओ नाहाकोत होय?” 10येशु कोयु, “माहुंहु बोहाडीत दया” तियाअ जागापो जास्ती चारू ओतुताहा मांहे त्यामेरयू माहुउ खाजगी पाच हजार ओती बोहित गोये. 11ताहा येशु रोटा लेदिओलो अने आशीर्वाद आपित बोहणाराहा वाटीत आप्लु; तेहलूज मासे पण जेवडे तियाहा लागित ओते वाटीत आप्लु. 12जाहा ते खात तृप्त उवेताहा तिये आपाआ शिष्यांआ कोयु, उरिलो तुकडे एखटो कोईत ल्या का किबी टाक्ये न जालो. 13कोईत तियाआ एखटो कोल्यु अने जवोओ पाच रोटाहा तुकाडामरोत खाणारा त्यापोरोत उरिलो ओते ते बारा टोपल्या पोअल्यो. 14ताहा जे आश्चर्य काम कोईत देखाडीलाआ तियाहा ते मांहे पालीत कोहू लागाडीत, “तो भविष्यवक्ता जो जगात आविलो ओतु खरोज तोज होय” 15येशु ओ होमजीत का ते माहु तोईत राजा बोडाविही होय फासी डोगोपो एखालुज निहित गोल्यो.

येशु पाअयो पोओ साल्यु

(मत्ती 14.22-27; मरकुस 6.45-52)

16जाहा हांजेपो उवी ताहा तियाआ शिष्य गलील समुद्राआ किनारावपो गोये. 17अने नावेपो सोडवीत समुद्राआ तिवोल कफर्णहुमात जाऊ लागाडीत त्या टायमोहो रात ओतगोयु गोयी ओती अने येशु ओमेजा तियाआ जागे आव्ये निमिले. 18अने वारा उठेत्यामुळे लाटा जोरामे आवुहू लागी. 19जाहा ते कोस सवा कोस निहित गोये तेहलाम तिये येशुहू समुद्रापो सालीलावेले अने नावेए जागे आविलावेले पालीत भिईल्यो गोये. 20पोन तिये तियाहा कोयु, “आय होय; बिही नाहा” 21कोईत ते नावीपो सोडीत तीयार उवे अने लागेज ती नाव तियाअ जागापो पुग्यी जी जागे ते जात ओते.

मांहे येशुहू हुदे वोल्ये

22दिहरा तेदीही तियाअ गोर्दी जे समुद्राआ तिवोल उबी ओती इही होमला घेडीला सोडीत दिहरी नाव नाहाओती; अने येशु आपाआ शिष्याआरी सोढयू ने ओतू पण फक्त तियाआ शिष्यन गोये ओते. 23ताहा दिहरा नाव तीबिर्यामरोत तीही आव्या जीही तिये धन्यवाद आपित रोटा खाद्योओ कोयु 24यावाही जांहा गोर्दी पालील्यो का इंही येशु अने शिष्य पण नाहा तेहलाम ते नावूमे सोड्या अने येशुहू होदित-होदित कफर्णहुमात पुग्या.

येशु जीवनों रुटू

25गलीलो समुद्रापलीकडे जांहा ते तियाहा मिल्ये तेहलाम कोयु, “ओ स्वामी, तू इही कोयो आवयू?” 26येशु तियाहा उत्तर आप्लु, “आय तुमामे खोरोज-खोरोज कोत्लू तुमु माहु याकोअता होदित होय एहलो नाहा का तुमामे आश्चर्य काम देखाये पण तुमु यकोअता आव्ये का रोटा खात तृप्त उवे.” 27नाश उवानारो खाअलाकाजे मेहनतो कोहू नाहा पण तियाअ खाअलाकाजे जे अनंत जीविलातांहुजा टिके याहा माअहा पोऱ्या तुमाहा आपी काहाके बाह्हू म्हणजे परमेश्वराने त्यापोओ ठासु लागाडयी होय. 28तिये तियाहा कोयु, “परमेश्वरोओ काम कोइला कोअता आमाहा नाहाकोत कोईओलो?” 29येशु तियाहा उत्तर आप्लु, “परमेश्वरोओ काम ओ होय का तुमु तियापो ज्याहा तिये मोक्ल्यीत होय विश्वास को” 30तेहलाम तिये तियाहा कोयु, “फासाडी तुमु कोठले चिन्ह देखाडीत होय का आमाहा तियाहा पालीत तुमापो विश्वास कोअनारू?” तू कोठले काम देखाडीत होय? 31आमू आगला डायाहा जंगलूम मन्ना खाले; एहलो लेखिलो होय; तिये तियाहा खाअलाकोता होर्गामरोत भाकर आप्यी. 32येशु तियाहा कोयु, आय तुमामे खोरोज-खोरोज कोत्लू का मुस्साने तुमामे ती भाकर ताहा आप्यी नाहा पण माआ बाह्हू तुमामे होर्गामरोत खोरी भाकर आपोहो. 33काहाके परमेश्वरोओ भाकर तेज होय जी होर्गामरोत उतरित जगाला जीवोन आपोहो. 34तेहलाम तिये तियाहा कोयु, ओ प्रभू ए भाकर आमाहा कायम आपित रो 35येशु तियाहा कोयु, जीवनोओ भाकर आय होय जो मा आहने विश्वास आवत्लू तो केधीज बुख्यो उवे नाहा. 36पोन आय तुमामे कोयु ओते का तुमु माहु पालील्यो होय तेबी पण विश्वास कोईत नाहा. 37जे किबी बाह्हू माहु आपोहो ते आखेज मांही येत अने जो कोडु मांही आवत्लू तियाहा आय केधीज काडनारू नाहा. 38काहाके आय माआ इच्छा नाहा पण माहु मोकलीनाऱ्याआ इच्छा पुरो कोइला कोअता होर्गामरोत उतरीलो होय, 39अने माहु मोकलिनाराआ इच्छा ए होय काजे किबी माहु आप्लु होय तीयाम आय किबी आरवूहू कायना पण तियाहा शेवटच्या तेदीही फासी जिवंत उठाडे. 40काहाके माआ बाह्हाआ इच्छा ए होय का जो कोडु पोऱ्याहा पालनारू अने तियापो विश्वास कोअनारू तो अनंत जीवोन मेलविनारू; अने आय तियाहा शेवटच्या तेदीही फासी जीवतु उठवीही. 41त्यापोत यहुदी तियापो कुरकुर कोहू लागाडीत काहाके तिये कोयु ओते, जी भाकर होर्गामरोत उतरित ती आयुज होय. 42अने तिये कोयु, “नाहाकोत ओ योसेफाआ पोऱ्या नाहा? ज्याआ याह्ही बाह्हू आमाहा ओलखीत्लू? ताहा फासाडी तो केहलु कोत्लू का आय होर्गामरोत खालेआत होय.” 43येशु तियाहा उत्तर आप्लु, “आपसामेहे कुरकुर कोहू नाहा” 44कोडु मा आहने आवहू शकत नाहा जोपोरोत माआ बाह्हू जीआ माहु मोक्ल्यीत होय तियाहा आकर्षिल्या वासित अने आय तियाहा शेवटच्या तेदीही फासी जिवंत उठवीही. 45भविष्यवाक्ताआ ग्रंथात ओ लेखिलो होय का ते आखे परमेश्वारापोरोत हिकाड्ये होय ज्या कोडावाही बाह्हाप रोत होमल्यु होय अने हिकल्ये होय तो माआ जागे आवत्लू. 46एहलो नाहा का कोडा बाह्हाहा पाल्लये होय पण जो परमेश्वारापोरोत होय तीयेज फक्त बाह्हाहा पाल्लये होय. 47आय तुमाहा खोरोज-खोरोज कोत्लू का जो कोडु विश्वास कोअत्लू अनंत जीवोन तियाआ होय. 48जीवनोओ भाकर आय होय 49तुमाआ पूर्वजांहि जंगलूम मन्ना खादे अने मोईत गोये. 50एती भाकर होय जी होर्गामरोत उतरीत्ले म्हणजे माहुहू त्यामेरोत खाही अने मोअनारू नाहा. 51जीवनोओ भाकर जी होर्गामरोत उतरी आय होय जर कोडु आव रोटामरोत खाही तो सार्वकालिक जिवंत रोही; अने जी भाकर आय जुगाआ जीवना कोअता आपी ते माआ माहा होय. 52योपो यहुदी ओ कोत आपसामेहे वादविवाद कोहू लागाडीत ओ माहुहू केहलु आमाहा आपाआ माहा खाहुं आपुहू शकतो? 53येशु तियाहा कोयु, आय तुमामे खोरोज-खोरोज कोत्लू का जोपोरोत तुमु माअहा पोऱ्याआ माहा खाही नाहा अने तियाआ रक्त पीही नाहा तुमु तीयाम जीवोन नाहा. 54जो माआ माहा खाय अने रक्त पिहों अनंत जीवोन तीयाआज होय; अने आय तियाहा शेवटच्या तेदीही फासी जिवंत उठवीही. 55काहाके माआ माहा वास्तव्याम खाअला वस्तु होय अने माआ रक्त वास्तव्याम पिईला वस्तु होय. 56जो माआ माहा खाय अने माआ रक्त पिहों तो मामेह स्थिर बोणीत रोही अने आय तीयाम बोणीत रोही. 57जेहलो जिवंत बाह्हू मला मोक्ल्यीत होय अने आय बाह्हा वाही जिवंत होय तेहलूज तो पण जो माहु खाही माआ वोजोसे जिवंत रोही. 58जी भाकर होर्गामरोत उतरी एज होय ए तियाअ रोटा हारखी नाहा जीही पूर्वजांहि निसे अने माईत गोये; जो कोडु ए भाकर खाही तो कायम जिवंत रोही. 59याआ गोठी तिये कफर्णहुमात एक मंदिरोमेहे हिकवन आपलो वेले कोयु.

अनन्त जीवनों वचन

60तियाआ शिष्यामेरोत केताहा ओ होमलित कोयु, “याआ कठीण गोठी होय यांहा कोडू होमलीनारू?” 61येशु आपाआ मोनामे ओ जाईत लेधलो का याआ गोठीपो माआ शिष्य कुरकुर कोईत होय तियाहा फ़ुस्ल्याआ नाहाकोत याआ गोठीपोरोत तुमामे ठोकायू लागित होय? 62जर तुमु माअहा पोऱ्याहा जीही तो पहीले ओतु तीइही उसे जाआत्लू पालनारू ताहा नाहाकोत उवे? 63आत्माआ ताहा जीवोन आपणारो होय डीलोवांही किबी फायदा नाहा; ज्या गोठी आय तुमामे कोयु होय ती आत्माआ होय अने जीवोन पण होय. 64पण तुमामेर्ये केतेक जण एहलो होय जे विश्वास कोईत नाहा काहाके येशु पेलरोत होमजाडीत ओतु काजे विश्वास कोईत नाहा ते कोडू होय; अने कोडू माहु तोईत आपी. 65अने तिये कोयु, ह्यामुळेच आय तुमामे कोयु ओते का जोपोरोत ओ वरदान बाह्हाप रोत आप्लु जात नाहा तोपोरोत तो मा आहने आवहू शकत नाहा.

पतरसो विश्वास

66यापो तियाआ शिष्य उलटो फिरीत गोये अने तिया फासाडी त्याआरी गोये नाहा. 67तेहलाम येशु तियाअ बारा शिष्यांआ कोयु, “नाहाकोत तुमामे पण जायलो होय काहा?” 68शिमोन पेत्राई तियाहा उत्तर आप्लु, ओ प्रभू आमाहा कोडाही जायलो? अनंत जीवनाआ गोठी ताहा ताआज जागे होय, 69अने आमाहा विश्वास कोअयु अने होमजीत गोये का परमेश्वरोओ पवित्र जोओ तांहुज होय. 70येशु तियाहा उत्तर आप्लु, नाहाकोत आय तुमाआ बाराना निवडील्ये नाहा? तेबी पण तुमामेरोत एक जोओ शैतान होय. 71ओ तिये शिमोन इस्करियोती चा पोऱ्या यहुदाआ विषयाम कोयु ओते काहाके तोज तो बारा मायरोत एक ओतु, तियाहा तोईत आपणारो.

Currently Selected:

युहन्ना 6: NOINT

Highlight

Copy