प्रेरितो काम 7

महासभामेहे स्तिफनुसो भाषण

1ताहा महायाजक कोयु काय ऐ गोट्यु खोरुय होय? 2स्तेफनाने कोयु ओ पाहीही अने बाह्हू होमला आमाआ बाह्हू आब्राहम हारान बोहनाराहा पालील्यो तेहलाम मेसोपोटामियाम ओतु तेहलाम गौरवशाली परमेश्वराने तियाहा दर्शन आप्लु, 3अने तियाहा कोयु, तू आपाआ देशोमेरोत अने आपाआ कोमेहे निहित तियाअ देशामेने जा जो देश आय ताहु देखाळीत. 4तेहलाम तो खांद्याच्या देशोमेरोत निहित हारान रोत जात बोह्लुत्याआ पिताआ मृत्युच्याआ फासाडी परमेश्वराने तियाहा तिहीरोत आव तियाहा लेतआवीत सोडये ज्याम ओमे तुमु रोत होय. 5अने तियाहा किबी वतन आप्लु नाहा नहाते तियाहा गुडू मेकीला सुधा तियाहा जागू आप्यी नाहा परंतु प्रतिज्ञा कोअयी का आय ओ देश ताहु अने ताआनंतर ताआ वंशजाआ आथोमेहे कोईत आपे तांहुजा आव तियाहा यद्यपि तियाअ वेले तिया पुत्र ने ओतू. 6अने परमेश्वराने ओ कोयु, ताआ पोऱ्याहा मांहे दिहरा तियाहा दिहरा देशोआ रोय अने ते तियाहा दास बोनावित्लू अने चारहोव वर्ष दुख आपे. 7फासाडी परमेश्वराने कोयु, ज्या जातीही ते दास होय, ज्याह आय दंड आपिही अने तियाआ फासाडी ते निहित याज जागापो माआ सेवा कोए. 8अने तिये तियाहा सुतांआ करार कोअयु अने याज देशामेने इसहाक तियाहा उत्पन्न ओवयू अने आठवो तेदीही तियाआ सुंता कोअयी गोयी अने इसाहाकाप रोत याकोब त्यापोरोत बारा कुलपती उत्पन्न उवे. 9कुलपतीनी योसेफ कोअतीज तिया पाही याहा मिसर तियाहा जाणाराहा वेसेत आप्लु, परंतु परमेश्वर तियाआ आरी ओतु, 10अने तियाहा तियाआ आखे लागल्यो सोडवीत मिसरआ राजा फारो याआ नोजरेवाही कृपापात्र अने ज्ञानी एहलो कोल्यु तिये तियाहा मिसरामेहे अने आपाआ आखे कोमे अधिकारी निवड योजनाला. 11तेहलाम मिसर अने कनानहा आखे देशामेने दुष्काळ पोडीत, ज्याम आखाहा दुख उवे अने आमा आगला डायाहा ओन जोडयेहे नाहा. 12परंतु याकोबाआ ओ होम्लाडित का मिसर माय ओन होय आमा आगला डायाहा पाल्या वेले मोक्ल्यीत, 13दिहरा वेले योसेफाने स्वतः आपाआ पाहीहो ओळखत आप्यी अने योसेफाआ कुल फारोला मालुम उवे. 14तेहलाम योसेफाहा आपाआ बाह्हू याकोब अने आपाआ आखा कोअंमेहे पंच्याहातर मांहे ओते हाहुई मोक्ल्यीत, 15तेहलाम याकोब मिसर देशामेने गोल्यो अने तीइही तो अने तियाआ आगाडी डाये मोईत गोये. 16तियाआ डील शकेमात पोचाडीत जात तियाअ कब्रामेहे मेक्ल्ये गोयुजा अब्राहम चांदी आपित शाकेम माय हमेराआ पोऱ्यापोरोत वेसातो लेधलो ओते. 17पोन जांहा तियाअ प्रतिज्ञेचा पुरो उविला वेल जागे आवयी ओती जे परमेश्वराने अब्राहमोओ आरी कोल्यु ओते ताहा मिसरामे ते मांहे वोदित गोये अने जाअखो ओतगोयु. 18तेहलाम मिसर माय दिहरु राजा ओवयू जो योसेफाहा उलखित्लू ने ओतू, 19तिये आमा कुलोपो चालाखी कोईत आमा आगला डायारी ईहि पर्यंत वाईट व्यवहार कोअयु का तियाहा आपाआ पोऱ्याहा वेसेत आपलो लागाडीत का ते जिवंत रोहू कायना. 20तियाआ वेले मोशे उत्पन्न ओवयू तो परमेश्वरोओ नोजरेवाही जाखो हाजी ओतु तो तीन महिन्यापोरोत आपाआ बाह्हाआ कोआ पाल्यू गोल्यो 21जाहा तो जुगरिलो गोल्यो तेहलाम फारो पोर्या विसित लेधलो अने आपाआ पुत्र कोईत पाल्यू. 22मोशेला मिसर देशोमेऱ्या आखे शिक्षण आपलो आव्ये अने तो वचन अने हाजा कानोवाही सामर्थ्यवान ओतु. 23जाहा तो सालीह सालाआ पाही तेहलाम तियाआ मोनामे आव्ये का आय आपाआ इस्राएल माआहुआगाडी भेट कोहू. 24तिये एक व्यक्तीपो अन्याय उवेताहा पालीत तियाहा वाचाड्यू अने मिस्रीला माईत त्रास आपणाराहा बदलू आप्लु. 25तिये विचार कोअयु तियाआ पाही लेतावे परमेश्वर तियाआ आथोवाही तिया उद्धार कोअही पण ते होमज्ये नाहा. 26दिहरा तेदीही जांहा ते एकमेकाम रोत लोळाई कोईत ओते तेहलाम तो तीइही आविते गोल्यो अने ते कोत तियाहा मिलून बालीन रोइला कोअता होमजाद्योहो, अने कोयु, ओ माहाआ, तुमु ताहा पाही-पाही होय एक दिहरापो काहा अन्याय कोअता? 27परंतु जो आपाआ आरी कोरयापो प्रेम कोईत ओतु तिये तियाहा ओ कोत सेटे होरकावित आप्लु ताहु कोडु आमापो अधिकारी अने न्याय कोअनारा ठेरव्यो होय? 28नाहाकोत ज्या रीतीवाही तू मिस्रीही माईत टाक्ये, माहु पण माईत टाकीला जोवे उवनारा? 29ए गोठी होमलित मोशे नाह्यू अने मिद्यानआ देशामेने दिहरादेशोआ कोईत रोंहु लाग्यू अने तियाहा तीइही बेन पोऱ्ये उवी. 30जाहा तियाआ सालीह वर्षे पुरो उवे तेहलाम होमला स्वर्गदूतोवाही सीनै डोगोओ जगलूम आगी जागे ओती तियाअ साडोमेहे आगीमे दर्शन आप्लु 31मोशेला ओ दर्शन पालीत आश्चर्य ओवयू अने देखिलाहो जांहा तो जागे गोल्यो तेहलाम प्रभूआ ओ शब्द उनालू आवयू, 32आयताआ आगलाआ, अब्राहमोओ, इसहाकआ, अने याकोबाआ परमेश्वर होय तेहलाम मोशे कापू लाग्यू, इहिंजा का तियाहा पालीला हिम्मत रोली नाहा. 33तेह्लाम प्रभूऊ तियाहा कोयु, आपाआ पायाहा बुट काढीत ले काहाके ज्या जागापो तू उबु होय ती पवित्र जागू होय. 34आय खरोज आपाआ लोकांची जे मिसरामे होय तियाआ परिस्थिती देखल्यी होय अने जिया हुंदके अने रोडीलो होमल्यु होय याकोअता तियाहा सुडावुहु कोआता उतरीलो होय ओमे आव आय ताहु मिसरामे मोकालीनारू. 35ज्या मोशेला तिये ओ कोत नाहाकोयो ओते माहु कोडु आमा न्यायधीश अने अधिकारी ठेरवीत तियाअ परमेश्वर अधिपति अने सुडावनारु ठेरवीत स्वर्गदूताआ त्यापोरत जीआ तियाहा साडोमेहे दर्शन आप्लु ओते मुकल्यु. 36याचे माहहू मिसर अने लाल दर्या अने जंगलूम सालीह वर्ष पर्यंत अदभूत काम अने चिन्ह देखाडीत तियाहा काढीत लाविले. 37ओतो तोज मोशे होय जीआ इस्राएल ला कोयु पण परमेश्वर तुमाआ पाहीपो तुमा कोअता माआहोस एक भविष्यवक्ता उठावलो जाइअलो. 38ओ तोज होय जीआ जंगलामेहे मंडली ज्या स्वर्गदूताआरी सीनै डोगोपो तियाआ आरी गोठी कोअयु अने आगला आरी ओते, तियाहा जिवंत वचन जोडीत काजे आमा पर्यंत पोचाळीओत. 39पोन आमा पूर्वजांहि त्याआं होमल्यु नाहा नहाते तियाहा सेटे कोईत आपाआ मोन मिसरा फिरावल्यो, 40अने हारूनला कोयु, आमा कोअता एहेलू देव बोनाव जो आमा आगाडी-आगाडी चाले काहाके तो मोशे जो आमाहा मिसर देशामेहे काढीत लाविले आमाहा नाहा उलखित्लू तियाहा नाहाकोत उवे? 41तियाअ दिहोमे तिये एक वासडो बोणाडीत तियाआ मूर्तीच्या आगाडी बलि उचलून अने आपाआ आथो काम मग्न ओवुहू लागाडीत. 42आखरी परमेश्वराने सोब फेरवित तियाहा सोडीत आप्लु का आकाशाआ सेनागनाची उपासना जेहलो भविष्यवक्ताआ पुस्तकाम लेखिलो होय, ओ इस्राएल च्या कोवाले, कि तुमु जंगलूम सालीह वर्ष पर्यंत जनावरे बलि अने ओनबली माहुंज चोडावीत रोही? 43तुमु मोलखाआ मंडप अने रेफान देवताआ तीण्याहा घेऊन फिरीत ओते अर्थात ज्या पुत्राने ज्याहा तुमु नमन कालीला कोअता बोनाडहि ओते आखरी आय तुमामे बाबेलाआ तिवोल जात बोहाडे. 44साक्षीचा मंडप जंगलूम आमा पुर्वाजामेहे ओते जेहलो तिये ठेरवीही ज्याहा मोशेई कोयु, जे आविलो तू पालील्यो होय तियाआ अनुसार तियाहा बोनाव. 45ज्या मंडपा मेहे आमा पूर्वजांहि वारजोंपोरोत यहोशू आरी रथ ओतगोयु आव्ये ज्या वेले का तिये दिहरे जातीपो अधिकार मिलउत, जिये परमेश्वरोओ आमा पुर्वाजा काढीत टाक्ये अने ते मंडप दाविदाआ टायमोपो रोत रोला. 46तियापो परमेश्वराने अनुग्रह कोअयु आखरी तिये विनंती कोअयी का तो याकोबाआ परमेश्वरा कोअता निवासाहा स्थान बोनाविही 47पोन सुलैमान त्यांकोअता कोआ बोणाव्यू. 48परंतु परमप्रधानआ ओतु कोईत बोनाडील्याआ गोईल्या कोआत रोत जेहलो का भविष्यवक्त्यांनी कोयु होय, 49प्रभू कोत्लू का स्वर्ग माआ सिहासन होय धोरती माआ गुडानिसेए पिढी होय माकोअता तुमु कोडला प्रकारोओ को बोनाविलो अने माआ निवासाआ कोठले स्थान उवे? 50नाहाकोत ए वस्तू माआ आथोवाही बोनाडयो नाहा? 51ऐ ताठा बोसीही, अने मोन अने कानोओ सुंता कोईओलो माहुहू, तुमु सदा पवित्र आत्माआ विरोध कोअता जेहलो तुमाआ आगाडी डाये कोईत ओते तेहलूज तुमुभी कोईत होय. 52भविष्यवाक्त्यामरोत कोडाआ तुमाआ मायरोत त्रास आप्यू नाहा तियाअ अर्धीहा आविलाआ पूर्व कालोलरोत संदेश आपनाराहा माईत टाक्ये अने ओमे पर्यंत तियाहा तोईत आपणारे अने माईत टाकणारे. 53तुमु स्वर्गदूतांवाही योजलेले नियमशास्त्र जोडयो उवे ओते परंतु तियाआ पालीत कोल्यु नाहा.

स्तिफनुसोओ हत्या

54ई गोठी होमलित ते बोलीते गोये अने तियापो दात चाविलो लागाडीत. 55कोईत जीआ पवित्र आत्मावांहि पुरोओत ओतगोयु स्वर्गामेहे पालील्यो अने परमेश्वरोओ गौरवाला अने येशुहू परमेश्वरोओ हुदिवोल उबु रोला पालीत, 56कोइलो, पाला आय स्वर्गाआ उगडीलो अने माअहा पोऱ्याहा परमेश्वरोओ हुदिवोल उबु रोतगोल्यु पेल्लु, 57तोयों तिये वोडा शब्दावाही आयडीत कान बंद कोईत लेधलो अने एक आरी तियापो दोवडीत ये, 58त्याला नगराआ बारथे काढीत तियाआ उपो दगडा देना वोल्या साक्षीदाराहा आपाआ कापडे शौल नावोओ एक जुवानोओ गुडाजागे काढीत मेक्ल्ये. 59ते स्तेफन उपो डोणो माआदे कोईत रोल्या अने तोओ कोयो प्रार्थना कोहू लाग्यू, ओ प्रभू माआ आत्माहा ग्रहण को. 60फासी गुडघे टेक्यू उचो शब्दाम आअड्यू, ओ प्रभू ओ पाप तियापो लागाडहु नाहा अने ओ कोत तो हुवीत गोल्यो शौललाआ तियाआ तिया वध मान्य कोअयु.

Currently Selected:

प्रेरितो काम 7: NOINT

Highlight

Copy