Luka 20

Mwoohnan takharshiiy dhakk khi Jesu

Mat 21:23-27; Mar 11:27-33

1P'ar m'ee puus shi, kaarooh Jesu kaah sh'in kamm gurum mwopp kihfur LuhNaan, kihh satt Pwoo'wurett mwopp, bhi prist wu'nan kihh Mhikamm-w'aar kihshag kihh mwoohnan mwopp ja dyarrang phi nyi gyerez. 2Bhi mwopp nang phi nyi le, “Ghi satt munn, gha phi sh'in bii mihhse mwopp a sh'i satt mhi wuyeh, a wuyeh pihh pee mhi sh'in mwopp gha?”

3Bhi Jesu lapp mwopp le, “Wu'an zag p'ee sh'in m'ee t'al wunn. Wu satt a'n; 4baptisma w'u gyet Yohanna kihh sh'in seh, gyet a Naan l'e nyi sh'in nyi aa'h, h'aa kooh gyet a zhepp gurum kyekk mwopp l'e nyi sh'in nyi ayeh?”

5Bhi mwopp dum bheett orr mhizeh phishag mwopp le, “Mihh mu lapp mu le, ‘A Naan gyet l'e nyi,’ bhi nyi p'ee nang nyi pwoo mu le, ‘Dheeh a mihyeh l'e bhi baah gyet wu pihhzeenn Yohanna ni mou?’ 6Mihh mu lapp mu le, ‘Gyet a zhepp gurum kyekk mwopp l'e nyi sh'in nyi,’ ai bhi mwopp'muun p'ee vat munn twa kihh pangg, p'ee baa mwopp m'ang le, baah m'ee satt kihhshe, Yohanna a gu'wanggshiiy.”

7Kaarooh mwopp baja, bhi mwopp lapp Jesu le, “Baah mu man gwooh gyet lop Yohanna ni sh'in baptisma ni mou.”

8Bhi Jesu satt mwopp le, “Mihh nyi a kihhsheh, bhi wu'an zag p'ee cham satt nyi wunn kooh a weeh pihh pee mhi sh'in bii mihhse ni mwopp a'n mou.”

Shumpwoo kaah mhiwapp-maarr w'u bwutdhood

Mat 21:33-44; Mar 12:1-11

9Jesu sokihkyeen kihh laa'pwoo bhi satt shumpwoo mihhse gurum ni mwopp le, “M'ee gurum gyet kopp gag m'ee bongg'anab keeniy, bhi wapp bongg'anab ni m'ee mhiwapp-maarr mwopp, bhi dhel mwaan p'ee yiiy dhirrihkk.#Ish 5:1

10“Kaarooh pee wull p'ee yak zhepp'anab ni, bhi gwoh ni lop m'ee kromm keeniy kihpee mhiwapp-maarr ni mwopp diy, tihh mwopp pihh shapp mhi zhepp'anab miin'niy diy lhi'ji riy. Dhangg mhiwapp-maarr ni mwopp nas kromm ni, mwopp pwoorr nyi shenn kih arr w'aa sarr niy wu'fii paah-paah. 11Gubhokk ni waa shenn m'ee kromm keeniy wu'zeh dyi lhidum, bhi mwopp nas wu'nyi zag, mwopp fullup nyi, mwopp shen nyi shenn kih arr w'aa sarr niy wu'fii paah-paah zag. 12Weett kihhsheh, gwoh ni waa lop kromm wu'kunn dyi, bhi mhiwapp-maarr ni mwopp m'ang nyi buakk, mwopp le'laah nyi, mwopp pwoorr nyi shen lhiput dhighin bongg ni.

13“Bhi g'u bongg'anab ni nang phi shin le, ‘A mihyeh a bii w'u a'n p'ee sh'in ayeh? An p'ee lop a em na, w'u a phikrihpp nah; shaahseh mwopp pihhdhess wu'nyi.’

14“Dhangg kaarooh mhiwapp-maarr ni mwopp naah l'aa ni kihh ji, bhi mwopp bheett bii w'u runn p'ee sh'in kihh nyi. Mwopp satt le, ‘Dyau'matt oou, a mihhse a gu'sokopp khi gwoh ni, mu tih'tu nyi fyaad tihh koppuup khinyi dheeh diy munn!’ 15A nyi seh, bhi mwopp pwoorr l'aa ni lhiput dhighin bongg'anab ni, mwopp t'u meng seh.

“T'o, naah mug, bhi a mihyeh a bii w'u g'u bongg'anab ni p'ee sh'in kihh gurum mhizeh ni mwopp? 16Ai nyi p'ee ji twa mwopp, yakhal pihh bongg'anab ni m'ee gurum wu'dyikk mwopp ruh.”

Kaarooh gurum ni mwopp klihng bii w'u Jesu satt seh bhi mwopp satt le, “Naan l'e tihh tapp bii mhize yakhal kwed a kihhsheh mou!”

17Jesu le'yit niy kih mwopp bhi nang mwopp le, “Dheeh a mihyeh a shiiy khi pwoo w'u rih-ran dhighin pwoo khi Naan w'u satt le,

“ ‘Pangg w'u mhi'dyik mwopp shiih kihh nyi

a nyi yakhal dhen a pangg kwang'luh’ seh ayeh?#KN 118:22

18Koohweeh w'u mihh pal kih pangg mhizeh ni bhi gwoh ni p'ee tihtrep rukhupp-rukhupp; gwooh pangg ni mihh taah khinyi, bhi pangg ni p'ee biakhas nyi lakhass, lakhass.”

19Mhikamm-w'aar kihh prist wu'nan mwopp kihh rengg arr w'u tihh mwopp y'aa nyi diy abet, p'ee mwopp man le satt shumpwoo mhizeh a kaah ruh. Dhangg mwopp kihkhir dw'uu gurum w'u mwopp nhighin.

T'al kaah kwat wapp Kaisar

Mat 21:45,46; 22:15-22; Mar 12:12-17

20A nyi seh, bhi mwopp y'aa lang'bhongg Jesu nett-nett. Mwopp lop m'ee wer keeru lhidum kihpee nyi diy a pin'shig gurum, tihh mwopp dwallass nyi diy dhighin m'ee pwoo w'u dhok diy satt, tihh mwopp kad arr y'aa nyi diy pihh sarr Govno. 21A nyi seh bhi wer ni mwopp dum nang phi Jesu le, “Gukamm, mu man mu le ghi kihh satt a zeenn, yakhal ghi kihh kamm a bii w'u a zeenn. Baah ghi kihh naah yitlwaann khi gurum mwopp mou, ghi kihh kamm pwoo khi Naan shi'zeenn. 22T'o, ghi satt munn, nyi dihhreh tihh mu kwat wapp Kaisar aa'h, h'aa shiih'pee nyi dihhreh ayeh?”

23Jesu naah raa'soon khimwopp man, bhi satt mwopp le, 24“Wu pihh m'ee dinarius dhak se a'n ih naah 'y.” Bhi nang phi mwopp le, “A ran'ryiin kihh le'sarr mhi wuyeh se dyikihh?”

Bhi mwopp lapp nyi le, “A mhi Kaisar e'h.”

25Bhi satt mwopp le, “Mihh nyi a kihhsheh, bhi wu pihh bii w'u a mhi Kaisar, Kaisar; yakhal wu pihh bii w'u a mhi Naan, Naan.”

26Baah mwopp mak y'aa nyi dhighin bii w'u satt bazh kih k'aam seh mou. Pwoo w'u lapp mwopp seh aa'phi mwopp, bhi mwopp tong dh'ok.

T'al kaah yakhal kih peemuutt kihh dyik

Mat 22:23-33; Mar 12:18-27

27Pakk m'ee Sadusiiy, w'u a mwooh kihh satt le baah m'ee yakhal kih peemuutt nhighin mou, mwopp ja kihpee Jesu diy kihh t'al. 28Mwopp nang phi nyi le, “Gukamm, Musa gyet ran munn dhighin w'aar khi Naan le, mihh em'nhikhin menguh m'uut yet mat niy dheeh dheng l'aa, bhi nyi a ching tihh gwoh ni looh mat'kaah ni, tihh la zhepp diy kih shumm kumm em'nhikhin ni#WSW 25:5.

29“T'o, gyet mwopp cham sh'in m'ee zheppdaass mwopp pwoghovel bwut ru. Gwooh'shee lapp mat, bhi m'uut noott l'aa. 30Bhi wu'vel lapp mat'kaah nyi. Wu'nyi zag m'uut a kihhsheh noott l'aa. 31Bhi wu'kunn lapp mat mihhseh ni; dhangg wu'nyi zag m'uut noott l'aa. Kooh meehrangg dhighin mwopp weett pwoghovel lapp mat mhizeh ni, dhangg mwopp weett mwarrap noott zhepp. 32Kyess nyi bhi mat ni wu'nyi m'uut zag. 33T'o, ghi satt munn, mat mihhseh ni, p'ee p'ar dheeh a mat khi m'ee mwopp wu'ranggyeh p'ar yakhal kih peemuutt ni, p'ee gyet mwopp weett pwoghovel cham looh nyi mat?”

34Bhi Jesu lapp mwopp le, “Gurum w'u yill mhize mwopp kihh lapp shwarab yakhal mwopp kihh shenn zhi'raapp ruh dyik. 35Dhangg mwooh Naan naah kad mwopp wull mhi lapp shapp dhighin yillpwooh w'u kihh ji, kihh shapp dhighin yakhal kih peemuutt zag, bhi baah m'ee dyik nhighin bihzeh p'ee wu'mwopp mou. 36Yakhal baah mwopp p'ee mwarrap dyi mou; p'ee mwopp p'ee kwed a kaa mhi'lop khi Naan se. Mwopp a zhepp khi Naan, p'ee mwopp a gurum w'u baa mwopp yakhal kih peemuutt.

37“T'o, kooh dyinn a dhighin pwookaah wus w'u gyet Musa naah kihh lapp dhighin dh'em se kyekk maah, bhi kihh kamm le mwooh mihmwarrap kihh waa yakhal dyi. P'ee Musa ran le Naan ni a ‘Naan khi Ibrahim, kihh Naan khi Ishaku, kihh Naan khi Yakub.’#Put 3:6 38Naan ni a Naan khi mwooh mihmwarrap mou, Nyi a Naan khi mwooh kihhseen, p'ee kihpee Naan diy bhi koohweeh a kihh seen.”

39Pakk m'ee Mhikamm-w'aar mwopp pring Jesu le, “Gukamm, ghi satt bii gha a dihhreh!” 40Yakhal nhighin, bhi baah menguh kamm nang m'ee t'al dyi phi nyi mou.

Kristi ni a l'aa khi wuyeh?

Mat 22:41-46; Mar 12:35-37

41Jesu nang phi mwopp le, “Sh'in a ranggyeh bhi mwopp kihh satt le Kristi a Em khi Dauda? 42Ai Dauda maah sh'i kaah niy satt dhighin KoogNaan le:

“ ‘Daah Naan satt Gwoohyon keena le:

“Ghi tong gha se sarrsoh keena,

43harr seeh ih l'e tihh shaar'lek keegha

mwopp zhwam pwoo ru diy yill tekhem gha.” ’#KN 110:1

44Dauda sh'i kaah niy peet nyi ‘Gwoohyon,’ bhi shitt a rangg diy tong a em khinyi ayeh?”

45Kaarooh gurum ni mwopp weett kaah klihng Jesu, bhi satt zheppkamm keeniy mwopp le, 46“Wu kihh kangg kihh kaah wuh tapp w'u dheeh kaa Mhikamm-w'aar mwopp se mou. Mwopp kihh dh'om witt mwan a kihh das'nan bh'aar wu'nan vhi-khi-kihg, vhi-khi-kihg. Yakhal mwopp khi dh'om a rooh gurum mwopp kihh yibyid runn sh'i togpee kih luhtukk, yakhal mwopp kihh pihh peetong w'u tihngg kihkyeen runn dhighin Luh'kang, kihh peetong mhi mwoohnan kihpee soh'var zag. 47A mwopp a mhi zhwam shwarabkaah tihh mwopp chakk bii diy lapp sarr mwopp bhangg-bhangg. Dhangg mihh yakhal bhi mwopp kihh raanaan gab'zhakham m'ee dhangNaan w'u kwer-kwer. Ai gurum wu'kihhsheh ni mwopp aa'h! Naan p'ee shandyeell w'u shishwal mwopp.”

Currently Selected:

Luka 20: Chakfem

Highlight

Copy