Luka 19

Pwookaah Zakka Gu-lappwapp

1Jesu ji dhel dhighin Jeriko tihh waa arr diy nhighin. 2M'ee gurum nhighin, w'u shumm nyi a Zakka. Gwoh ni gyet a m'ee gu'kihkyeen khi mhi-lappwapp mwopp, yakhal nyi a gulong. 3Bhi gwoh ni lyap arr w'u tihh naah yit Jesu diy, tihh man diy kooh kyed Jesu ni a m'ee gurum wu'kaarangg se oh, dhangg baah mak naah nyi mou, p'ee dw'uu khi gurum mwopp, yakhal Zakka ni zag gyet a gwooh kihh-kihpp. 4A nyi seh bhi dyaar shu'shu dum kihkyeen, dum k'aa m'ee tihng lun w'u kihh dharr pwoo arr w'u Jesu kihh t'ang waa diy.

5Kaarooh Jesu ji'wull der tihng lun ni, bhi eep yit niy bhi naah Zakka kihh l'ang se. Bhi satt nyi le, “Zakka Oo, ghi sam kyen-kyen, p'ee a'n p'ee teer a luh gha shinn.” 6Bhi Zakka chakk pee sam, bhi kang Jesu sh'i rettyit looh luh niy. 7Kaarooh gurum ni mwopp naah kihhsheh, bhi mwopp y'aa gwakbhelepp, mwopp kihh satt le, “Hah, Jesu dum teer mhizeb luh gu'shigbis e'h, mwopp'muun!”

8Kaarooh mwopp nhighin, bhi Zakka yakhal dharr bhi satt Daah Jesu le, “Gwoohyon, ghi naah mwasseh kihhshe, bhi a'n p'ee shap long keena der vel. An p'ee pihh shapp wu'zeh mhipyaah mwopp. Yakhal mihh ih cham bukhur menguh, bhi a'n p'ee kwatkopp ni gwoh ni yit feerr.”#Put 22:1; 2Sam 12:6

9Bhi Jesu satt nyi le, “Ai bh'am khi Naan sam luh mhize shishinn, ih kihh satt wunn, p'ee gwoh mhize ni zag a l'aa khi Ibrahim. 10P'ee L'aa khi Gurum sam a p'ee lyap mwooh lhi-lakh'am tihh bham mwopp diy.”#Mat 18:11

Shumpwoo kaah m'ee Longfwaann kihh kromm keeniy mwopp

Mat 25:14-30

11Kaarooh gurum ni mwopp kaah klihng bii mihhseh, bhi Jesu sokihkyeen kihh laa'pwoo, bhi satt m'ee shumpwoo mwopp. Satt shumpwoo mhize ni a pee'rooh nyi kuss kihh Urshalima, yakhal gurum ni mwopp kihh ryeeh le dhenglong khi Naan ni arr ji abet.#Mat 25:14-30 12Satt mwopp le, “M'ee Longfwaann gyet kihh t'ang dum m'ee yill w'u zhong-zhong tihh mwopp bwakhat miskakhamm diy nyi dhangg baa'ji. 13A nyi seh bhi perrep gurum kaghapaad dhighin kromm keeniy mwopp bhi pihh shaghal meina kaghapaad mwopp, satt mwopp le, ‘Wu sh'in w'oor kihh shaghal mhize ni harr p'ar baa'ji keena.’

14“Dhangg kan baah zheppyill khi gwoh mhizeh ni mwopp kihh dh'om nyi mou. A nyi seh bhi mwopp lop m'ee gurum kihpwoo ru lhidum kihbwoon nyi, tihh mwopp dum dyangg diy g'u bwakhat miskakhamm ni le, ‘Baah mu kihh dh'om tihh gwoh mhize so-miskakhamm kaah mu mou.’

15“Weett kihhsheh, bhi mwopp bwakhat miskakhamm gwoh ni, harr baa'ji tuluh. Kaarooh ji'wull, bhi l'e tihh mwopp perrep kromm w'u deh pihh shaghal mwopp seh, tihh klihng lebhed w'u mwopp kad diy kih shaghal ni.

16“Kromm wu'shee ji satt nyi le, ‘Guluh, meina keegha shi ji kihh meina kaghapaad dyikihh.’

17“Bhi guluh khinyi satt nyi le, ‘Ha'winn, kromm wu'rett ou! Pee'rooh ghi sh'in zeenn kaah reb bii wu'lee, bhi a'n p'ee bwakhat bh'aar gha kaah khishikhitt kaghapaad.’

18“Kromm wu'vel ji, bhi satt Guluh keeniy ni le, ‘Guluh, meina keegha shi ji kihh meina paad dyikihh.’

19“Bhi Guluh khinyi satt nyi le, ‘Wu'gha zag p'ee dheeh gu'bhaar kaah khishikhitt paad.’

20“Kromm wu'zeh ji, bhi satt nyi le, ‘Guluh, ghi lapp meina keegha shi; deh ih foghom bii gha ih dhen a dhighin kleb-fwaat. 21Hai, ih kihkhir gha pwetd, p'ee wu'gha a Shigbii Daa'glihng; gha a g'u t'ang wu'nung der deb; gha a g'u so wunn khi gurum.’

22“Guluh khi kromm ni pring ni le, ‘Gag m'ee kromm w'u bwutdhood! An p'ee shandyeell gha a sh'i pwoo w'u put pwoo gha seh. O'hooh, kan ghi man rooh a'n a Shigbii Daa'glihng, g'u t'ang wu'nung der deb, g'u so wun khi gurum; 23dheeh deh a mihyeh d'aam gha dum dhen shaghal keena ni luh-dhenshaghal, tihh p'ar mihh ih baah ih ji diy, bhi ih lapp bii na kihh am dyikihh?’

24“Bhi Guluh ni satt mwooh kihh dyarrang nhighin le, ‘Wu lapp shaghal ni sarr nyi, wu pihh gwooh kihh nyi kaghapaad seh.’

25“Bhi mwopp satt nyi le, ‘Hah, Gwoohyon, ai baa gwoh mhizeh ni kihh shaghal meina kaghapaad!’

26“Bhi guluh ni satt mwopp le, ‘Ih kihh satt wunn, gwooh kihh bii, bhi mwopp p'ee waa pihh bii dyi nyi dyikihh, dhangg gwooh noott bii, bhi kooh a bii w'u nyi kihh nyi seh bhi mwopp p'ee y'aa nyi lapp khinyi.#Mat 13:12; Mar 4:25; Luk 8:18 27T'o, mwasseh, mhitonn nah mhizeh shi mwopp, w'u deh mwopp le runn kihh dh'om tihh a'n so-miskakhamm kaah ruh seh mou, dum wu ja kihh mwopp wu twa se kihkyeen na tihh ih kihh naah diy.’ ”

Jesu dhel Urshalima naar waaw

Mat 21:1-11; Mar 11:1-11; Yoh 12:12-19

28Bwoonrooh Jesu satt bii mihhseh, bhi lang'arr kihkyeen gurum ni mwopp p'ee k'aa dum Urshalima. 29Kaarooh ji'wull kuss kihh kwangyill Betfaji kihh Betani w'u mwopp sh'i m'ee bwumm w'u mwopp kihh peet Bwumm Paatt, bhi lop vel dhighin zheppkamm keeniy mwopp, satt mwopp le, 30“Taah wu dum takhann kwangyill w'u kihkyeen wu seh. Mihh wu kudyi ji dhel dhighin kwangyill ni, bhi wunn p'ee kad mwopp kukhul m'ee l'aa zaa'kwiy w'u baah menguh khi cham l'ang dyikihh mou nhighin. Wu shang l'aa zaa'kwiy ni lhitaah se. 31Mihh menguh nang pwoo wu le, ‘Wunn phi sh'in a mihyeh seh?’ Bhi wu satt nyi wu le, ‘A Gwoohyon kihh t'ang sh'in dhakk kihh nyi 'y.’ ”

32Mwooh Jesu lop mwopp seh dum kad bii ni a kaa dyinn satt runn seh. 33Kaarooh mwopp kaah shang l'aa zaa'kwiy nyi, bhi mhi l'aa zaa'kwiy ni mwopp nang phi mwopp le, “Wunn phi shang nyi a p'ee mihyeh?”

34Bhi zheppkamm ni mwopp lapp mwopp le, “A Gwoohyon kihh t'ang sh'in dhakk kihh nyi 'y.”

35Mwopp ji kihh l'aa zaa'kwiy ni Jesu, bhi mwopp shwat das'nan bh'aar keeru bihr dyikihh, bhi mwopp m'ang Jesu dhen dyikihh. 36Kaarooh Jesu kaah l'ang l'aa zaa'kwiy ni, bhi gurum mwopp kihh shwat n'an bh'aar keeru bihr lhiduam kih arr.

37Kaarooh ji'wull kuss kihh pee w'u arr ni m'ang pwoo'sam diy sh'i Bwumm Paatt, bhi kapp dw'uu mhi-dumdang nyi mwopp y'aa kwoob Naan sh'i rettyit kihh dhekheh ru chapp-chapp p'ee v'ur bii'aapwoo w'u gyet mwopp kihh naah seh. 38Mwopp kihh kwoob Naan le:

“Naan le'wurett Miskakhamm w'u ji dhighin shumm Puup mu Naan!”

“Tongkakhamm kwed tihngg kih dhengNaan,

tihghindhess a mhi Daah Naan W'u Mettweett

tihngg kih dhengNaan!”#KN 118:26

39Pakk Farisiiy w'u gyet mwopp dhighin dw'uu khi gurum ni mwopp satt Jesu le, “Gukamm, ghi tepbhelepp mhi-dumdang gha mwopp e'h!”

40Bhi Jesu pring mwopp satt le, “Ih kihh satt wunn, kooh dyinn wu'mwopp tong dh'ok, bhi pangg mwopp p'ee shatt waaw.”

41Jesu ji'wull kuss kihh Urshalima, bhi kaarooh naah khishikhitt Urshalima ni, bhi y'aa wall kaah nyi; 42kihh satt le, “Ai, kaddyinn shishinn se wu man bii w'u p'ee ji kihh tongkakhamm wunn aa'h! Dheeh a nihyeh, nyi rah a w'u zihzok wunn! 43Pee kihh ji w'u shaar'lek keeyi mwopp p'ee okhor yi kihh bongg'lek shikhir kaat, mwopp gab yi dhen kihnaar ru grihz. 44Mwopp p'ee rumm yi lhisam yill rukhupp-rukhupp, yakhal mwopp twa zhepp yi w'u dhighin yi kwellelleh. Baah mwopp p'ee yet kooh pangg kihmeh dheeh dhen yi kihdab wu'nat mou. Bii mihhse p'ee sam kaah wuh a pee'rooh baa wu man ji khi Naan p'ee bham wunn mou.”

Jesu pwoorr mhi'glong lhipwat kihfur LuhNaan

Mat 21:12-17; Mar 11:15-19; Yoh 2:13-22

45Kaarooh Jesu ji'wull Urshalima, bhi ji dhel kihfur LuhNaan ni, bhi y'aa pwoorr v'ur mwooh phi seett kihh bii kihfur LuhNaan ni lhipwat. 46Satt mwopp le, “Nyi a rih-ran le, ‘Luh keena p'ee kwed a luh dhangNaan.’ Weett kihhsheh bhi wu'wunn wu shikhir kihh nyi dheeh a goghod lakham khi watt mwopp.”#Ish 56:7; Irm 7:11

47Kooh phirangg bhi Jesu kihh sh'in kamm kihfur LuhNaan ni. Dhangg prist wu'nan mwopp, kihh Mhikamm-w'aar, kihh mwoohnan khi Zhepp Yahuda ni mwopp kihh t'ang t'u nyi.#Luk 21:37 48Weett kihhsheh, baah mwopp kad arr t'u nyi mou, p'ee gurum mwopp weett dang nyi nyakk, baah mwopp kihh dh'om rooh m'ee kamm khinyi dhel runn mou.

Currently Selected:

Luka 19: Chakfem

Highlight

Copy