Mark 14

Iysanı óltiriw ushın til biriktiriw

(Mat 26:1-5; Luk 22:1-2; Yuxn 11:45-53)

1Qutqarılıw hám Ashıtqısız nan bayramına#14:1 Qutqarılıw hám Ashıtqısız nan bayramı – sózlikke qarań. eki kún qalǵan edi. Bas ruwxaniyler hám diniy muǵallimler Iysanı hiyle menen qolǵa túsirip óltiriwdiń jolın izlestirdi.

2Biraq olar: «Xalıq arasında qozǵalań bolmawı ushın, bul isti bayram kúnleri islemeyik», – desti.

Iysa Betaniyada

(Mat 26:6-13; Yuxn 12:1-8)

3Iysa Betaniyada, burın teri keselligi menen awırǵan Shimonnıń úyinde, dasturxan basında otırǵanda, mármer ıdısta júdá qımbatlı, sap nardtan alınǵan átir mayı bar bir hayal keldi. Ol ıdıstı sındırdı da, maydı Iysanıń basına quydı. 4Geybirewler ashıwlanıp, bir-birine:

– Bunday ısırapkershiliktiń ne keregi bar? 5Onı úsh júz dinardan da qımbatıraqqa satıp, aqshasın jarlılarǵa úlestirip beriwge bolatuǵın edi, – desip, hayaldı ayıplay basladı.

6Biraq Iysa:

– Hayaldı tınıshına qoyıńlar. Onı nege qısındırıp atırsızlar? Ol Maǵan jaqsılıq isledi. 7Óytkeni jarlılar sizler menen bárqulla birge, olarǵa qálegen waqtıńızda járdem bere alasızlar. Biraq Men sizler menen bárqulla birge bolmayman. 8Ol qolınan kelgenin isledi. Meniń deneme aldın ala átir may quyıp, onı jerlewge tayarladı. 9Sizlerge shının aytıp turman: Xosh Xabar dúnyanıń qay jerinde járiyalansa da, bul hayal eske alınıp, onıń islegen isi aytılatuǵın boladı, – dedi.

Yahudanıń satqınlıǵı

(Mat 26:14-16; Luk 22:3-6)

10Sońınan on eki shákirttiń biri bolǵan Yahuda Isqariot Iysanı uslap beriw ushın bas ruwxaniylerge bardı. 11Olar bunı esitip, quwanısıp qaldı hám oǵan gúmis teńge beriwdi wáde etti. Yahuda da Iysanı uslap beriwge qolaylı payıt izledi.

Iysanıń Óz shákirtleri menen Qutqarılıw bayramınıń asın jewi

(Mat 26:17-25; Luk 22:7-13; Yuxn 13:21-30)

12Ashıtqısız nan bayramınıń birinshi kúni Qutqarılıw bayramınıń qozısı shalınǵanda, shákirtleri Iysaǵa:

– Qutqarılıw bayramınıń asın jewiń ushın, bizlerdiń qay jerge barıp tayarlıq kóriwimizdi qáleyseń? – dedi.

13Ol shákirtleriniń ekewin jiberip, olarǵa:

– Qalaǵa barıńlar, ol jerde sizlerge gúze menen suw kóterip kiyatırǵan adam gezleskende, onıń izine erińler. 14Ol kirgen úydiń iyesine: «Ustazımız: „Shákirtlerim menen birge bayram asın jeytuǵın bólmem qáne?“ – dep sorap atır», deńler. 15Ol sizlerge tósekler tóselip tayar turǵan joqarıdaǵı úlken bólmeni kórsetedi. Bizlerge sol jerde bayram asın tayarlańlar, – dedi.

16Shákirtleri shıǵıp, qalaǵa keldi hám Iysanıń aytqanlarınıń hámmesin tawıp, bayram asın tayarladı.

17Kesh bolǵanda, Iysa on eki shákirti menen birge keldi. 18Olar awqatlanıp otırǵanda, Iysa:

– Sizlerge shının aytıp turman: Meniń menen awqatlanıp otırǵan arańızdaǵı birińiz Maǵan satqınlıq isleydi, – dedi.

19Olar qapa bolıp, birinen soń biri Onnan:

– Men emespen-ǵo, ya? – dep soray basladı.

20Iysa olarǵa juwap berip:

– On eki shákirtimniń biri, Meniń menen bir tabaqqa nanın malıp atırǵan adam – sol. 21Adam Ulı Ózi haqqında Muxaddes Jazıwda aytılǵanday baratır, biraq Adam Ulına satqınlıq qılıwshı hásiret shegedi! Ol adamnıń bul dúnyaǵa kelmegeni ózi ushın jaqsıraq bolar edi, – dedi.

Iysanıń sońǵı keshesi

(Mat 26:26-30; Luk 22:14-23; 1Kor 11:23-25)

22Olar awqatlanıp otırǵanda, Iysa nandı alıp, Qudayǵa shúkirlik etti. Onı sındırıp, shákirtlerine berdi de:

– Alıńlar, bul – Meniń denem, – dedi.

23Soń keseni alıp, Qudayǵa shúkirlik bildirdi de, olarǵa berdi. Onnan hámmesi ishti. 24Olarǵa:

– Bul – kóp adamlar ushın tógiletuǵın, jańa kelisimdi bekitetuǵın Meniń qanım. 25Sizlerge shının aytıp turman: Qudaydıń Patshalıǵında jańasın ishetuǵın kúnime deyin, júzim ishimliginen qaytıp ishpeymen, – dedi.

26Sońınan olar Qudaydı jırlaytuǵın qosıq aytıp, Záytún tawına ketti.

Petrdiń Iysadan tanıwı haqqında

(Mat 26:31-35; Luk 22:31-34; Yuxn 13:36-38)

27Iysa olarǵa:

– Sizlerdiń hámmeńiz Meni taslap ketesizler. Óytkeni Muxaddes Jazıwda bılay dep aytılǵan:

«Shopandı shawıp taslaǵanımda,

Qoylar tarqap ketedi»#14:27 Zxr 13:7..

28Biraq qayta tirilgenimnen keyin, sizlerden burın Galilaǵa baraman, – dedi.

29Petr Oǵan:

– Seni hámmesi taslap ketse de, men taslap ketpeymen, – dedi.

30Sonda Iysa oǵan:

– Saǵan shının aytıp turman: búgin túnde qoraz eki ret shaqıraman degenshe, sen Mennen úsh ret tanasań, – dedi.

31Biraq Petr qızıp ketip:

– Maǵan Seniń menen birge óliwge tuwra kelse de, Sennen hesh qashan tanbayman, – dedi.

Qalǵanlarınıń hámmesi de solay dedi.

Iysanıń Getsemanide duwa etiwi

(Mat 26:36-46; Luk 22:39-46)

32Olar Getsemani dep atalatuǵın jerge keldi. Iysa shákirtlerine:

– Men duwa etip bolaman degenshe, sizler usı jerde otırıńlar, – dedi.

33Petr, Yaqıp hám Yuxandı Ózi menen birge alıp ketti. Ol qattı qáweterlenip, qıynala basladı. 34Olarǵa:

– Janım ólerdey qıynalıp tur. Sizler usı jerde qalıp, sergek bolıp turıńlar, – dedi.

35Iysa biraz shetirekke barıp, jerge jıǵıldı da, múmkin bolsa bul saattıń Ózinen shetlep ótiwin sorap, duwa ete basladı.

36– Áke, Ákejanım! Saǵan hámmesi múmkin. Bul azap kesesin Mennen awlaq qıl. Biraq Meniń emes, Seniń qálegeniń bolsın, – dedi.

37Iysa shákirtleriniń qasına qaytıp kelip, olardıń uyıqlap atırǵanın kórdi de, Petrge:

– Shimon, uyıqlap atırsań ba? Uyıqlamay bir saat ta otıra almadıń ba? 38Sergek bolıńlar! Azǵırılmawıńız ushın duwa etińler. Ruwx qáleydi, biraq dene hálsiz, – dedi.

39Ol jáne barıp, sol sózlerin aytıp, duwa etti. 40Qaytıp kelip, olardıń jáne uyıqlap atırǵanın kórdi. Óytkeni kózlerin uyqı basqan edi. Olar Iysaǵa ne dep juwap bererin bilmedi.

41Iysa úshinshi ret qaytıp kelip, olarǵa:

– Sizler ele uyıqlap, dem alıp atırsızlar ma? Boldı, waqıt keldi. Adam Ulı gúnakarlardıń qolına uslap beriledi. 42Turıńlar, kettik. Qarańlar, Maǵan satqınlıq qılıwshı jaqınladı, – dedi.

Iysanıń qolǵa alınıwı

(Mat 26:47-56; Luk 22:47-53; Yuxn 18:3-12)

43Tap sol waqıtta, Iysa ele sóylep turǵanda, on eki shákirtiniń biri Yahuda keldi. Onıń menen birge bas ruwxaniyler, diniy muǵallimler hám aqsaqallar jibergen bir topar adamlar bar edi. Adamlar qollarına qılısh hám shoqmar uslaǵan edi. 44Satqınlıq qılıwshı olarǵa belgi berip: «Men kimdi súysem, Ol – Sonıń Ózi. Onı uslap, abaylap alıp ketińler», – degen edi.

45Yahuda keldi de, dárriw Iysaǵa jaqınlasıp, Oǵan:

– Ustaz! – dep, Onı súydi.

46Al adamlar Iysaǵa táp berip, uslap aldı. 47Biraq Iysanıń qasında turǵanlardıń birewi qılıshın suwırıp alıp, bir siltep, bas ruwxaniydiń qulınıń qulaǵın shawıp tasladı. 48Sonda Iysa olarǵa:

– Meni uslaw ushın, jınayatshıǵa qarsı shıqqanday bolıp, qılısh hám shoqmar alıp keldińler me? 49Men hár kúni sizler menen Ibadatxanada birge bolıp, tálim bergenimde, Meni uslamadıńlar. Biraq, Muxaddes Jazıwlar orınlanıwı shárt, – dedi.

50Sonda shákirtleriniń hámmesi Onı taslap, qashıp ketti.

51Denesine zıǵır tawar oraǵan bir jas jigit Onıń izine erip baratır edi. Olar onı uslap alǵanda, 52ol oranǵan tawarın taslap, ishki kiyim menen qashıp ketti.

Iysa joqarǵı keńes aldında

(Mat 26:57-68; Luk 22:54-55, 63-71; Yuxn 18:13-14, 19-24)

53Olar Iysanı bas ruwxaniyge apardı. Ol jerge hámme bas ruwxaniyler, aqsaqallar hám diniy muǵallimler jıynaldı. 54Petr Iysaǵa bas ruwxaniydiń háwlisiniń ishine deyin uzaqtan erip kelip, háwlide saqshılar menen birge otqa jılınıp otırdı. 55Bas ruwxaniyler hám pútkil joqarǵı keńes Iysanı ólim jazasına húkim etiw ushın, Oǵan qarsı gúwalıq izledi, biraq taba almadı.

56Sebebi kóp adamlar Oǵan qarsı jalǵan gúwalıqlar berse de, gúwalıqları bir-birine sáykes kelmes edi.

57Sońınan geybirewler ornınan turıp, Oǵan qarsı jalǵan gúwalıq berip:

58– Bizler Onıń: «Adam qolınan qurılǵan bul Ibadatxananı Men buzıp taslayman hám úsh kúnniń ishinde adam qolınan qurılmaǵan basqa Ibadatxana quraman», – degenin esittik, – dedi.

59Biraq olardıń gúwalıǵı da sáykes kelmedi.

60Sonda bas ruwxaniy ortaǵa shıǵıp, Iysadan:

– Olar Saǵan qarsı gúwalıq berip atır. Sen nege hesh juwap bermeyseń? – dep soradı.

61Biraq Iysa úndemedi hám hesh juwap qaytarmadı. Bas ruwxaniy Onnan jáne:

– Alǵıslanǵannıń Ulı – Masiyx Senbiseń? – dep soradı.

62Iysa:

– Awa, Men. Sizler Adam Ulınıń Qúdiretliniń oń jaǵında otırǵanın#14:62 Zab 109:1. hám aspandaǵı bultlarda kiyatırǵanın kóresizler#14:62 Dan 7:13., – dedi.

63Sonda bas ruwxaniy óz kiyimlerin jırtıp:

– Endi bizlerge gúwalardıń ne keregi bar? 64Qudayǵa til tiygizgenin esittińler-ǵo. Sizlerdiń qararıńız qanday? – dedi.

Olardıń hámmesi Iysanı ólim jazasına húkim etiwge qarar etti.

65Geybirewler Oǵan túkire basladı hám betin baylap, Onı mushlap urdı da, Oǵan:

– Qánekey, wáliylik et, – desti.

Saqshılar da Onı shapalaq penen urdı.

Petrdiń Iysadan tanıwı

(Mat 26:69-75; Luk 22:56-62; Yuxn 18:15-18, 25-27)

66Petr ishki háwlide otırǵanda, bas ruwxaniydiń shorı qızlarınan biri keldi. 67Ol otqa jılınıp otırǵan Petrdi kórip, oǵan tigilip qaradı da:

– Sen de sol nasıralı Iysa menen birge ediń-ǵo, – dedi.

68Biraq Petr tanıp:

– Seniń ne aytıp turǵanıńdı bilmeymen hám túsinbeymen, – dedi de, sırtqı háwlige shıǵıp ketti#Mrk 14:68 Bazı qoljazbalarda mına sózler de bar: «Sol waqıtta qoraz shaqırdı»..

69Shorı qız onı kórip, sol jerdegilerge jáne:

– Bul adam – solardıń biri, – dep ayta basladı.

70Biraq Petr jáne tandı.

Birazdan soń, sol jerde turǵanlar Petrge:

– Írasında da, sen solardıń biriseń, óytkeni galilalısań-ǵo#Mrk 14:70 Bazı qoljazbalarda mına sózler de bar: «Seniń sóylewiń júdá uqsas»., – dedi.

71Ol:

– Sizler aytıp turǵan bul Adamdı men tanımayman, aldasam nálet jawsın, – dep ant ishti.

72Sol waqıtta-aq qoraz ekinshi ret shaqırdı. Petr Iysanıń ózine: «Qoraz eki ret shaqıraman degenshe, sen Mennen úsh ret tanasań», – degen sózi esine túsip, jılap jiberdi.

Currently Selected:

Mark 14: QrqMK22

Highlight

Copy