Mark 13

Iysanıń Ibadatxananıń qıyralıwın boljawı

(Mat 24:1-14; Luk 21:5-19)

1Iysa Ibadatxanadan shıqqanda, shákirtleriniń biri:

– Ustaz, qara, qanday ájayıp taslar, qanday ájayıp imaratlar! – dedi.

2Iysa oǵan:

– Mına sawlatlı imaratlardı kórip tursań ba? Bul jerde tas ústinde tas qalmaydı, hámmesi qıyratıladı, – dedi.

3Sońınan Iysa Záytún tawında, Ibadatxananıń qarsı aldında otırǵanda, Petr, Yaqıp, Yuxan hám Andrey awlaqta Onnan:

4– Bizlerge ayt, bular qashan boladı hám bulardıń hámmesiniń bolatuǵının qanday belgi bildiredi? – dep soradı.

5Sonda Iysa olarǵa bılay dep ayta basladı:

– Birewlerdiń sizlerdi aldawınan saq bolıńlar! 6Óytkeni kópler Meniń atım menen kelip: «Men – Masiyxpan» dep, kóp adamlardı aldaydı. 7Sizler urıslardıń shawqımın hám urıslar haqqında mısh-mıshlardı esitkende qáweterlenbeńler. Bulardıń bolıwı shárt, biraq bul ele aqırı emes. 8Sebebi millet milletke qarsı, patshalıq patshalıqqa qarsı kóteriledi. Kóp jerlerde jer silkiniwler hám asharshılıqlar boladı. Bul waqıyalar tolǵaq azabınıń baslanıwına uqsaydı.

9Ózlerińizge saq bolıńlar! Óytkeni sizlerdi qazıxanalarǵa tapsıradı hám májilisxanalarda tayaq jeysizler. Jáne de, Men sebepli hákimler hám patshalardıń aldına aparılıp, olarǵa gúwalıq beresizler. 10Biraq dáslep Xosh Xabar hámme xalıqlarǵa járiyalanıwı shárt. 11Sizlerdi uslap alıp, húkim etiwge aparatırǵanda, ne aytıwdı oylap, aldın ala tınıshsızlanbańlar. Sol waqıtta sizlerge ne berilse, sonı aytıńlar. Sebebi sizler emes, al Muxaddes Ruwx sóyleydi. 12Tuwısqanı tuwısqanın, ákesi balasın ólimge uslap beredi. Balaları da ata-analarına qarsı shıǵıp, olardı óltirtedi. 13Meniń atım sebepli, sizlerdi hámme jek kóredi. Biraq aqırına deyin shıdaǵan qutqarıladı.

Eń ullı apat

(Mat 24:15-21; Luk 21:20-24)

14– Wayran qılatuǵın jerkenishli bir zattıń turıwǵa bolmaytuǵın jerde turǵanın kórgenińizde#13:14 Dan 9:27; 11:31; 12:11., Yahudiyadaǵılar tawlarǵa qashsın! Payǵambardıń jazıwın oqıǵan adam bul zattıń mánisin túsinsin. 15Kim de kim tamnıń tóbesinde bolsa, tómenge túspesin hám bir nárse alıw ushın úyine kirmesin. 16Al kim de kim atızda bolsa, shapanın alıw ushın izine qaytpasın. 17Sol kúnleri júkli hám emiziwli hayallarǵa qanday qıyın boladı! 18Bulardıń qıs máwsiminde bolmawı ushın duwa etińler. 19Óytkeni sol kúnleri Quday bul dúnyanı jaratqannan beri usı kúnge deyin bolmaǵan hám qaytıp bolmaytuǵın apat boladı. 20Eger Iyemiz sol kúnlerdiń sanın qısqartpaǵanda, hesh kim qutqarılmaǵan bolar edi. Biraq Ol Óziniń tańlap alǵanları ushın, sol kúnlerdiń sanın qısqarttı.

21Sonda eger sizlerge birew: «Qarańlar, Masiyx bul jerde» yamasa: «Qarańlar, Ol ana jerde» dese, isenbeńler. 22Óytkeni jalǵan masiyxlar hám jalǵan payǵambarlar payda bolıp, eger múmkin bolsa, tańlap alınǵanlardı aldaw ushın, káramatlı belgiler hám tań qalarlıq islerdi kórsetedi. 23Sonlıqtan saq bolıńlar! Men hámmesin sizlerge aldın ala aytıp atırman.

Adam Ulınıń qayta keliwi

(Mat 24:29-31; Luk 21:25-28)

24– Biraq sol kúnleri, sol apattan keyin,

«Quyash qarańǵılanadı,

Ay óz jaqtısın túsirmeydi.

25Juldızlar aspannan túsip,

Aspan kúshleri silkinedi»#13:25 Iysh 13:10; 34:4..

26Sonda adamlar Adam Ulınıń ullı qúdiret hám saltanat penen bultlarda kiyatırǵanın#13:26 Dan 7:13. kóredi. 27Ol Óz perishtelerin jiberip, dúnyanıń tórt tárepinen, jerdiń shetinen baslap aspannıń shetine deyin, Óziniń tańlap alǵanların jıynap keledi.

Ánjir aǵashın mısalǵa alıńlar!

(Mat 24:32-35; Luk 21:29-33)

28– Ánjir aǵashın mısalǵa alıńlar: onıń shaqaları jumsarıp, japıraq shıǵara baslaǵanda, jazdıń jaqın ekenin bilesizler. 29Sol sıyaqlı, sizler bul waqıyalardıń bolıp atırǵanın kórgenińizde, Adam Ulınıń jaqınlap, esik aldında turǵanın bilińler. 30Sizlerge shının aytıp turman: bul áwlad joq bolıp ketpesinen burın bulardıń hámmesi boladı. 31Aspan menen jer joyıladı, biraq Meniń sózlerim hesh qashan joyılmaydı.

Sol kúndi yamasa sol saattı hesh kim de bilmeydi

(Mat 24:36-44)

32– Sol kúndi yamasa sol saattı hesh kim de bilmeydi: aspandaǵı perishteler de, Uldıń Ózi de, tek ǵana Ákem biledi. 33Abaylańlar hám sergek bolıńlar#Mrk 13:33Bazı qoljazbalarda «…hám duwa etińler» degen sózler de bar., óytkeni sol waqıttıń qashan keletuǵının bilmeysizler. 34Bul – bir adamnıń sayaxatqa ketip baratırıp, úyindegi xızmetshilerine basqarıwǵa biylik bergeni hám hár birine is tapsırıp, dárwaza qarawılına sergek bolıwdı buyırǵanına uqsaydı. 35Solay etip, sergek bolıńlar! Sebebi úy iyesiniń keshte me, yarım aqshamda ma, qoraz shaqırǵanda ma, erte azanda ma, qashan keletuǵının bilmeysizler. 36Ol kútilmegende kelip, sizlerdiń uyıqlap atırǵanıńızdı kórmesin. 37Sizlerge aytatuǵınımdı hámmege aytaman: sergek bolıńlar!

Currently Selected:

Mark 13: QrqMK22

Highlight

Copy