Mark 12

Jawız diyxanlar haqqında tımsal

(Mat 21:33-46; Luk 20:9-19)

1Iysa olarǵa tımsallar menen sóyley basladı:

– Bir adam júzim baǵın otırǵızıp, onı diywal menen qorshaptı hám sharap iskenjesin qazıp, gúzet minarasın ornatıptı. Sońınan baǵın diyxanlarǵa ijaraǵa berip, ózi uzaq jerge ketip qalıptı. 2Terim máwsimi kelgende, ol baǵdıń jemisinen tiyisli úlesin alıw ushın, diyxanlarǵa óziniń bir xızmetshisin jiberipti. 3Biraq olar xızmetshini uslap alıp sabap, qurı qol qaytarıptı. 4Ol jáne olarǵa basqa xızmetshisin jibergende, onıń basın jarıp, biyabıray qılıptı. 5Sonda ol jáne basqa bir xızmetshisin jibergende, olar onı óltiripti. Ol jáne de kóp basqa xızmetshilerin jibergende, geybirewlerin sabap, geybirewlerin óltiripti. 6Endi bir ǵana adam, onıń súyikli ulı qalıptı. Eń aqırında ol: «Ulımdı húrmet eter» dep, olarǵa óz ulın jiberipti. 7Biraq diyxanlar bir-birine: «Bul – miyrasxor-ǵo. Júrińler, onı óltireyik, sonda miyras múlki bizlerge qaladı», – desipti. 8Solay etip, onı uslap alıp óltirip, júzim baǵınan sırtqa shıǵarıp taslaptı.

9Endi júzim baǵınıń iyesi ne isleydi? Ol kelip, diyxanlardı joq qıladı da, júzim baǵın basqalarǵa beredi. 10Sizler Muxaddes Jazıwdaǵı mına sózlerdi oqımaǵansızlar ma:

«Qurılısshılardıń kereksiz dep taslaǵan tası,

Úydiń múyeshiniń tiykarǵı tası boldı.

11Jaratqan Iye qılǵan bul is,

Kózimizge ájayıp kórindi!»#12:10-11 Zab 117:22-23.

12Olar bul tımsaldıń ózlerine qarsı aytılǵanın bilip, Iysanı qolǵa alıwǵa tırıstı. Biraq xalıqtan qorqqanlıqtan Onı qaldırıp, ketip qaldı.

Salıq tólew tuwralı

(Mat 22:15-22; Luk 20:20-26)

13Sońınan olar Iysanı sózinen tutıw ushın, pariseylerdiń hám Hirodtıń tárepdarlarınıń geybirewlerin Oǵan jiberdi. 14Olar Iysaǵa kelip:

– Ustaz! Bizler Seniń durıs adam ekenińdi hám jaǵımpazlıq etpeytuǵınıńdı bilemiz. Óytkeni Sen adamlardıń bet-júzine qaramay, Qudaydıń jolın durıs úyretip otırsań. Rim imperatorına salıq tólew durıs pa yamasa nadurıs pa? Tólewimiz kerek pe yamasa kerek emes pe? – dep soradı.

15Biraq Iysa olardıń eki júzliligin bilip:

– Meni nege sınap atırsızlar? Maǵan bir dinar ákelińler, kóreyin, – dedi.

16Olar alıp kelgende, Ol:

– Bunda kimniń súwreti bar hám kimniń atı jazılǵan? – dep soradı.

Olar:

– Rim imperatorınıń, – dedi.

17Sonda Iysa olarǵa juwap berip:

– Imperatordıń haqın imperatorǵa, Qudaydıń haqın Qudayǵa berińler, – dedi.

Olar Oǵan tań qalıstı.

Qayta tiriliw haqqında soraw

(Mat 22:23-33; Luk 20:27-40)

18Sońınan qayta tiriliw joq dewshi saddukeylerdiń#12:18 Saddukeyler – Iysanıń zamanında yahudiy xalqınıń kúshli diniy toparı. bir neshesi Iysaǵa kelip Onnan:

19– Ustaz! Muwsa bizlerge: «Eger birewdiń aǵası balasız ólip, hayalın qaldırsa, inisi onıń hayalın alıp, óz aǵasınıń urpaǵın dawam ettirsin»,#12:19 Nzm 25:5-6. – dep jazıp qaldırǵan. 20Aǵayinli jeti jigit bar edi. Olardıń birinshisi úylenip, izinde bala qaldırmay ólip ketti. 21Sol hayaldı ekinshisi alıp, ol da izinde bala qaldırmay ólip ketti. Úshinshisine de solay boldı. 22Jeti aǵayinliniń hesh qaysısı da izinde bala qaldırmastan ólip ketti. Eń sońında hayaldıń ózi de qaytıs boldı. 23Olar qayta tirilgende, hayal qaysısınıń hayalı boladı? Sebebi ol jetewine de hayal bolǵan edi-ǵo, – dep soradı.

24Iysa olarǵa juwap berip:

– Sizler Muxaddes Jazıwlardı da, Qudaydıń qúdiretin de bilmegenlikten aljasıp tursızlar. 25Óytkeni adamlar ólimnen qayta tirilgende úylenbeydi de, turmısqa da shıqpaydı, al aspandaǵı perishteler sıyaqlı boladı. 26Ólgenlerdiń qayta tiriliwi tuwralı Muwsanıń kitabında, janıp turǵan puta haqqında aytılǵan waqıyada Qudaydıń ne aytqanın oqımaǵansızlar ma? Quday Muwsaǵa: «Men – Ibrayımnıń Qudayıman, Ísaqtıń Qudayıman, Yaqıptıń Qudayıman»#12:26 Shıǵ 3:6., – degen. 27Quday ólilerdiń emes, al tirilerdiń Qudayı. Sizler qattı aljasıp tursızlar, – dedi.

Eń baslı buyrıq

(Mat 22:34-40; Luk 10:25-28)

28Diniy muǵallimlerdiń biri olardıń tartısların esitti. Iysanıń olarǵa jaqsı juwap bergenin kórip, Onnan:

– Buyrıqlardıń ishinde eń baslısı qaysı? – dep soradı.

29Iysa oǵan:

– Eń baslı buyrıq bul: «Qulaq sal, Izrail! Qudayımız Jaratqan Iye – jalǵız Iye. 30Qudayıń Jaratqan Iyeni shın júregiń, jan-tániń, pútkil aqıl-oyıń hám bar kúshiń menen súy»#12:29-30 Nzm 6:4-5.. 31Ekinshisi mınaday: «Ózińdi súygeniń sıyaqlı, janıńdaǵı adamdı da súy»#12:31 Leb 19:18.. Bulardan ullı buyrıq joq, – dedi.

32Diniy muǵallim Oǵan:

– Awa, Ustaz! «Quday – jalǵız, Onnan basqa quday joq», – dep durıs ayttıń. 33Qudaydı pútkil júregiń, pútkil aqılıń, pútkil kúshiń menen súyiw hám ózińdi súygeniń sıyaqlı, janıńdaǵı adamdı da súyiw – hámme jandırılatuǵın qurbanlıqlardan hám Quday jolına berilgen sadaqalardan artıq, – dedi.

34Iysa onıń aqılǵa say juwap bergenin kórip:

– Sen Qudaydıń Patshalıǵınan alıs emesseń, – dedi.

Sonnan soń, Oǵan soraw beriwge hesh kimniń batılı barmadı.

Masiyx kimniń Urpaǵı?

(Mat 22:41-46; Luk 20:41-44)

35Iysa Ibadatxanada adamlarǵa tálim berip atırıp:

– Qalayınsha diniy muǵallimler Masiyxtı Dawıttıń Urpaǵı deydi? 36Dawıttıń ózi Muxaddes Ruwxtan ilhamlanıp, bılay degen:

«Jaratqan Iye Iyeme ayttı:

„Dushpanlarıńdı ayaǵıńnıń astına bastırmaǵanımsha,

Meniń oń jaǵımda otır!“»#12:36 Zab 109:1.

37Dawıttıń ózi Onı «Iyem» dep ataǵan bolsa, Ol qalayınsha onıń urpaǵı boladı? – dep soradı.

Kóp xalıq Onı quwanısh penen tıńladı.

Diniy muǵallimler haqqında

(Mat 23:1-36; Luk 20:45-47)

38Iysa tálim berip:

– Diniy muǵallimlerden saq bolıńlar! Olar uzın kiyim kiyip júrgendi, bazar maydanlarında ózlerine sıylap sálem bergendi, 39májilisxanalarda sıylı orında, zıyapatlarda tórde otırǵandı jaqsı kóredi. 40Olar jesir hayallardıń úylerin jalmap jutıp, kózge kóriniw ushın uzaq duwa etedi. Bunday adamlar eń awır jaza aladı, – dedi.

Jesir hayaldıń sadaqası

(Luk 21:1-4)

41Iysa Ibadatxanadaǵı sadaqa qutısınıń qarsısında xalıqtıń qutıǵa aqsha salıwına qarap otırdı. Baylardıń kóbisi kóp aqsha saldı. 42Sonda bir jarlı jesir hayal kelip, eki tiyin saldı. 43Iysa shákirtlerin qasına shaqırıp alıp:

– Sizlerge shının aytıp turman: bul jarlı jesir hayal qutıǵa aqsha salǵanlardıń hámmesinen kóp saldı. 44Sebebi olardıń hámmesi óz baylıqlarınan awısqanın saldı. Al bul hayal jarlı bolsa da, kún kórisine kerekli barlıq aqshasın saldı, – dedi.

Currently Selected:

Mark 12: QrqMK22

Highlight

Copy