Mark 11
11
Iysanıń Erusalimge saltanatlı túrde kiriwi
(Mat 21:1-11; Luk 19:28-40; Yuxn 12:12-19)
1Olar Erusalimge jaqınlap, Záytún tawınıń etegindegi Betfage hám Betaniya degen awıllarǵa kelgende, Iysa shákirtleriniń ekewin jumsap, 2olarǵa bılay dedi:
– Qarsı aldıńızdaǵı awılǵa barıńlar. Oǵan kiriwden-aq, ele hesh kim minbegen, baylawlı turǵan bir gúrreni tabasızlar. Onı sheship, alıp kelińler. 3Eger birew sizlerden: «Nege bunday islep atırsızlar?» – dep sorasa, sizler: «Bul Iyemizge kerek. Ol bunı tez qaytarıp jiberedi», – dep juwap berińler.
4Olar barıp, kóshedegi dárwaza qasında baylanǵan gúrreni taptı hám onı sheship aldı. 5Sol jerde turǵan geybirewler olarǵa:
– Gúrreni sheship alıp ne qılajaqsızlar? – dep soradı.
6Olar Iysanıń aytqanınday juwap bergende, adamlar olarǵa ruxsat berdi. 7Gúrreni Iysaǵa alıp kelip, ózleriniń shapanların onıń ústine japtı, Iysa gúrrege minip aldı. 8Kóp adamlar shapanların jolǵa tósep, al geybirewler daladaǵı tereklerden shaqa kesip alıp, jolǵa jaydı. 9Aldında hám izde erip kiyatırǵanlar bılay dep baqırıstı:
– «Hosanna!#11:9 Hosanna! – «Qutqara gór!» degen mániste. Qudaydı alǵıslaǵanda aytıladı.
Jaratqan Iyeniń atı menen keletuǵın jarılqansın!
10Babamız Dawıttıń jaqınlap kiyatırǵan Patshalıǵı jarılqanǵan!
Eń joqarıda hosanna!»#11:9-10 Zab 117:25-26.
11Iysa Erusalimge kelip, Ibadatxanaǵa kirdi. Ol jerde hámme nárseni kózden keshirip bolıp, kesh bolǵanlıqtan, on eki shákirti menen Betaniyaǵa ketti.
Iysanıń ánjir aǵashın ǵarǵawı
(Mat 21:18-19)
12Kelesi kúni olar Betaniyadan shıqqanda, Iysa ash boldı. 13Ol alıstan japıraqları menen qaplanǵan bir ánjir aǵashın kórip, onnan bir nárse tabılar ma eken dep, qasına bardı. Biraq jemis beretuǵın waqtı bolmaǵanlıqtan, japıraqlarınan basqa hesh nárse tappadı. 14Sonda Ol aǵashqa:
– Bunnan bılay, máńgige seniń miyweńnen hesh kim jemesin! – dedi.
Bunı shákirtleri de esitti.
Iysanıń Ibadatxanadan satıwshılardı quwıwı
(Mat 21:12-17; Luk 19:45-48; Yuxn 2:13-22)
15Olar Erusalimge kelgende, Iysa Ibadatxanaǵa kirip, ol jerden satıwshılar menen alıwshılardı quwıp shıǵara basladı. Aqsha almastırıwshılardıń stolların, kepter satıwshılardıń otırǵıshların awdarıp tasladı 16hám Ibadatxananıń háwlisi arqalı hesh kimge hesh nárse alıp ótiwge ruxsat etpedi.
17Sońınan xalıqqa tálim berip:
– «Meniń Úyim hámme xalıqlar ushın,
Duwa etetuǵın úy dep ataladı»#11:17 Iysh 56:7., –
dep jazılmaǵan ba? Al sizler onı qaraqshılardıń uyasına aylandırdıńlar#11:17 Erm 7:11., – dedi.
18Bas ruwxaniyler hám diniy muǵallimler bunı esitip, Onı joq qılıwdıń jolın izledi. Óytkeni pútkil xalıq Iysanıń tálimine tań qalısqanlıqtan, olar Onnan qorqatuǵın edi.
19Kesh bolǵanda, Iysa shákirtleri menen qaladan shıǵıp ketti.
Quwrap qalǵan ánjir aǵashı
(Mat 21:20-22)
20Olar erte azanda ótip baratırıp, ánjir aǵashınıń tamırına deyin quwrap qalǵanın kórdi. 21Petr bolǵan waqıyanı esine túsirip, Iysaǵa:
– Ustaz! Qara, Sen ǵarǵaǵan ánjir aǵashı quwrap qalıptı, – dedi.
22Iysa olarǵa juwap berip:
– Qudayǵa isenińler. 23Sizlerge shının aytıp turman: eger kim de kim bul tawǵa: «Ornıńnan kóterilip, teńizge qula», – dese hám kewlinde gúmanlanbay, aytqanınıń orınlanatuǵınına isense, onıń aytqanı orınlanadı. 24Sonlıqtan sizlerge aytatuǵınım: duwa etkenińizde neni sorasańlar da, alǵanıńızǵa iseniń, sonda ol sizlerge beriledi. 25Duwa etip turǵanıńızda, birewge ókpeli bolsańız, onı keshiriń, sonda aspandaǵı Ákeńiz de sizlerdiń gúnalarıńızdı keshiredi, – dedi. [26#Mrk 11:26Bazı qoljazbalarda 26-ayat ta bar: «Eger sizler basqalardıń gúnaların keshirmeseńler, aspandaǵı Ákeńiz de sizlerdiń gúnalarıńızdı keshirmeydi».]
Iysanıń biyligi haqqında soraw
(Mat 21:23-27; Luk 20:1-8)
27Olar jáne Erusalimge keldi. Iysa Ibadatxananıń háwlisinde aylanıp júrgende, Oǵan bas ruwxaniyler, diniy muǵallimler hám aqsaqallar kelip, 28Onnan:
– Bul islerdi qanday biylik penen islep júrseń hám bunday biylikti Saǵan kim berdi? – dep soradı.
29Iysa olarǵa juwap berip:
– Men de sizlerge bir soraw bereyin, juwap berińler. Sonda Men de bul islerdi qanday biylik penen isleytuǵınımdı aytaman. 30Yaqıyanıń shomıldırıwı aspannan boldı ma yamasa adamlardan ba? Juwap berińler, – dedi.
31Olar óz ara oylasa basladı: «Eger „aspannan“ desek, Ol: „Sonda nege oǵan isenbedińler“, deydi. 32„Adamlardan“ deyik pe?»
Biraq onday dewge xalıqtan qorqtı, sebebi hámme Yaqıyanı haqıyqıy payǵambar dep sanaytuǵın edi. 33Sonlıqtan olar Iysaǵa:
– Bilmeymiz, – dep juwap berdi.
Iysa olarǵa:
– Onday bolsa, Men de sizlerge bul islerdi qanday biylik penen isleytuǵınımdı aytpayman, – dedi.
Currently Selected:
Mark 11: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
