मर्कूस 7

रितीरिवाजके विषयमे शिक्षा

(मत्ती १५:१-९)

1एक दिन यरूशलेम सहरसे ऐल फरिसी समूहके आदमी आर यहूदी धरमशास्त्रके पण्डितसब येशूके बात सुनैले चारो बगल जमा भेलै। 2ऊसब देखल्कै ओकर कुछु चेलासब एरंको हातसे खाना खैते रहै जे साफ नैरहै, जकर मतलब यी छै कि ऊसब यहूदी रितीरिवाजके मुताबिक आपन हात नै धोयल्कै रहे। 3फरिसी समूहके आदमीसब आर बाँकी सभे यहूदी आदमीसब भी खाना खैसे पहेला सभे समय पूर्वजसिके रितीरिवाजके मुताबिक आपन हात धुवैछै। 4बजारसे ऐलके बाद, ऊसब खाना खैसे पहेला आपन हातके खास रितीरिवाजके मुताबिक धुवैछै। ओकरसिके पूर्वजसिके आरहौ कतनें रितीरिवाज छै जकरा ऊसब मानैछै जेरं कि बाटी, पानीके घैल आर फूलके बर्तनसब धुएवाला रितीरिवाज। 5सेल्याके फरिसी समूहके आदमीसब आर यहूदी धरमशास्त्रके पण्डितसब ओकरा पुछल्कै, “तोर चेलासब हमरसिके पूर्वजके द्वारा सिखैल रितीरिवाजके पालन कहिने नैकरैछौं?” ऊसब अशुद्ध छै कहिनेकी ऊसब खाना खैसे पहेला आपन हात नैधुवैछै! 6येशू ओकरासिके जबाब देल्कै, “परमेश्वरके वक्ता यशैया तुहें ढोंगीसिके विषयमे बिलकुल ठीक भविष्यवाणी कैल्कै छै, ऊ एरं लिखल्कै रहे:

‘तुहेंसब हमर विषयमे बढियाँ बोलैछैं,

मगर वास्तवमे तुहेंसब हमरा प्रेम नैकरैछैं।

7एकरसिके द्वारा हमरा करेवाला आराधना व्यर्थ छै

कहिनेकी ऊसब आदमीसिके आदमीके बनैल आज्ञापालन करैले सिखाबैछै जेरं कि यी हमर आज्ञा छै।’ ”

8“तुहेंसब परमेश्वरके आज्ञापालन करैले बन्द करि देल्हैं छे आर आदमीसिके शिक्षा पालन करैछैं।” 9ऊ ओकरासिके कहैल्कै, “तुहेंसब आपन रितीरिवाजके अनुसरण करैके लिए परमेश्वरके आज्ञाके अनदेखा करिदैछैं! 10जेरं कि मूसा कहैल्कै छे,

‘आपन मयाँ-बाबुके आदर कर, आर जे मयाँ-बाबुके विरुद्धमे खराब बात बोलैछै ओकरा मरे पड्तै।’

11-12मगर तुहेंसब आदमीसिके सिखाबैछैं कि, अगर कोय आपन मयाँ-बाबुके कहैछै कि, ‘हमे तोर सहायता करे नैसकैछिहौं कहिनेकी हमे तोरा जे देतिहौं उटा हमे परमेश्वरके दियैके कसम खैलियै छे। सेल्याके यी बलिदान खाली परमेश्वरके लिए छै।’ आर फेर तखनसे, तुहेंसब उटा आदमीके ओकर मयाँ-बाबुके सहायता करैके अनुमति नैदैछैं। जेरं कि परमेश्वरके आज्ञा सिखाबैछै। 13एरंके, तुहेंसब धरमशास्त्रके परमेश्वरके आज्ञासिके उलंघन करैछैं, जे आज्ञा मूसा तोरासिके देल्कौ, ताकी उटा रितीरिवाजके पालन करे सक्हैं, जेटा पूर्वजसिके द्वारा तोरासिके सौंप्ल गेलौ छे। आर तुहेंसब एरंको बहुते किसिमके खराब काम करैछैं।”

आदमीसिके अशुद्ध बनाबेवाला बातसब

(मत्ती १५:१०-२०)

14येशू आदमीसिके फेर आपन लगत बोल्याके कहैल्कै, “तुहेंसब सभेको हमर बात सुन आर बुझ। 15एरंको कोनो चीज नैछै जे बाहारसे कोनो आदमीके भितर ढुकैछै, जे ओकरा रिवाजके मुताबिक अशुद्ध बनाबे सक्तै। मगर उटा आदमीसे बाहार निक्लेवाला चीज, उहे ओकरा अशुद्ध बनाबैछै। 16जे कोय यी बातके सुने सकैछै जे हमे कहैछियै, ऊ यी बातके बुझैके कोशिश करक।” 17भीडके छोडिके घरमे गेलके बाद ओकर चेलासब येशूसे यी खिसाके मतलब पुछल्कै। 18येशू ओकरासिके कहैल्कै, “कि तुहेंसब भी एरं नासमझ छैं? कि तुहेंसब यी नैबुझैछैं? निश्चय ही तुहेंसब यी जानैछैं कि जे खाना आदमीसब खैछै, उटा खाना आदमीके अशुद्ध नैबनाबैछै। 19कहिनेकी उटा खाना ओकर हृदयमे नै, मगर पेटमे जैछै, आर बाहार निक्ली जैछै। यी कहिके, येशू कहैल्कै कि सभे किसिमके खाना परमेश्वरके स्वीकार्य छै। 20आदमीसब जे खराब बात सोचैछै, कहैछै आर करैछै उहे चीज आदमीके परमेश्वरके समनामे अशुद्ध बनाबैछै। 21कहिनेकी ह्रदय सभे किसिमके खराबीके जड छै यानिकी खराब विचार, व्यबिचार, चोरी, हत्या, परस्त्रीगमन 22लोभ, दुष्टता, छल, लुचपनी, ईर्ष्या, ईश्वर निन्दा, घमण्ड, मूर्खपन निक्लैछै। 23यी खराब बातसब ह्रदयसे निक्लैछै, आर आदमीके अशुद्ध बनाबैछै।”

गैर-यहूदी जनानीके विश्वास

(मत्ती १५:२१-२८)

24एकरबाद, येशू आर ओकर चेलासब ओत्तेसे चल गेलै आर फेर टुरोस सहर आर सिदोन सहरके अगल-बगलके इलाकामे गेलै। ऊ एकटा घरमे गेलै आर नैचहते रहै, कि कोय जानै कि येशू ओत्ते ऐलै छे। मगर आदमीसिके तुरन्ते पता चलि गेलै कि ऊ ओत्ते छै। 25तखनिहैं एकटा जनानी जकर छोटकी बेटीके भूत धर्ल रहै, येशूके चर्चा सुनिके ऐलै आर ओकरा आदर दियैके लिए आबिके ओकर पैर पक्डल्कै। 26ऊ यूनानी जनानी रहै, ऊ सिरिया प्रदेशके फोनिके नामके जिलामे जनमल रहै। ऊ जनानी आपन छोटकी बेटीसे भूत निकाली दियैले येशूके बिन्ती कैल्कै। 27येशू ओकरा कहैल्कै, “पहेला बेटा-बेटीके खैले दहैं, कहिनेकी बेटा-बेटीके रोटी छिनिके कुत्तासिके फेकि देना उचित नैहैछै।” 28मगर ऊ जनानी बुझी गेलै कि येशू गैर-यहूदी आदमीसिके कुत्ता आर यहूदी आदमीसिके बेटा-बेटी कहिके सम्बोधन कर्ते रहै, सेल्याके ऊ जनानी ओकरा जबाब देल्कै, “हँ प्रभु, मगर कुत्तोसब ते बेटा-बेटीसिके टेबुलके निच्चामे खस्ल टुकरासब खैछै।” 29तब येशू जबाब देल्कै, “कहिनेकी तुहें विश्वाससे जबाब देल्हैं छे, हमे भूतके तोर बेटीसे बाहार निकाली देलियौ छे, सेल्याके आब तुहें घर जो।” 30जब ऊ घर गेलै आपन बेटीके चौकीमे सुत्ल देखल्कै आर ओकरासे भूत निक्लीके चल गेलै रहे।

येशू बहिर आर बौक आदमीके ठीक करैछै

31एकरबाद येशू आर ओकर चेलासब टुरोस सहरके अगल-बगलके इलाकाके छोडिके सिदोन सहर द्याके गेलै। फेर ऊ डेकापोलिसके इलाका द्याके गेलै आर फेर गालील समुन्दरके नज्दिकके गाँवसिमे गेलै। 32ओत्ते आदमीसब ओकरलगत एकटा एरंको आदमीके आनल्कै जे बहिर आर बौक रहै, आर ओकरा ठीक करि दियैके लिए येशूसे बिन्ती कैल्कै। 33तकरबाद, ऊ ओकरा भीडसे अलग ल्यागेलै, आर आपन आङगुर ओकर कानमे ढुकैल्कै तकरबाद ऊ आपन एकटा आङगुरमे थुकल्कै आर उटा आदमीके जिभाके छुल्कै। 34आर स्वर्गमहर देखिके लम्बा साँस लेल्कै। तब उटा आदमीके कहैल्कै, “इफ्फाता” जकर यूनानी भाषामे मतलब हैछै, “खुलिजो!” 35एकदमसे, उटा आदमी साफसे सुने लाग्लै आर बिना कोनो दिक्कतके जिभा चलाबे लाग्लै आर बोले लाग्लै। 36येशू आदमीसिके कहैल्कै कि कक्रहौ नैकहिहैं कि हमे कि कैलियै छे। मगर जतनें बेसी ऊ ओकरासिके आज्ञा देल्कै कि दोसर आदमीसिके नैबताबैले, ओतनें ही बेसी जोशके साथ दोसर आदमीसिके बीचमे यी खबर फैलाबे लाग्लै। 37आदमीसब आश्चर्यसे खुबे चकित भेलै आर कहे लाग्लै, “ऊ सभे काम बढियाँ कैल्कै छे! एत्तेतक कि ऊ बहिरके सुनेवाला आर बौकके बोलेवाला भी बनाबैछै!”

Currently Selected:

मर्कूस 7: KYVNT

Highlight

Copy